“Talagan Makapanyari a Tuloy so Salita na Dios!”

“SAY salita na Dios sikatoy mabilay tan mabiskeg.” (Hebreos 4:12) Bilang pamaneknek ed agnaresistian a pakayari na Salitay Dios, say 2003 Calendar of Jehovah’s Witnesses so angiparungtal na anemiran peteg ya istorya ed bilay ed interon mundo. Diad silong na paulon “Antis tan Kayari,” ipapabitar na kalendaryo no panon a say edukasyonal a kimey na saray Tasi nen Jehova so ontutulong ed totoo a napaaligwas so moralidad da, nikaindan so makaderal ya estiloy-kabibilay da, napabiskeg so bilay na pamilya ra, tan nabayuboan so personal a pisisiglaotan da ed Dios.

Naawat so pigaran sulat a mangibabalikas na apresasyon ed 2003 a kalendaryo. Niraya so pigara ed sarayan komento:

“Sayan kalendaryo so mamaneknek ed saray tuan Kristiano a walaray arum a singa sikara a kinaukolan day mipuligesgesan nisesengeg ed pananisia. Natan et nanengneng da la iray litrato a mangipapanonot ed saray pananguman a ginawa na arum.”​—Steven, Estados Unidos.

“Talagan labalabay kon isulat irayan salita ta pian nipaamtak ed sikayo no panon a say 2003 a kalendaryo so pirmin anenyeg ed liknaan ko. Anggapo ni so kalendaryo a walaan na ontan ya epekto ed siak. Sarayan istorya ed bilay so magmaliw lan kabiangan na materyal ya ikakargak ed bag kon panagpulong ta pian nipanengneng ko ed saray totoo so mabilay tan makapadinayew a prueba a say Biblia so makaimpluensya ed saray indibidual.”​—Marc, Belgium.

“Siak so apakiwas a maong na kalendaryo. Atenyeg a maong so liknaan ko ed impakabasak tan impakanengneng ko ed no panon a pinasimbalo nen Jehova irayan indibidual. Bilang resulta, siak so asagyat a mantultuloy a manguman ed mismon kabibilay ko. Mas lalon naliliknak natan a kabiangan ak na sankamundoan ya impanaagi.”​—Mary, Estados Unidos.

“Apakiwas a tuloy si Jesus lapud maermen a kipapasen ed espiritual na saray totoo. Pisalamatan mi kayo ed pangaalig yo ed alimbawa nen Kristo diad impangiparungtal yo ed saray istorya ed bilay diad 2003 a kalendaryo tayo. Natan ko labat asali ed bilay ko so akalua nisesengeg ed kalendaryo.”​—Cassandra, Estados Unidos.

“Sanen mantaon ak na 11, ginapoan koy mansigarilyo; insan angusar ak na druga. Aminpiga a ninonot koy manbikkel. Sanen akabat ko si Jehova, nitundak iraman a bisyo. Sayan kalendaryo so importantin maong ed siak. Saray alimbawa na saray agagik a lalaki tan bibii ed sankamundoan so mamapabiskeg ed siak. Amtak la natan ya agko bukbukor ed sayan pibabakal tan say sankaimportantian et say panangaro ed si Jehova tan interon-puson panaglingkor ed sikato.”​—Margaret, Polandya.

“O, talagan makapanyari a tuloy so Salita na Dios! Sanen naawat ko so 2003 a kalendaryo, pinokpokan kon maong so inkasiak pian ag-onakis. Sarayan eksperiensya, a pati saray litrato, so makapabiskeg a tuloy na pananisia.”​—Darlene, Estados Unidos.

“Say datin estiloy-kabibilay na pigara ed sarayan totoo so mipadparan maong ed datin estiloy-kabibilay ko. Siak so pinabiskeg nen Jehova pian nitunda so singano agnatalonaan iran bisyo. Pisalamatan kon tuloy irayan peteg ya istorya ed bilay.”​—William, Estados Unidos.