“Agkayo Miulop ed Pako a Duma”

SINGA nanengneng yo dia, say kamelyo tan say baka a saniban manbabaka so naiirapan a maong. Say pakon inkagor ed sikaran dua​—ya intadya parad duaran ayep a parehoy kabaleg tan biskeg​—so mamapairap ed sikaran dua. Lapud mapaga ed pankaabigan na saray isisintan ayayep, oniay inkuan na Dios ed saray Israelita: “Agmo nepeg a panlansingen so baka tan asno a pambaka.” (Deuteronomio 22:10) Onaplika met itan a prinsipyo ed say baka tan kamelyo.

Kaslakan, say dumaralos so agmamapairap ed ayayep to. Balet no sikatoy andian na duaran baka, nayarin pampakoen to so duaran ayep a walad sikato. Mapatnag ya onia so ginawa na sakey a dumaralos nen koma-19 siglo diad ilustrasyon. Lapud agnampara so kabaleg tan kabelat da, say memelag ya ayep so nairapan a makapibansag bangta mas ambelat so awiten na babaleg ya ayep.

Inusar nen apostol Pablo so ilustrasyon nipaakar ed duman pipapako pian bangatan itayo na sakey ya importantin leksion. “Agkayo miulop ed pako a duma na saray agmananisia,” so insulat to. “Ta anto so piulopan na katunongan ed kaugsan? Odino anto so piulopan na silew ed bilunget?” (2 Corinto 6:14) Panon a makapiulop so sakey a Kristiano ed pako a duma?

Say sakey a dalan et no pilien na sakey a Kristiano so mangasawa odino miasawa ed agto kapananisiaan. Say ontan a pikakasakey so magmaliw a mairap ed parehon dapag tan agmakapanpaknaan so sanasawa ed saray manunan isyu.

Sanen inletneg nen Jehova so panangasawa, inter to ed asawan bii so betang a “kapanoan,” odino “katupagan.” (Genesis 2:18, NW, paimano’d leksab) Ontan met, diad panamegley nen propeta Malaquias, tinukoy na Dios so asawan bii bilang ‘kaiba.’ (Malaquias 2:14) Kaliktan na Manamalsa tayo a mankimey a mantunosan so sanasawa diad parehon espiritual a direksion, a sikaran dua so manakbat ed saray problema tan man-ani ed saray gunggona.

Diad pangasawa ya “unong lambengat ed Katawan,” nipatnag na sakey a Kristiano so panagrespeto ed simbawa na mangatatawen ya Ama tayo. (1 Corinto 7:39, NW) Saya so mangiletneg na pundasyon parad sakey a malet a panamaley, a kidayewan tan kigalangan na Dios legan a manlilingkor ed sikato so sanasawa bilang ‘matoor a mankaiba ed panaglingkor’ diad nikaduman pantalos.​—Filipos 4:3.

[Picture Credit Line ed pahina 32]

Kamelyo tan baka: Nanlapud libron La Tierra Santa, Tomo 1, 1830