Apresyaen so Gagala na Disiplina
Apresyaen so Gagala na Disiplina
ANTO so nanonotan yo sano narengel yo so salitan “disiplina”? Inukeran na sakey a diksionaryo so disiplina bilang “say agamil pian patuloken so totoo ed saray totontonen odino estandarte ed walna, tan dusaen ira sano agda tuloken itan.” Anggaman aliwan saya labat so naabobonan ya uker na satan, dakel a totoo natan so maniisip na negatibon kabaliksan ed amin a nengneng na disiplina.
Balet, say Biblia so mangipaparungtal ed disiplina diad miduman paraan. “Ana’ko, agmo mudmoraen so pananusa [“disiplina,” NW] nen Jehova,” so insulat nen makabat ya Arin Solomon. (Uliran 3:11) Agtutukoyen na sarayan salita so disiplina ed inkalapagan, noagta say “[disiplina] nen Jehova,” salanti, say disiplinan nibase ed atagey iran prinsipyo na Dios. Satan lambengat a disiplina so mamaaligwas tan mamaabig ed espiritual—a makapalikliket ni ingen. Diad pisunian, say disiplinan nibase ed kanonotan na too a misumlangan ed atagey iran prinsipyo nen Jehova so mabetbet a maabuso tan makapasakit. Satan so rason no akin a dakel so walaan na negatibon awawey nipaakar ed disiplina.
Akin a napaseseg itayon mangawat ed disiplina nen Jehova? Diad Kasulatan, say madibinon disiplina so deneskribe bilang panangipatnag na aro na Dios ed totoon pinalsa to. Kanian, oniay intuloy ya inkuan nen Solomon: “Say aroen nen Jehova baaten to, singa sakey ya ama a manliket ed anak.”—Uliran 3:12.
Disiplina Odino Dusa—Dinan?
Say salitan disiplina a nausar diad Biblia so walaan na dakerakel ya aspekto—panangiwanwan, panamilin, panangipasal, panamaat, panametek, tan pananusa ni ingen. Balet, diad kada kipapasen, say disiplina nen Jehova so papakiwasen na aro, tan say getma na satan et gunggonaan so didisiplinaen. Say manametek a disiplina nen Jehova et aliwan parad gagalan manusa labat.
Diad biek a dapag, saray pananusa na Dios so aglawas ginetman mangipetek odino mangibangat ed dudusaen. Alimbawa, diad mismon agew na impankasalanan di Adan tan Eva, ginmapon sinagmak da iray nansumpalan na itutunganga ra. Pinapaway ira nen Jehova ed paraison hardin na Eden, tan asagmak da iray epekto na ag-inkayadyari, sakit, tan itatakken. Kayari na nilasus a taon na makapaot-ot ya impanbilay da, sikara so atawtaw ed ando lan ando. Sayan amin so peteg a madibinon pananusa, balet aliwa itan a manametek a disiplina. Lapud ginagala ra itan tan ag-ira nagbabawi, si Adan tan si Eva so aglan balot nipetek.
Kabiangan ed arum niran salaysay nipaakar ed saray pananusa nen Jehova so Delap ed panaon nen Noe, inkaderal na Sodoma tan Gomorra, tan inkatigway na armada na Ehipto diad Ambalangan Dayat. Say gagala na sarayan inkiwas nen Jehova et aliwan pian mangitarya na panangiwanwan, panamilin, odino panangipasal ed saray dinusa. Nipaakar ed saratan a pananusa na Dios, oniay insulat nen apostol Pablo: “Agto intepel so daan a mundo bangbalet inlaban to si Noe, a pati arum nin pitora, sakey a managpulong na katunongan, dia ed impangitarok to na delap ed mundo na saray momoan [“agmaridios,” NW]; tan no dinusa to ra, dia ed impaneral to, ed saray syudad na Sodoma tan Gomorra, impagmaliw to ra a dapol, tan ginawa to ra a panuliranan na saray totoo a manbilay na marumsis.”—2 Pedro 2:5, 6.
Diad anton pantalos a sarayan pananusa so ‘agawan panuliranan na saray totoo a manbilay na marumsis’? Diad sulat nen Pablo ed saray 2 Tesalonica 1:8, 9) Malinew, satan a pananusa so ginetma aliwan pian bangatan odino gogolan iramay dudusaen. Balet, sano papasesegen nen Jehova iray mandadayew ed sikato a mangawat ed disiplina to, agto tutukoyen so pananusa ed saray agmagbabawin managkasalanan.
taga-Tesalonica, impabitar to so agew tayo bilang say panaon a say Dios, panamegley na Anak ton si Jesu-Kristo, so mangitarok na “panamales ed saray agmikabat ed Dios, tan dia ed saray ag-ontulok ed ebanghelyo.” Inyarum nen Pablo: “Sikara so mantepel na dusa a salanti andi-anggaan a kabalang da.” (Makatantanda ta say Biblia so agmanunan manideskribe ed si Jehova bilang managdusa. Imbes, sikatoy mabetbet a dedeskribien bilang maaron manangibangat tan maanos a manangipasal. (Job 36:22; Salmo 71:17; Isaias 54:13) On, say maridios a disiplina ya ipapaakseb diad gagalan mangipetek so lawas atekepan na panangaro tan inkaanos. No natebek na saray Kristiano so gagala na disiplina, mas mainomay da so mangawat tan mangipaakseb na disiplina a tekep na dugan awawey.
Say Disiplina na Maaron Atateng
Diad loob na pamilya tan Kristianon kongregasyon, amin so nakaukolan a makatalos ed gagala na disiplina. Nagkalalo la ed saramay walaan na autoridad, a singa saray atateng. Oniay ibabaga na Uliran 13:24: “Say mangipaliis na lewet kagula to so anak to, balet say mangaro ed sikato, sikato so dusaen [“disiplinaen,” NW] to a masaksakbay.”
Panon so pangipaakseb na atateng ed disiplina? Oniay ipapalinew na Biblia: “Sikayoran kaamaan, agyo pasasanoken iray ananak yo, noag ingen mantultuloy iran pabalegen ed disiplina tan manametek-kanonotan nen Jehova.” (Efeso 6:4, NW) Sayan simbawa so inulit ed oniaran salita: “Atateng, agyo paningongoten so saray anak yo, pian ag-ira komon naekalan na linawa.”—Colosas 3:21.
Saray Kristianon atateng a makatebek ed gagala na disiplina so ag-onkiwas a maramsak. Say prinsipyon nidatak diad 2 Timoteo 2:24 so niyaplika met ed paraan na panagdisiplina na atateng. Oniay insulat nen Pablo: “Say aripen na Katawan agto kanepegan so makolkol, noag ingen maamo ed ganagana, maong a mangibangat.” Seguradon say agnapokpokan a pasnok, panag-eyag, tan makapasakit odino makapabaing iran balikas et aliwan maaro a panagdisiplina tan agmatukoy ed bilay na Kristiano.—Efeso 4:31; Colosas 3:8.
Say panametek na ateng so aglabat la mangilalanor ed maganat tan determinadon panangipaakseb na dusa. Maslak ya ugugaw so mankaukolan na paulit-ulit a panamilin sakbay dan nipetek so kanonotan da. Kanian, saray atateng
so nepeg a mangipanaon, man-anos, tan mannonot a maong ed paraan na panangipaakseb da ed disiplina. Nepeg dan nonoten lawas a saray ananak so nepeg a pabalegen ed “disiplina tan manametek-kanonotan nen Jehova.” Saya so sakey a kurso na panangipasal a manbayag ed loob na saray taon.Saray Kristianon Pastol so Mauyamon Manidisiplina
Onaplika met iratan a prinsipyo ed saray Kristianon mamatatken. Bilang maaron pastol, sikaray manggugunaet a mamabiskeg ed pulok diad pangitatarya na panamilin, panangidirehi, tan panamaat sano nakakaukolan. Legan dan gagawaen itan, sankanonot da so peteg a gagala na disiplina. (Efeso 4:11, 12) No iyapasakey da labat ed pangipaakseb na dusa, anggapo lay arum a nagawaan da noagta say manusa ed sakey a nankasalanan anggad man labat la. Dakel ni so lalanoren na madibinon disiplina. Lapud papakiwasen na aro, saray mamatatken so mapeleng tan mantutultuloy a manisimbawa. Lapud masimoon a panagpaga ra, mabetbet iran mangigagana na panaon pian mamaseseg tan mangipasal.
Unong ed simbawa a naromog ed 2 Timoteo 2:25, 26, anggan sano midedeneng ed saraman so agmainomay a mangawat ed disiplina, nepeg a saray mamatatken so mangibangat a “matayarno.” Insan indalatdat na teksto so gagala na disiplina: “Agla piga no say Dios iter to ed sikara so panagbabawi pian nakabatan da so tua. Tan pian makaukpos ira ed kalot na Diablo.”
No maminsan et nakaukolan a dispelosipen iray agmagbabawin managgaway-mauges manlapud kongregasyon. (1 Timoteo 1:18-20) Anggan satan ya ambelat a kiwas so nepeg ya ipasen a disiplina, aliwan basta labat dusa. Panapanaon et panggugunaetan na saray mamatatken a dalawen iray adispelosip ya indibidual ya agla mibibiang ed gawan-mauges. Legan iran ondadalaw, saray mamatatken so onkikiwas a mitunosan ed peteg a gagala na disiplina diad pangidadatak da ed saray nakaukolan a kundang pian makapawil ed Kristianon kongregasyon so sakey a too.
Si Jehova so Ayadyarin Ukom
Saray atateng, Kristianon pastol, tan arum nin walaan na Makasulatan ya autoridad a mangipaakseb na disiplina so kaukolan a seryoson manakbat ed satan a responsabilidad. Nepeg ya agda sasalien a husgaay arum ya agla iran balot nipetek. Kanian, nepeg a say pananisiplina ra so agbalot gawaen ed agmapangasi tan maruksan paraan na pananusa.
Tua a si Jehova so tutukoyen na Biblia bilang manangipaakseb na ambelat tan unor a dusa. Diad tua et ibabaga na Kasulatan a “sakey a Hebreos 10:31) Balet nepeg ya agpanggunaetan na sakey a too ya ikomparay inkasikato ed si Jehova diad sayan pamaakaran odino antokaman ni. Tan nepeg ya agkomon liknaen na sakey a makapataktakot a bengatla so napelag ed saray lima na ateng odino ed sakey a matatken ed kongregasyon.
makapataktakot a pamaakaran so napelag ed saray lima na Dios a mabilay.” (Nayarian nen Jehova a pawalaen so naspot ya inkasimbang sano manidisiplina. Agnagawaan itan na totoo. Sarag na Dios a basaen so puso tan nadetermina to sano say sakey so aglan balot nipetek tan sirin et makanepegan parad sigpot tan unor a pananusa. Diad biek a dapag, agnayarian na totoo so mangipaakseb na ontan a panangukom. Kanian, sano wala so nakaukolan a disiplinaen, saramay walaan na autoridad so lawas kaukolan a manggawa ed satan diad gagalan mangipetek.
Awaten so Disiplina nen Jehova
Amin tayo so mankaukolan na disiplina nen Jehova. (Uliran 8:33) Diad tua et nepeg a pirawaten tayo so disiplina a nibase ed Salita na Dios. Legan tayon aaralen so Salita na Dios, naaawat tayo so disiplina a direktan manlalapu ed si Jehova panamegley na Kasulatan. (2 Timoteo 3:16, 17) Balet, no maminsan et makaawat itayo na disiplina manlapud saray kaparan Kristiano. Say panebek ed peteg a gagala na ontan a disiplina so ontulong ed sikatayon mangawat ed satan a mabulbulos.
Oniay inaksobi nen apostol Pablo: “Tua ya anggapo so pananusa [“disiplina,” NW] natan a singa sengeg na liket, noag ingen kaermenan.” Insan iyarum to: “Balet kayari to mangiter na bunga a mareen na katunongan ed saray nailuam la lapu ed sikato.” (Hebreos 12:11) Say disiplina nen Jehova et pakapatnagan na aralem a panangaro to ed sikatayo. Balanglan sikatayoy mangawat odino mangipaakseb na disiplina, nodnonoten tayo komon lawas so gagala na madibinon disiplina tan talinengen so makabat a simbawa na Biblia: “Bembenan mo a malet so panangibangat; sikato so agmo yabuloy ya onla; sikato so unoren mo; ta sikato so bilay mo.”—Uliran 4:13.
[Saray litrato ed pahina 21]
Saray agmagbabawin managkasalanan so mangawat na hudisyal a pananusa na Dios, aliwan say manametek a disiplina to
[Saray litrato ed pahina 22]
Lapud papakiwasen na aro, saray mamatatken so mangipapanaon pian mansukimat tan ontulong ed saray nankasalanan
[Saray litrato ed pahina 23]
Saray atateng so maanos tan maaron mangipapaakseb na “disiplina tan manametek-kanonotan nen Jehova”