Bayuboan so Espiritu na Panangiter
Bayuboan so Espiritu na Panangiter
ANGGAPO so nianak a walaan la na espiritu na panangiter. Say nisipor ya inklinasyon na ugaw et say pamenek ed saray kaliktan tan pankaukolan ton dili, ya agsinononot ed pankaabigan na anggan saray mangaasikaso ed sikato. Balet, onsabi panaon et naaralan na ugaw ya aliwan sikato labat so walaan na saray pankaukolan. Nepeg ton nodnonoten so arum, tan aliwa labat a mangawat so nepeg ton aralen noagta say pangiter tan panginabang met. Say espiritu na panangiter so kaukolan a bayuboan.
Aliwan amin ya indibidual a mangiiter—anggaman mabunbunlok—so walaan na espiritu na panangiter. Nayarin walaray mandodonasyon ed sakey ya institusyon ta pian nitandoro iray dilin pankaabigan da. Say arum so mangiiter na abuloy ta pian irayrayew ira na totoo. Balet, duma so panangiter a gagawaen na saray tuan Kristiano. Anto sirin iray pakapatnagan na panangiter ya ipapaseseg na Salitay Dios? Sayan tepet so naebatan diad antikey a pangonsidera ed panangiter a ginawa na saray Kristiano nen inmunan siglo.
Saray Alimbawa na Makristianon Panangiter
Unong ya adeskribe diad Biblia, say Makristianon panangiter et kaslakan a “pananginabang na saray bengatla ed arum” a peteg a mankaukolan. (Hebreos 13:16, NW; Roma 15:26) Agnepeg a gawaen itan dia ed pasootan. Oniay insulat nen apostol Pablo: “Balang sakey gawaen to komon so ginetma to ed puso to; aliwa a dia ed kaermenan odino dia ed pasootan; ta say Dios aroen to so sililiket a mangiter.” (2 Corinto 9:7) Say panangiter so agnepeg a gawaen met diad gagalan manpasirayew. Ontan a panamalikdo so ginawa di Ananias tan Safira kanian sinagmak da iray mauges a nansumpalan.—Gawa 5:1-10.
Say panangiter so manunan kinaukolan sanen nantitipon ed Jerusalem so dakel a Judio tan proselita a nanlalapud ararawin pasen parad piesta na Pentecostes nen 33 K.P. Ditan et saray patumbok nen Jesus so ‘napno na masanton espiritu tan ginmapo iran nansalita na salitan nagsikasikmat.’ Dakdakel a totoo so akitipon ed sikara tan akadngel ed makatenyeg a paliwawa nen Pedro nipaakar ed si Jesu-Kristo. Diad saginonor et anengneng na saray totoo no panon a pinaabig nen Pedro tan Juan so lupoy a laki diad wangalan na templo, tan nadngel dan nansalita lamet si Pedro nipaakar ed si Jesus tan say pankaukolan parad pagbabawi. Nilibo so nagbabawi tan abautismoan bilang papatumbok nen Kristo.—Gawa, kapitulo 2 tan 3.
Kinaliktan na saray balon akomberte so mansiansia ed Jerusalem tan paibangat ni ed saray apostol nen Jesus. Balet panon a naasikaso na saray apostol iray pankaukolan na amin a bisita? Oniay ibabaga ed sikatayo na salaysay na Biblia: “Amin a walaan na kaumaan odino kaabungan inlako da ra, tan inawit da so bili na saray bengatla ya inlako ra. Et inyan da ed saray salian na apostoles: et agawa so impangiyutob ed sinansakey, unong ed wala a nakaukolan na siopaman.” (Gawa 4:33-35) Peteg a say balo nin aporma a kongregasyon ed Jerusalem so walaan na espiritu na panangiter!
Diad saginonor et impatnag na arum a kongregasyon so parehon espiritu na panangiter. Alimbawa, saray Kristiano ed Macedonia, anggaman mairap so bilay da, so nanggawa ed labas na aktual a nayarian da diad impankontribusyon da parad saray mankaukolan ya agagi ra diad Judea. (Roma 15:26; 2 Corinto 8:1-7) Say kongregasyon ed Filipos so pirmin anuporta ed ministeryo nen Pablo. (Filipos 4:15, 16) Say mismon kongregasyon ed Jerusalem so inagew-agew ya angiyutob na tagano ed saray mankaukolan a balo, tan saray apostol so anuro na pitoran kualipikadon lalaki pian naseguro a naasikason amin iray makanepegan a balo.—Gawa 6:1-6.
Saray akadkaunan Kristianon kongregasyon so kinmiwas a tampol tan namparaanan da ni ingen so isabi na panaon na kairapan. Alimbawa, sanen impasakbay nen propetan Agabo so isabi na baleg ya eras, saray babangatan ed kongregasyon na Sirya Antioquia so ‘nannononong, unong ed nayarian na sinansakey, pian mangipawit na payabol ed saray agagin manaayam ed Judea.’ (Gawa 11:28, 29) Agaylan abig ya espiritu so impatnag da diad impangiparaan da ed saray nayarin nakaukolan na arum!
Anto so amakiwas ed saray Kristiano nensaman a magmaliw ya ontanlan mabunlok tan maaro? On, panon kasin nabayuboan na sakey so espiritu na panangiter? Makaaral itayo na dakel diad antikey a pangonsidera ed alimbawa nen Arin David.
Say Mabunlok ya Impanuporta nen David ed Tuan Panagdayew
Diad loob na ngalngalin 500 a taon, say kaban na sipan—sakey a sagradon kaban a mangirerepresenta ed kiwawala nen Jehova—so andian na permanentin ayaman. Satan so insimpen ed sakey a tolda, odino tabernakulo, ya inyalis-alis legan na impanyatawyataw na Israel ed kalawakan insan da inawit diad Insipan a Dalin. Pirpirawat nen Arin David ya iyalis so kaban manlapud tolda ya angisimpenan ed satan tan mamaalagey na matukoy ya abung parad si Jehova a panginan ed satan a sagradon kaban. Oniay inkuan nen David sanen akitongtong ed si propetan Natan: “Nia, manaayam ak ed abung a cedro, balet say kaban na sipan nen Jehova manaayam ed silong na saray kobongkobong.”—1 Awaran 17:1.
Balet, si David et sakey a mibabakal. Kanian ingganggan nen Jehova a si Solomon la ya ilalak to so mangipaalagey ed templo a panayaman na 1 Awaran 22:7-10) Anggaman ontan, saya so ag-amuger ed espiritu nen David ed panangiter. Sikatoy angorganisa na baleg a grupo pian mangitarya na saray materyales ya usaren diad pangipaalagey na templo. Diad saginonor et oniay inkuan to’d si Solomon: “Intadiak a nipaakar ed abung nen Jehova so sanlasus libo a talento a balitok, tan sanlibo a laksa a talento a pilak, tan ed gansa tan balatyang ya agsinimbang, ta sikato so daakan; kiew met tan bato angitadia ak.” (1 Awaran 22:14) Agni kontento ed satan, kanian lapu ed dilin inkaaligwas to, si David so angiter na balitok tan pilak a say balor na satan diad kaplesan et masulok a $1,200,000,000. Niarum ni, saray prinsipe so mabulbulos met a nankontribusyon. (1 Awaran 29:3-9) Talagan impatnag nen David so mabunlok ya espiritu na panangiter!
kaban na sipan, legan na mareen ya uley to. (Anto so amakiwas ed si David pian mangiter a mabunbunlok? Binidbir to ya amin ya atipon tan agawaan to et resulta na panamendisyon nen Jehova. Oniay inaksobi to ya impikasi: “O Jehova a Dios mi, amin so saya a sinop ya intadia mi pian ipaalageyan da ka na abung nipaakar ed masanto a ngaran mo [et] nanlapu ed limam, tan amin sikato so kayarian mo a dili. Amtak 1 Awaran 29:16, 17) Pinabli nen David so relasyon to ed si Jehova. Minoria to a nakaukolan toy manlingkor ed Dios “tekep na interon puso tan maliket a kamarerwa,” tan sikato so nanggayaga diad impanggawa ed satan. (1 Awaran 28:9, NW) Onia met iran kalidad so amakiwas ed saray inmunan Kristiano a mangipatnag na espiritu na panangiter.
met, Dios ko, a salien mo so puso, tan mankaliket ka dia ed inkatunong. Nipaakar ed siak, dia ed inkatunong na pusok inyapay ko a mabulbulos so saraya ya amin a bengatla: et natan anengneng ko a magaygayaga so baley mo, a wala ya akaarap dia, a mangiyapay a mabulbulos na tukdol da ed sika.” (Si Jehova—Say Sankatalonggaringan a Manangiter
Si Jehova so sankaabigan ya alimbawa na panangiter. Pirmi so panangaro tan panangasikaso to lapud ‘pabubutayen to so banwa to ed saray mauges tan maong, tan papepelagen toy uran ed saray matunong tan aliwan matunong.’ (Mateo 5:45) Amin a katooan et iikdan to na ‘bilay, linawa, tan ami-amin a bengatla.’ (Gawa 17:25) On, unong ya impabitar nen babangatan a Santiago, “amin a maong a palangkap tan amin ya ayadyarin palangkap manlapu ed tagey tan onleksab a manlapu ed Ama na saray liwawa.”—Santiago 1:17.
Juan 3:16) Anggapo so makapangibaga a sikatoy makanepegan ed satan a langkap, “ta amin nankasalanan, tan makulang ira ed gloria na Dios.” (Roma 3:23, 24; 1 Juan 4:9, 10) Say dondon nen Kristo so basiyan tan paralanan parad “langkap [na Dios] ya agnibalikas,” salanti, say “alablabas a grasya na Dios.” (2 Corinto 9:14, 15) Lapud misalsalamat ed langkap na Dios, ginawa nen Pablo a manunan kimey ed bilay to so ‘panamatua ed ebanghelyo na grasya na Dios.’ (Gawa 20:24) Binidbir to a linawa na Dios a “saray amin a totoo nilaban ira komon, tan ondago’ra ed pakapikabat ed katuaan.”—1 Timoteo 2:4.
Say sankabalgan a langkap nen Jehova ed sikatayo et say impangibaki to ed “bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.” (Saya so nasusumpal la natan panamegley na malaknab a panagpulong tan panagbangat a ninmatnat la diad 234 a daldalin ed sankamundoan. Impasakbay nen Jesus iyan ilalaknab sanen inkuanto: “Saya ya ebanghelyo na panarian nipulong naani ed sankamundoan ya onkanan pamintuaan ed saray amin a nasyones; et saman la onsabi so anggaan.” (Mateo 24:14) On, “say ebanghelyo [so] kaukolan a nipulong ya unona ed saray amin a nasyones.” (Marcos 13:10) Nen katantaon et masulok ya anemiran milyon a manangiyabawag na maong a balita so angusar na 1,202,381,302 ya oras diad sayan kimey tan angikondukta na masulok a 5,300,000 a panangiyaral ed Biblia. Sayan bilin so importantin tuloy lapud bilay so nalalanor.—Roma 10:13-15; 1 Corinto 1:21.
Minilyon a publikasyon—a kabiangan iray Biblia, libro, tan brosyur—so iyiimprinta kada taon pian natulongan iraman so naeerasan ed katuaan ed Biblia. Niarum ni et masulok a sakey bilyon a kopya na saray magasin a Panag-Bantayan tan Awake! so papawalaen. Legan ya onkikiwas so totoo ed maong a balita, mandakel so ipapaalagey iran Kingdom Hall tan Assembly Hall na saray Tasi nen Jehova, a pinagkasentro na panagbangat ed Biblia. Iyuuksoy ed kada taon iray sirkiton asamblea tan espisyal ya agew ya asamblea, tan saray distriton kombension. Say panangipasal ed saray misionaryo, managbiahen manangasikaso, mamatatken, tan ministeryal a lingkor so peles met a nagagawa. Misalamat itayo ed si Jehova lapud pangitatarya to ed sayan amin a probisyon panamegley na “matoor tan makabat ya aripen.” (Mateo 24:45-47) Agaylay pampilalek tayon ibalikas so pisasalamat tayo ed Sikato!
Ipatnag so Pisasalamat ed si Jehova
Singa diad impangipaalagey na templo tan diad impangasikaso ed saray pankaukolan na inmuunan Kristianon kongregasyon, saray gagastosen ed sayan amin a pamaakaran so manlalapu ya amin ed boluntaryon kontribusyon. Balet nepeg tayon nonoten ya anggapo so makapanpayaman ed si Jehova, say Makankayarian na amin a bengatla. (1 Awaran 29:14; Aggeo 2:8) Saray kontribusyon sirin so pakapatnagan na panangaro tayo ed si Jehova tan ed pilalek tayon onaligwas so tuan panagdayew. Sarayan panangipatnag na inkamabunlok, kuan nen Pablo, so manresulta ed “pisasalamat ed Dios.” (2 Corinto 9:8-13) Ipapaseseg nen Jehova so ontan a panangiter lapud ipapatnag na satan a walaan itayo na dugan espiritu tan maong a puso a parad sikato. Saraman so mabunlok tan manmamatalek ed si Jehova so bebendisyonan to tan onaaligwas ed espiritual a paraan. (Deuteronomio 11:13-15; Uliran 3:9, 10; 11:25) Pinaseguroan itayo nen Jesus a panlapuan itan na liket, a kuanto: “Lalo a mapalar so mangiter nen say mangawat.”—Gawa 20:35.
Saray Kristiano a walaan na espiritu na panangiter so aglabat manaalagar ed isabi na panaon na pankaukolan. Imbes, sikaray manaanap na saray pankanawnawa pian “manggawa na maabig ed amin, nagkalalo ed saramay kapananisiaan [da].” (Galacia 6:10, NW) Bilang pangipaseseg ed maridios ya inkamabunlok, insulat nen Pablo: “Agyo lingwanan so panaggawa na maabig tan say pannanabang: ta say Dios napaliket a maong ed sarayan bagat.” (Hebreos 13:16) Say pangusar ed kaykayarian tayo—panaon, biskeg, tan kuarta—pian tulongan so arum tan pian iyalibansa so puron panagdayew et makapaliket a tuloy ed si Jehova a Dios. Peteg a papablien to so espiritu na panangiter.
[Kahon/Litrato ed pahina 28, 29]
Saray Paraan a Pinili na Arum Pian Mangiter na
SARAY KONTRIBUSYON PARAD SANKAMUNDOAN A KIMEY
Dakel so mangigagana, odino mangigegetar, na kantidad ya ipelag da ed saray “contribution box” ya atatakan na “Contributions for the Worldwide Work—Matthew 24:14.”
Kada bulan et ipapawit na saray kongregasyon irayan kantidad diad sangan opisina na saray Tasi nen Jehova a manlilingkor ed mismon bansa ra. Saray boluntaryon donasyon a kuarta so nayarin direktan ipawit met Watch Tower Bible and Tract Society of the Philippines, Inc., P.O. Box 2044, 1060 Manila, odino diad sangan opisina a manlilingkor ed bansa yo. Saray tseke so kaukolan ya ibayar ed “Watch Tower.” Saray alahas odino arum niran ankablin bengatla so nayari met ya idonasyon. Nepeg ya itekep ed sarayan kontribusyon so sakey ya antikey a sulat a mangibabagan satan so direktan langkap.
UKSOYAN NA KONDISYONAL A DONASYON
Nayarin idonasyon so kuarta panamegley na espisyal a reglamento a nayarin ipawil so donasyon ed angidonar, no kerewen to itan. Parad kaaruman ya impormasyon, ipangasin mitalosan ed Treasurer’s Office diad address a nipaimano ed tagey.
NIPLANON PANANULONG
Bilang kaaruman ed saray direktan langkap tan saray kondisyonal a donasyon a kuarta, wala niray arum a paraan na panangiter a parad sankamundoan a serbisyo ed Panarian. Kabiangan ed saraya so:
Insurance: Say Watch Tower Society so nayarin ingaran a minanabang ed life insurance policy odino retirement/pension plan.
Deposito ed Bangko: Saray deposito ed bangko, sertipiko na deposito, odino indibidual a deposito ed panretiro so nayarin imatalek odino ibayar ed Watch Tower Society diad ipatey, unong ed saray kakaukolanen na lokal a bangko.
Saray Stock tan Bond: Saray stock tan bond so nayarin idonasyon ed Watch Tower Society bilang direktan langkap.
Lote tan Abung: Say lote tan abung a nayarin ilako so nidonasyon balanglan diad panamegley na direktan langkap odino, no nipaakar ed abung, diad pangireserba ed satan bilang panayaman na angidonar, a makapantultuloy a manayam ditan legan a mabilay. Mitalosan ed sangan opisina diad bansam sakbay ya iyalis ed ngaran so antokaman a lote tan abung.
Gift Annuity: Say gift annuity et sakey a reglamento a niyalis na sakey so kuarta odino saray seguridad diad Watch Tower Society. Bilang kasalat, say angidonar, odino siopaman a pangipiyaan to, so makaawat na pihon bayaran a tinaon legay bilay. Say angidonar so makaawat na income-tax deduction diad taon a ginmapo so gift annuity.
Testamento tan Inmatalek: Saray kayamanan odino kuarta so nayarin ipatawir ed Watch Tower Society diad panamegley na sakey a legal a testamento, odino nayarin ingaran so Watch Tower Society bilang minanabang ed paknaan a pangimatalek. Say inmatalek a parad sakey a relihyoson organisasyon so nayarin mamawala na pigaran bentaha ed panag-buis.
Unong ya ipapatnag na terminon “niplanon pananulong,” sarayan nengneng na donasyon so kaslakan a mankakaukolan na panagplano ed biang na mangidonar. Pian tulongan iray indibidual a malabay ya ontulong ed sankamundoan a kimey na saray Tasi nen Jehova panamegley na pigaran nengneng na niplanon pananulong, niparaan so sakey a brosyur diad Ingles tan Español ya atituloan na Charitable Planning to Benefit Kingdom Service Worldwide. Sayan brosyur so denisinyo a mangebat ed dakel a naaawat a tepet nipaakar ed saray langkap, testamento, tan imatalek. Lugan met na satan so kaaruman a mausar ya impormasyon diad panangiplano ed lote, pinansyal, tan buis. Papakabatan met na satan iray indibidual nipaakar ed nanduruman paraan, a saray langkap so nayarin iter la natan odino ipatawir diad ipatey. Kayari ran abasa so brosyur tan tinmupleg ed saray legal a managkonseho ra nipaakar ed panagbuis tan diad Charitable Planning Office, dakel la so akatulong ed saray Tasi nen Jehova ed sankamundoan tan nagagamoran da met so dakel a benepisyo ed buis diad panggawa ra ed satan. Sayan brosyur so naala panamegley na direktan ikerew na sakey a kopya diad Charitable Planning Office.
Parad kaaruman ya impormasyon, nayarian moy mitalosan diad Charitable Planning Office, balanglan diad pansulat odino itawag ed telepono, diad address a nilista ed leksab odino diad opisina na Saray Tasi nen Jehova a manlilingkor ed bansa yo.
Charitable Planning Office
Watch Tower Bible and Tract Society of the Philippines, Inc.
186 Roosevelt Avenue, San Francisco del Monte
1105 Quezon City
Telephone: (02) 411-6090
[Litrato ed pahina 26]
Anto so amakiwas ed saray Kristiano nensaman a magmaliw a mabunlok?