Manpulong Pian Makapanggaway Babangatan
Manpulong Pian Makapanggaway Babangatan
“Sanen [si Apolos] so nadngel di Priscila tan Aquila, sikato so inawit da, et impaliwawa ra ed sikato ed lalo ya ayadyari so dalan na Dios.”—GAWA 18:26.
1. (a) Anggaman sikato so ‘marlang ed espiritu,’ anto so kulang ed si Apolos? (b) Anto so nakaukolan nen Apolos pian nawalaan na sigpot a pakatalos ed espiritual iran pamaakaran?
NAIMANO di Priscila tan Aquila, a sanasawan Kristiano nen inmunan siglo, so impanpaliwawa nen Apolos ed sakey a sinagoga diad syudad na Efeso. Lapud maong a pananalita to tan abilidad ton manangguyor, asagyat toy imano na dumerengel to. Sikato so “maralit [“marlang,” NW] ed espiritu,” tan “nambabangat a maseet na saray bengatlan nipaakar ed Jesus.” Balet, mapatnag a ‘say amta lambengat nen Apolos et binyag nen Juan.’ Tua so impulong nen Apolos nipaakar ed Kristo balet ta limitado labat. Say problema et aliwan magenap so pikakabat nen Apolos. Nakaukolan ya ondaak so pikakabat to ed betang nen Jesu-Kristo diad kasusumpal na gagala nen Jehova.—Gawa 18:24-26.
2. Anton angat so inawat di Priscila tan Aquila?
2 Mabulbulos si Priscila tan Aquila a tinmulong ed si Apolos pian nasumpal to so “amin a bengabengatla” ya ingganggan nen Kristo. (Mateo 28:19, 20) Ibabaga na salaysay a si Apolos et “inawit da, et impaliwawa ra ed sikato ed lalo ya ayadyari so dalan na Dios.” Balet walaray sengegan no akin a masuyat iray arum a Kristiano a mangibangat ed si Apolos. Anto iratan a sengegan? Tan anto so naaralan tayo ed saray sagpot di Priscila tan Aquila a mangisingbat na Kasulatan ed si Apolos? Panon itayon natulongan na panrepaso ed sayan maawaran a salaysay pian niyapasakey tayoray sagpot tayo ed pangigapo na saray panangiyaral na Biblia?
Imanoen Iray Pankaukolan na Totoo
3. Akin a say kipapasen nen Apolos et ag-angamper ed si Priscila tan Aquila a mangibangat ed sikato?
3 Lapud Judio so poli to, si Apolos so mapatnag a binmaleg ed syudad na Alexandria. Say Alexandria et kabisera ed saman na Ehipto tan sentro na atagey ya edukasyon, a bantog itan lapud baleg a librarya to. Say syudad so walaan na baleg a Judion populasyon, pati saray iskolar. Kanian, say Griegon patalos ed Hebreon Kasulatan a kabkabat bilang Septuagint so pinawala diman. Agpankelawan a si Apolos et “makapanyari [o mikabisadon tuloy] ed saray sulat”! Si Aquila tan Priscila et managgaway-tolda. Kasin tinmalaw ira ya ontulong ed si Apolos lapud maong a pananalita to? Andi. Lapud aro ra et ninonot da so too, saray pankaukolan to, tan no panon dan tulongan.
4. Iner tan panon so impakaawat nen Apolos ed tulong a nakaukolan to?
4 Anggan panon lay inkadunong nen Apolos a manalita, nakaukolan toy nabangatan. Say tulong a nakaukolan to so agnaromog ed antokaman ya unibersidad balet naromog labat ed limog na saray kaparan membro na Kristianon kongregasyon. Si Apolos so nagunggonaan ed saray punto a manresulta ed mas suston pakatalos ed uksoyan na Dios parad kilalaban. Sikato so “inawit [nen Priscila tan Aquila], et impaliwawa ra ed sikato ed lalo ya ayadyari so dalan na Dios.”
5. Anto so nibaga yo nipaakar ed espiritualidad nen Priscila tan Aquila?
5 Si Priscila tan Aquila so mabiskeg ed espiritual tan walaan na malmalet a pananisia. Maseguron ‘akaparaan ira lawas ya onebat ed siopakaman a mankaukolan ya ipaliwawa so gapo na satan ya ilalo a wala ed sikara,’ balanglan satan a too et mayaman, mairap-bilay, iskolar, odino sakey ya aripen. (1 Pedro 3:15) Ayarian nen Aquila tan say akulaw to a ‘suston usaren so salita na katuaan.’ (2 Timoteo 2:15, NW) Mapatnag, sikara so seryoson manaaral na Kasulatan. Si Apolos so pirmin apakiwas ed panangibangat a nibase ed ‘salita na Dios, a mabilay tan mabiskeg,’ a mangaapekta ed puso.—Hebreos 4:12.
6. Panon tayon naseguro ya inapresya nen Apolos so intulong ed sikato?
6 Inapresya nen Apolos so alimbawa na saray angibangat ed sikato tan nagmaliw a lalon marundunong ed panaggawa na babangatan. Inusar to so pikakabat to ed epektibon paraan diad panangiyabawag na maong a balita, nagkalalo la ed limog na Judion populasyon. Si Apolos so mausa-usar ed pananangguyor ed saray Judio nipaakar ed si Kristo. ‘Lapud sikatoy mapuersa ed Kasulatan,’ apaneknekan to ed sikara ya iilaloan na amin a propeta nensaman so isabi na Kristo. (Gawa 18:24, Kingdom Interlinear Translation) Iyaarum na salaysay a si Apolos so linma ed Acaya, a “dakel so intulong to ed saray anisia, lapu ed panamegley na grasya [na Dios]. Ta tinalo to so saray Judios ed sankabalgan a pakayari ed arap na karaklan, ya impaliwawa to ed panamegley na saray sulat a si Jesus sikato so Kristo.”—Gawa 18:27, 28.
Makaaral ed Alimbawa na Arum Iran Managbangat
7. Panon so impagmaliw nen Aquila tan Priscila a marunong a managbangat?
7 Panon so impagmaliw nen Aquila tan Priscila ya epektibon managbangat na Salita na Dios? Nilikud ed inkaseet da ed personal a panagaral tan iyaatendi ed miting, say maapit ya impilimog da ed si apostol Pablo so akatulong a maong ed sikara. Diad loob na 18 a bulan, si Pablo so nanayam ed abung di Priscila tan Aquila diad Corinto. Saniiba iran nankimey diad panaggawa tan panag-apiger na saray tolda. (Gawa 18:2, 3) Isipen pa so aralem a pantotongtong da nipaakar ed Kasulatan. Tan agaylan panamabiskeg ed espiritualidad da so ontan ya impilimog ed si Pablo! ‘Say miulop ed saray makabat a totoo, et makabat naani,’ so inkuan na Uliran 13:20. Say maabig a pililimog so walaan na maabig ya epekto ed espiritualidad da.—1 Corinto 15:33.
8. Anto so naaralan nen Priscila tan Aquila diad impangobserba ra ed ministeryo nen Pablo?
8 Sanen naobserbaan di Priscila tan Aquila si Pablo bilang manangiyabawag na Panarian, anengneng dan mismo so alimbawa na sakey a maong a managbangat. Ibabaga na salaysay ed Gawa a si Pablo so “nankatunongan ed sinagoga [diad Corinto] ed amin a Sabaton et sineetan to a sinimbawa so saray Judios tan Griegos.” Diad saginonor, sanen sikatoy akiulop ed si Silas tan Timoteo, si Pablo so “naspot a tuloy ed panagpulong a papaletan to ed saray Judios a si Jesus sikato so Kristo.” Sanen agtanton interesado iray membro na sinagoga, naimano nen Priscila tan Aquila ya inmalis si Pablo ed lugar a mas ondengel iray pupulongan to, dia ed sakey ya abung a walad abay na sinagoga. Ditan et atulongan nen Pablo si Crispo, “a pangulo na sinagoga,” pian magmaliw a babangatan. Maseguro a naimano nen Priscila tan Aquila a say impagmaliw na satan a babangatan so walaan na baleg tan mabungan epekto ed teritorya. Oniay ibabaga na salaysay: “Si Crispo . . . anisia ed Katawan, pati amin a kaamong to: et dakel ed saray taga Corinto so nandengel, et anisia ra, tan abinyagan ira.”—Gawa 18:4-8.
9. Panon so inkiwas nen Priscila tan Aquila ed ehemplo nen Pablo?
9 Say ehemplo nen Pablo ed lawak na ministeryo so inalig na arum a manangiyabawag na Panarian, a singa si Priscila tan Aquila. Oniay imbilin na apostol ed arum niran Kristiano: “Mialig kayo komon ed siak, singa siak met ed Kristo.” (1 Corinto 11:1) Mitunosan ed alimbawa nen Pablo, tinulongan nen Priscila tan Aquila si Apolos pian mas onlinew so pakatalos to ed saray Makristianon bangat. Bilang resulta, tinulongan to met so arum. Andi-duaruwan akatulong si Priscila tan Aquila ed panaggawa na babangatan ed Roma, Corinto, tan Efeso.—Gawa 18:1, 2, 18, 19; Roma 16:3-5.
10. Anto so naaralan yo ed Gawa kapitulo 18 a makatulong ed panaggawa yo na babangatan?
10 Anto so naaralan tayo ed impangonsidera tayo ed Gawa kapitulo 18? Bueno, singa si Aquila tan Priscila ya akaaral ed si Pablo, napaaligwas tayo so abilidad tayon manggawa na babangatan diad panumbok ed ehemplo na saray maong a managbangat na Salitay Dios. Nayarian tayo so milimog ed saramay “okupadon maong ed salita” tan “sigpot a mantatasi” ed arum. (Gawa 18:5, Kingdom Interlinear Translation) Naobserbaan tayo no panon so impanabi ra ed puso na totoo diad impangusar da ed makatangguyor iran dunong da ed panagbangat. Saratan a dunong so makatulong ed sikatayo a manggawa na saray babangatan. Sano mangiyaaral tayo na Biblia ed sakey a too, nayarin isuheri tayo ya imbitaan to so arum niran membro na pamilya to odino kakaabay to a mibiang ed panagaral. Odino nayarin kerewen tayo ed sikato a mangirekomenda na arum a pakapangiyopresian tayo na panagaral na Biblia.—Gawa 18:6-8.
Mamawala na Saray Pankanawnawan Makapanggaway Babangatan
11. Iner so pakaromogan na saray balon babangatan?
11 Nanggunaetan nen Pablo tan saray kapara ton Kristiano so manggaway babangatan diad pampulong ed kabkaabungan, diad tindaan, tan diad pambiabiahe ra—on, inerman a pasen. Bilang maseseg a komikimey ed Panarian a manggugunaet a manggaway babangatan, sarag yo kasin palaknaben iray aktibidades yo ed lawak na kimeyan? Kasin aanamoten yo iray pankanawnawa a mananap ed saray makanepegan tan pulongan ira? Anto so pigaran paraan ya aromog na saray kapara tayon manangipalapag na maong a balita iray babangatan? Imanoen tayo nin unona so aspekton panagpulong diad panamegley na telepono.
12-14. Pian niyilustra iray gunggona ed panagpulong panamegley na telepono, isalaysay yo pa so eksperiensya yon mismo odino sakey ed saray eksperiensya ed sarayan parapo.
12 Legan a mankakabkaabungan ed Brazil, sakey a Kristiano a tawagen tayon Maria so akapangiter na tract ed sakey a bii ya ompaway la ed sakey ya apartment. Diad impangusar to ed titulo na tract bilang introduksion, oniay intepet nen Maria: “Labay moy makaaral nin maong diad Biblia?” Inmebat so bii: “Labalabay ko. Say problema balet et sakey ak a maestra, tan okupado ak a maong ed panagbangat.” Impaliwawa nen Maria a nayarian dan aralen iray tema na Biblia diad telepono. Inter na bii so numero na telepono to ed si Maria, tan diad saman a labi, inggapo to so impaiyaralan ed telepono ya inusar da so brosyur ya Anto so Kakaukolanen na Dios ed Sikatayo? *
13 Legan a mibibiang ed panagpulong panamegley na telepono, sakey a sigpot-panaon a ministro diad Etiopia so abigla sanen akatongtong to so sakey a laki a maingal so kaliberliber to. Inkerew na laki a sikatoy ontawag la ed saginonor. Sanen sikatoy tinmawag lamet, kinmerew iman a laki na dispensa tan inkuanton diad samay intawag ton inmuna et mansesebeg ira nen akulaw to. Inusar na agin bii itan a komento bilang pankanawnawa ya ipabitar so makabat a panangigiya na Biblia diad pangarap ed saray problema ed pamilya. Inkuan na agin bii ed sikato a dakel a pamilya so atulongan la na Say Sekreto na Liket ed Pamilya, sakey a libron impalapag na saray Tasi nen Jehova. Kayari na pigaran agew sanen nipatulor so libro, tinmawag lamet so agin bii ed saman a laki. Oniay inkuan na laki: “Insalba na sayan libro so panamaley ko!” Diad tua, tinugyop to so pamilya to pian inabang to iray maabig a punto ya abasa to ed libro. Nigapo so panangiyaral na Biblia, tan agnambayag et regular lan inmatendi iyan laki ed saray Makristianon miting.
14 Oniay inkuan na sakey a manangiyabawag na Panarian ed Denmark ya akapangigapo na panangiyaral na Biblia diad impanpulong ed panamegley na telepono: “Pinaseseg ak na service overseer a manpulong diad panamegley na telepono. Diad gapo et masuyat ak, a kuanko: ‘Agko labay.’ Balet, sakey ya agew et nampakpel ak tan sinalik so tinmawag ed primeron unabung. Inmebat si Sonja tan, kayari na antikey ya impitongtong et sikatoy angawat na literatura a nibase ed Biblia. Sakey a labi et siningbat mi so tema nipaakar ed panamalsa, tan labay ton basaen so Life—How Did It Get Here? By Evolution or by Creation. * Inkuan ko a mas maabig no personal min singbaten so tema. Inmabobon si Sonja, tan sikato lay akaparaan a paiyaralan sanen sinmabi ak, tan manlapu la’d saman et kada simba kami a nanaral.” Oniay inkuan na Kristianon agi tayo: “Diad loob na dakel a taon et nampikasi ak a nawalaan na iyaaralan na Biblia, balet agko ilaloan a makaromog ak diad impanpulong ko ed telepono.”
15, 16. Antoran eksperiensya so nisalaysay yo a mangipanengneng ed gunggona na pagmaliw ya alerto ed nanduruman paraan na pangigapo ed panangiyaral na Biblia?
15 Panggagayagaan na dakel so aligwas lapud impangiyaplika ra ed saray suhestion a pulongan so totoo inerman so kawalaan da. Imparada na sakey a Kristianon bii ed Estados Unidos so kotsi to ed abay na sakey a van. Sanen sikatoy naimano na bii ed loob na van, inggapo na agin bii ya ipaliwawa so nengneng na kimey tayo a panangibangat na Biblia. Dinmengel so bii, pinmaway ed luluganan, tan inmasingger ed kotsi na bii. Inkuanto: “Malikeliket ak ta kinatongtong mo ak. Abayag lan anggapoy naawat kon literatura yo a nibase ed Biblia. Sakey ni et labay ko lamet so paiyaralan na Biblia. Nayarin iyaralan mo ak?” Apawala na agi tayon bii so maabig a kipapasen pian ninabang to so maong a balita.
16 Sakey ya agin bii diad Estados Unidos so awalaan na onggendan ya eksperiensya sanen sikatoy binmisita ed nursing home: Inasinggeran to so direktor ya inkargado ed pigaran aktibidades ed loob na pasilidad tan inkuan to a labay toy manboluntaryon mangitarya na espiritual a pankaukolan na saray manaayam diman. Inyarum ni na agi tayo a sikatoy maliket a mangikondukta na libren panangiyaral na Biblia ed kada simba diad amin a malabay ya onatendi. Sikatoy inabuloyan na direktor ya ombisita ed saray kuarto na nanduruman manaayam ditan. Agnambayag et sikatoy akapangikondukta na panangiyaral na Biblia a tugyopen na 26 a manaayam ditan a mamitlo ed kada simba, tan sakey ed saratan so regular lan onaatendi ed saray miting.
17. Anton metodo so mabetbet ya epektibo diad pangigapo na panangiyaral na Biblia?
17 Parad pigaran manangiyabawag na Panarian, say direktan pangiyopresi na panangiyaral na Biblia so mamawala na maabig a resulta. Sakey a kabuasan et nanggawa na nikaduman sagpot so sakey a kongregasyon a walaan na 105 a manangipalapag pian mangiyopresi ira na panangiyaral na Biblia ed kada unabung a nakatongtong da. Walomplo tan anem a manangipalapag so akibiang ed lawak na serbisyo, tan kayari na duay oras ed panagpulong, nalmoan dan walay nigapon 15 a balon panangiyaral na Biblia.
Mantultuloy ya Anapen Iray Makanepegan
18, 19. Anton importantin panangidirehi nen Jesus so nepeg a nodnonoten tayo, tan pian nagawaan itan et anto so nepeg tayon determinadon gawaen?
18 Bilang manangiyabawag na Panarian, nayarin labay yon salien iray suhestion ed sayan artikulo. Siempre, makabat so pangikonsidera ed lokal iran kustombre sano nononoten tayon usaren iray metodo na panagpulong. Manuna ed amin, komon ta sinononot itayo ed panangidirehi nen Jesus ya anapen iray makanepegan tan tulongan iratan ya indibidual a magmaliw a babangatan.—Mateo 10:11; 28:19.
19 Pian nagawaan itan, komon ta ‘suston usaren tayo so salita na katuaan.’ Nagawaan tayo itan diad pangagamil na pananangguyor a malet a nibase ed Kasulatan. Saya so ontulong ed sikatayo a manenyeg ed puso na saray ondengel tan mamakiwas ed sikara. Diad masimoon a panmatalek tayo ed si Jehova, makapibiang itayo ed pananulong ed arum a magmaliw a babangatan nen Jesu-Kristo. Tan agaylan makapatumang iyan kimey! ‘Gawaen tayo sirin so anggaay nayarian tayo ya ompatnag a naabobonan ed arap na Dios,’ a lawas igalang si Jehova bilang maseseg iran manangiyabawag na Panarian, a manpupulong tekep na gagalan makapanggawa na saray babangatan.—2 Timoteo 2:15, NW.
[Saray paimano ed leksab]
^ par. 12 Impalapag na saray Tasi nen Jehova.
^ par. 14 Impalapag na saray Tasi nen Jehova.
Kasin Natandaan Yo?
• Akin a nakaukolan a lalon sigpot ya ipaliwawa ed si Apolos so nipaakar ed dalan na Dios?
• Diad antoran dalan ya akaaral si Priscila tan Aquila ed si apostol Pablo?
• Unong ed Gawa kapitulo 18, anto so naaralan yo ed panaggaway-babangatan a kimey?
• Panon yon napawala iray pankanawnawan makapanggawa na saray babangatan?
[Tepetepet Parad Panagaral]
[Litrato ed pahina 18]
“Impaliwawa [di Priscila tan Aquila ed si Apolos] ed lalo ya ayadyari so dalan na Dios”
[Litrato ed pahina 20]
Si Apolos so nagmaliw a marunong ed panaggawa na babangatan
[Litrato ed pahina 21]
Si Pablo so nampulong ed inerman a pasen a nakar to
[Saray litrato ed pahina 23]
Mamawala na saray pankanawnawan makapanpulong