No Akin a Mimimisa Ira

“SAY Republika na Korea natan so walaan la na ngalngalin mamipat a karakel na saray Presbyterian nen say Amerika.” Satan a balikas ed Newsweek a magasin so nayarin anurprisa ed dakel a managbasa, lapud iisipen na maslak a totoo a say Korea et sakey a bansan Confucian odino Buddhista. Natan et dakdakel lan simbaan na “Kristiano” so nanengneng ditan na saray turista, a mainomay a nabidbiran lapud saray krus a walaan na saray ambalangan silew. Kada Simba, kaslakan lan nanengneng so totoo a sanderwa odino santatlo, a walay awit dan Biblia, pian mimisa. Unong ed sakey a surbi nen 1998, ngalngalin 30 porsiento na saray Koreano so balanglan oonla ed simbaan na Katoliko odino Protestanti, a mas dakel nen saramay mankuan a Buddhista.

Diad sayan panaon et makapakelaw a naimano so dakdakel a porsiento na totoo ed inerman a pasen a maparanay a mimimisa. Ingen, aliwa labat a diad Korea noagta nagagawa met itan diad arum a bansa ed Asia, ontan met ed Aprika tan Latin Amerika. Akin a dakdakel nin siansia so mangibabagan manisia ira ed Dios bangta ompatnag a kasmak la ed dalin so agmananginenen tan mangibabaliwala ed relihyon? Akin a mimimisa ira?

Imparungtal na Gallup a surbi a masulok a kapaldua ed saray Koreanon mimimisa so manaanap na kareenan na nonot; manga kakatlo so maniilalo ed magnayon a bilay kayari ipatey; tan 1 ed 10 so maniilalo parad bunigas, kayamanan, tan itatalona.

Dakel a totoo ed Tsina so mimimisa diad ilalon naromog da so bengatlan mamenek ed espiritual a kakulangan da lapud say Komunistan ideolohiya so kalkalnan sasalatan na saray pirawat a nibase ed kapitalismo. Kada taon et minilyon a kopya na Biblia so iyiimprinta tan ibubunog ed Tsina, tan ompatnag a maseet iray totoo a manbabasa ed satan a singa ed inkaseet dan manbasa ed melag ya ambalangan libro nen Mao Tse-tung.

Arum a Katoliko ed Brazil, nagkalalo la ed saramay malangwer nin kailalakan, so agkontento ed sipan a maliket a bilay diad arapen​—say  labay da et nagamoran da la itan natan. Oniay inkuan na magasin a Tudo: “No say amakiwas ed totoo nen dekada 1970 et say teolohiya ed kawayangan, natan et say teolohiya ed inkaaligwas.” Diad sakey a surbi ed Britanya, tinepetan iramay mimimisa no antoy sakey a bengatlan labalabay da ed relihyon da. Parad sikara et manunaan so panlilimog.

Ipapatnag na sayan amin ya anggaman dakdakel ni so totoon manisia ed Dios, maslak so mas interesado nipaakar ed say nagunggona ra natan imbes a diad arapen​—odino say nipaakar ed Dios ni ingen. Antoy padesir mo a dugan rason ed panisia ed Dios? Anto kasi so ibabaga na Biblia ed sayan pamaakaran? Naromog mo so ebat diad ontumbok ya artikulo.