Tepetepet Manlapud Saray Managbasa

Panon so nepeg a panmoria na saray Kristiano ed panangusar na saray birthstone?

Diad arum a kultura, saray birthstone so isisiglaot ed bulan na inkianak na sakey. Personal a desisyon na sakey a Kristiano no labay toy mansulong na singsing a walaan na ontan ya ankablin bato. (Galacia 6:5) Sano mandesidi nipaakar ed satan, walaray makanan bengatla a nepeg ton ikonsidera.

Imbaga na Encyclopaedia Britannica a say birthstone et “sakey ya ankablin bato a nisiglaot ed petsa na inkianak na sakey, a kaslakan ya iisipen a say pangisulong ed satan et panlapuan na suwerti odino maong a bunigas.” Oniay inkuan ni na sayan reperensya: “Abayag lan ipapasen na saray astrologo a saratan ya ankablin bato so walaan na makapakelkelaw iran pakapanyari.”

Nagkalalo la ed kadaanan a panaon a dakel so anisian say birthstone et mangiiter na suwerti ed sakey a mangisusulong. Kasin panisiaan iya na sakey a tuan Kristiano? Andi, lapud kabat to a kokondenaen nen Jehova iramay mangibabaliwala ed sikato tan manmamatalek ed “Kapalaran.”​—Isaias 65:11.

Legan na Kapegleyan a Panaon, saray managparles so amili na sakey a baton parad kada bulan na taon. Pinaseseg da so totoo a mangisulong ed bato na bulan na inkianak da, ya inisip dan iyagel na satan so mangisulong manlapud pakasakitan. Balet aliwan Makasulatan parad sakey a Kristiano ya ontumbok ed panangiwanwan na saray eksperton managparles na saray ebento, lapud kokondenaen iratan na Biblia.​—Deuteronomio 18:9-12.

Aliwa met a matukoy a moriaen na saray Kristiano a makabaliksan a tuloy so singsing lapud walaan itan na birthstone. Saray Tasi nen Jehova so agmanseselebra na saray agew na inkianak. Say rason et lapud sarayan selebrasyon so pirmin niyapasakey ed indibidual tan say nikurit labat diad Biblia et saray agew na inkianak na saramay manuley ya agmandadayew ed Dios.​—Genesis 40:20; Mateo 14:6-10.

Isipen na arum a totoo a say pangisulong na singsing a walaay birthstone et walaan na maabig ya epekto ed personalidad na mangisulong. Balet, ag-itan papanisiaan na saray tuan Kristiano, lapud kabat dan say “too a balo” et niwala diad panangimpluensya na masanton espiritu na Dios tan panangiyaplika ed Makasulatan iran prinsipyo.​—Efeso 4:22-24.

Say motibo so importante ya ikonsidera. Diad pandeside no kasin mangisulong na singsing a walaan na birthstone, nayarin tepetan na sakey a Kristiano so inkasikato, ‘Kasin labay kon isulong so singsing lapud nasasantingan ak labat ed bato na satan, anggaman nibana a satan imay ibabagan birthstone? Odino kasin siak so iimpluensyaan na saray maaniton ideya ya isisiglaot na pigaran totoo ed saratan a bato?’

Nepeg ya usisaen na sakey a Kristiano so puso to ta pian nadetermina to so motibo to. “Yatol mo so pusom ed amin a seet,” so kuan na Kasulatan, “ta manlapu ed sikato so saray agus na bilay.” (Uliran 4:23) Diad pandeside nipaakar ed saray birthstone, maabig no ikonsidera na kada Kristiano so motibo to tan saray posiblin epekto na kurang to ed sikato a mismo tan ed arum.​—Roma 14:13.