‘Suston Usaren so Salita na Dios’

“Seetan mo a sikukuli so ompatnag a naabobonan ed arap na Dios, a singa tometeger ya anggapo so ibaing to, ya agamilen mo ed matunong [“suston usaren,” NW] so salita a tua.”​—2 TIMOTEO 2:15.

1, 2. (a) Akin a nakaukolan na saray komikimey iray kagawaan? (b) Diad anton kimey so pibiangan na saray Kristiano, tan panon dan ipatnag ya uunaen da so Panarian?

 NAKAUKOLAN na saray komikimey iray kagawaan ta pian nasumpal da iray kimey da. Balet, aliwan magenap so basta pakawalaan na antokaman a kagawaan. Nakaukolan na komikimey so dugan kagawaan, tan nepeg ton usaren itan diad suston paraan. Singa bilang, no mangipapaalagey kayo na siroman et labay yon pantuopen so duaran tabla, aliwa lambengat a martilyo tan pasak so nakaukolan. Nepeg ya amta yo no panon a martilyoen so pasak ed tabla ya ag-itan napiklo. No sasalien yon ipasak ed tabla tan agyo amta so manmartilyo, satan so mair-irap, tan makapadismaya ni ingen. Balet, say suston pangusar ed saray kagawaan so ontulong ed sikatayon manumpal ed saray kimey tayo tekep na makapaliket a resulta.

² Bilang Kristianos, wala so kimey a sumpalen tayo. Satan so importantin tuloy a kimey. Pinaseseg nen Jesu-Kristo iray patumbok to ya ‘anapen da nin unona so panarian.’ (Mateo 6:33) Panon tayon nagawaan itan? Say sakey a paraan et say pagmaliw a maseseg ed panangipulong ed Panarian tan panaggawa na babangatan. Sakey nin paraan et say malet a pangibase ed ministeryo tayo dia ed Salitay Dios. Say komatlon paraan et say maabig a kondukta. (Mateo 24:14; 28:19, 20; Gawa 8:25; 1 Pedro 2:12) Pian magmaliw ya epektibo tan maliket ed sayan Makristianon kimey, nakaukolan tayo iray matukoy a kagawaan tan pikakabat ed no panoy dugan pangusar ed saratan. Nipaakar ed saya, impatnag nen apostol Pablo so alay abig ya ehemplo bilang Kristianon komikimey, tan pinaseseg to iray kapananisiaan to a mangalig ed sikato. (1 Corinto 11:1; 15:10) Kanian, anto sirin so naaralan tayo ed si Pablo, say kapara tayon komikimey?

Pablo​—Maseseg a Manangiyabawag na Panarian

3. Akin a nibaga a si apostol Pablo et maseseg a komikimey ed Panarian?

³ Anton klase na komikimey si Pablo? Maseguro a sikato so maseseg. Nansagpot a maong si Pablo, ya impulong to so maong a balita ed maaw-awang  a lugar na Mediteraneo. Oniay inkuan na sayan maseet ya apostol no akin a sikatoy maligsan manangiyabawag ed Panarian: “No ipulong ko so ebanghelyo, anggapo so panggloriaan ko; ta say kapilitan sikato so amasoot ed siak; et abagey ak la no agko ipulong so ebanghelyo.” (1 Corinto 9:16) Kasin interesado labat si Pablo a niliktar so bilay to? Andi. Sikato so aliwan masiblet a too. Imbes, pinilalek to a nagunggonaan met so arum manlapud maong a balita. Oniay insulat to: “Gagawaen ko [irayan] amin nisengeg ed ebanghelyo, pian makapinabang ak ed [arum].”​—1 Corinto 9:23.

4. Anton kagawaan so papablien a maong na saray Kristianon komikimey?

⁴ Si apostol Pablo et mapaabeban komikimey ya amoria to ya agto lambengat napandependian so mismon dunong to. Singa sakey a karpentero a mankaukolay martilyo, nakaukolan nen Pablo so suston kagawaan pian nipurek so katuaan na Dios ed kapusoan na saray onderengel ed sikato. Anton kagawaan so manunan inusar to? Say Salitay Dios, say Masanton Kasulatan. Mipadpara, say interon Biblia so manunan kagawaan ya usaren tayo pian makapanggawa itayo na babangatan.

5. Pian magmaliw ya epektibon ministros, anto so nakaukolan a gawaen tayo nilikud ed pangaon ed saray teksto?

⁵ Amta nen Pablo a say suston pangusar ed Salitay Dios so aglambengat mangilalanor ed pangaon ed satan. Inagamil to so ‘panagkalar’ odino pananangguyor. (Gawa 28:23) Panon? Matalona ya inusar nen Pablo so insulat a Salita na Dios pian kombinsien so dakel a mangawat ed katuaan na Panarian. Sikato so akikatunongan ed sikara. Diad loob na taloran bulan diad sinagoga ed Efeso, si Pablo so “akieb-ebatan tan inkalar to so saray bengatlan nipaakar ed panarian na Dios.” Anggaman ‘arum so nampaawet ed inkasikara tan ag-anisia,’ arum so dinmengel. Bilang resulta na ministeryo nen Pablo ed Efeso, “binmaleg [o binmulaslas] so salita na Katawan tan tinmalona.”​—Gawa 19:8, 9, 20.

6, 7. Panon so impangigloria nen Pablo ed ministeryo to, tan panon tayon nagawaan met itan?

⁶ Bilang maseseg a manangiyabawag na Panarian, si Pablo so ‘angigloria ed ministeryo to.’ (Roma 11:13, NW) Panon? Agto naninteresan so pangitandoro ed inkasikaton dili; nisay imbaing to ed publiko so impagmaliw ton sakey ed saray kakimeyan na Dios. Imbes, impasen to so ministeryo to bilang sankatageyan a kagalangan. Sidudunong tan epektibon inusar nen Pablo so Salitay Dios. Say mabungan kimey to so angunggona ed arum, ya amakiwas ed sikara pian sigpot dan nasumpal so ministeryo ra. Nigloria so ministeryo to diad ontan met a paraan.

⁷ Singa si Pablo, nigloria tayo so kimey tayo bilang ministros diad mabetbet tan epektibon pangusar ed Salita na Dios. Diad amin ya aspekto na ministeryo tayo, kaukolan a say kalat tayo et manginabang na bengatla manlapud Kasulatan dia ed dakel a totoo no posible. Panon tayon nagawaan iya tekep na pananangguyor? Konsideraen so taloran importantin paraan: (1) Ipaarap so imano ed Salitay Dios diad paraan a napawala so panagrespeto ed satan. (2) Mataktikan ipaliwawa tan iyaplika so ibabaga na Biblia. (3) Makakombinsin mikatunongan unong ed Kasulatan.

8. Antoran kagawaan ed panangipulong ed Panarian so wala ed sikatayo natan, tan panon tayon usaren iratan?

⁸ Saray manangiyabawag na Panarian natan so walaan na saray kagawaan ya anggapo ed si Pablo legan na ministeryo to. Laktipen na saratan iray libro, magasin, brosyur, handbill, tracts, tan saray rekording ya audio tan video. Diad imbeneg a siglo et nausar met iray testimony card, ponograpo, de-trumpan luluganan, tan saray brodkas ed radyo. Siempre, say sankaabigan a kagawaan tayo et say Biblia, tan nakaukolan ya usaren tayo iyan makanakanan kagawaan diad maabig tan suston paraan.

Say Ministeryo Tayo so Nepeg a Nibase ed Salitay Dios

9, 10. Nipaakar ed panangusar ed Salitay Dios, anto so naaralan tayo ed insimbawa nen Pablo ed si Timoteo?

⁹ Panon tayon usaren so Salitay Dios bilang epektibon kagawaan? Diad italineng tayo ed sarayan salita nen Pablo ed kakimeyan ton si Timoteo: “Seetan mo a sikukuli so ompatnag a naabobonan  ed arap na Dios, a singa tometeger ya anggapo so ibaing to, ya agamilen mo ed matunong so salita a tua.” (2 Timoteo 2:15) Anto so nalalanor ed suston pangusar odino ‘pangagamil a matunong ed salita a tua’?

¹⁰ Say Griegon salita a nipatalos a “suston usaren” so literal a mankabaliksan na “maptek a pamutot” odino “panggawa na maptek a dalan.” Dia labat ed simbawa nen Pablo ed si Timoteo so akausaran ed satan a termino diad Kristianon Griegon Kasulatan. Nausar met itan a salita pian deskribien so maptek a panagbaka diad uma. Say agmaptek ya impanbaka so maseguron kababaingan parad sakey ya eksperiensyado lan dumaralos. Pian magmaliw a “tometeger ya anggapo so ibaing to,” apanonotan si Timoteo ya agnaabuloyan so ikasipa ed saray tuan bangat na Salitay Dios. Agnaabuloyan si Timoteo a manbangat unong ed personal iran panmoria to. Nepeg a maalwar ton isentro ed Kasulatan so ipupulong tan ibabangat to. (2 Timoteo 4:2-4) Diad onian paraan, niwanwan iray matuan-impanpuson totoo a nawalaan na panmoria nen Jehova ed saray pamaakaran, aliwan unong ed minumundon pilosopiya. (Colosas 2:4, 8) Mipadpara met itan natan.

Nepeg a Maabig so Kondukta Tayo

11, 12. Anto so epekto na kondukta tayo ed suston panangusar ed Salitay Dios?

¹¹ Say suston pangusar ed Salitay Dios so aglambengat mangilalanor ed pangiyabawag ed saray katuaan na satan. Nepeg a mitunosan ed satan so kondukta tayo. ‘Sikatayo so kakimeyan na Dios,’ kanian nepeg ya aliwa itayon mansimpisimpitan a komikimey. (1 Corinto 3:9) Oniay ibabaga na Salitay Dios: “Sika a mangibangat ed arum agmo bangatan so inkasika a dili? Sika ya ipupulong mo so agpantakew mantakew ka ta? Sika, a kuan mo a say sakey a too agto nepeg so manggawa na pikakalugoran mikalugoran ka ta? Sika a kabusol mo so saray kinondiosdiosan sika mantakew ka ed saray templo?” (Roma 2:21, 22) Kanian bilang kaplesan a tometeger ed Dios, say sakey a paraan pian  suston nausar tayo so Salitay Dios et diad italineng ed sayan simbawa: “Manmatale’ka ed Jehova ed simoon a pusom, tan agka onsaral ed tapew na dili a pakatalos mo: Dia ed saray amin a dalan mo sikato so bidbiren mo, et sikato itonton to so saray basbas mo.”​—Uliran 3:5, 6.

¹² Antoran resulta so nailaloan tayo diad suston pangusar ed Salitay Dios? Konsideraen so pakayari na nisulat a Salita na Dios ed bilay na saray matuan-impanpuson indibidual.

Say Salitay Dios so Walaan na Manamasimbalon Pakayari

13. Anto so napawala na sakey a too diad pangiyaplika to ed Salitay Dios?

¹³ Sano awaten so mensahe na Salitay Dios bilang napanmatalkan, satan so walaan na mabiskeg ya epekto a makatulong ed totoon manggawa na baleg a pananguman ed kabibilay da. Naimano nen Pablo so impluensya na salitay Dios tan naimatonan to so maabig ya epekto na satan ed saramay nagmaliw a Kristianos ed kadaanan a Tesalonica. Kanian oniay inkuan to ed sikara: “Nisengeg ed saya misalamat kami met ed Dios ya andi tunda, ta, sanen inawat yo ed sikami so salita ya ingganggan, a salanti salita na Dios, inako yo ya aliwan singa salita na totoo, balet unong ed katuaan, say salitay Dios, a sikato met so onggawa ed sikayo a manisia.” (1 Tesalonica 2:13) Parad saratan a Kristiano​—on, parad amin a tuan papatumbok nen Kristo​—say limitadon panagnonot na too so agmipara ed matalonggaring a kakabatan na Dios. (Isaias 55:9) Saray taga-Tesalonica so ‘angawat ed salita anggaman ed baleg a kaermenan, a sililiket ed espiritu santo’ tan nagmaliw iran ehemplo ed arum a mananisia.​—1 Tesalonica 1:5-7.

14, 15. Panon kabiskeg so mensahe na Salitay Dios, tan akin?

¹⁴ Say Salita na Dios so mabiskeg lapud si Jehova so nanlapuan na satan. Satan so nanlapud “Dios a mabilay,” a lapud salita to et “agawa so katawenan,” tan satan a salita so lawas ‘maaligwas ed bengatla ya angiyakaran to ed satan.’ (Hebreos 3:12; Salmo 33:6; Isaias 55:11) Oniay inkomento na sakey ya iskolar na Biblia: “Agsusumlangen na Dios so Salita to. Agto itan ibuburi a singano agmisiglaotan ed sikato. . . . Kanian aliwa itan ya inatey a bengatla, ya ag-itan balot naapektoan na saray nagagawa kayarin sinalita itan; lapud satan so malet a nisiglaot ed mabilay a Dios.”

¹⁵ Panon kabiskeg so mensahe na Salitay Dios? Walaan itan na mabiskeg a pakayari. Kanian matukotukoy ya onia so insulat nen Pablo: “Say salita na Dios sikatoy mabilay tan mabiskeg, tan makdem nen say anggan dinan a kampilan a duaray tarem, tan ontalos ya angga ed pansianan na kamarerwa tan espiritu, tan angga ed saray langolangoan tan saray utek, tan masiglat a mangibiig ed saray nonot tan saray getma na puso.”​—Hebreos 4:12.

16. Panon a sigpot a nauman na Salitay Dios so sakey a too?

¹⁶ Say mensahe na nisulat a Salita na Dios so “makdem nen say anggan dinan a kampilan a duaray tarem.” Diad ontan, satan so walaan na mabiskeg a pakayari a mas makdem ni nen say antokaman ya uusaren odino kagawaan na too. Say Salita na Dios so ontalos ed sankaaraleman a parte na too tan satan so manguman ed inkatoo to, a mangapekta ed panag-isip to tan no anto so papablien to, a manggawa ed sikaton makapaliket tan maridios a komikimey. Agaylan epektibon uusaren!

17. Ipaliwawa so manamasimbalon pakayari na Salitay Dios.

¹⁷ Iwawalwal na Salitay Dios so walad akindalem met na too ya aliwa lambengat a no anto so padesir to ed inkasikato odino no anto so labay ton ipatnag ed arum. (1 Samuel 16:7) Anggan say marelmeng a too et makapangiyamot no maminsan ed inkatoo to diad pangipatnag to na kamaongan odino debosyon. Saray mauges a totoo so mansimpisimpitan lapud marelmeng iran rason. Mankuankuanan a mapaabeba iray mapaatagey a totoo pian pandinayewen so arum. Balet diad pangipaparungtal na satan ed no anton talaga so walad puso, say Salitay Dios so mabiskeg a mamakiwas ed mapaabeban too a mangiwaklit ed daan a personalidad to tan ‘ikawes to so too a balo, a sikato so pinalsay Dios ed loob na kaptekan tan matuan kasantosan.’ (Efeso 4:22-24) Saray bangat na Salitay Dios so mamasimbalo met ed saray mabaing a totoo pian magmaliw a makpel a Tasi nen Jehova tan maseseg a manangiyabawag na Panarian.​—Jeremias 1:6-9.

18, 19. Unong ed sarayan parapo odino ed personal ya eksperiensya yo ed lawak na kimeyan, ipabitar no panon a nauman na Makasulatan a katuaan so awawey na sakey a too.

 ¹⁸ Say manamasimbalon pakayari na Salitay Dios so walaan na maong ya epekto ed totoo diad anggan inerman a pasen. Alimbawa, saray manangiyabawag na Panarian ed Phnom Penh, Cambodia, so manpupulong ed probinsya na Kompong Cham a mamidua ed kada bulan. Sanen nadngelan to so impamauges na saray pastor ed saray Tasi nen Jehova, inyuksoy na sakey a pastora diman so pakapitongtong ed saray Tasi diad tinmumbok ya imbisita ra ed probinsya. Dakerakel so intepet to ed sikara nipaakar ed panagselebra na saray piesta-opisyal tan tinmalineng a maong legan na impikatunongan da ed sikato manlapud Kasulatan. Insan oniay inyabawag to: “Amtak la natan ya aliwan tua so imbaga na saray kaibak a pastor nipaakar ed sikayo! Imbaga ra ya agkayo manguusar na Biblia, balet diad sayan kabuasan et satan labat so inusar yo!”

¹⁹ Intultuloy na sayan bii so akitongtong ed saray Tasi nipaakar ed Biblia tan agto inabuloyan iray panamagyaw a sikatoy naekal bilang pastora. Say pitotongtong to nipaakar ed Kasulatan so imbaga to ed sakey ya amiga to, ya impaiyaralan met la na Biblia ed saray Tasi. Lapud nagmaliw ya entusiastiko so kaaro to ed nanaaralan to, oniay nikuan to ed sakey ed saray impanmisa to, “Mila kayo, paiyaralan kayo na Biblia ed saray Tasi nen Jehova!” Agnambayag, sikato so inmekal ed simbaan. Say datin pastora, say amiga to, tan arum nira so impaiyaralan na Biblia ed saray Tasi nen Jehova.

20. Panon ya iyilustra na eksperiensya na bii ed Ghana so pakayari na Salitay Dios?

²⁰ Say pakayari na Salitay Dios so niyilustra met ed kipapasen nen Paulina, a taga-Ghana. Sakey a sigpot-panaon a manangiyabawag na Panarian so angiyaral ed sikato na Biblia panamegley na libron Pikakabat a Mangitonton ed Bilay ya Andi-anggaan. * Alanor si Paulina ed poligamya a panamaley tan naimano to a nakaukolan to so manguman, balet sikato so maruksan sinumpa na masiken to tan amin a kakanayon to. Say laki to, a huis ed atagey a korte tan matatken ed simbaan, so anismaya ed sikato diad lingon impangiyaplika ed Mateo 19:4-6. Singa segsegurado so huis ed imbaga to, balet amorian tampol nen Paulina a mipadpara itan ed impamikewet nen Satanas ed Kasulatan sanen tinukso to si Jesu-Kristo. (Mateo 4:5-7) Anonotan to so malinew a balikas nen Jesus nipaakar ed panangasawa, a sinaglawi ton pinalsa na Dios so totoo bilang laki tan bii, aliwan sakey a laki tan bibii, tan say duara, aliwan talora, so magmaliw a sakey a laman. Pinekderan to so desisyon to tan nipagamor ed sikato ed kaunoran so pidiborsyo ed poligamya a panamaley. Agnambayag, sikato so nagmaliw a maliket a manangiyabawag na Panarian.

Mantultuloy ya Usaren so Salitay Dios ed Suston Paraan

21, 22. (a) Anto so determinado tayon gawaen bilang manangiyabawag na Panarian? (b) Anto so konsideraen tayo ed ontumbok ya artikulo?

²¹ Say nisulat a Salita na Dios so petepeteg a mabiskeg a kagawaan a nausar tayon ontulong ed arum a manggawa na pananguman ed kabibilay da ta pian onapit ira ed si Jehova. (Santiago 4:8) No panon a say onsianon komikimey so manguusar na saray kagawaan pian nadampot to iray maabig a resulta, determinado itayo komon ed masimoon tan sidudunong a pangusar ed Salitay Dios, say Biblia, diad inter na Dios a kimey tayo bilang manangiyabawag na Panarian.

²² Panon tayon nausar so Kasulatan ed mas epektibon paraan diad panaggawa tayo na babangatan? Sakey lan paraan et say pamayubo ed saray abilidad tayo bilang makatangguyor a managbangat. Ipangasi yon imanoen a maong so ontumbok ya artikulo, lapud isusuheri na satan iray paraan ed pangibangat tan itulong ed arum a mangawat na mensahe na Panarian.

[Paimano ed Leksab]

Kasin Natandaan Yo?

• Antoran kagawaan so wala parad saray manangiyabawag na Panarian?

• Diad antoran paraan a si Pablo et ehemplo bilang komikimey ed Panarian?

• Anto so nalalanor ed suston panangusar ed Salitay Dios?

• Panon kabiskeg a kagawaan so nisulat a Salita nen Jehova?

[Tepetepet Parad Panagaral]

[Saray litrato ed pahina 10]

Arum a kagawaan ya uusaren na saray Kristiano diad panangiyabawag ed Panarian