Say Dugan Rason ed Panisia

SAY Koreanon libro a 31 Reasons Why Young People Leave the Church so mangibabagan dakel la so agmimimisa lapud agda naromog iray makapenek ya ebat ed saray tepet da. Singa bilang, oniay itetepet da, ‘Akin a maniirap iramay totoo a manisia ed Dios?’ tan ‘Akin a nepeg tayon panisiaan so amin ya ibabangat na simbaan bangta dakel ed saratan a bangat so makapawetwet tan mansusumlangan?’

Lapud ag-ira napepenek ed saray ebat na saray klero ra, dakel so mangibabaga ya anggapo so ebat diad Biblia. Sano manpaliwawa so sakey a pari a base lambengat ed dilin opinyon to, say resulta et mabetbet a lingon pakatalos, panangipulisay ni ingen, ed Dios tan say Biblia.

Ontan so eksperiensya nen Abel, a pinabaleg bilang sakey a Lutheran diad Abalaten ya Aprika. Oniay nanonotan to: “Ibabangat na simbaan ya amin a toon ompapatey et ‘aalaen’ na Dios. Balet agko natalosan no akin ya ‘aalaen’ na maaron Dios iray atateng manlapud ananak da. Diad kaumaan na Aprika a binalegan ko, agmi pakgeran so nganak anggad agni binmaleg iray siwsiw to. Sano naamtaan min malukon so sakey a baka, agmi ni itan pakgeran sano agni nianak tan nisian so kilaw to. Agko natalosan no akin ya ag-ipapatnag na maaron Dios so ontan met a konsiderasyon ed totoo.”

Ontan met so panduaruwaan nen Aram, a taga-Canada. “Sanen 13-años ko, inatey so tatay ko,” so insalaysay to. “Diad diskurso na sakey a prominentin pari ed ponpon, insalaysay to a nilabay na Dios ya ompatey so tatay ko ta pian sikatoy lalon napaapit ed Dios diad tawen. Inkuanto ya ‘aalaen na Dios iray maong a totoo, lapud aaroen na Dios iramay matunong.’  Agko natalosan no akin ya ontanlay inka-siblet na Dios.”

Diad saginonor et akabat nen Abel tan si Aram iray Tasi nen Jehova, impaiyaralan ira na Biblia ed sikara tan, aromog da a siansia so ebat ed saray tepet da. Abayuboan da so panangaro ed Dios tan mabiskeg a pananisia ed sikato. Diad kaunoran et indedika ra so bilay da ed si Jehova tan nagmaliw iran matoor a lingkor to.

Suston Pikakabat​—Sakey a Tombok ed Panisia ed Dios

Anto so naaralan tayo ed sarayan eksperiensya? Naaralan tayo a no nipaakar ed panisia ed Dios, makana so suston pikakabat ed Biblia. Oniay inkuan nen apostol Pablo ed saray Kristiano diad kadaanan a syudad na Filipos: “Saya so kerewen ko a say aro yo ondaak a lalo nin lalo komon ed kakabatan dia ed amin a panangimano.” (Filipos 1:9) Insiglaot dia nen Pablo so panangaro ed Dios tan ed saray kapananisiaan diad suston pikakabat ed Dios tan pakatebek ed linawa to.

Makatunongan iya, lapud say manunan kakaukolanen parad pakawalaan na panagmatalek tan kompiyansa ed siopaman et say pakapikabat ed sikato​—a lalon maabig no sikatoy kabkabat mo. Mipadpara, nakaukolan mo so suston pikakabat pian napakiwas kan manisia ed Dios. “Say pananisia sikato so agpanduaruwa ed saray bengatla ya iilaloan, say panangipatnag ed saray bengatla ya agni anengneng,” so inkuan nen Pablo. (Hebreos 11:1) Say panisia ed Dios ya ag-atekepan na suston pikakabat ed Biblia et niyaliling ed sakey ya abung-abung a tinuop panamegley na saray baraha. Narageman labat na daiset et nabuyak la.

Ontulong ed sika so panaral na Biblia pian naromog mo iray ebat ed saray tepet a singa samay abayag ya akawetwetan nen Abel tan Aram, Akin ya ompapatey so totoo? Ipapaliwawa na Biblia a “say kasalanan linmoob ed mundo lapu ed sakey a too, tan say patey lapu ed kasalanan; et say patey ed satan linma ed amin a too, ta amin nankasalanan.” (Roma 5:12) Ontatakken tan ompapatey so totoo lapud impankasalanan nen Adan, aliwan lapud aalaen ira na Dios pian sikaray nakaiba to. (Genesis 2:16, 17; 3:6, 17-19) Niarum ni, ipaparungtal na Biblia so tuan ilalo ya itatarya nen Jehova a Dios. Panamegley na Anak to, si Jesu-Kristo, sikatoy angitarya na ilalon kioli na saray makasalanan a totoo.​—Juan 5:28, 29; Gawa 24:15.

Pian natulongan itayon makatebek ed katuaan nipaakar ed kioli, lugan na rekord na Biblia so pigaran alimbawa na indibidual a pinaoli nen Jesus. (Lucas 7:11-17; 8:40-56; Juan 11:17-45) Legan mon babasaen irayan salaysay na Biblia, imanoen so gayaga tan liket ya alikna na saray kakaaro tan kapamilya na saratan ya apaoli. Imanoen met ya apakiwas iran mangidayew ed Dios tan manisia ed si Jesus.

Say suston pikakabat nipaakar ed Dios tan ed saray gagala to so walaan met na parehon epekto ed saray totoo natan. Dakel so datin nawewetwet, nabebelatan, tan nagagapol ni ingen lapud agda naromog iray makapenek ya ebat ed saray importantin tepet. Balet sanen inaral da so Biblia, aromog da iray ebat, tan satan so sigpot ya anguman ed bilay da.

Panangaro ed Dios​—Manunan Rason ed Panlingkor ed Sikato

Anggaman makana so suston pikakabat parad panisia ed Dios, wala ni so nakaukolan pian napakiwas so sakey ya ontulok tan manlingkor ed sikato. Sanen tinepetan no anto so sankabalgan a ganggan na Dios, oniay inkuan nen Jesus: “Sika aroen mo so Katawan a Dios mo ed amin a pusom, tan ed amin a kamarerwam, tan ed amin a nonot mo, tan ed amin a biskeg mo.” (Marcos 12:30) No aaroen na sakey a too so Dios unong ed paraan ya impabitar nen Jesus, sikatoy mabulbulos ya ontulok tan manlingkor ed Sikato. Ontan met kasi so gagawaen mo?

Si Rachel, a pigara lan dekada a manlilingkor bilang misionaryo diad Korea, so angiter na rason parad pananisia to: “Nonodnonoten ko so inkamabunlok nen Jehova ed saray pinalsa to, say panamerdona to diad pidedeneng to ed saray totoo to, tan say pilalek ton nagunggonaan itayon mismo diad impangipaamta to ed sikatayo no antoray kaliktan to ed sikatayo. Amin iratan so mamapabulaslas na panangarok ed Dios. Tan satan a panangaro so mamapakiwas ed siak a manlingkor ed sikato.”

 Si Martha, sakey a balo a taga-Alemanya, so 48 a taon lan manlilingkor ed si Jehova. Oniay inkuan to: “Akin a manlilingkor ak ed si Jehova? Lapud sikato so inarok. Nilabilabi ak a mitotongtong ed si Jehova diad pikakasi tan ibabagak ed sikato a misalsalamat ak ed sikato lapud amin a langkap to, nagkalalo la ed say dondon bagat.”

On, say panangaro ed Dios so mamakiwas ed sikatayon manlingkor ed sikato ya impapuso. Balet, panon a nawalaan na ontan a panangaro so sakey a too? Say sankabiskegan a mamakiwas pian bayuboan tayo so panangaro ed Dios et say aralem ya apresasyon ed panangaro ya impatnag to ed sikatayo. Imanoen iyan makapaligsay-puson panonot manlapud Biblia: “Say agmangaro agto kabat so Dios; ta say Dios sikato so aro. Dia ed saya nipatnag so aro na Dios ed sikatayo, a say Dios imbaki to ed mundo so Anak ton bogbogtong, pian manbilay itayo ed panamegley to. Onia so panangaro: aliwa a lapu ed sikatayo so angaro ed Dios, noag ingen sikato so angaro ed sikatayo, tan imbaki to so Anak to a makapamaandi kasalanan tayo.”​—1 Juan 4:8-10.

Kasin natetebek mo so kinaaralem na sayan panangaro? Isipen pa a sikay nalelener ed maples ya agus tan sakey a too so angirisgay bilay to pian isalba to ka. Kasin sikatoy lingwanan mo, odino agka ta misalamat a maong ed sikato? Agka ta mabulos a manggawa ed amin a nayarian mo parad sikato? Agbalot naparaan so aro ya impatnag na Dios diad impangitarya to ed Anak to, si Jesu-Kristo, bilang dondon bagat. (Juan 3:16; Roma 8:38, 39) Sano naliliknam so panangaro na Dios, sikay napakiwas a mangaro tan manlingkor ed sikato diad interon-puso.

Saray Bendisyon Natan tan Diad Arapen

Anggaman say panangaro tayo ed Dios so nepeg a manunan rason pian gawaen so linawa to, makapaligsay-puso a naamtaan a tutumangan na Dios iramay manlilingkor ed sikato. Oniay impabitar nen apostol Pablo: “No anggapo so pananisia agnayarin paliketen: ta say ondago ed Dios nakaukolan a sisiaen to a wala, tan sikato so niiyan a mananumang ed saray mananap ed sikato.”​—Hebreos 11:6.

Saraman so mangaaro tan manguunor ed Dios so peteg a bebendisyonan to. Dakel so  manggagayaga ed magmaong a bunigas lapud tutumboken da iray prinsipyo na Biblia. (Uliran 23:20, 21; 2 Corinto 7:1) Saraman so mangiyaaplika ed saray prinsipyo na Biblia nipaakar ed inkamatua tan inkakuli so kaslakan a panmamatalkan na saray amo ra kanian panggagayagaan da so babaleg a seguridad ed ekonomya. (Colosas 3:23) Lapud manmamatalek ira ed si Jehova, panggagayagaan na saray lingkor na Dios so deen na kanonotan anggaman nidudunget ira ed makapasubok iran sirkumstansya. (Uliran 28:25; Filipos 4:6, 7) Manuna ed amin, sikaray matalek a maniilalo ed tumang ya andi-anggaan a bilay diad onsabin mangaraldalin a Paraiso.​—Salmo 37:11, 29.

Anto kasi so nalilikna na saramay bebendisyonan nen Jehova nipaakar ed sikato? Imbalikas nen Jacqueline, sakey a Kristiano ed Canada, so apresasyon to ed Dios: “Sikatoy mangiiter lawas ed sikatayo na saratan ya alay abig a regalo, tan itatarya to so seguradon ilalo ya andi-anggaan a bilay.” Si Abel, ya akabat tayo ed gapo, so aneskribe ed liknaan to ed onian paraan: “Say ilalon pambilay a maando diad paraison dalin et agko nin balot nadngelan nensaman, tan siak so maniilalo ed satan. Anggaman ontan, anggano anggapo so Paraiso, maliket ak nin siansia ya ipatnag so panangarok ed Dios diad panlingkor ed sikato.”

Nawalaan Ka Met na Tuan Pananisia

‘Si Jehova na saray ehersito so mangukom a matunotunong tan manalsali ed puso tan isip,’ so kuan na Biblia. (Jeremias 11:20) On, uusisaen nen Jehova no anto so walad akindalem ya inkatoo tayo. Balang sakey so nepeg a mangusisa ed dilin motibo to ed pananisia ed Dios. Nayarin say sengegan ed mauges ya inkiwas ed apalabas et saray lingon sisisiaen tan ideya nipaakar ed Dios. Balet say suston pikakabat ed Biblia so makapangitonton ed dugan pisisiglaotan ed Manamalsa, si Jehova a Dios.​—1 Timoteo 2:3, 4.

Diad panamegley na uksoyan da a libren panangiyaral ed Biblia, saray Tasi nen Jehova so ontutulong ed saray totoo a nagamoran so suston pikakabat ed Dios. (Mateo 28:20) Dakel ya angawat ed satan a tulong so mangaaro la ed Dios tan nababayuboan da la so puron pananisia ed sikato. Lapud panaaral da na Biblia, nagagamoran da so “aralem a kakabatan tan kalakal” ya ontutulong ed sikaran ‘manakar a mataletalek’ diad sarayan mapeligron panaon. (Uliran 3:21-23) Manuna ed amin, sikaray walaan la natan na “nailaloan tan malet” ya ilalo ed arapen. (Hebreos 6:19) Nawalaan ka met na tuan pananisia tan sikay manggayaga ed sarayan bendisyon.

[Kahon ed Pahina 6]

Makapawetwet Iran Tepet a Mankaukolan na Ebat

“Leleg kon manpapasal diad ospital bilang estudyante ed medisina, naimanok iray maong a totoo a mannanangis lapud saray sakit tan desyang. No wala so Dios, akin a nagagawa irayan bengatla? Kasin say relihyon et parad pakawalaan labat na mareen a kanonotan?”​—Sakey a datin Presbyterian ed Korea.

“Mabetbet kon panuumamengan no kasin say tatay ko, a mainum na alak, so linma ed impierno odino diad tawen. Natatakot ak ed saray inatey tan ed ideyan impiernon-apoy. Agko natalosan no panon a nitepel na maaron Dios a say sakey a too et magnayon a manirap ed impierno.”​—Sakey a datin Katoliko ed Brazil.

“Anto so manatalaran ed dalin tan katooan diad arapen? Panon a makapambilay ya andi-angga so katooan? Panon a nagamoran na katooan so tuan kareenan?”​—Sakey a datin Katoliko ed Alemanya.

“Aliwan makatunongan ed siak so bangat a reinkarnasyon. Agmakapandayew so ayayep, kanian no lapud pigaran rason et niyalis so bilay mo ed sakey ya ayep pian bayaran iray kasalanan mo, panon mo kasin ipetek iray pamaakaran tan onaligwas ed satan a kipapasen?”​—Sakey a datin Hindu ed Abalaten ya Aprika.

“Binmaleg ak ed pamilyan Confucian, tan mibibiang ak nensaman diad seremonya parad pamareen ed inmuunan atateng mi. Sanen angiba ak ya angiparaan ed lamisaan a pan-aapayan tan dinmakmomo ak, inumameng ko no kasin saray inatey lan inmunan ateng mi so mangan ed tagano tan makanengneng ed pandadakmomo mi ed sikara.”​—Sakey a datin Confucianista ed Korea.

Amin irayan indibidual so akaromog na ebat ed saray tepet sanen impaiyaralan ira na Biblia ed saray Tasi nen Jehova.