Kasin Napanisiaan Mo so Paraison Dalin?

DAISET so totoon manisia a say dalin et magmaliw a sakey a paraiso. Ipapasen na dakel a temporaryo labat so dalin. Inkuan na libron The Sacred Earth ya insulat nen Brian Leigh Molyneaux, a sayan globo so niwala lapud ‘baleg ya insabog ed liwang’ minilyon a taon lay apalabas. Tan no agderalen na mismon too so dalin, dakel so manisia a satan tan say interon uniberso et “natunaw odino naulam ed singa-bolan apoy” diad kaunoran.

Say koma-17 a siglon Ingles a manag-anlong a si John Milton so andian na ontan a negatibo iran kanonotan. Diad makapadinayew ya anlong to a Paradise Lost, insulat to a pinalsa na Dios so dalin pian magmaliw a Paraison ayaman na pamilya na too. Satan ya orihinal a paraiso et abalang. Balet, panisiaan nen Milton a nipawil itan tan nasabi panaon et si Jesu-Kristo bilang mananondon so “manumang ed saray matoor ed sikato, tan mangabrasa ed sikara diad paraiso . . . diad Tawen odino Dalin.” Oniay matalek ya imbaga nen Milton: “Diad ontan et magmaliw a Paraiso so interon Dalin.”

Paraiso​—Diad Tawen Odino Diad Dalin?

Mipara so panmoria na dakel a relihyoson totoo ed panmoria nen Milton a diad kaunoran et sikara so natumangan lapud saray ir-irap tan ot-ot a kinaukolan a sungdoan da diad dalin. Balet iner so pakapanggayagaan da ed satan a tumang? Kasin “diad Tawen odino Dalin”? Aliwan diad dalin so walad kanonotan na arum. Ibabaga ra a panggayagaan labat na totoo so “paraiso” sano taynan da la so dalin tan manayam ira ed pasen na saray espiritu diad tawen.

Diad libron Heaven​—A History, inkuan na saray autor a si C. McDannell tan B. Lang a panisiaan na komaduan-siglon teologo a si Irenaeus a say bilay ed nipawil a paraiso et “agnagawa diad arawdawin mangatatawen ya ayaman, noagta dia ed dalin.” Inkuan na satan a libro ya anggaman inilaloan na saray relihyoson lider a si John Calvin tan Martin Luther a sikaray onla ed tawen, panisiaan da met a “say Dios so mamasimbalo ed dalin.” Mipara ed satan iray sisiaen na saray membro na arum a relihyon. Inkuan met nen McDannell tan Lang a panisiaan na arum a Judio a diad aturon panaon na Dios, amin a kairapan na too so “naandi la tan niwala so makapnek a bilay diad dalin.” Unong ed sisiaen na kadaanan a Persia, “say orihinal a kipapasen na dalin so nipawil tan saray totoo so manayam lamet ed kareenan,” so inkuan na The Encyclopaedia of Middle Eastern Mythology and Religion.

Anto so agawa ed iilaloan a paraison dalin? Kasin say kiwawala tayo dia ed dalin et ginetma a temporaryo lambengat? Unong a sinisia na inmunan-siglo a Judion pilosopo a si Philo, kasin satan so “magangganon eksperiensya, a maslak et makapasinagem” diad pamapaarap ed pasen na saray espiritu? Odino kasin wala so sananey a gagala na Dios sanen pinalsa to so dalin tan impanayam to so totoo ed paraiso? Kasin naromog na katooan so puron espiritual a kapenek tan sigpot a liket dia mismo ed dalin? Akin ya ag-usisaen so ibabaga na Biblia nipaakar ed saya? Nayarin nikuan yo, unong ya ibabaga la na minilyon, a talagan makatunongan so panilalo ed kipawil na mangaraldalin a paraiso.

[Litrato ed pahina 3]

Panisiaan na manag-anlong a si John Milton a nipawil lamet so Paraiso

 [Picture Credit Line ed pahina 2]

COVER: Earth: U.S. Fish & Wildlife Service, Washington, D.C./NASA

[Picture Credit Lines ed pahina 3]

Dalin: U.S. Fish & Wildlife Service, Washington, D.C./NASA; John Milton: Leslie’s