Matoor a Kristianon Bibii​—Mabmablin Managdayew ed Dios

“Say dakep sikato so mamalingo, tan say kalimgasan sikato so apa; balet say bii ya antakot ed Jehova, sikato naani narayew.”​—ULIRAN 31:30.

1. Panon a midumaan so panmoria nen Jehova ed panmoria na mundo nipaakar ed kalimgasan?

 IDADANET na sayan mundo so nipaakar ed akinpaway ya itsura, nagkalalo la ed bibii. Balet, si Jehova so mas interesado ed akindalem ya inkatoo, a lalon ondarakep legan ya ontatakken so sakey. (Uliran 16:31) Kanian, oniay insimbawa na Biblia ed saray bibii: “Say parakep da aliwa a say nanengneng ed inkalapir-lapir na buek tan pangikanay alahas a balitok, tan karakpan na kawes; noag saman komon so niamot a too na puso, ya aparakpan na agnaderal a kawes na mauyamo tan mareen ya espiritu, a sikato so mabli ed arap na Dios.”​—1 Pedro 3:3, 4.

2, 3. Panon so impakatulong na bibii ed inyaligwas na maong a balita nen inmunan siglo, tan panon iyan nipasakbay?

² Satan a makapadinayew ya awawey so impatnag na dakel a bibiin asalambit ed Biblia. Nen inmunan siglo, arum ed sikara so walaan na pribilehyon manserbi ed si Jesus tan saray apostol to. (Lucas 8:1-3) Saginonor, saray Kristianon bibii so nagmaliw a maseseg ya ebanghelisador; arum so makanakanan tinmulong ed saray Kristianon lalaki a mangidadaulo, pati ed si apostol Pablo; tan arum so angipatnag na nikadkaduman panagparawes, ya impausar da ni ingen so ayaman da parad saray miting ed kongregasyon.

³ Nipasakbay ed Kasulatan so matalonggaring a pangusar nen Jehova ed saray bibii diad pakasumpal na gagala to. Singa bilang, impasakbay na Joel 2:28, 29 a saray lalaki tan bibii, malangwer man odino matakken, so makagamor na masanton espiritu tan mibiang ed panangikayat na maong a balita na Panarian. Satan a propesiya so ginmapon asumpal nen Pentecostes 33 K.P. (Gawa 2:1-4, 16-18) Arum ya alanaan na espiritu a bibii so naikdan na mamilagro iran langkap, a singa say langkap na panagpropesiya. (Gawa 21:8, 9) Lapud seseg da ed ministeryo, sayan baleg tan maespiritual ya armada na matoor ya agagin bibii so akatulong ed maples a panangikayat na  Inkakristiano nen inmunan siglo. Diad tua, nen ngalngali 60 K.P. et insulat nen apostol Pablo a say maong a balita so “nipulong ed amin a pinalsa ed leksab na tawen.”​—Colosas 1:23.

Akomendaan Lapud Inkakpel, Seseg, tan Inkamaparawes Da

4. Akin a walaan si Pablo na makatunongan a rason pian komendaan so pigaran bibii ed Kristianon kongregasyon nen inmunan siglo?

⁴ Bilang alimbawa, si apostol Pablo so maapresya ed ministeryo na pigaran bibii​—a singa met ed pamapabli na saray Kristianon manangasikaso natan ed ministeryo na saray maseseg a bibii. Kabiangan ed bibiin binitla nen Pablo et “si Trifena tan si Trifosa a mankimey ira ed Katawan,” tan “si Persis ya inaro, a nankimey na dakel ed Katawan.” (Roma 16:12) Insulat nen Pablo a si Euodias tan Sintique, so ‘akisagsagpot ed [sikato] ed ebanghelyo.’ (Filipos 4:2, 3) Si Priscila, kaiba so masiken to, si Aquila, so nanlingkor met a kaiba nen Pablo. Sikato tan si Aquila, ya ‘angiyan ed beklew da’ parad si Pablo, so amakiwas ed sikaton mansulat: “Aliwa a siak lambengat so misalamat ed sikara, noag ingen met ganagana ray iglesias na Gentil.”​—Roma 16:3, 4; Gawa 18:2.

5, 6. Diad antoran paraan so impangipatnag nen Priscila ed maabig ya ehemplo ed saray agagin bibii natan?

⁵ Anto so makasengeg no akin a maseseg tan makpel si Priscila? Say pakapatnagan ed satan so naromog ed Gawa 18:24-26, a nabasa tayo ditan a sinuportaan to so masiken to diad impanulong da ed si Apolos, sakey ya apalangkapan ya espiker, pian makapibansag ed nipaparungtal a katuaan. Mapatnag sirin a si Priscila et maong ya estudyante na Salitay Dios tan ed bangat na saray apostol. Bilang resulta, abayuboan to iray ekselentin kalidad a sengegay impagmaliw ton mabmabli ed imaton na Dios tan ed masiken to tan makanan membro na akadkaunan kongregasyon. Mabmabli met iray dakel a makukulin Kristianon agagin bibii natan a maseet a manaaral na Biblia tan onggagamor na espiritual a tagano ya itatarya nen Jehova panamegley na ‘napanmatalkan a managpaga.’​—Lucas 12:42.

⁶ Si Aquila tan Priscila so maparawes a tuloy. Akiayam si Pablo ed ayaman da sanen sikatoy nantrabaho ed sikara diad panaggaway-tolda ed Corinto. (Gawa 18:1-3) Sanen inmalis so sanasawa ed Efeso tan diad saginonor et diad Roma, nantultuloy ira ed panagparawes da bilang Kristiano, ya impausar da ni ingen so ayaman da parad saray miting ed kongregasyon. (Gawa 18:18, 19; 1 Corinto 16:8, 19) Si Nimfas tan si Maria ya ina nen Juan Marcos so angitarya met ed ayaman da parad saray miting ed kongregasyon.​—Gawa 12:12; Colosas 4:15.

Sakey a Mablin Bengatla Natan

7, 8. Anton nakomendaan a rekord na sagradon serbisyo so wala natan ed dakel a Kristianon bibii, tan anto so nipaseguro ed sikara?

⁷ Singa met nen inmunan siglo, saray matoor a Kristianon bibii natan so walaan na importantin betang ed pakasusumpal na gagala na Dios, nagkalalo la ed panag-ebanghelyon kimey. Tan agaylay abig na rekord na sarayan agagin bibii! Konsideraen pa so alimbawa nen Gwen, a matoor a nanlingkor ed si Jehova diad loob na masulok a 50 taon anggad impatey to nen 2002. “Say inkaseseg nen Gwen bilang ebanghelisador so kabkabat ed syudad mi,” so kuan nen masiken to. “Parad sikato, kada too et posiblin makagamor na aro tan saray sipan nen Jehova. Say katooran to ed Dios, ed organisasyon to, tan ed pamilya mi​—nilikud ni ed maaron panamaseseg to sano nadidismaya kami​—so akatulong a maong ed siak tan ed ananak mi diad makapatumang a tuloy ya impanbilay min sankapamilyaan. Makakailiw kamin maong ed sikato.” Si Gwen tan say masiken to so sanasawa ed loob na 61 a taon.

⁸ Saray nilibo-libon Kristianon bibii, walad kasuloan tan de-asawaan, a manlilingkor bilang payunir tan misionaryo, so kontento ed saray kakaukolanen da ed bilay legan dan ikakayat so mensahe na Panarian diad saray teritorya ra a manlapud okupado iran syudad anggad nisulinek iran lugar. (Gawa 1:8) Dakel so angisakripisyo ed pakawalaan da na ayaman odino ananak ta pian sigpot iran makapanlingkor ed si Jehova. Walaray matoor a manusuporta ed kaasawaan da a manseserbi bilang managbiahen manangasikaso, tan nilibo met ya agagin bibii so manlilingkor ed saray ayaman a Bethel diad interon mundo. Maseguro, sarayan masakripisyon bibii so kabiangan ed “saray mabli a bengatla na saray amin a  nasyon” a mamapano na gloria ed abung nen Jehova.​—Aggeo 2:7.

9, 10. Panon ya imbalikas na pigaran membro na pamilya so apresasyon da ed maabig ya ehemplon impatnag na saray Kristianon asawan bibii tan kainaan?

⁹ Siempre, dakel a Kristianon bibii so walaan na saray responsabilidad ed pamilya; ingen ta iyuuna ra so intereses na Panarian. (Mateo 6:33) Oniay insulat na sakey a walad kasuloan a payunir ya agin bii: “Lapud agnagiing a pananisia tan maabig ya ehemplo nen nanay ko, sikato so akatulong a maong ed impagmaliw kon regular payunir. Diad tua, sikatoy sakey ed saray sankaabigan a kaibak ed panagpayunir.” Oniay inkuan na sakey ya asawan laki nipaakar ed akulaw to, ya ina na limaran mamarikit: “Say abung mi so naynay a malinis tan maayos. Pansiasiansiaen itan nen Bonnie a simpli tan ag-abuyandak ta pian niyapasakey na pamilya mi so espiritual iran kimey mi. Lapud maalwar a panagbadyet to ed saray gastosen mi, akapantrabaho ak a part-time ed loob na 32 a taon, ya akatulong ed siak a mangipanaon na malaem parad pamilyak tan ed espiritual iran pamaakaran. Imbangat met nen akulaw ko ed ananak mi so kaimportantian na inkakuli. Kanian sikatoy daydayewen ko.” Natan, sikaran sanasawa so manlilingkor ed sankamundoan a hedkuarter na saray Tasi nen Jehova.

¹⁰ Oniay insulat na sakey ya asawan laki nipaakar ed akulaw to, ya ina na angkabaleg laran ananak: “Saray kalidad a pandinayewan ko ed si Susan et say pirmin panangaro to ed Dios tan ed totoo, ontan met ed pakatalos, empatya, tan inkamatua to. Lawas ton nonodnonoten a si Jehova so makanepegan ed sankaabigan a bengatlan niiter tayo ed sikato​—sakey a prinsipyo ya iyaaplika to ed inkasikato bilang lingkor na Dios tan bilang sakey ya ina.” Diad tulong na akulaw to, sayan asawan laki so akapangawat na pigaran maespiritual a pribilehyo, pati say panserbi bilang matatken, payunir, onsasandin manangasikaso na sirkito, tan membro na Hospital Liaison Committee. Mabmabli irayan bibii ed kaasawaan da, ed kapara ran Kristiano, tan manuna ed amin, ed si Jehova!​—Uliran 31:28, 30.

Mabmablin Bibii ya Andian na Kaasawaan

11. (a) Panon ya impatnag nen Jehova so panangiyansakit to ed matoor iran bibii, nagkalalo la ed saray balo? (b) Anto so nipapaseguro ed saray Kristianon balon bibii tan arum niran matoor ya agagin bibii ya andian na asawa?

¹¹ Mabetbet ya impatnag nen Jehova so panangiyansakit to ed pankaabigan na saray balo. (Deuteronomio 27:19; Salmo 68:5; Isaias 10:1, 2) Agto ni anguman. Sikato so interesado nin maong, aliwa lambengat ed saray balo noagta ontan met ed saray mansusulon kainaan tan bibiin denesidi ray magmaliw a walad kasuloan odino lapud ag-ira akaromog na matukoy a Kristianon asawan laki. (Malaquias 3:6; Santiago 1:27) No sakey kayo ed saramay matoor a manlilingkor ed si Jehova ya andian na Kristianon kapareha ya onsuporta ed sikayo, makapanseguro kayo a mabmabli kayo ed imaton na Dios.

12. (a) Panon ya ipapatnag na pigaran Kristianon agagin bibii so katooran da ed si Jehova? (b) Antoran liknaan so tatalonaan na arum ed saray agagi tayon bibii?

¹² Alimbawa, konsideraen paray Kristianon agagin bibii ya ag-akiasawa lapud matoor a panguunor da ed simbawa nen Jehova a miasawa “dia ed linawa na Katawan lambengat.” (1 Corinto 7:39; Uliran 3:1) Sikara so pinaseguroan na Salitay Dios: “Dia ed matoor [si Jehova] so onkiwas ed katooran.” (2 Samuel 22:26, NW) Ingen, parad dakel ed sikara, sakey ya angat so pansiansian  walad kasuloan. Oniay inkuan na sakey ya agin bii: “Determinado ak a miasawa unong labat ed Katawan, balet aminpiga ak a nanakis lapud naiimatonan ko iray kakaarok ya akapiasawa la ed alay abig iran Kristianon lalaki, bangta wala ak ni ed kasuloan.” Oniay kuan na sakey nin agin bii: “Manseserbi ak ed si Jehova ed loob la na 25 a taon. Determinado ak a mansiansian matoor ed sikato, balet naynay ak a maneermen lapud pambukbukor ko.” Inyarum to ni: “Saray agagin bibii a singa siak so manpipirawat na panamabiskeg.” Panon itayon makatulong ed sarayan matoor?

13. (a) Anto so naaralan tayo ed alimbawan impatnag na saramay binmisita ed marikit nen Jefte? (b) Anto niray kaaruman a paraan a nipanengneng tayo so panangiyansakit ed saray mansusulon agagin bibii diad kongregasyon tayo?

¹³ Say sakey a paraan et naimano ed sakey ya alimbawa nensaman. Sanen ingguntang na marikit nen Jefte so pankanawnawan miasawa, amoria na totoo a sikato so nansakripisyo. Anto so ginawa ra pian sikatoy napabiskeg da? “Saray bibii ya anak na Israel onla ra a tinaon a mangambegya [“mangomenda,” NW] ed bii ya anak nen Jefte a Galaadita ed apat agew ed sakey taon.” (Uko-ukom 11:30-40) Ontan met, nepeg a masimoon tayon komendaan iray mansusulon agagin bibii a matoor a manguunor ed ganggan na Dios. * Anto ni so paraan a nipanengneng tayo so panangiyansakit tayo? Diad saray pikakasi tayo, nepeg tayon ikerew ed si Jehova a tulongan to iratan a papablien tan matoor ya agagin bibii a mantutultuloy ed serbisyo ra. Sikara so makanepegan na panamaseguro a sikara so aaroen a maong tan papablien nen Jehova tan say interon Kristianon kongregasyon.​—Salmo 37:28.

No Panon ya Ontalona Iray Mansusulon Ateng

14, 15. (a) Akin a nepeg a saray Kristiano a mansusulon kainaan so onkerew na tulong nen Jehova? (b) Panon so nayarin ikiwas na saray mansusulon atateng a mitunosan ed saray pikakasi ra?

¹⁴ Saray Kristianon bibii bilang mansusulon ateng so makakasagmak met na dakel ya angat. Balet, nayarian day onkerew na tulong ed si Jehova diad pamabaleg da ed ananak da unong ed saray prinsipyo na Biblia. Tua, no sakey kayon mansusulon ateng, agyo nayarian a sumpalen so betang na ina tan ama diad amin a pamaakaran. Anggaman kuan, ontulong ed sikayo si Jehova a manumpal ed dakel a responsabilidad yo no onkerew kayo na tulong to tekep na pananisia. Diad pangiyilustra: Nodnonoten pa a walay awit-awit yon ambelat a supot na saray sinaliw yo tan isegep yo itan ed apartment yon walad pigaran grado ni na sakey a bilding. Kasin piliten yo ni so mantakayan anta walay elevator? Siempre andi! Mipadpara, agyo sasalien ya awiten a bukor iray pakakabelatan na emosyon yo sano sarag yoy onkerew na tulong ed si Jehova. Diad tua, iimbitaan to kayon onkerew na tulong ed sikato. Inkuan na Salmo 68:19: “Nagalang so Katawan, a sikato agew-agew ya ililibitan to itayo na awi’tayo.” Ontan met, papasesegen kayo na 1 Pedro 5:7 ya ipaawit  ed si Jehova so amin a kapagaan yo, “ta sikato asikasoen to kayo.” Kanian sano nabebelatan kayo ed saray problema tan kapagaan, ipaawit yo iratan ed mangatatawen ya Ama yo, a gawaen itan ya “andi-tunda.”​—1 Tesalonica 5:17; Salmo 18:6; 55:22.

¹⁵ Alimbawa, no sakey kayon ina, maseguron papagaan yo so nipaakar ed impluensya na saray kalimog na ananak yo ed eskuelaan odino ed saray subsubok ed katooran da. (1 Corinto 15:33) Saraya so makatunongan a pampagaan. Balet saratan so nepeg met ya ipikasi. Diad tua, akin ta no ipikasi iratan kaiba so ananak yo sakbay ira ya onla ed eskuelaan, a nayarin kayari yon konsideraen so inagew-agew a teksto? Saray masimoon tan espisipikon pikakasi so nayarin nipaslep a maong ed kanonotan na ananak yo. Manuna ed amin, satan so pakagamoran yo na bendisyon nen Jehova sano maanos yon ipurek ed puso na ananak yo so Salita to. (Deuteronomio 6:6, 7; Uliran 22:6) Tandaan, “saray mata na Katawan wala ed saray matunong tan saray layag to imatleken to so pikakasi ra.”​—1 Pedro 3:12; Filipos 4:6, 7.

16, 17. (a) Anto so inkuan na sakey ya anak a laki nipaakar ed aron impatnag na ina to? (b) Panon ya akaapekto so espiritual a panmoria na ina ed ananak to?

¹⁶ Konsideraen pa so alimbawa nen Olivia, sakey ya ina na anemiran ugugaw. Sikaran saniina so tinaynan na agmananisian masiken to kayarin tuloy na inkianak na sankayugtanan, balet ta mabulos a sinakbat nen Olivia so responsabilidad ya ibangat ed ananak to so nipaakar ed saray dalan na Dios. Man-limay taon ed saman so anak a laki nen Olivia, a si Darren, a natan et 31 años to la tan manseserbi bilang Kristianon matatken tan payunir. Niarum ni ed saray pampapagaan nen Olivia, si Darren so walaan na seryoson problema ed bunigas a siansian mangogonigon ed sikato. No nodnonoten to so impanugaw to, oniay insulat nen Darren: “Nanonotan ko ni so panaalagar ko ed si Mommy legan ya akayurong ak ed dukolan ko ed ospital. Sikato so onyurong ed abay ko tan ibasaan to ak na Biblia ed inagew-agew. Insan kansionen to so kanta ed Panarian a ‘Misalamat Kami, Jehova.’ * Anggad natan, satan so labalabay kon kanta ed Panarian.”

¹⁷ ay panagmatalek tan panangaro nen Olivia ed si Jehova so akatulong ed intalona to bilang mansusulon ina. (Uliran 3:5, 6) Say maabig ya awawey to so apatnagan ed saray kalat ya impurek to ed ananak to. “Si Mommy so naynay a mamapaseseg ed sikami a gegemtanen so kalat a sigpot-panaon a ministeryo,” so inkuan nen Darren. “Bilang resulta, siak tan say apatira ed agagik a bibii so linmoob ed sigpot-panaon a ministeryo. Ingen, agbalot impangta nen Mommy ed arum so nipaakar ed sarayan bengatla. Panggugunaetan kon aligen iray alay abig a kalidades to.” Tua, aliwan amin ya ananak et manserbi ed Dios a singa saray ananak nen Olivia sano ombaleg la ira.  Balet sano gawaen na sakey ya ina so sankaabigan to pian manbilay unong ed saray prinsipyo na Biblia, sikato so napaseguroan ed panangigiya tan maaron tulong nen Jehova.​—Salmo 32:8.

18. Panon tayon nipatnag a papablien tayo so probisyon nen Jehova ed Kristianon kongregasyon?

¹⁸ itatarya so baleg a tulong na Dios diad panamegley na Kristianon kongregasyon, a ditan so regular a pakagamoran na tagano ed espiritual, say Kristianon impanaagi, tan saray matakken ed espiritual a ‘langkap a totoo.’ (Efeso 4:8) Mansasagpot iray matoor a mamatatken pian pabiskegen ya amin so walad kongregasyon, a mangiiter ira na nikaduman imano ed pankaukolan na “saray ulila tan babalo a bibii ed kaermenan da.” (Santiago 1:27) Kanian mansiansian maapit ed totoo na Dios, ya agbalot isisian so inkasikayo.​—Uliran 18:1; Roma 14:7.

Say Karakpan na Panagpasakop

19. Akin a say panagpasakop na asawan bii et agmankabaliksan na panangiyabeba, tan anton alimbawa ed Biblia so mamaneknek ed saya?

¹⁹ Pinalsa nen Jehova so bii bilang kapanoan na laki. (Genesis 2:18) Kanian, say panagpasakop na asawan bii ed masiken to so agmankabaliksan na panangiyabeba. Imbes, satan so mamagalang ed sakey a bii, a mangiyabuloy ed sikaton mangusar ed dakel iran langkap tan talento to a mitunosan ed linawa na Dios. Dedeskribien na Uliran kapitulo 31 so nanduruman kimey na makayarin asawan bii diad kadaanan ya Israel. Tinulongan to iray mankaukolan, nantanem na ubasan, tan nansaliw na dalin. On, “say puso na asawa to manmatalek ed sikato, tan agnakulangan na nabang.”​—Bersikulo 11, 16, 20.

20. (a) Panon so nepeg a panmoria na sakey a Kristianon bii ed saray abilidad, odino langkap ya inter ed sikato na Dios? (b) Antoran maabig a kalidad so impatnag nen Ester, tan panon so impangusar nen Jehova ed sikato?

²⁰ Say masimpit tan matakot ed Dios a bii so agmangipaatagey ed sikaton dili odino milaslasan ed masiken to. (Uliran 16:18) Agto uunaen so panliketan ton dili diad saray sekular a gegemtan noagta uusaren to iray langkap ya inter ed sikato na Dios a manserbi ed arum​—say pamilya to, saray kaparan Kristiano, kaparan totoo, tan manuna ed amin, si Jehova. (Galacia 6:10; Tito 2:3-5) Konsideraen pa so alimbawa na Biblia a si Reyna Ester. Anggaman sikatoy maganggana, sikato so masimpit tan mapasakop. (Ester 2:13, 15) Sanen akiasawa, impatnag to so aralem a respeto ed masiken to, si Arin Ahasuerus, aliwan singa si Vasti, a datin asawa na ari. (Ester 1:10-12; 2:16, 17) Si Ester so marespeto met ed opinyon na matatken lan kapinsan ton si Mardokeo, diad matukoy iran pamaakaran​—anggan sanen sikatoy nagmaliw lan reyna. Balet ta sikato so aliwan maletey! Makpel ton inwalwal si Haman, say maimpluensya tan maruksan too ya angiplanon mangupot ed saray Judio. Matalonggaring ya inusar nen Jehova si Ester pian niliktar so totoo To.​—Ester 3:8–4:17; 7:1-10; 9:13.

21. Panon so pagmaliw na sakey a Kristianon bii a lalon mabmabli ed si Jehova?

²¹ Nensaman tan natan, mabitar a saray maridios a bibii so angipatnag ed nikabkabiig a debosyon da ed si Jehova tan ed panagdayew da ed sikato. Kanian, saray matakot ed Dios a bibii so mabmabli ed imaton nen Jehova. Sikayoran Kristianon agagin bibii, abuloyan yo so espiritu nen Jehova a mantultuloy a manmoldi ed sikayo pian magmaliw kayo a lalon makaroyroyon “baseha,” a “sipaparaan ed amin a gawan maabig.” (2 Timoteo 2:21, NW; Roma 12:2) Nipaakar ed saratan a mabmablin managdayew, oniay kuan na Salitay Dios: “Ikdan mo na bunga na saray lima to; et sikato so idayew komon na saray gawa to ed saray wangalan.” (Uliran 31:31) Komon ta ontan so paneknekan na balang sakey ed sikayo.

[Saray paimano ed leksab]

Kasin Natandaan Yo?

• Panon a pinaneknekan na pigaran Kristianon bibii nen inmunan siglo a mabmabli ira ed imaton nen Jehova?

• Panon a pinagmaliw na dakel ya agagin bibii ed panaon tayo a mabmabli ira ed Dios?

• Diad antoran paraan so panutulong nen Jehova ed saray mansusulon kainaan tan arum nin agagin bibii ya andian na asawa?

• Panon a nipatnag na sakey a bii so masimoon a respeto ed uksoyan na inkaulo?

[Tepetepet Parad Panagaral]

[Kahon ed Pahina 17]

Saray Ehemplon Nodnonoten

Kasin labay yon konsideraen so pigaran kaaruman ya alimbawa na matoor a bibii ya asalambit ed Biblia? No ontan, ipangasin basaen iray nisitan teksto ed leksab. Legan yon dadalepdepen so nipaakar ed nanduruman indibidual ya akalista, ipangasin tebeken a maong iray prinsipyo a malaknab a niyaplika yo ed bilay yo.​—Roma 15:4.

◆ Sarah: Genesis 12:1, 5; 13:18a; 21:9-12; 1 Pedro 3:5, 6.

◆ Mabunlok ya Israelitan bibii: Exodo 35:5, 22, 25, 26; 36:3-7; Lucas 21:1-4.

◆ Debora: Uko-ukom 4:1–5:31.

◆ Rut: Rut 1:4, 5, 16, 17; 2:2, 3, 11-13; 4:15.

◆ Bii ed Shunem: 2 Arari 4:8-37.

◆ Bii a taga-Fenicia: Mateo 15:22-28.

◆ Marta tan Maria: Marcos 14:3-9; Lucas 10:38-42; Juan 11:17-29; 12:1-8.

◆ Tabita: Gawa 9:36-41.

◆ Say apatiran mamarikit nen Felipe: Gawa 21:9.

◆ Febe: Roma 16:1, 2.

[Litrato ed pahina 15]

Kasin kokomendaan yo iray agagin bibii ya andian na asawa, a matoor a manguunor ed ganggan na Dios?

[Litrato ed pahina 16]

Antoray nayarin espisipikon ikerew ed pikakasi kaiba so ananak sakbay ira ya onla ed eskuelaan?