Say Pansungdo ed Saray Subok so Kirayewan nen Jehova

“No dia ed panggawa yo na kaabigan [et] napasegsegang kayo tan itepel yo, sayan peteg so makapaliket ed Dios.”​—1 PEDRO 2:20.

1. Lapud sinononot iray tuan Kristiano diad panumpal ed dedikasyon da, anton tepet so nepeg a konsideraen?

 SARAY Kristiano so dedikado ed si Jehova tan labay dan gawaen so linawa to. Pian nasumpal da so dedikasyon da, gagawaen da so anggaay nayarian da pian tumboken iray bakat na Ehemplo ra, si Jesu-Kristo, tan makapantasi ira ed katuaan. (Mateo 16:24; Juan 18:37; 1 Pedro 2:21) Balet, si Jesus tan arum niran matoor so angibuis ed bilay da tan inatey ira bilang martir lapud pananisia ra. Kabaliksan kasi na saya ya amin a Kristiano et nailaloan ya ompatey lapud pananisia ra?

2. Panon so panmoria na saray Kristiano ed saray subok tan paniirap?

² Bilang Kristianos, sikatayo so nabibilin a magmaliw a matoor anggad ipapatey, balet ta agmet nakaukolan ya ompatey itayo lapud pananisia tayo. (2 Timoteo 4:7; Apocalipsis 2:10) Kabaliksan na saya ya anggaman mabulos itayon manirap​—tan ompatey, no nakaukolan​—lapud pananisia tayo, agtayo kakaliktanen so panagmak ed satan. Agtayo panliketan so irap tan ot-ot odino pakapabpabanday. Balet, lapud nailaloan tayo ya onsabi iray subok tan panamasegsegang, nakaukolan a maalwar tayon konsideraen no panon so ikiwas tayo sano onsabi iratan ed sikatayo.

Matoor Anggaman ed Subok

3. Antoran alimbawa ed Biblia nipaakar ed panagsungdo ed panamasegsegang so nisalaysay yo? (Nengnengen so kahon a “No Panon Dan Sinungdoan so Panamasegsegang,” ed ontumbok a pahina.)

³ Diad Biblia, naromog tayo so dakerakel iran salaysay a mangipapanengneng no panon so inkiwas na saray lingkor na Dios nensaman sanen nidunget ira ed saray kipapasen a makapasesgay-bilay. Say nanduruman paraan na inkiwas da so mangitarya na giya ed saray Kristiano natan bektaman a nidunget ira ed mipara iran angat. Konsideraen iray salaysay ed kahon a “No Panon Dan Sinungdoan so Panamasegsegang,” tan imanoen yo no panon kayon makaaral ed sikara.

4. Anto so nibaga nipaakar ed paraan na inkiwas nen Jesus tan ed arum niran matoor a lingkor sanen asubok ira?

⁴ Anggaman nanduruma so inkiwas nen Jesus tan arum niran matoor a lingkor na Dios ed panamasegsegang, mandepende ed saray kipapasen, mapatnag ya agda impatara so bilay da. Sanen nidunget ira ed mapeligro iran kipapasen, sikara so nampakpel ingen ta maalwar. (Mateo 10:16, 23) Say gagala ra et say pamalaknab ed panagpulong a kimey tan pansiansiaen so katooran da ed si Jehova. Saray inkiwas da ed nanduruman kipapasen so angitarya na saray alimbawa parad saramay Kristiano a nasusubok tan napapasegsegang natan.

5. Anton panamasegsegang so agawa ed Malawi nen dekaday 1960, tan panon so inkiwas na saray Tasi diman?

⁵ Diad moderno iran panaon, saray totoo nen Jehova so mabetbet a nidudunget ed saray kipapasen na pirmin kairapan tan pankaukolan lapud saray bakal, pananebel, odino pirmin panamasegsegang. Alimbawa, nen dekaday 1960, saray Tasi nen Jehova ed Malawi so pirmin pinasegsegang. Saray Kingdom Hall, ayaman, abasto, tan saray anapan da​—amin lawarin kayarian da​—so dinederal. Sikara so nanirap ed panagpekpek tan arum niran makapasinagem ya eksperiensya. Panon so inkiwas  na saray agagi? Nilibo so kinaukolan ya ontaynan ed saray purok da. Dakel so nanamot ed saray katakelan, bangta say arum so temporaryon inmalis ed kabangibang a Mozambique. Anggaman inaatey so dakel a matoor, denesidi na arum so ontaynan ed mapeligron lugar, a mapatnag a makatunongan a kurang diad ontan iran kipapasen. Diad impanggawa ra ed satan, tinumbok na saray agagi so alimbawan impatnag nen Jesus tan si Pablo.

6. Anto so agpinaulyanan na saray Tasi ed Malawi anggaman ed maramsak iran panamasegsegang?

⁶ Anggaman saray agagin taga-Malawi so kinaukolan ya ontaynan odino manamot-amot, nanggunaetan dan tinumbok so teokratikon panangidirehi tan ginawa ray anggaay nayarian dan sinumpal iray Makristianon kimey da diad maamot a paraan. Anto so resulta? Walay pantok a 18,519 a manangipalapag na Panarian sakbay a tuloy na impanebel nen 1967. Anggaman wala ni so pananebel tan dakel so kinaukolan ya ombatik ed Mozambique, kasabi 1972 et walay balon pantok na 23,398 a manangipalapag a nanreport. Walaan ira na promedyon masulok a 16 ya oras ed ministeryo diad kada bulan. Maseguron saray kiwas da so angidayew ed si Jehova, tan say  panamendisyon to so walad saramay matoor ya agagi ed saman a mairap a tuloy a panaon. *

7, 8. Parad antoran rason a denesidi na arum so ag-ontaynan, anggaman say isusumpa et pansesengegan na saray problema?

⁷ Diad biek a dapag, diad saray bansa a say isusumpa so nansengegan na saray problema, arum ya agagi so nayarin mandesidin ag-onalis, anggaman sarag da itan a gawaen. Diad itaynan da et nayarin nasolbar so pigaran problema, balet satan so nayarin mamawala na arum niran angat. Singa bilang, kasin nayarian dan pansiansiaen so pakapitalosan da ed saray agagin Kristiano tan ag-ira niyarawi ed espiritual a paraan? Kasin nayarian da so mantultuloy ed espiritual a rotina ra legan na pipupuligesgesan dan iligen lamet so inkasikara, a nayarin diad mas maasenson bansa odino diad bansan walaan na dakel a pankanawnawa parad materyal a bentaha?​—1 Timoteo 6:9.

⁸ Deneside na arum so ag-onalis lapud nononoten da so espiritual a pankaabigan na saray agagi ra. Denesidi ra so mansiansia tan arapen so kipapasen ta pian nitultuloy da so manpulong ed teritorya ra tan magmaliw a lapuan na panamaseseg ed saray kapara ran managdayew. (Filipos 1:14) Lapud ontan so denesidi ra, arum ni ingen so akatulong diad saray impanbiktorya ed korte diad bansa ra. *

9. Antoran sengegan so nepeg ya ikonsidera na sakey a too sano desidien to so pansiansia odino iyalis nisesengeg ed panamasegsegang?

⁹ Say pansiansia odino iyalis et talagan personal a desisyon. Siempre, say ontan iran desisyon so nepeg a gawaen lambengat kayari na masimoon ya impananap ed panangidirehi nen Jehova. Balet, anggan anton kurang so pilien tayo, nepeg a nodnonoten tayo iray salita nen apostol Pablo: “Sakey tan sakey ed sikatayo mangiusa-usa naani nipaakar ed inkasikaton dili ed arap na Dios.” (Roma 14:12) Unong a naimano tayo la ed gapo, say kakaukolanen nen Jehova ed balang sakey ed saray lingkor to et say pansiansian matoor ed  amin a kipapasen. Arum ed saray lingkor to so nidudunget ed saray subok tan panamasegsegang natan; arum so nayarin nidunget ed saginonor. Amin so nasubok ed nanduruman paraan, tan anggapo so nepeg a manilalo a sikatoy nipuera. (Juan 15:19, 20) Bilang dedikadon lingkor nen Jehova, agtayo napaliisan so sankatalbaan ya isyu a mangilalanor ed panamasantos ed ngaran nen Jehova tan ed kiyalangon na inkasoberano to.​—Ezequiel 38:23; Mateo 6:9, 10.

“Aleg ya Itumang Yo ed Anggan Siopa so Mauges ed Mauges”

10. Anton importantin pangaligan so impatnag nen Jesus tan saray apostol to diad impangarap da ed saray pananesdes tan isusumpa?

¹⁰ Say sananey nin importantin prinsipyo a naaralan tayo ed inkiwas nen Jesus tan saray apostol sanen nadedesdes ira et say agbalot ibales ed saray mamapasegsegang ed sikatayo. Anggapo so nabasa tayo ed Biblia a si Jesus odino saray patumbok to et linmaban ira diad impangorganisa ra na sakey a klase na ulopan odino angagamil ira na karawalan ta pian labanan da iray mamapasegsegang ed sikara. Misunian, ‘agda intumang ed anggan siopa so mauges ed mauges,’ unong ya insimbawa nen apostol Pablo ed saray Kristiano. “Aleg a sikayo a dili so ombales, inararo, noag ingen ikdan na pasen so sanok na Dios: ta nisulat; Siak so akankien na panamales; siak so ontumang naani, kuan na Katawan.” Niarum ni, “agka pararaeg ed mauges; noag ingen say maong so panaeg mo ed mauges.”​—Roma 12:17-21; Salmo 37:1-4; Uliran 20:22.

11. Anto so imbaga na sakey a manag-awaran nipaakar ed awawey na saray Kristiano nipaakar ed gobierno?

¹¹ Satan a simbawa so impapuso na saray akadkaunan Kristiano. Diad libro ton The Early Church and the World, deneskribe nen manag-awaran a si Cecil J. Cadoux so awawey na saray Kristiano ed gobierno legan na panaon na 30 anggad 70 K.P. Oniay insulat to: “Anggapo so malinew ya ebidensya tayo a nanggunaetan na saray Kristiano ed satan a panaon so puersaan ya italindeg ed panamasegsegang. Say nagawaan da lambengat et say mabiskeg a pangondena ed saray manuley da odino pangewkew ed sikara diad itakas da. Balet, say kaslakan a kiwas na Kristiano ed panamasegsegang et say kontrolado balet ta mapekder ya agpangunor ed saray ganggan na gobierno a moriaen dan sumlang ed katutulok da ed si Kristo.”

12. Akin a magmaong so pansungdo ed kairapan nen say ibales?

¹² Kasin sankapraktikalan lan paraan so ontan ya ag-masugnar ya awawey? Agta say siopaman ya onkiwas ed ontan a paraan so mainomay a nabiktima na saramay determinadon mangupot ed sikara? Agta makabat so pangidepensa ed dili? Diad punto de bista na too, nayarin ompatnag ya ontan so kipapasen. Balet, bilang lingkor nen Jehova et matalek itayo a sankaabigan la so panumbok ed panangidirehi nen Jehova diad amin a pamaakaran. Sinononot itayo ed saray salita nen Pedro: “No dia ed panggawa yo na kaabigan [et] napasegsegang kayo tan itepel yo, sayan peteg so makapaliket ed Dios.” (1 Pedro 2:20) Matalek itayo a kabat a tuloy nen Jehova so kipapasen tan agto iyabuloy a mantultuloy iray pamaakaran. Panon tayon  naseguro itan? Oniay inyabawag nen Jehova ed akautibon totoo to ed Babilonia: “Say maniwit ed sikayo et manidiwit ed bukelbukel na matak.” (Zacarias 2:8, NW) Kaunongan kabayag so pangiyabuloy na siopaman a paniwit ed bukelbukel na mata to? Itarya nen Jehova so pakainawaan ed suston panaon. Anggapo so duaruwa ed satan a bengatla.​—2 Tesalonica 1:5-8.

13. Akin a mapasakop ya inmabobon si Jesus a sikatoy erelen na kakabusol?

¹³ Nipaakar ed saya, nayarian tayon tumboken si Jesus bilang modelo tayo. Sanen inabuloyan to iray kakabusol ton mangerel ed sikato diad hardin na Getsemani, satan so aliwan lapud agto nayarian ya idepensa so inkasikato. Diad tua, oniay kuan to ed saray babangatan to: “Isipen mo ya agko nayarian a kerewen ed Amak, et sikatoy ibaki to ya anggan natan ed siak so masulok a labinduan lehyon na angheles? Panon balet so kasumpal na saray sulsulat, ya ontan so kaukolan a nagawa?” (Mateo 26:53, 54) Say pakasumpal ed linawa nen Jehova so sankaimportantian ed si Jesus, anggano satan so pakasagmakan to na irap. Sikato so walaan na sigpot a kompiyansa ed saray salita na mapropetikon salmo nen David: “Agmo itilak so kamarerwak ed Sheol; agmo nitepel a say sakey a masantom et nanengneng to so kabubulok.” (Salmo 16:10) Kayari na pigaran taon et oniay inkuan nen apostol Pablo nipaakar ed si Jesus: “Lapud gayaga a niyan ed arap to sinungdoan to so krus, ya imbantak to so baing, et yinmurong ed kawanan na trono na Dios.”​—Hebreos 12:2.

Say Gayaga ed Panamasantos ed Ngaran nen Jehova

14. Anto so gayaga ya akatulong ed si Jesus diad amin a subok ed sikato?

¹⁴ Anto so gayaga ya amabiskeg ed si Jesus diad sankagrabian a subok ed sikato? Diad amin a lingkor nen Jehova, si Jesus, say inad-aron Anak na Dios, so maseguron manunan puntirya nen Satanas. Kanian say impamasiansia nen Jesus ed katooran  to diad silong na subok so sankatalonggaringan ya ebat ed kantiaw nen Satanas ed si Jehova. (Uliran 27:11) Kasin naisip yo la so gayaga tan inkapnek ya alikna nen Jesus diad inkioli to? Agaylay liket ton namoria ya asumpal to so betang to bilang ayadyarin too ya angiyalangon ed inkasoberano nen Jehova tan say kapasantos na ngaran To! Niarum ni, say iyurong ed ‘nikawanan na trono na Dios’ et agnasuppiat ya alay abig a kagalangan tan sankabalegan a lapuan na gayaga parad si Jesus.​—Salmo 110:1, 2; 1 Timoteo 6:15, 16.

15, 16. Anton marukduksan panamasegsegang so sinungdoan na saray Tasi diad Sachsenhausen, tan anto so angiter ed sikara na biskeg pian nagawaan da itan?

¹⁵ Parad saray Kristiano, sakey met a gayaga so pakapibiang ed panamasantos ed ngaran nen Jehova diad pansungdo ed saray subok tan panamasegsegang, a tumboken so alimbawa nen Jesus. Sakey nin alimbawa et say eksperiensya na saray Tasi a nanirap ed kabkabat a panangipangawan a kampo diad Sachsenhausen tan aliktaran da so makapaot-ot a martsa na ipapatey diad pansampot na Guerra Mundial II. Legan na martsa, nilibo iran priso so inaatey lapud inkaktelan, sakit, odino eras odino maruksan pinatey na saray guardian SS dia ed dalan. Saray 230 a Tasi so akaliktar diad impanuulop da tan impantutulongan da anggaman napepeligro so bilay da.

¹⁶ Anto so angiter na biskeg ed sarayan Tasi pian nasungdoan so ontan a maruksan panamasegsegang? Sanen aliktaran da lay kapeligroan, imbalikas day gayaga tan pisasalamat da ed si Jehova diad dokumenton apauloan na “Say resolusyon na 230 a tasi nen Jehova a nanlapud anemiran nasyon, ya atipon ed katakelan diad asingger na Schwerin diad Mecklenburg.” Oniay indalatdat da: “Say mairap a panaon na subok so linmabas la tan saramay aliktar, a singano asingkat ed mangapuy-apoy a palbaan, so agbalot asilayotan. (Nengnengen so Daniel 3:27.) Diad pisunian, sikara so napno na biskeg tan pakayari a nanlapud si Jehova tan sikara so magunaet a manalagar ed saray balon ganggan manlapud say Ari pian napalaknab iray Teokratikon intereses.” *

17. Antoran nengneng na subsubok so aarapen na totoo na Dios natan?

¹⁷ Singa ed saramay 230 a matoor, nayarin asubok met so pananisia tayo, anggaman agtayo ni “nantepel angga ed dala.” (Hebreos 12:4) Balet dakerakel so klase na subok. Nayarin panagludlurey na saray kaklase, odino pananesdes na saray kalimog a manggaway imoralidad tan arum niran makapuy a gawa. Niarum ni, say determinasyon ya ompaliis ed dala, mangasawa o miasawa labat ed Katawan, odino pamabaleg ed ananak dia ed pananisia diad sankaabungan a naapag lapud relihyon so manresulta no maminsan ed pirmin pananesdes tan saray subok.​—Gawa 15:29; 1 Corinto 7:39; Efeso 6:4; 1 Pedro 3:1, 2.

18. Anto so panamaseguro ed sikatayo a makapansungdo itayo anggano diad nikadkaduman subok?

¹⁸ Balet, anggan anton subok so onsabi ed sikatayo, amta tayo a manirap itayo lapud iyuuna tayo si Jehova tan say Panarian to, tan ibilang tayo bilang peteg a pribilehyo tan gayaga so panggawa ed satan. Napabiskeg itayo ed manamaseguro iran salita nen Pedro: “No napabpabanday kayo ed ngaran nen Kristo, mapalar kayo, ta say espiritu na gloria tan espiritu na Dios dia ed sikayo so panayaman da.” (1 Pedro 4:14) Diad pakayari na espiritu nen Jehova, walaan itayo na biskeg a mansungdo anggaman ed sankairapan iran subok, diad kigloriaan tan kirayewan to.​—2 Corinto 4:7; Efeso 3:16; Filipos 4:13.

[Saray paimano ed leksab]

Kasin Nipaliwawa Yo?

• Panon so panmoria na saray Kristiano ed irap tan panamasegsegang?

• Anto so naaralan tayo ed paraan na inkiwas nen Jesus tan saray arum nin matoor sanen asubok ira?

• Akin a makabat so ag-ibales sano napapasegsegang itayo?

• Anton gayaga so amabiskeg ed si Jesus anggaman ed saray subok ed sikato, tan anto so naaralan tayo ed saya?

[Tepetepet Parad Panagaral]

[Kahon/Saray litrato ed pahina 15]

No Panon Dan Sinungdoan so Panamasegsegang

• Sakbay ya onsabi iray sundalo nen Herodes dia ed Betlehem pian pateyen da so amin ya ugugaw a lalaki a mantaon na duara a paabeba, inawit nen Jose tan Maria so ugaw nin Jesus tan binmatik ira ed Ehipto diad panangidirehi na anghel.​—Mateo 2:13-16.

• Legan na ministeryo nen Jesus et aminpigan nanggunaetan na saray kakabusol so pamatey ed sikato lapud mapuersan impantasi to. Apaliisan ira nen Jesus ed kada inkagawa.​—Mateo 21:45, 46; Lucas 4:28-30; Juan 8:57-59.

• Sanen sinmabi ed hardin na Getsemani iray sundalo tan opisyales pian erelen da si Jesus, sikato so maparungtal ya angipabidbir ed sikato, ya amidua ton inkuan: “Siak iman.” Inamper to ni ingen iray patumbok to a milaban tan inabuloyan to so pangkat a mangawit ed sikato.​—Juan 18:3-12.

• Diad Jerusalem, si Pedro tan arum ni so inerel, siniplatan, tan ingganggan ya ontunda lan mansalita nipaakar ed si Jesus. Ingen, sanen nibulos ira et ‘sikara so pinmaway ed arap na singbatan, a malikeliket ira lapud kinmana ra a nantepel na baing ed ngaran nen Jesus. Et inagew-agew ed templo tan ed saray kaabungan, ag-ira tinmunda a nambabangat tan nampupulong a si Jesus et Kristo.’​—Gawa 5:40-42.

• Sanen naamtaan nen Saul, a nagmaliw ya apostol Pablo ed saginonor, so nipaakar ed gagaem na saray Judio ed Damasco a sikatoy pateyen da, sikato so inkarga na saray agagi ed sakey a baleg a buksot tan inyabeba ra ed sakey a lalabotan ed bakor na syudad diad labi, kanian akaliktar.​—Gawa 9:22-25.

• Kayari na pigaran taon, denesidi nen Pablo so onapela ed si Cesar, anggaman anggapo so aromog di Gobernador Festus tan Arin Agripa ya “agawa to a kanepegan ed pamatey.”​—Gawa 25:10-12, 24-27; 26:30-32.

[Saray litrato ed pahina 16, 17]

Anggaman apaskar ira ya ontaynan lapud maruksan panamasegsegang, nilibo ed saray matoor a Tasi ed Malawi so maliket a nantultuloy ed serbisyo ra ed Panarian

[Saray litrato ed pahina 17]

Say gayaga ed panamasantos ed ngaran nen Jehova so amabiskeg ed sarayan matoor diad martsa na ipapatey tan saray panangipangawan a kampo na Nazi

[Credit Line]

Death march: KZ-Gedenkstätte Dachau, courtesy of the USHMM Photo Archives

[Saray litrato ed pahina 18]

Nanduruman klase so subok tan pananesdes