Tepetepet Manlapud Saray Managbasa

Akin a kinmerew si Eliseo na “mamidua a kabiangan” na espiritu nen Elias?

Sakbay a nasumpal nen Elias so kimey to bilang propeta ed Israel, oniay kinerew ed sikato na malangwer a propetan si Eliseo: “Pikasik ed sika, a say mamidua a kabiangan na espiritum onla komon ed siak.” (2 Arari 2:9) Diad espiritual a pantalos, say mamiduan karakel ya apag so mapatnag a kinerew nen Eliseo a singa samay iiter ed panguloan ya anak. (Deuteronomio 21:17) Napalinew iya diad antikey a pangonsidera ed salaysay tan makaaral itayo na leksion manlapud agawa.

Unong ya indirehi nen Jehova, nilanaan nen propetan Elias si Eliseo bilang kasalat to. (1 Arari 19:19-21) Diad loob na manga anem taon et nanlingkor si Eliseo bilang matoor a katambayan nen Elias tan determinadon manggawa ed satan anggad kasampotan. Anggan diad unor lan agew nen Elias bilang propeta ed Israel, si Eliseo so agsinmian ed managbangat tan mananimbawa to. Anggaman binagaan nen Elias si Eliseo ya agla ontutumbok ed sikato, oniay amitlon inkuan na malangwer a propeta: “Agta ka paulyan.” (2 Arari 2:2, 4, 6; 3:11) On, impasen nen Eliseo so masiken lan propeta bilang espiritual ya ama to.​—2 Arari 2:12.

Anggaman ontan, aliwa labat a si Eliseo so espiritual ya anak nen Elias. Akilimog met si Elias tan Eliseo ed sakey a grupo na lalaki a kabkabat a “saray anak na saray propeta.” (2 Arari 2:3) Ipapabitar na salaysay ed Komaduan Arari a maap-apit met irayan “anak” ed espiritual ya ama ra, si Elias. (2 Arari 2:3, 5, 7, 15-17) Ingen, bilang nilanaan a kasalat, si Eliseo so manunaan ed limog na saray espiritual ya anak nen Elias​—a singa sikato so panguloan. Diad kadaanan ya Israel, say literal a panguloan so makaawat na duaran apag ed tawir nen Ama to, bangta parad arum ya ananak et sakey ya apag so naawat na kada sakey. Kanian, kinmerew si Eliseo na mamidua a kabiangan na espiritual a tawir nen Elias.

Akin ya ontan so kinerew nen Eliseo diad saman a pankanawnawa? Lapud sikatoy magano lan manakbat na ambelat a kimey​—salanti onsalat ed si Elias bilang propeta ed Israel. Atebek nen Eliseo a pian nasumpal to iray responsabilidad a misiglaotan ed sayan makapatalaw a kimey, kinaukolan to so espiritual a pakayari a labas ed dili iran pakasarag to, a si Jehova lambengat so makapangiter. Kinaukolan to so magmaliw a makpel a singa met ed si Elias. (2 Arari 1:3, 4, 15, 16) Kanian, sikatoy kinmerew na mamidua a kabiangan na espiritu nen Elias, say espiritu na inkakpel tan say “sigpot ya inkaseseg parad si Jehova”​—saray kalidad a papawalaen na espiritu na Dios. (1 Arari 19:10, 14, NW) Panon so inkiwas nen Elias?

Amta nen Elias a say bengatlan kinerew nen Eliseo et agto kanepegan ya iter noagta say Dios labat so makapangiter. Kanian oniay mapaabeban inyebat nen Elias: “Kinerew mo so mairap a bengatla: Anggaman ontan, no nanengneng mo ak sano naekal ak a manlapu ed sika, sikato naani so ontan ed sika.” (2 Arari 2:10) Tan, inabuloyan a tua nen Jehova a nanengneng nen Eliseo so insegep nen Elias panamegley na alimbusabos. (2 Arari 2:11, 12) Nipagamor ed si Eliseo so kerew to. Sikato so inikdan nen Jehova na espiritu a kinaukolan to pian nagawaan to so balon kimey to tan pian natalonaan iray onsabin subsubok.

Natan et saray alanaan a Kristiano (a tatawagen no maminsan a say Eliseon klase) tan saray lingkor na Dios ed inkalapagan so napaseseg a tuloy manlapud sayan salaysay na Biblia. Walay panaon a nayarin liknaen tayon nabebelatan itayo tan ag-itayo la kualipikadon mangawat na balon asainmin, odino nayarin naaandi la so inkakpel tayo pian mantultuloy ed panangipulong na Panarian legan ya ompapalalo so agpananginenen odino isusumpa diad teritorya tayo. Ingen, no onkerew itayo na tulong ed si Jehova, ikdan to itayo na masanton espiritu to unong a nakaukolan tayo itan pian natalonaan iray angat tan saray manguuman a sirkumstansya. (Lucas 11:13; 2 Corinto 4:7; Filipos 4:13) On, no panon a pinabiskeg nen Jehova si Eliseo lapud ambelat iran responsabilidad to, sikatoy ontulong met ed sikatayon amin, ugaw man odino matatken, pian nasumpal so ministeryo tayo.​—2 Timoteo 4:5.