Istorya ed Bilay

Imbangat Ak nen Jehova Manlapud Inkaugaw Ko

UNONG ED SALAYSAY NEN RICHARD ABRAHAMSON

“O Dios, sika imbabangat mo ak a nanlapu ed inkaugaw ko; tan angga ed natan ipaamtak so saray pankelawan a kimey mo.” Abuloyan yo ak pan mangisalaysay no akin a saratan a salita ed Salmo 71:17 so walaan na nikaduman kabaliksan ed siak.

SAY Nanay ko, a si Fannie Abrahamson, so aromog nen 1924 na saray Estudyante na Biblia, bilang tawag ed saray Tasi nen Jehova nensaman. Sakey taon ko ni labat ed saman. Sanen nibangat ed si Nanay iray katuaan na Biblia, sikatoy linma a tampol ed kakaabay pian inabang ed sikara iray naaralan to, tan sikatoy angibangat met ed siak tan say kuyak tan say atsik. Sakbay kon naaralan so manbasa, tinulongan to ak a mangipatlep na dakel a teksto nipaakar ed saray bendisyon na Panarian na Dios.

Diad kaunoran a dekada na 1920, say grupo mi bilang Estudyante na Biblia diad La Grande, ed estado na Oregon, E.U.A., ya inkianakan tan binalegan ko, so tugyopen labat na pigaran bibii tan ugugaw. Anggaman niarawi kami, maminsan odino mamidua ed kada taon so ibibisita ed sikami na saray managbiahen ministro, a kabkabat bilang saray pilgrim. Sikara so angiparungtal na makapaseseg iran paliwawa, inulop da kami ed panagkabkaabungan a ministeryo, tan impatnag da so maabig ya interes ed saray ugugaw. Kabiangan ed saratan a pinabli et si Shield Toutjian, Gene Orrell, tan si John Booth.

Nen 1931 et anggapo ed grupo mi so akaatendi ed kombension diad Columbus, Ohio, a diman et inawat na saray Estudyante na Biblia so ngaran a Saray Tasi nen Jehova. Balet saray company, bilang tawag ed saray kongregasyon nensaman, tan saray niyarawin grupo ya anggapo ed saman a kombension so nantitipon ed saman ya Agosto pian manggawa na resolusyon ya awaten  so ngaran. Ontan so ginawa na melag a grupo mi diad La Grande. Insan, diad sakey a kampanya nen 1933 a mangibunog na bokletan The Crisis, impatlep ko so presentasyon a nibase ed Biblia, tan diad primeron pankanawnawa et nampulong ak a bukor ed kabkaabungan.

Legan na dekaday 1930, wala so ompapalalon isusumpa ed kimey mi. Pian natalonaan iya, saray kongregasyon so inapag ed saray tatawagen a dibisyon, a nanggawa na angkelag iran asamblea tan akibiang ed panagpulong a kimey a kabkabat bilang saray divisional campaign, a maminsan odino mamidua ed kada taon. Diad sarayan asamblea et nibangat ed sikami iray metodo na panagpulong tan niparungtal ed sikami no panon so marespeton pideneng ed polis a mangamper ed sikami. Lapud mabetbet ya aawiten iray Tasi ed huis a polis odino ed korte, ipapasal mi so materyal manlapud instruction sheet a tinawag ya Order of Trial. Saya so anginlong ed sikami a mangarap ed isusumpa.

Asakbay ya Imbulaslas Ko ed Katuaan na Biblia

Inmaralem so pakatalos ko ed saray katuaan na Biblia tan say nibase ed Biblia ya ilalon manbilay ya andi-anggaan ed dalin diad silong na mangatatawen a Panarian na Dios. Diad saman a panaon, say bautismo et agtanton nidadanet ed saramay andian na ilalon miuley ed si Kristo diad tawen. (Apocalipsis 5:10; 14:1, 3) Anggaman kuan, nibaga ed siak a no diad pusok et determinado ak lan manggawa na linawa nen Jehova, matukoy so manpabautismo. Kanian abautismoan ak nen Agosto 1933.

Sanen mantaon ak na 12, abaloan na maestrak a marundunong ak la ed panagsalita ed publiko, kanian pinaseseg to si Nanay a mangiyuksoy na kaaruman a pangipasal ed siak. Inisip nen Nanay a makatulong itan ed siak pian mas maabig so pakapanlingkor ko ed si Jehova. Kanian, impesakan to so managbangat ed loob na sakey taon bilang bayar ed panaaral ko. Satan a panagpasal so peteg ya akatulong ed ministeryok. Sanen mantaon ak na 14, siak so awalaan na rheumatic fever, a sengegan na agko impakapaneskuela ed masulok a sakey taon.

Nen 1939 et walay sinmabi ed lugar mi a sigpot-panaon a ministro a manngaray Warren Henschel. * Diad espiritual a paraan et sikato so nagmaliw a kuyak, ya itatagar to ak ed lawak na ministeryo diad loob na pigaran agew. Agnambayag et tinulongan to ak ya onggapon manlingkor bilang vacation pioneer, sakey a temporaryon nengneng na sigpot-panaon a ministeryo. Diad saman a panaoy-tiagew, naorganisa so grupo mi bilang sakey a kongregasyon. Si Warren so aturo bilang company servant, tan siak so aturo bilang manangikondukta na Panagaral na Panag-Bantayan. Sanen nanserbi lay Warren ed Bethel, say internasyonal iran hedkuarter na saray Tasi nen Jehova diad Brooklyn, New York, siak so nagmaliw a company servant.

Inggapok ed Sigpot-Panaon a Ministeryo

Say dinmakel a responsabilidad ed panagserbi bilang company servant so lalon amabiskeg ed pilalek kon onloob ed sigpot-panaon a ministeryo, a ginawak nen 17 años ko kayarik ed komatlon taon ed haiskul. Si Tatay et agmi kapananisiaan, balet sikato so maong a managlegpet tan walaan na atagey iran prinsipyo. Labay to ak a panaralen  ed kolehyo. Balet, inkuanto a no agak la akadependi ed sikato ed panayaman tan taganoen ko, nayarian ko lan gawaen so labay ko. Kanian nampayunir ak nen Setyembre 1, 1940.

Sanen onalis ak la’d abung, imbasa ed siak nen Nanay ko so Uliran 3:5, 6: “Manmatale’ka ed Jehova ed simoon a pusom, tan agka onsaral ed tapew na dili a pakatalos mo: Dia ed saray amin a dalan mo sikato so bidbiren mo, et sikato itonton to so saray basbas mo.” Say lawas impanmatalek ko ed si Jehova so petepeteg ya akatulong a maong ed siak.

Agnambayag, akiulop ak ed si Joe tan Margaret Hart ed ministeryo diad amianen-sentro a Washington State. Nanduruma so teritorya​—saray rantso na baka, karnero, ayaman na saray Indian, ontan met ed dakel ya angkelag a baley tan baryo. Diad primabera na 1941, siak so aturo bilang company servant ed kongregasyon na Wenatchee, Washington.

Diad sakey ed saray asamblea mi ed Walla Walla, Washington, siak so nanserbi bilang attendant, a mangaabrasa ed saramay onloloob ed auditoryum. Naimanok so kalangweran ya agin laki a naiirapan a mamaandar ed sound system. Kanian insuherik a mansalat kami na asainmin. Sanen pinmawil so regional servant, a si Albert Hoffman, tan naimano to ya agko sinumpal so asainmin ko, impaliwawa to ed siak tekep na makaaron imis so kablian na pansiansia na sakey ed asainmin to anggad sikatoy pabtangan na arum ya asainmin. Agko alingwanan iman a simbawa to manlapu la’d saman.

Nen Agosto 1941, implano na saray Tasi nen Jehova so sakey a baleg a kombension diad St. Louis, Missouri. Tinarongan na sanasawan Hart so beneg na pickup trak da tan angiyan ira na yurongan. Siamera kamin payunir a nambiahe na 2,400 a kilometro anggad St. Louis panamegley na saman a trak. Ngalngali sakey simba so impanbiahe min amaarap diman. Diad kombension, kinalkula na sakey a polis a say pantok a bilang na inmatendi et 115,000. Anggaman say bilang na inmatendi et nayarin kulang ed satan, maseguron sinmulok itan ed 65,000 a bilang na saray Tasi diad Estados Unidos ed saman a panaon. Say kombension so talagan makapabiskeg ed espiritual.

Impanlingkor Ko Diad Brooklyn Bethel

Kapawil ko ed Wenatchee, siak so sinulatan pian mantrabaho ed Brooklyn Bethel. Kasabik diman nen Oktubre 27, 1941, siak so intagar ed opisina nen Nathan H. Knorr, say manangasikaso ed factory. Sikato so mapangasin angipaliwawa ed siak no anto so bilay ed Bethel tan indanet to a say pansiansian maapit ed si Jehova so makanakana pian magmaliw a maaligwas so bilay diad Bethel. Insan inawit da ak ed Shipping Department tan impansinger da ak na saray kahon na literatura ya ipatulor.

Nen Enero 8, 1942 et inatey si Joseph Rutherford, a mangidadaulo ed limog na saray Tasi nen Jehova diad sankamundoan. Kayari na limay agew, pinili na saray direktor na Sosyedad si Brother Knorr ya onsalat ed sikato. Sanen inyanunsio iya nen W. E. Van Amburgh, say abayaglan sekretaryo tan tresurero na Sosyedad, diad pamilyan Bethel, oniay inkuanto: “Nanonotan ko  sanen inatey si C. T. Russell [nen 1916] tan sinalatan nen J. F. Rutherford. Intultuloy na Katawan ya indirehi tan pinaaligwas so kimey To. Natan, iilaloan kon maong ya onabanti so kimey diad panangidaulo nen Nathan H. Knorr bilang presidente lapud saya so kimey na Katawan, aliwan too.”

Nen Pebrero 1942, niyanunsio ya igapo so “Advanced Course in Theocratic Ministry.” Adesinyo itan a mangipasal ed saramay walad Bethel ta pian napaaligwas da so abilidad dan mansukimat ed saray tema ed Biblia, makatibukel na materyal da ed suston paraan, tan nipresenta itan diad epektibon paraan. Lapud atulongan ak ed akadkaunan inkipasal ko ed publikon panagpaliwawa, siak so maples ya inmaligwas ed programa.

Agnambayag et siak so niasain ed Service Department, a mangaasikaso ed ministeryo na saray Tasi diad Estados Unidos. Diad saginonor ed saman a taon, denesidi so pangiletneg lamet ed sakey a programa parad saray ministro ya ombisita ed saray kongregasyon na saray Tasi. Sinmabi panaon, sarayan managbiahen ministro, a tinawag a servants to the brethren, so tinawag a manangasikaso na sirkito. Legan na panaoy tiagew nen 1942, inyuksoy so sakey a kurso ed Bethel a mangipasal ed saray agagi parad sayan nengneng na ministeryo, tan apribilehyoan ak a napiiba ed saramay nipasal. Nagkalalo lan nanonotan ko so indanet ed sikami nen Brother Knorr, sakey ed saray instruktor: “Agyo papaliketen so totoo. Say pansumpalan et anggapoy napaliket yo. Paliketen si Jehova, tan napaliket yo so amin a mangaaro ed si Jehova.”

Say panagbiahen kimey so nigapo nen Oktubre 1942. Arum ed sikami diad Bethel so akibiang ed satan diad pigaran sampot-simba, a binisita mi iray kongregasyon a walad loob na 400 kilometro manlapud New York City. Nirepaso mi iray aktibidad na kongregasyon ed panagpulong tan bilang na onaatendi ed saray miting na kongregasyon, miniting mi iramay mamebemben na saray responsabilidad ed kongregasyon, angiter kami na sakey odino duaran paliwawa, tan akikimey ed saray agagi diad ministeryo.

Nen 1944, kaiba ak ed saramay walad Service Department a nibaki ed panagbiahen kimey diad loob na anem-bulan, a nanserbi kami ed Delaware, Maryland, Pennsylvania, tan Virginia. Saginonor, diad loob na pigaran bulan et binmisita ak ed saray kongregasyon ed Connecticut, Massachusetts, tan Rhode Island. Kapawil ko ed Bethel, nankimey ak a part-time diad opisina nen Brother Knorr tan say sekretaryo ton si Milton Henschel, a diman ko akabisado so kimey tayo ed sankamundoan. Nanlingkor ak met a part-time diad Treasurer’s Office diad panangasikaso nen W. E. Van Amburgh tan say katulongan to, si Grant Suiter. Insan, nen 1946, siak so nagmaliw a manangasikaso ed pigaran opisina ed Bethel.

Saray Baleg a Pananguman ed Bilay Ko

Legan na panseserbik ed saray kongregasyon nen 1945, akabat ko si Julia Charnauskas diad Providence, Rhode Island. Diad kapegleyay 1947 et namplano kamin mankasal. Pinablik a tuloy so serbisyok ed Bethel, ingen ta diad saman a panaon et anggapo so uksoyan a niloob so kapareha pian manlingkor met diman. Kanian nen Enero 1948, pinmaway ak ed Bethel, tan nankasal kami nen Julia (Julie). Awalaan ak na part-time a trabaho diad sakey a baleg a lakoan diad Providence, tan ginmapo kamin nampayunir.

Nen Setyembre 1949, siak so naimbitaan ed kimey ed sirkito diad amianen-sagur na Wisconsin. Baleg a pananguman ed sikami nen Julie so manpulong ed angkelag a balbaley tan saray baryo diad probinsya a dakel so produkto na gatas. Mabayag tan makaketel so panaon na ambetel, a pigaran simba a say klima et –20 degrees odino onabeba ni tan makapakapal so yelo. Anggapo so luganan mi. Balet, walan naynay so mangilulugan ed sikami a paarap ed onsublay a kongregasyon.

Kagapok ed kimey ed sirkito, walaan kami na sirkiton asamblea. Nanonotan ko so inkamapeget kon mangimano pian naseguro a naasikason maong iray uksoyan, a medyo akanerbiyosan na arum. Kanian mapangasin impaliwawa na manangasikaso na distrito, a si Nicholas Kovalak, a nipasal laray agagi diman a mangasikaso ed saray bengatla diad dili ran paraan kanian agko la nakaukolan a pampagaan so amin a detalye. Manlapud saman et akatulong ed siak iman a bilin diad pangasikaso ed dakel iran asainmin ko.

Nen 1950, akaawat ak na temporaryon asainmin ​—a mangasikaso ed saray pandawesan na saray delegado diad sankaunaan ed saray angkabaleg a kombension tayo diad Yankee Stadium ed New York City. Makapaliket so kombension manlapud gapo anggad asumpal, a walaray delegadon nanlapud 67 a bansa tan walaan na pantok ya inmatendi a 123,707! Kayari na kombension, intuloy mi nen Julie so panagbiahen ministeryo. Malikeliket kami ed kimey ed sirkito. Balet, naisip mi a nepeg min itultuloy ya iparaan so inkasikami parad antokaman a sigpot-panaon a serbisyo. Kanian kada taon et mangisusubmiti kami na aplikasyon ed Bethel tan ed misionaryon serbisyo. Nen 1952, nanliketan mi so impakaawat na imbitasyon ya onatendi ed koma-20 a klase na Watchtower Bible School of Gilead, ya inkipasalan mi parad misionaryon kimey.

Say Impanserbi Mi ed Arum a Bansa

Diad samay impangraduar mi nen 1953, niasain kami ed Britanya, a nanlingkoran ko ed kimey na distrito diad abalaten na Inglatera. Kayari na kulang a sakey taon diad sayan kimey, a nanggayagaan min maong nen Julie, asurprisa kami ed asainmin a naawat mi ya onla kami ed Denmark. Wala so pankaukolan ed Denmark parad balon panangasikaso ed sangan opisina. Lapud asingger kami labat ditan tan nipasal ak la ed ontan a kimey diad Brooklyn, siak so nibaki ya ontulong. Nambaloto kamin inmarap ed Netherlands, tan manlapu ditan et nan-tren kamin amaarap ed Copenhagen, Denmark. Sinmabi kami nen Agosto 9, 1954.

Sakey ed saray probleman kinaukolan ya asikasoen ko et say agpangawat na pigaran agagi a walad responsablin posisyon ed panangidirehi na hedkuarter ed Brooklyn. Ontan met, talora ed apatiran mangipapatalos ed saray publikasyon mi ed Danish so pinmaway ed Bethel tan diad saginonor et agla ra akilimog ed saray Tasi nen  Jehova. Balet inebatan nen Jehova iray pikakasi mi. Duaran payunir, si Jørgen tan si Anna Larsen a nankimey bilang part-time a managpatalos, so sigpot-panaon lan akibiang ed satan. Nantultuloy so impangipatalos ed saray magasin mi ed Danish, ya anggapoy anggan sakey ya isyu ya asaew. Say sanasawan Larsen so wala nin siansia ed Bethel diad Denmark, tan si Jørgen so coordinator na Branch Committee.

Say peteg a lapuan na panamaseseg ed sikami ed saraman ya akadkaunan taon et say regular ya imbisita nen Brother Knorr. Impanaon to so pakapitongtong ed kada sakey ed sikami, ya insalaysay to iray eksperiensyan amaaralem na pakatalos mi ed no panon so pangasikaso ed saray problema. Legan na sakey a bisita nen 1955, denesidi a nepeg mi so mangipaalagey na balon sanga a walaan na saray pasilidad na imprintaan ta pian nipalapag mi laray magasin parad Denmark. Walay asaliw a lote diad mamaamianen a parte ya asingger ed syudad na Copenhagen, tan kasabi na panaoy-tiagew nen 1957, inmalis kami ed balon nipaalagey a bilding. Si Harry Johnson, kaiba toy akulaw to, si Karin, ya agano nin sinmabi ed Denmark kayari na impangraduar da ed koma-26 a klase na Gilead, so tinmulong a mamaandar ed imprintaan mi.

Apaaligwas so panangorganisa mi na angkabaleg iran kombension ed Denmark, tan akatulong a maong so eksperiensyan agamoran ko ed impankimey ed saray kombension diad Estados Unidos. Nen 1961 say baleg ya internasyonal a kombension mi ed Copenhagen so amarawes ed saray delegado a nanlapud masulok a 30 a bansa. Walay pantok a bilang na inmatendi a 33,513. Nen 1969, agawa so sankabalegan ed amin a kombension dia ed Scandinavia, a walaan na pantok a bilang na inmatendi a 42,073!

Nen 1963, siak so naimbitaan ya onatendi ed koma-38 a klase na Gilead. Saya so niyarunsan samploy-bulan a kurso a nagkalautlan denesinyon mangipasal ed saray manlilingkor ed sangan opisina. Makapaliket so pakapilimog lamet ed pamilyan Bethel ed Brooklyn tan nagunggonaan ed eksperiensya na saramay mankikimey ed dakel lan taon a panangasikaso ed ikukurang na saray hedkuarter.

Kayari na sayan kurso, pinmawil ak ed Denmark pian itultuloy kon asikasoen iray responsabilidad ko diman. Niarum ni, awalaan ak na pribilehyon manserbi bilang zone overseer, ya ombisita ed mamasagur tan mamaamianen ya Europa pian pasesegen iray mankikimey ed sanga tan tulongan ira a manumpal ed saray responsabilidad da. Agano ni labat et ginawak iya ed Sagur Aprika tan diad Caribbean.

Diad pansamposampot na dekaday 1970, saray agagi ed Denmark so nananap na napangipaalageyan ed babaleg a pasilidad parad onlalaknab a kimey na panagpatalos tan panag-imprinta. Walay nalmo min marakep a lote a manga 60 kilometro ed sagur na Copenhagen. Kaiba so arum, nankimey ak ed panagplano tan panagdesinyo ed sayan balon pasilidad, tan sikami nen Julie so nanilalo a manayam ed sayan balibalin pasilidad kaiba so pamilyan Bethel. Balet, ag-iman agawa.

Pinmawil Kami ed Brooklyn

Nen Nobyembre 1980, sikami nen Julie so naimbitaan a manlingkor ed Bethel diad Brooklyn, a sinmabi kami nen kasaksakbayan na Enero 1981. Manedad kami la’d saman na masulok a 50, tan kayari na impanlingkor mi ed loob na ngalngali kapaldua lay impanbilay mi a kaiba iray pinablin agagi ed Denmark, aliwan mainomay ed sikami so ompawil ed Estados Unidos. Ingen, agmi ninonot so labay min pansiansiaan noagta inyapasakey mi so kanonotan mi ed saray peles ya asainmin mi tan antokaman ya angat ed saratan.

Sinmabi kami ed Brooklyn tan nanpirmi kami la’d man. Si Julie so niasain ed accounting office, a mipara ed datin trabaho to ed Denmark. Siak so  niasain ed Writing Department pian ontulong a mangiyeskedyul ed panangiparaan ed saray publikasyon tayo. Diad kasakbayan na dekaday 1980 et agaway pananguman ed saray paraan na panangipalapag mi ed Brooklyn, a datin manguusar na saray makinilya tan panag-typeset ed ampetang a tingga tan natan et sinaltan la na kompyuter tan offset printing. Anggapoy amtak nipaakar ed saray kompyuter balet natalosan ko iray totontonen ed panangorganisa tan pikikimey ed totoo.

Kayarin tuloy na satan, wala so pankaukolan na pamabiskeg ed panangorganisa ed Art Department diad impangusar mi la ed full-color offset printing tan saray de-kolor ya ilustrasyon tan litrato. Anggaman anggapoy eksperiensyak bilang artist, makatulong ak ed panangorganisa. Kanian awalaan ak na pribilehyon mangasikaso ed satan a departamento diad loob na siameran taon.

Nen 1992 et niasain ak ya ontulong ed Publishing Committee na Mananguley ya Ulop tan niyalis ak ed Treasurer’s Office. Intuloy ko dia so manlingkor a misiglaotan ed pinansyal ya aktibidades na saray Tasi nen Jehova.

Panaglingkor Manlapu La’d Inkaugaw Ko

Manlapu la’d inkaugaw ko tan legan na 70 a taon na dedikadon panaglingkor, si Jehova so maanos ya angibangat ed siak panamegley na Salita to, say Biblia, tan saray matulong ya agagi ed alay abig ya organisasyon to. Nanggayagaan ko so masulok a 63 a taon diad sigpot-panaon a ministeryo, a masulok a 55 ed saratan a taon et kaibak so matoor ya asawak, si Julie. Tua, aliknak so mayaman a panamendisyon nen Jehova.

Nen 1940 sanen inmalis ak ed abung pian manpayunir, binalaw nen tatay ko so desisyon ko tan inkuanto: “Ana’ko, no ontaynan ka ed sayan abung lapud satan, agmo la nonoten a nayarian mo ni so onkerew ed siak na tulong.” Diad loob na dakel a taon, agkon balot ginawa iman. Si Jehova so mabunlok ya angitarya ed saray pankaukolan ko, a mabetbet et diad panamegley na matulong iran kaparan Kristiano. Saginonor et nirespeto nen tatay ko so kimey ko, tan sikato ni ingen so inmaligwas ed panaaral toy katuaan na Biblia sakbay a sikatoy inatey nen 1972. Si Nanay, a walaan na ilalon mangatatawen a bilay, so nantultuloy a nanlingkor ed si Jehova a matoor anggad impatey to nen 1985, diad edad a 102.

Anggaman onlelesa iray problema ed sigpot-panaon a ministeryo, sikami nen Julie so agbalot nannonot a mangikaindan ed asainmin mi. Si Jehova so lawas tinmulong ed sikami ed sayan determinasyon mi. Anggan sanen tinmakken laray atateng ko tan mankaukolan ira na tulong, say atsik, si Victoria Marlin, so tinmulong tan mapangasin angasikaso ed sikara. Misalsalamat kami ed maaron tulong to, ya akatulong ed sikami pian mantultuloy ed sigpot-panaon a ministeryo.

Siak so matoor a sinuportaan nen Julie diad amin ya asainmin mi, a minoria to iya bilang kabiangan na mismon dedikasyon to ed si Jehova. Tan anggaman 80 años ko la tan naliliknak la so pigaran beblay ed laman, siak so mayamyaman a bebendisyonan nen Jehova. Napapaseseg ak a maong ed kerew na salmista kayari ton inyabawag a sikatoy imbangat na Dios manlapud inkaugaw to: ‘Natan met a masiken ak la, O Dios, agmo ak ikaindan, angga ed nipanengneng ko so pakayarim ed balang sakey ya onsabi.’​—Salmo 71:17, 18.

[Paimano ed Leksab]

[Litrato ed pahina 20]

Kaibak si Nanay nen 1940, sanen ginmapo ak a nampayunir

[Litrato ed pahina 21]

Kaibak si Joe tan Margaret Hart, a kaparak a payunir

[Litrato ed pahina 23]

Diad agew na kasal mi nen Enero 1948

[Litrato ed pahina 23]

Nen 1953, a kaibak iray kaklasek ed Gilead. Manlapud kawigi anggad kawanan: Don tan Virginia Ward, Geertruida Stegenga, tan sikami nen Julie

[Litrato ed pahina 23]

Kaibak si Frederick W. Franz tan si Nathan H. Knorr diad Copenhagen, Denmark, 1961

[Litrato ed pahina 25]

Sikami nen Julie natan