Tulongan so Arum a Mangawat ed Mensahe na Panarian

“Si Agripa inkuan to ed Pablo: Dia ed dagdaiset a salita nauyot [odino natangguyor] mo ak a man-Kristiano.”​—GAWA 26:28.

1, 2. Akin a niyarap si apostol Pablo ed si Gobernador Festo tan si Arin Herodes Agripa II?

 DIAD Cesarea nen 58 K.P., say Romanon Gobernador a si Porcio Festo so binisita nen Arin Herodes Agripa II tan say agi ton si Bernice. Lapud imbitasyon nen Gobernador Festo, sikara so sinmabi tekep na “baleg a liket, tan linmoob ira ed panangukoman, ya inulop na koronel, tan saray mablin totoo ed baley.” Diad ganggan nen Festo, niyarap ed sikara so Kristianon apostol a si Pablo. Akin a niyarap iyan patumbok nen Jesu-Kristo ed panangukoman nen Gobernador a Festo?​—Gawa 25:13-23.

² Say imbaga nen Festo ed saray bisita to so mangebat ed satan a tepet. Inkuanto: “Ari Agripa, tan sikayon amin a wadia ya akaarap ed sikami: Nengneng yo so saya a too a sikato so indalem da ed siak na amin a karaklan na saray Judios ed Jerusalem tan dia met, ya inyakis da ya agmanepeg la a manbilay. Balet aromog ko ya anggapo so agawa to a kanepegan ed pamatey; et bangta sikaton dili pinmanon ed Augusto, ninonot ko a sikatoy paiyakar ko. Nipaakar ed sikato anggapo so antokaman a tua a nayarian ko ya isulat ed katawan ko, kanian sikato so inyarap ko ed sikayo, et lalo ed sika, ari Agripa, pian kayari panalaysay, wala so nayarian ko ya antokaman ya isulat. Ta isipen ko ya ag-onkatunongan so pamayakar na sakey a pinangaw, ya ag-ibaga met so saray dalem a sumpa ed sikato.”​—Gawa 25:24-27.

3. Akin a si Pablo et inakusaan na saray relihyoson lider?

³ Ipapabitar na saray salita nen Festo a nidunget si Pablo ed palso iran panamakasalanan a sikatoy onsusumpa ed gobierno​—sakey a krimen a walaay dusan ipapatey. (Gawa 25:11) Balet, anggapoy kasalanan nen Pablo. Saratan a panamakasalanan so makasengeg ed imon na saray relihyoson lider ed Jerusalem. Sinumpa ra so kimey nen Pablo bilang manangiyabawag na Panarian tan nan-ingongotan dan maong so impanulong to ed arum a magmaliw a papatumbok nen Jesu-Kristo. Guardiado na saray armadon sundalo, si Pablo so inawit ed syudad na Cesarea a walay daongan, a diman so inapelaan to ed si Cesar. Manlapu diman et sikatoy inawit da ed Roma.

4. Anto so makapasurprisan imbalikas nen Arin Agripa?

⁴ Isipen pa si Pablo a walad palasyo na gobernador diad arap na sakey a grupon kaiba so manuley  ed manunan kabiangan na Romanon Empiryo. Oniay inkuan nen Arin Agripa ed si Pablo: “Niabuloy ed sika a mansalita ka.” Legan a mansasalita si Pablo, walay nikadkaduman agawa. Say imbaga nen Pablo et angapekta ed ari. On, oniay inkuan nen Arin Agripa: “Dia ed dagdaiset a salita nauyot mo ak a man-Kristiano.”​—Gawa 26:1-28.

5. Akin ya epektibon tuloy iray salita nen Pablo ed si Agripa?

⁵ Isipen pa labat! Bilang resulta na marundunong ya impandepensa nen Pablo, naapektoan so sakey a manuley lapud makatenyeg a pakayari na Salitay Dios. (Hebreos 4:12) Akin ya epektibon tuloy so impangidepensa nen Pablo? Tan anto so naaralan tayo ed si Pablo a makatulong ed panaggawa tayoy babangatan? No analisaen tayo so impangidepensa to, mabitar so duaran manunan punto: (1) Makatangguyor so presentasyon nen Pablo. (2) Sidudunong ton inusar so pikakabat to ed Salitay Dios, a singano sakey a komikimey ya epektibo ed panangusar toy kagawaan.

Usaren so Dunong ed Pananangguyor

6, 7. (a) Unong a nausar ed Biblia, anto so kabaliksan na “tangguyoren”? (b) Anto so kanaan na pananangguyor pian natulongan so arum a mangawat na bangat na Biblia?

⁶ Diad libro na Gawa, saray Griegon termino na pananangguyor so aminpigan inusar pian deskribien so panagpulong nen Pablo. Anto so pisiglaotan na satan ed panaggawa tayo na babangatan?

⁷ Diad orihinal a lenguahe na Kristianon Griegon Kasulatan, say “tangguyoren” so mankabaliksan na “kombinsien” odino “umanen so nonot diad panamegley na panagkatunongan odino pangikonsidera ed moral,” so kuan na Expository Dictionary of New Testament Words nen Vine. Say pangusisa ed pinagkalamot a kabaliksan na satan so lalon mangipalinew. Ipapasabi na satan so ideya na panagmatalek. Kanian no natangguyor yo so sakey a toon mangawat ed bangat na Biblia, sikato so akombinse yon manmatalek, a panisiaan to so inkamatua na satan a bangat. Mapatnag, agmagenap so pangibaga labat ed sakey a too no anto so ibabaga na Biblia ta pian sikatoy manisia tan mangiyaplika ed satan. Nepeg a nakombinse so onderengel ed sikayo a tua so ibabaga yo, balanglan satan et sakey ya ugaw, kaabay, katrabahoan, kaeskuelaan, odino kanayon.​—2 Timoteo 3:14, 15.

8. Anto so nalalanor ed pangombinse ed sakey a too nipaakar ed Makasulatan a katuaan?

⁸ Panon yon nakombinse so too a tua so iyaabawag yo manlapud Salitay Dios? Diad panamegley na lohikon panagkatunongan, malinew ya argumento, tan masimoon a panangombinse, nanggunaetan nen Pablo ya umanen so kanonotan na saray indibidual a katongtong to. * Imbes ya iyabawag lambengat sirin a tua so sakey bengatla, nakaukolan yon itarya so makapenek ya ebidensya a mamaneknek ed imbalikas yo. Panon iyan nagawaan? Seguroen a say ibabaga yo et malet a nibase ed Salitay Dios, ya aliwan unong ed personal ya opinyon yo. Ontan met, mangusar na kaaruman ya ebidensya a manuporta ed masimoon iran ibabaga yo manlapud Kasulatan. (Uliran 16:23) Singa bilang, no ipapabitar yo a panggayagaan na matulok a katooan so bilay ed paraison dalin, paneknekan itan a balikas diad panukoy ed Kasulatan, a singa say Lucas 23:43 odino Isaias 65:21-25. Panon yo nin napaneknekan so Makasulatan a punto yo? Nayarin usaren yo iray alimbawan naeeksperiensya na dumerengel yo. Nayarin ipanonot yo ed sikato so simpli tan libren pakapanliket ed karakpan na onseselek ya agew, say ambalbalingit a rosas, say masamit a taway na prutas, odino say liket ed pakanengneng ed pamapakan na sakey a billit ed sibong to. Sikatoy tulongan a makatebek a saratan et ebidensya na panlabay na Manamalsa a panggayagaan tayo so bilay diad dalin.​—Eclesiastes 3:11, 12.

9. Panon tayon nipatnag so pagmaliw a makatunongan diad panagpulong tayo?

⁹ Sano tatangguyoren so too a mangawat ed sakey a bangat na Biblia, alwaran a say inkaligsa yon mitongtong et ag-ompatnag a dogmatiko, a mangamper la ingen ed lukas a nonot tan puso na onderengel ed sikayo. Oniay ipapasakbay na libron Eskuelaan Parad Ministeryo: “Say bugta-bugtak  a pangibaga ed katuaan a mangiwalwal ed inkapalso na pinabpablin sisiaen na sananey a too, anggano say balikas so walaan na dakel iran manuportan Makasulatan iran teksto, so kaslakan ya agnaawat a maong. Alimbawa, no saray popular a selebrasyon so basta kondenaen lapud nanlapu iratan ed pagano, nayarin saya so agmanguman ed liknaan na arum a totoo nipaakar ed saratan. Mabetbet a lalon matalona so pagmaliw a makatunongan.” Akin a nepeg tayon panggunaetan a maong so pagmaliw a makatunongan? Inkuan na libro: “Say pankatunongan a paraan a managyat na diskusyon, so mangiter ed totoo na bengatlan nonoten ed saginonor, tan mangitarya na pankanawnawa para ed arapen a pantotongtong. Mabiskeg itan a makatangguyor.”​—Colosas 4:6.

Pananangguyor a Makasagyat ed Puso

10. Diad anton paraan so impangiparungtal nen Pablo ed panangidepensa to ed arap nen Agripa?

¹⁰ Imanoen tayon maong natan so panangidepensa nen Pablo diad Gawa kapitulo 26. Imanoen so impangigapo to ed paliwawa to. Pian niparungtal to so tema to, inanap nen Pablo so makatunongan a pangomendaan to ed si Agripa, anggaman say ari so walaan na mabanbanday a relasyon ed agi ton si Bernice. Oniay kuan nen Pablo: “Igaton koy inkasiak a mapalar, ari Agripa, ta dia ed arap mo nagawaan ko so mankatunongan nipaakar ed amin a bengatla ya angidaleman da ed siak na saray Judio: Laut la, ta kabat mo ya amin so saray kaugalian tan siblangan a wala ed saray Judios; kanian kerewen ko ed sika ya imanesan mo ak a dengelen.”​—Gawa 26:2, 3.

11. Panon a nipatnag ed saray salita nen Pablo so panagrespeto ed si Agripa, tan anto so gunggona bilang resulta?

¹¹ Kasin naimano yo so impamidbir nen Pablo ed autoridad nen Agripa, a sinalambit to so titulo to ya Ari? Angipatnag itan na panagrespeto, tan diad makabat ya impamili ton maong ed saray salita to, si Agripa so pinagalangan nen Pablo. (1 Pedro 2:17) Binidbir na apostol a kabisado nen Agripa so komplikado iran kustombre tan ganggan ed saray uuleyan ton Judio tan inkuan nen Pablo a panliketan toy mandepensa ed arap na sakey a manuley a mikabat a maong ed saratan. Bilang Kristiano, si Pablo so agkinmiwas a singano mas atagtagey ni nen say si Agripa, ya aliwan Kristiano.  (Filipos 2:3) Imbes, si Pablo so akikasi ed ari a sikatoy maanos komon ya ondengel. Kanian, pinawala nen Pablo so kipapasen a mas posiblin awaten nen Agripa so walan iparungtal to, ontan met ed arum nin onderengel ed sikato. Sikato so angiletneg na pundasyon, sakey a bengatlan napampaknaan da a pangibasiyan to ed saray argumento to.

12. Diad panangiyabawag tayo na Panarian, panon tayon nasagyat so puso na saray dumerengel tayo?

¹² Singa ed impanpaliwawa nen Pablo ed si Agripa, sagyaten tayo so puso na onderengel ed sikatayo manlapud gapo anggad kasampotan na ipaparungtal tayon mensahe na Panarian. Nagawaan tayo itan diad pangipatnag tayo na masimoon a respeto ed too a pupulongan tayo tan diad pangipanengneng na puron interes ed walan kipapasen tan opinyon to.​—1 Corinto 9:20-23.

Sidudunong ya Usaren so Salitay Dios

13. Singa si Pablo, panon yon pakiwasen iray onderengel ed sikayo?

¹³ Pilalek nen Pablo ya onkiwas iray onderengel ed sikato unong ed maong a balita. (1 Tesalonica 1:5-7) Lapud satan a gagala, sinagyat to so piguratibon puso ra, say sentro na liknaan. No konsideraen tayo nin maong so panagdepensa nen Pablo ed arap nen Agripa, imanoen so ‘suston impangusar nen Pablo ed salitay Dios’ diad impanukoy to ed saray bengatlan imbalikas nen Moises tan saray propeta.​—2 Timoteo 2:15, NW.

14. Isalaysay no panon so impangusar nen Pablo ed pananangguyor sanen sikatoy walad arap nen Agripa.

¹⁴ Amta nen Pablo a diad ngaran labat so inka-Judio nen Agripa. Diad impangusar to ed pikakabat nen Agripa ed Judaismo, inkatunongan nen Pablo a say pampupulong to so talagan angilanor ed ‘agto impansalita na antokaman ya ag-imbaga na saray propeta tan si Moises, ya onsabi’ nipaakar ed ipatey tan kioli na Mesias. (Gawa 26:22, 23) Oniay direktan intepet nen Pablo ed si Agripa: “Ari Agripa, manisia ka ed saray propetas?” Nipaarap si Agripa ed sakey a problema. No ibaga ton agto panisiaan iray propeta, naderal so reputasyon to bilang Judion mananisia. Balet no sikatoy  onabobon ed panagkatunongan nen Pablo, nipatnag to ed publiko a sikatoy mipakna ed apostol tan sikatoy nabaloan a Kristiano. Oniay makabat ya inyebat nen Pablo ed tepet ton dili: “Amtak a manisia ka.” Panon so inyebat nen Agripa unong ed kiwas na puso to? Oniay inyebat to: “Dia ed dagdaiset a salita nauyot mo ak a man-Kristiano.” (Gawa 26:27, 28) Anggaman si Agripa et agnagmaliw a Kristiano, anggan panon et mapatnag ya asagyat nen Pablo so puso nen Agripa panamegley na mensahe to.​—Hebreos 4:12.

15. Panon a niletneg nen Pablo so kongregasyon ed Tesalonica?

¹⁵ Kasin naimano yo a say panangiparungtal nen Pablo ed maong a balita et tugyopen na panangiyabawag tan pananangguyor? Lapud inusar nen Pablo itan a metodo diad ‘suston impangusar to ed salita na Dios,’ arum ya onderengel ed sikato et nagmaliw a mananisia. Ontan so kipapasen ed Tesalonica, a ditan so akaromogan nen Pablo ed saray Judio tan matakot ed Dios a Gentiles diad sinagoga. Oniay kuan na salaysay ed Gawa 17:2-4: “Si Pablo, unong ed ugali to, linmoob ed sikara, et dia ed taloran agew na Sabaton aki-ebatan ed sikara nipaakar ed saray Sulat, ya impaliwawa to, tan impatnag to a kaukolan nensaman a manirap si Kristo, tan onoli ed bilay dia ed saray inatey . . . Et saray arum ed sikara anisia ra.” Makatangguyor si Pablo. Sikato so akikatunongan, angipaliwawa, tan pinaneknekan to diad panamegley na Kasulatan a si Jesus so abayag lan insipan a Mesias. Anto so resulta? Niletneg so sakey a kongregasyon na saray mananisia.

16. Panon kayon lalon naliketan diad panangiyabawag na Panarian?

¹⁶ Sarag yo kasi so magmaliw a lalon marunong ed pananangguyor sano ipapaliwawa yo so Salitay Dios? No ontan, naromog yon mismo so liket tan gayaga ed panagpulong tan panagbangat yo ed totoo nipaakar ed Panarian na Dios. Ontan so eksperiensya na saray manangipalapag na maong a balita ya angiyaplika ed saray suhestion a nagkalalon usaren so Biblia diad panagpulong a kimey.

17. Pian nipatnag tayo a makagunggona so pangusar na Biblia diad ministeryo tayo, mangisalaysay na eksperiensya yon mismo odino iter so segek na say eksperiensya ed sayan parapo.

¹⁷ Alimbawa, oniay insulat na sakey a managbiahen manangasikaso na saray Tasi nen Jehova: “Dakerakel lan agagi so mamebemben na Biblia sano manpupulong ira ed saray puerta. Satan so akatulong ed saray manangipalapag a makapangibasa na teksto ed dakel a totoo a katongtong da. Satan so akatulong ed unabung tan say manangipalapag a mangisiglaot ed Biblia diad ministeryo tayo, ya aliwa labat a diad saray magasin tan libro.” Siempre, say mapalaway a pamemben tayo na Biblia sano manpupulong tayo so akadependi ed nanduruman kipapasen, kalaktip lay lokal iran kustombre. Anggaman kuan, nepeg a nakabkabat itayo bilang marunong ed panangusar na Salitay Dios diad panangguyor ed arum a mangawat ed mensahe na Panarian.

Agamilen so Panmoria na Dios ed Ministeryo

18, 19. (a) Panon so panmoria na Dios ed ministeryo tayo, tan akin a bayuboan tayo so ontan a panmoria? (b) Anto so makatulong ed sikatayo pian maaligwas tayon nagawaan so panagpawil? (Nengnengen so kahon ya apauloan na “No Panon so Panggawa na Maaligwas a Panagpawil,” ed pahina 16.)

¹⁸ Say sananey nin paraan pian nasabi tayo so puso na saray onderengel ed sikatayo et nakaukolan a mipara so panmoria tayo ed panmoria na Dios ed ministeryo tan magmaliw a maanos. Say linawa na Dios et amin a nengneng na too so ‘ondago ed pakapikabat ed katuaan.’ (1 Timoteo  2:3, 4) Agta satan so mismon pilalek tayo? Si Jehova so maanos met, tan lapud inkaanos to et naabuloyan so dakel a makapambabawi. (2 Pedro 3:9) Kanian, sano naromog tayo so sakey a mabulos ya ondengel ed mensahe na Panarian, nayarin nakaukolan so maminpigan ipawil ta pian nabayuboan so interes to. Nakaukolan so panaon tan anos pian naimatonan so ibulaslas na saray bini na katuaan. (1 Corinto 3:6) Itatarya na akatekep a kahon ya apauloay “No Panon so Panggawa na Maaligwas a Panagpawil” iray suhestion pian nabayuboan so interes. Tandaan a lawas manguuman so kabibilay na totoo, salanti, saray problema tan kipapasen da. Nayarin nakaukolan so maminpigan ipawil ed ayaman da, balet makanakana itan a sagpot tayo. Labay tayon nawalaan ira na pankanawnawan ondengel ed mensahe na Dios nipaakar ed kilalaban. Kanian, manpikasi ed si Jehova a Dios parad kakabatan pian nabayuboan so dunong na pananangguyor diad kimey yon pananulong ed arum a mangawat na mensahe na Panarian.

¹⁹ No walay aromog yon too ya interesadon ondengel ed mensahe na Panarian, anto ni so nagawaan tayo bilang Kristianon komikimey? Walaray suhestion ed ontumbok ya artikulo.

[Paimano ed Leksab]

Kasin Natandaan Yo?

• Akin ya epektibo so impandepensa nen Pablo ed arap nen Arin Agripa?

• Panon a nasagyat so puso ed mensahe tayo?

• Anto so ontulong ed sikatayo pian epektibo tayon nausar so Salitay Dios diad panabi ed puso?

• Panon tayon moriaen so ministeryo unong ed punto de bista na Dios?

[Tepetepet Parad Panagaral]

[Kahon/Saray litrato ed pahina 16]

No Panon so Panggawa na Maaligwas a Panagpawil

• Ipatnag so masimoon ya interes ed totoo.

• Mamili na makapasagyat a tema ed Biblia a singbaten.

• Mangitilak ed unabung na punton napantongtongan yo ed kada ipawil yo.

• Lawas nodnonoten so nipaakar ed too sano onalis kayo la.

• Ompawil a tampol, no nayari et kayari na sakey odino ed duaran agew, ta pian nasubaybayan so interes.

• Lawas nonoten a say gagala yo et say pakapangigapo na panangiyaral na Biblia.

• Ipikasi ed si Jehova a pabulaslasen to so interes.

[Litrato ed pahina 15]

Inagamil nen Pablo so pananangguyor sanen sikatoy walad arap nen Gobernador Festo tan Arin Agripa