Saray Bobon a Naekatan

DIAD panaon na Biblia, saray bobon et saray abot a kinotkot na too a manunan pan-aasolan na danum. Diad loob na pigaran panaon, diad Insipan a Dalin, saratan lambengat so paraan pian mantultuloy a niwala so importantin suplay na danum.

Sanen inkurit nen propeta Jeremias so panangiyabawag na Dios, tinukoy to iray bobon diad piguratibon pantalos, a kuanto: “Duaran inkauges so ginawa na baley ko: inkaindan da ak a subol na saray danum a mabilay, tan angotkot ira na bobon a nipaakar ed sikara, bobon a letakletak ya agmakaiyan na danum.”​—Jeremias 2:13.

Saray Israelita so angikaindan ed Dios da, si Jehova​—say “subol na danum a mabilay”​—tan binmaling ira ed agnapanmatalkan iran piaalyansa na militar ed saray paganon nasyon tan ed panagdayew ed saray agmakayarin palson dirios. Unong ed panangikompara nen Jeremias, saratan ya iilaloan dan pansalimbengan et kaparpara na saray nanletak a bobon ya andian na antokaman a pakayarin manalimbeng odino mangisalba.​—Deuteronomio 28:20.

Kasin walay naaralan tayo natan ed sayan maawaran ya alimbawa? Singa say kipapasen ed panaon nen Jeremias, say maandon Dios, a Jehova, so mantutultuloy bilang alenleneg a Subol na saray manangiter-bilay a danum. (Salmo 36:9; Apocalipsis 4:11) Sikato lambengat, panamegley na Anak ton si Jesu-Kristo, so pakagamoran na totoo na andi-anggaan a bilay. (Juan 4:14; 17:3) Ingen, singa saray kapanaonan nen Jeremias, dakdakel a totoo natan so mangipupulisay tan mangibabaliwala ni ingen ed salita na Dios unong a nibalikas ed Biblia. Sikara so manmamatalek ed temporaryo iran solusyon na politika, maapan panagkatunongan na too, tan andi-kabaliksan iran ideolohiya tan pilosopiya a mamapabanday ed Dios. (1 Corinto 3:18-20; Colosas 2:8) Malinew so pampilian. Iner so labay mon panmatalkan? Kasin diad “subol na saray danum a mabilay,” si Jehova, odino diad saray “bobon a letakletak ya agmakaiyan na danum”?

[Litrato ed pahina 32]

Terra-cotta a pigurin na sakey ya inan-diosa ya aromog ed sakey a lubok na Israelita

[Credit Line]

Inalan litrato diad panangiyabuloy na British Museum