Sakey ya Istoryan Mangisasagyat na Inkamatoor tan Inkakpel​—Saray Tasi nen Jehova ed Ukraine

NO PANON a saray Kristiano et akasagmak na panamasegsegang nen inmunan siglo, ontan met natan ed saray totoo na Dios. (Mateo 10:22; Juan 15:20) Pigpigara so pasen a say panamasegsegang so mas nambayag odino mas pirmi no ikompara ed Ukraine, a ditan et 52 taon so impanebel ed kimey a panangipulong ed Panarian.

Insalaysay na 2002 Yearbook of Jehovah’s Witnesses so istorya nipaakar ed totoo na Dios ed satan a dalin. Sakey itan ya istorya nipaakar ed inkamatoor, inkakpel, tan inkabiskeg diad silong na pirmin kairapan. Niraya so pigaran komento na apresasyon a naawat na sangan opisina na saray Tasi nen Jehova ed Ukraine:

“Asumpal ko lan binasa so 2002 Yearbook. Agko apokpokan so inmakis sanen babasaen koy nipaakar ed kimey yo ed Ukraine. Labay kon ipaamta ed sikayo ya apabiskeg ak a tuloy ed maseseg ya alimbawa tan mabiskeg a pananisia yo. Sakey a kagalangan so pagmaliw a kapamilya yo ed espiritual. Misalsalamat ak a maong ed sikayo!”​—Andrée, Pransya.

“Anggapoy salitan makapangideskribe ed pisasalamat ko ed sikayo tan ed si Jehova lapud 2002 Yearbook. Akaakis ak sanen binasak so dakel iran eksperiensya na agagin lalaki a nipriso tan nipangaw ed saray kampo legan na saray taon a kaksilan da. Pandinayewan koy inkakpel da. Anggaman Tasi ak la ed loob na 27 a taon et akaaral ak ni ed sarayan agagi. Pinabiskeg da so pananisiak ed mangatatawen ya Ama tayo, si Jehova.”​—Vera, datin Yugoslavia.

“Sililiket kon insulat iya lapud maabig ya alimbawa na panagsungdo tan katooran yo legan na amin na saratan a taon na isusumpa. Say sigpot ya impanmatalek yo ed si Jehova tan ed determinasyon yon manmatoor so angitarok ed sikayo na kagalangan. Niarum ni, say inkamapaabeba yo ed arap na saray subsubok so amabiskeg ed papanisiaan ko ya ag-ikaindan nen Jehova iray totoo to. Lapud maabig ya alimbawa na inkakpel, inka-agnagiing, tan inkaanos yo, mas mainomay mi lan sungdoan iray ankelag a problema mi.”​—Tuteirihia, French Polynesia.

“Kayarik a binasa so Yearbook, kinaukolan koy mansulat ed sikayo. Atenyeg ak a tuloy ed amin na saray makapaseseg ya eksperiensya. Ikinon koy pagmaliw a membro na ontan a matoor, nankakasakey ya organisasyon, ya idadaulo na maaro, tan maasikason Ama, a mamapabiskeg ed sikatayo ed dugan panaon. Panermenan ko ta dakerakel a makpel tan maseseg iran lingkor nen Jehova so pirmin nanirap tan abalang da ni ingen so bilay da. Balet maliket ak met ta diad inkakpel tan inkaseseg da, dakerakel a totoo so akaaral na katuaan tan akapikabat ed maaron Ama tayo.”​—Colette, Netherlands.

“Sikamin sanasawa so nansulat ed sikayo pian ipaamta ya atenyeg so puso mi sanen abasa mi ed Yearbook iray salaysay nipaakar ed Ukraine. Sikayoran matoor ya agagi so angipanengneng na maabig ya alimbawa na panagsungdo ed silong na andukey tan pirmin irap. Mitukoyan ed saray salita  ed Uliran 27:11, agaylan panliketan nen Jehova so pakaamtan dakerakel a matoor ya agagi ed Ukraine so nantultuloy ed integridad da anggaman ed amin a marelmeng iran agamil na Diablo.”​—Alan, Australia.

“Akalua ak sanen abasak so nipaakar ed saray agagi ed Ukraine. Dakerakel so sinungdoan da​—dakel a taon na inkipriso, panagpairap, panaglames, tan inkisian ed saray kapamilyaan. Labay kon ibalikas ed amin na saramay agagin manseserbi ni ed kongregasyon yo ya aaroen tan rerespetoen ko ran tuloy. Talagan apaliket ak ed inkakpel tan impantultuloy dan agnagiing. Amtak so nanlapuan na biskeg da, say espiritu nen Jehova. Si Jehova so asingger ed sikatayo, tan labay to itayon tulongan.”​—Sergei, Russia.

“Manakis ak sanen abasak so 2002 Yearbook. Pantotongtongan kayo na dakel ya agagi ed kongregasyon mi. Papablien mi kayon maong. Panliketan kon tuloy ta kabiangan ak ed ontan a baleg ya espiritual a pamilya.”​—Yeunhee, South Korea.

“Atenyeg ak a maong ed salaysay a nipaakar ed inkamatoor, impansungdo, tan agnagiing a panangaro yo ed si Jehova tan ed Panarian to. No maminsan et nalingwanan mi lan apresyaen so kawayangan a panggagayagaan mi tan say inkadaakan na espiritual a tagano ya itatarya nen Jehova ed sikami. Ingen ta aliwan onia so agawa ed sikayo. Say alimbawa na katooran yo so akatulong ed sikami pian moriaen a no walay maapit a pisisiglaotan tayo ed Dios, ikdan to itayo na biskeg pian arapen so amin a nengneng na subok.”​—Paulo, Brazil.

“Apribilehyoan ak ed impakabasa ed saray eksperiensya yo ed 2002 Yearbook. Atenyeg ak a maong ed saratan, nagkalautla ed makatenyeg ya eksperiensya nen Sister Lydia Kurdas. Inmapit so liknaan ko ed sayan agin bii.”​—Nidia, Costa Rica.

“Asumpal ko la natan a binasa so 2002 Yearbook. Sanen babasaen ko itan, binmiskeg so pananisiak ed si Jehova. Say agko nalingwanan et samay salaysay nipaakar ed impamawala na saray panduaruwa ed saramay manangidaulo. Saya so angibangat ed siak ya agbalot panduaruwaan iray agagin mangidadaulo. Baleg a salamat ed sikayo! Sayan espiritual a tagano so makapaseseg tan mangipaparaan ed sikami sano onsabi panaon a say pananisia mi so nayarin nasubok.”​—Leticia, Estados Unidos.

“Misalsalamat kami ed marakerakep a Yearbook. Diad primeron pankanawnawa et abasa na dakel iran manangipalapag so nipaakar ed aktibidad na saray agagi tayo ed Ukraine. Apabiskeg iray agagi dia. Amayamay so amadaak la ed serbisyo ra, nagkalalo la ed limog na saray kalangweran. Arum so ginmapo lan nan-regular odino nan-auxiliary payunir. Amin so apaseseg ed saray istorya nipaakar ed saray agagin nanserbi legay impanebel.”​—Sakey a congregation service committee, Ukraine.

Say inkamatoor na saray agagi tayo ed Ukraine so peteg a pakapasesegan na saray totoo nen Jehova ed interon mundo. Diad tua, say pambasan regular ed saray makapaligsay-puson salaysay a tinaon a nipapalapag ed Yearbook et sakey a maabig a paraan pian napabiskeg so pananisia tan panagsungdo tayo ed sarayan makatantandan panaon.​—Hebreos 12:1.