Sakey a Mundo ed Arapen ya Anggapo lay Krimen

ISIPEN pa, no sarag mo, so nipaakar ed sakey a mundo ya anggapo la ray kriminal! Agla nakaukolan iray polis, prisoan, odino say magastos tan komplikado iran sistema na hustisya ed krimen. Sakey itan a mundo a say kada too so manrespeto la ed bilay tan kayarian na arum. Kasin imposible itan? Nayarin ontan so padesir mo, balet sayan makapakelaw a pananguman so isisipan a mismo na Biblia. Akin ya agkonsideraen no anto so impasakbay na Kasulatan nipaakar ed krimen tan arum niran kaugsan diad dalin?

Oniay nabasa tayo diad libro na saray Salmo: “Agmo gonigonen so inkasika nisengeg ed saray managgawa na mauges, nisay makasisiblet ka ed saray managgaway kasulitan. Ta sikara nasipsip ira a magano a singa dika, tan namagaan a singa malangbot a balansi. Ingen ta saray mauyamo tawiren da naani dalin: tan manliket ira a dili ed inkadaakan na kareenan.” (Salmo 37:1, 2, 11) Peteg ya anggapo so makaamper ed Dios diad panumpal to ed sayan sipan tan ed arum niran makapaseseg a sipan to.

Say paraan na Dios ed pangitarok na sarayan bendisyon et say Panarian to. Diad Pikakasi na Katawan, imbangat nen Jesu-Kristo iray patumbok to ya ipikasi ran onsabi iyan Panarian tan nagawa so linawa na Dios “unong ed tawen, ontan met ed dalin.” (Mateo 6:9, 10) Agla manbayag, diad silong na satan a Panarian, anggapo la diad dalin so napakiwas a manggawa na krimen lapud kairapan na panagbilay, panaglames, odino inkasiblet. Imbes, oniay imbaga na Salitay Dios: “Wala so daakan ya ilik ed tapew na dalin ed tapew na toktok na saray palandey.” (Salmo 72:16) On, itaryaan nen Jehova a Dios so amin a totoo diad dalin na daakan a suplay na saray maabig a bengatla. Nagkalalon importante, say sosyedad na too so niletneg unong ed panangaro ed Dios tan ed kaparan too, tan aglan balot nagulo so mundo lapud krimen.