Report na Saray Manangiyabawag na Panarian

“Siak so Aliwawaan!”

SI DOROTA, sakey a sigpot-panaon a ministro na saray Tasi nen Jehova diad Poland, so angiba ed 14-años ya anak ton laki diad regular a check-up to diad klinika na eskuelaan. Kaleganan na check-up, si Dorota so tinepetan na doktora, a si Janina, * no antoray gagawaen na anak to diad abung.

“Sano agko la nagawaan, say ana’ko so mangiparaan na naakan min amin ya anem diad pamilya,” so ebat nen Dorota. “Sikatoy manlilinis met na abung tan mangiiban mangapiger diad kaliberliber na abung. Labalabay to so manbasa. Sikato so manaaral a maong.”

“Makapadinayew itan,” kuan nen Janina. “Siak so 12 taon lan mantratrabaho dia, tan natan ak labat akarengel na ontan.”

Lapud natetebek to so pankanawnawan makapanpulong, oniay impaliwawa nen Dorota: “Dakel ya atateng natan so agsuston mangipapasal ed ananak da. Kanian mabetbet a kulang na dilin-respeto so ananak da.”

“Panon mon amta iyan amin?” so intepet nen Janina. “Maslak ya atateng so agmakaamta ed sarayan bengatla.”

“Say Biblia so mablin lapuan na satan ya impormasyon,” so ebat nen Dorota. “Alimbawa, unong ed Deuteronomio 6:6-9, pian nibangat so ananak tayo et nepeg ya ibangat tayon unona so inkasikatayo. Agta nepeg ya ipurek tayo nin unona ed mismon puso tan isip tayo iray kablian a labay tayon ipurek ed ananak tayo?”

“Saya so makapadinayew,” kuan nen Janina. “Saya so makapadinayew!” Insan tinepetan toy Dorota no panon ya ontutulong ed sikato so Biblia diad pamapabaleg tan pangibabangat to ed ananak to.

“Manaaral kami na Biblia kada simba a kaiba so ananak mi,” so insalaysay nen Dorota. “Uusaren mi so libron apauloan na Questions Young People Ask​—Answers That Work.” * Insan to deneskribe so libro tan sinalambit so pigaran tema a kokobrian na satan.

“Siak so aliwawaan!” so inkelyaw nen Janina. “Nayarian kon nengnengen itan a libro?”

Sakey oras ed saginonor, pinmawil si Dorota ya awit to so libro.

“Anto so relihyon mo?” so intepet nen Janina, leleg ton uusisaen so libro.

“Sakey ak ed saray Tasi nen Jehova.”

“Panon so pidedeneng na saray Tasi nen Jehova ed saramay sananey so pananisia ra?”

“No panon so pidedeneng ko ed sika​—a walaan na respeto,” so ebat nen Dorota, ya inyarum to: “Siempre, pirawat min nakabatan da komon so katuaan diad Biblia.”

“Maliket ak la ed kipapasen ko,” so impatua nen Janina.

Sanen manpatanir la, pinaseseg nen Dorota si Janina a manbasa na Biblia. “Satan so mangiter na kabaliksan ed bilay mo tan ontulong ed sika diad trabahom.”

“Siak so talagan apaseseg mo a manggawa ed satan,” so inaksobi nen Janina.

Lapud inkataktika tan determinasyon, naanamot nen Dorota so regular ya idadalaw ed opisina na doktora pian mangiter na alay abig a pantasi.​—1 Pedro 3:15.

[Saray paimano ed leksab]