Isasalet na Dios​—Anto so Nailaloan Tayo?

NEN komawalon siglo K.K.P., naamtaan na 39-años a si Arin Ezekias na Juda a walay sakit ton makapatey. Lapud agonigon ed akabatan to, kinerew nen Ezekias ed Dios panamegley na pikakasi a sikatoy paabigen to. Inmebat so Dios panamegley na propeta to: “Nadngel ko so pikakasim, anengneng ko so saray luam: nia, yarum ko ed saray agew mo so labinlima a taon.”​—Isaias 38:1-5.

Akin a sinmalet so Dios ed satan ya inkagawa? Pigaran siglo ed asasakbay et oniay insipan na Dios ed matunong ya Arin David: “Say  abung mo tan say nanarian mo mansiansia lawas ed arap mo: say yurongan mo niletneg lawas.” Imparungtal met na Dios a say Mesias so nianak ed linya nen David. (2 Samuel 7:16; Salmo 89:20, 26-29; Isaias 11:1) Sanen nansakit si Ezekias, sikatoy andian ni na ilalak. Kanian, napepeligro a napultot so maarin linya nen David. Say insalet na Dios diad kipapasen nen Ezekias so kinmana ed espesipikon gagala a nipreserba so linya na kapolian na Mesias.

Pian nasumpal iray sipan to, si Jehova so apakiwas ya onsalet nisesengeg ed totoo to diad dakerakel ya inkagawa diad panaon a sakbay na saray Kristiano. Oniay inyabawag nen Moises diad impangiliktar ed Israel manlapud inkaaripen ed Ehipto: “Lapu ed si Jehova inaro to kayo tan lapud aagamilen to so sipanan a sinambaan to ed saray ama yo, say makapanyari a lima so impangipaway nen Jehova ed sikayo.”​—Deuteronomio 7:8.

Nen inmunan siglo, say insalet na Dios so kinmana met a mamalaknab ed saray gagala to. Alimbawa, diad dalan a mamaarap ed Damasco, sakey a Judion manngaran na Saulo so akaawat na mamilagron pasingawey pian agto la pasegsegangen iray babangatan nen Kristo. Say inkakomberti na sayan too, a nagmaliw ya apostol Pablo, so baleg ya akatulong ed inkikayat na maong a balita diad limog na saray nasyon.​—Gawa 9:1-16; Roma 11:13.

Kasin Kaslakan la so Isasalet?

Kasin kapilitan so madibinon isasalet odino aliwan naynay? Malinew ya ipapabitar na Kasulatan ya aliwan kaslakan itan. Anggaman inliktar na Dios so taloran Hebreo manlapud ipapatey diad manliob a palbaan tan si propetan Daniel manlapud ungib na leon, agto insalba iray arum a propeta manlapud ipapatey.  (2 Awaran 24:20, 21; Daniel 3:21-27; 6:16-22; Hebreos 11:37) Si Pedro so mamilagron inliktar na Dios manlapud prisoan ya angipangawan ed sikato nen Herodes Agrippa I. Ingen, saya met lanlamang ya ari so nampapatey ed si Santiago, tan agsinmalet so Dios pian amperen itan a krimen. (Gawa 12:1-11) Anggaman inikdan na Dios iray apostol na pakapanyarin mamaabig na saray mansasakit tan mamaoli ni ingen na inaatey, agto inabuloyan a naekal so “sabit ed laman” a mamapairap ed si apostol Pablo, a nayarin say pisikal a sakit.​—2 Corinto 12:7-9; Gawa 9:32-41; 1 Corinto 12:28.

Agsinmalet so Dios pian amperen so nantutumbokan a panamasegsegang ya impaarap na Romanon Emperador a Nero ed saray babangatan nen Kristo. Saray Kristiano so pinairap, pinoolan a mabilay, tan imbantak ed kawalaan na masesebeg ya ayep. Anggaman ontan, sayan isusumpa so inilaloan la na saray inmunan Kristiano, tan seguradon ag-itan amakapuy na pananisia ra ed kiwawala na Dios. Sakey ni, pinasakbayan la nen Jesus iray babangatan to a sikaray managmak na saray panamasegsegang kanian nepeg a sikaray akaparaan a manirap tan ompatey ni ingen nisesengeg ed pananisia ra.​—Mateo 10:17-22.

No panon a ginawa to la nensaman, natan et seguradon sarag na Dios ya iliktar iray lingkor to ed saray mapeligron situasyon, tan agnepeg a husgaan iraman so moriaen dan nagugunggonaan ira ed pananalimbeng to. Balet, mairap a naseguro no kasin say Dios so sinmalet odino andi ed saratan a kipapasen. Pigaran matoor a lingkor nen Jehova so asugatan lapud insabog diad Toulouse, tan nilibon matoor a Kristiano so inatey diad Nazi tan diad saray kampo na Komunista odino diad arum niran makapasinagem a kipapasen, ingen agsinmalet so Dios pian amperen iratan. Akin a say Dios so aglawas onsasalet ed biang na amin a totoon aabobonan to?​—Daniel 3:17, 18.

“Panaon tan Ag-ilaloan a Nagawa”

Sano onsabi so desyang, anggan siopa a too so naapektaan, tan agkapilitan a mandependi so pansumpalan na pamaakaran ed katooran ed Dios. Diad insabog ed Toulouse, ya akaliktaran nen Alain tan Liliane, 30 a totoo so inatey tan nilasus so asugatan, anggaman anggapoy ginawa ran mauges. Mas malaknab ni, dakerakel a totoo so nabibiktima na krimen, palpalaran a panagmaneho, odino bakabakal, tan agnatetel so Dios ed mauges a pansusumpalan da. Ipapanonot ed sikatayo na Biblia a say “panaon tan ag-ilaloan a nagawa et onsabi” ed balang sakey.​—Eclesiastes 9:11, NW.

Niarum ni, saray totoo so mansakit, ontakken, tan ompatey. Anggan saramay mangipapasen a mamilagron inliktar na Dios so bilay da odino mangibabagan say Dios so ag-inilaloan ya amaabig ed sakit da so agmakapaliis ed ipapatey diad kaunoran. Say pakaandi na sakit tan ipapatey tan ‘pakapunas na amin a lua’ ed kamataan na too et dia ni ed arapen.​—Apocalipsis 21:1-4.

Ta pian nagawa itan, nakaukolan so bengatlan mas malaknab tan sigpot nen say sagpaminsan ya isasalet. Tutukoyen na Biblia so sakey ya ebento a tatawagen a “say baleg ya agew nen Jehova.” (Sofonias 1:14) Legan na sayan malaknab ya isasalet, panganggaen na Dios so amin a karelmengan. Naikdan na pankanawnawa so katooan a manbilay a maando diad ayadyari iran kipapasen, a saray “inmuna a bengatla ag-ira la nanonotan, ag-ira la onla ed nonot.” (Isaias 65:17) Anggan saray inaatey so onoli ed bilay, a diad ontan et naandi la so sankabalgan ed amin a trahedya ed too. (Juan 5:28, 29) Say Dios ya ag-alimitaan so aro tan kamaongan to so sigpot lan manolbar ed saray problema na katooan.

No Panon so Isasalet na Dios Natan

Balet, agkabaliksan na saya a diad kaplesan et basta labat maniimaton so Dios legan a maniirap so pinalsa. Natan et iiter na Dios so pankanawnawa ed amin a totoo, antokaman so nanlapuan  dan etniko odino sosyedad, pian sikaray makapikabat tan nawalaan na personal a pisisiglaotan ed sikato. (1 Timoteo 2:3, 4) Oniay impaneskribe nen Jesus ed sayan proseso: “Anggapo so too a makadago ed siak, likud no say Ama ya angibaki ed siak sikato so yasingger to.” (Juan 6:44) Iyaasingger na Dios ed sikato iray matuan-impanpuso a totoo panamegley na mensahe na Panarian ya iyaabawag na saray lingkor to ed interon mundo.

Niarum ni, say Dios so direktan mangiimpluensya ed bilay na saramay mabulos a paigiya ed sikato. Diad panamegley na masanton espiritu to, say Dios so ‘mangilulukas ed kapusoan da’ pian natebek day linawa to tan nasumpal da iray kakaukolanen to. (Gawa 16:14) On, diad pangitatarya to na pankanawnawan sikatoy nakabat, ontan met ed say Salita to, tan saray gagala to, papaneknekan na Dios so maaron panangiyansakit to ed balang sakey ed sikatayo.​—Juan 17:3.

Diad kaunoran, say Dios so ontutulong ed saray lingkor to natan, aliwan diad mamilagron pangililiktar ed sikara, noagta diad pangiiter ed sikara na masanton espiritu to tan “say sankatageyan ya inkabaleg na pakayari” pian nayarian dan arapen so antokaman a situasyon. (2 Corinto 4:7) Oniay insulat nen apostol Pablo: “Nayarian ko a gawaen so ganagana ed saman [Jehova a Dios] so mamabiskeg ed siak.”​—Filipos 4:13.

Walaan itayo sirin na amin a rason pian pisalamatan so Dios ed kada agew lapud bilay tan pangiiter to ed sikatayo na ilalon manbilay a maando diad sakey a mundo ya anggapo lay kairapan. “Anto kasi manepeg ya ibales ko ed Jehova a nipaakar ed amin na saray panamainawa to ed siak?” so intepet na salmista. “Alaen ko so kopa na kilalaban, tan ontawag ak ed ngaran nen Jehova.” (Salmo 116:12, 13) Say regular a pambasa ed sayan magasin so ontulong ed sikan natalosan no anto so ginawa la na Dios, gagawaen to, tan gawaen to ni a makapangitarok ed sika natan na liket tan seguradon ilalo parad arapen.​—1 Timoteo 4:8.

[Blurb ed pahina 5]

“Saray inmuna a bengatla ag-ira la nanonotan, ag-ira la onla ed nonot.”​—Isaias 65:17

[Saray litrato ed pahina 5]

Diad panaon na Biblia et ag-inamper nen Jehova so impantupak na bato ed si Zacarias . . .

nisay maruksan impamatey nen Herodes ed saray andian na kasalanan

[Litrato ed pahina 7]

Asingger la so panaon a naandi so paniirap; pati saray inaatey so manbilay lamet