Tepetepet Manlapud Saray Managbasa

Diad anton pantalos a nagmaliw ya “emel” si Ezequiel legan na panaon na inkakubkob tan inkaderal na Jerusalem?

Manuna’d amin, diad pantalos ya anggapo lay antokaman nin niarum to ed mapropetikon mensahe nen Jehova ya impasabi to la.

Ginmapon nanlingkor si propetan Ezequiel bilang matoor a managbantay parad saray Israelitan adakep ed Babilonia nen “komalima a taon na inkadakep nen ari Joacim,” salanti, nen 613 K.K.P. (Ezequiel 1:2, 3) Diad komasamplo ya agew na komasamplo a lunar a bulan na 609 K.K.P., sikatoy pinakabatan panamegley na madibinon panangipuyan nipaakar ed gapo na pangubkob na saray taga-Babilonia ed Jerusalem. (Ezequiel 24:1, 2) Anto so pansumpalan na pangubkob? Kasin makaliktar so Jerusalem tan saray andian na pananisian manaayam ditan? Bilang managbantay, impasabi la nen Ezequiel so ag-onsaew a mensahe nen Jehova nipaakar ed kadederal, tan agla kaukolan ya aruman ni itan nen Ezequiel, pian pagmaliwen a lalon makakombinse so mensahe. Nagmaliw ya emel si Ezequiel no nipaakar ed antokaman nin bengatla diad pangubkob ed Jerusalem.​—Ezequiel 24:25-27.

Manga anem bulan kayari inkaderal na Jerusalem nen 607 K.K.P., walay sakey ya akatakas ya angibalita ed si Ezequiel a walad Babilonia a say masanton syudad et nankibalatar. Diad labi antis a sinmabi imay sakey ya akatakas, si Jehova “nilukasan to so sangi [nen Ezequiel] . . . , tan [sikato so agla] emel nensaman.” (Ezequiel 33:22) Anampot ed saman so inkaemel nen Ezequiel.

Kasin literal a naemel si Ezequiel legan na saman a panaon? Andin balot, lapud anggan sanen kayari na sayan “inkaemel” to, sikatoy angibalikas na saray propesiya a manunan nipaarap ed saray walad kabangibang a nasyon a nanliket ed inkagba na Jerusalem. (Ezequiel, kapitulo 25-32) Diad kagapo na kimey nen Ezequiel bilang propeta tan managbantay, oniay inkuan nen Jehova ed sikato: “Ipeket ko naani so dilam ed mismon tawentawen mo, pian naemel ka, tan agka naani mamalaw ed sikara; ta sikara matunganga ra ya abung. Balet no kasalita ta ka lukasan ko naani so sangim.” (Ezequiel 3:26, 27) Sano anggapoy mensahe nen Jehova a parad Israel, si Ezequiel so mansiansian emel nipaakar ed satan a nasyon. Salitaen lambengat nen Ezequiel no anto so labay nen Jehova a paibaga ed sikato diad panaon a kaliktan la nen Jehova a gawaen to itan. Ipapatnag na say inkaemel nen Ezequiel ya anggapo la so salitaen to no nipaakar ed makabkabaliksan a propesiya parad saray Israelita.

Say modernon-agew a managbantay a klase, saray alanaan a Kristiano, so mangipapasakbay ed kaderal na Kakristianoan, say antitipikon Jerusalem. Sano onsabi so ‘baleg a kairapan’ tan naderal so “Babilonia a Baleg,” a sankamundoan ya empiryo na palson relihyon, say alanaan a klasen Ezequiel so agla kaukolan a mansalita nipaakar ed pangangga na Kakristianoan, a manunan kabiangan na satan ya empiryo.​—Mateo 24:21; Apocalipsis 17:1, 2, 5.

On, onsabi so panaon a saray alanaan tan saray kakaiba ra so magmaliw ya emel, ya anggapo lay antokaman nin ibaga ra parad Kakristianoan. Satan so panaon a “saray samploran saklor” tan “say ayep” so maneral tan manlakseb ed Babilonia a Baleg. (Apocalipsis 17:16) Siempre, agkabaliksan na saya a magmaliw a literal ya emel iray Kristiano. Unong a gagawaen da la natan, sikaray mangidayew ed si Jehova tan mangipakabat ed sikato diad inagew-agew tan “ed amin na saray kailalakan.”​—Salmo 45:17; 145:2.