Mas Pankaganatan Natan so Pambantay Tayo
Mas Pankaganatan Natan so Pambantay Tayo
“Sirin, mansiansian manbantay, lapud agyo amta no anton agew so isabi na Katawan yo.”—MATEO 24:42, NW.
1, 2. Anto so mangipatnag a manbibilay itayo la ed anggaan na kaplesan a sistema na bengabengatla?
“MANUNA ed amin, say koma-duamplo a siglo so pirmin naapektaan na bakal,” so inkuan na sakey ya autor a si Bill Emmott. Anggaman bibidbiren to a naeksperiensya ed interon peryodo na awaran na too iray makapasinagem ya ebento na bakal tan karawalan, oniay inyarum to: “Anggapoy pidumaan na koma-duamplo a siglo ed saray ebento diad akadkauna iran siglo, say pidumaan na satan et diad inkalaknab. Satan so sankaunaan a siglo ya inkagawaan na peteg a sankamundoan a panlalaban . . . Tan, diad pangidanet ed punto, aliwa lambengat a sakey a panlalaban so agawa ed satan ed sankamundoan, noagta duara.”
2 Saray bakal a mangilalanor ed ‘italindeg na nasyon sumpa ed nasyon, tan panarian sumpa ed panarian’ so impasakbay la nen Jesu-Kristo. Anggaman ontan, sakey labat itan ya aspekto na ‘tanda na isabi nen Kristo tan say anggaan na mundo’ odino sistema na bengabengatla. Diad sayan malaknab a propesiya, sinalambit met nen Jesus iray eras, salot, tan yegyeg. (Mateo 24:3, 7, 8; Lucas 21:6, 7, 10, 11) Diad dakel a paraan, linmaknab tan linmoor iratan a desyang. Kasmak so kaugsan na too, unong a nanengneng ed awawey to nipaakar ed Dios tan ed kapara ton too. Mapatpatnag so kagegeba na moral tan idaraak na krimen tan karawalan. Saray totoo so nagmaliw a manangaro na kuarta nen say manangaro ed Dios, ya okupado ira ed panliliket. Amin na saya so mamaneknek a manbibilay itayo la ed “saray panaon a maatap.”—2 Timoteo 3:1-5.
3. Panon itayon nepeg a naapektoan ed “[saray] tanda na saray panaon”?
3 Panon mon moriaen so onloloor a kipapasen na saray pakurang na totoo? Dakel so agmangim-imano, ya agnaaapektoan ni ingen, ed saray makapagonigon a nagagawa natan. Agnatetebek na saray maimpluensya tan matudion totoo na mundo so kabaliksan na “[saray] tanda na saray panaon”; nisay niiiter na saray relihyoson lider so manepeg a panangigiya nipaakar ed saya. (Mateo 16:1-3) Balet oniay insimbawa nen Jesus ed saray patumbok to: “Sirin, mansiansian manbantay, lapud agyo amta no anton agew so isabi na Katawan yo.” (Mateo 24:42, NW) Sikatayo so papasesegen nen Jesus ya aglambengat manbantay noagta “mansiansian manbantay.” Pian mansiansia itayon akabantay, nepeg ya alerto tan sililiing itayo. Kakaukolanen na saya so aliwa lambengat a pamidbir a manbibilay itayo ed kaunoran iran agew, ya aglambengat bibidbiren a mairap iray panaon. Nepeg a walaan itayo na mapekder a kombiksion a “say anggaan na ganaganay bengatla manasingger.” (1 Pedro 4:7) Magmaliw itayon akabantay tekep na pankaganatan no walaan itayo na ontan a kombiksion. Kanian, say tepet a nepeg tayon molimolien et: ‘Anto so ontulong ed sikatayo pian napabiskeg so kombiksion tayo ya asingger la so anggaan?’
4, 5. (a) Anto so mamabiskeg ed kombiksion tayo ya asingger la so anggaan na sayan marelmeng a sistema, tan akin? (b) Anto so sakey a pampadparaan na panaon nen Noe tan say kiwawala na Anak na too?
4 Konsideraen iray walan kipapasen sakbay ya agawa so nikadkaduman ebento ed awaran na too—say baleg a Delubio ed panaon nen Noe. Mauge-uges so totoo ed saman kanian “amasinagel [itan] ed puso” nen Jehova. Oniay inyabawag to: “Gaygayen ko so too a pinalsak ya ekalen ed tapew na dalin.” (Genesis 6:6, 7) Tan talagan ontan so ginawa to. Nipaakar ed pampara na panaon nen Noe tan say panaon tayo, oniay inkuan nen Jesus: “Unong ed saray agew nen Noe, ontan naani so isabi na Anak na too.”—Mateo 24:37.
5 Makatunongan ya isipen a mipadpara so panmoria nen Jehova ed kaplesan a mundo a singa ed impanmoria to ed panaon sakbay na Delap. Lapud impangangga to so agmaridios a mundo ed panaon nen Noe, sikato so maseguron maneral met ed marelmeng a mundo natan. Say pakawalaan na malinew a pakatalos ed saray pampadpara na panaon nensaman tan say panaon tayo so nepeg a mamabiskeg ed kombiksion tayo ya asingger la so anggaan na mundo. Anto sirin iray pampadpara? Wala so limara. Unona et espisipikon nidatak so pasakbay nipaakar ed onsabin kadederal.
Apasakbayan “Nipaakar ed Saray Bengatla ya Agni Anengneng”
6. Anto so determinadon ginawa nen Jehova diad panaon nen Noe?
6 Diad panaon nen Noe, oniay inyabawag nen Jehova: “Say espirituk aglawas misumpaan ed too, ta sikato so laman met: ingen ta saray agew to naani sanlasus tan duamplo a taon ira.” (Genesis 6:3) Say inkiyabawag na sayan ganggan na Dios nen 2490 K.K.P. so ananda ed gapoan na anggaan na saman ya agmaridios a mundo. Isipen pa so kaimportantian na satan parad saramay manbibilay ed saman! Wala labat so 120 taon insan to intarok so “delap na saray danudanum ed dalin, a mangaygay na amin a laman, a kawalaan na panlinlinawaan na bilay ed silong na tawen; amin a bengatla a wala ed dalin ompatey.”—Genesis 6:17.
7. (a) Anto so inkiwas nen Noe ed pasakbay nipaakar ed Delap? (b) Panon itayon nepeg ya onkiwas ed saray pasakbay nipaakar ed anggaan na sayan sistema?
7 Naawat nen Noe so pasakbay nipaakar ed onsabin desyang pigara nin dekada ed akadkauna, tan sikato so makabat ya angusar ed panaon pian manparaan parad kilalaban. Onia so inkuan nen apostol Pablo: “Sanen binilin na Dios nipaakar ed saray bengatla ya agni anengneng, [si Noe] nensaman aragdag ed mapagalang a takot, angiparaan na sakey a biong a kilabanan na abung to.” (Hebreos 11:7) Komusta itayo balet? Manga 90 taon lay linmabas manlapud inggapo na kaunoran iran agew na sayan sistema na bengabengatla nen 1914. Maseguro itayo a wala tayo la’d “panaon na kasumpalan.” (Daniel 12:4) Panon itayon nepeg ya onkiwas ed saray pasakbay a niiter ed sikatayo? “Sabalet so mangunor ed linawa na Dios onsiansia lawas,” so indalatdat na Biblia. (1 Juan 2:17) Natan la sirin so panaon ed panggawa na linawa nen Jehova tekep na pirmin pankaganatan.
8, 9. Antoran pasakbay so niiter dia ed modernon panaon, tan panon irayan niyaabawag?
8 Diad modernon panaon, naaralan na saray masimoon ya estudyante na Biblia manlapud apuyanan a Kasulatan a sayan sistema so nigana lan naderal. Kasin panisiaan tayo iya? Imanoen so mabitar ya inkuan nen Jesu-Kristo: “Wala naani baleg ya irap ed satan, ya anggapo so ontan a nanlapud gapo na mundo ya angga ed natan, anggapo, anggapo la naani.” (Mateo 24:21) Imbaga met nen Jesus a sikato so onsabi bilang say tinuro na Dios ya Ukom tan ibiig to so totoo a singa ed managpastol ya ibiig to iray karnero manlapud saray kanding. Saramay naromog ya agmakana so “onla ra naani ed dusa ya andi-anggaan; bang ira balet so matunong dia ed bilay ya andi-anggaan.”—Mateo 25:31-33, 46.
9 Impaimano nen Jehova irayan pasakbay ed totoo to panamegley na nipanpanaon iran panonot a lugan na espiritual a tagano ya intarya na say “matoor tan makabat ya aripen.” (Mateo ) Niarum ni, nipapasabi ed kada nasyon, tribu, pansasalita, tan totoo a ‘takotan da so Dios, tan iter ed sikato so gloria: ta say oras na pangukom to sinmabi la.’ ( 24:45-47Apocalipsis 14:6, 7) Say manunan kabiangan na mensahe na Panarian ya ipupulong na saray Tasi nen Jehova ed sankadalinan et say pasakbay a magano lan ekalen na Panarian na Dios so pananguley na too. (Daniel 2:44) Sayan pasakbay so agnepeg a leglemewen. Lawas totooren na Makapanyarin-amin a Dios iray sipan to. (Isaias 55:10, 11) Tinoor to so salita diad panaon nen Noe, tan tooren to met itan diad panaon tayo.—2 Pedro 3:3-7.
Nagmaliw a Kasmak so Seksual a Kabandayan
10. Anto so nibaga nipaakar ed seksual a kabandayan diad panaon nen Noe?
10 Mipadpara so panaon tayo ed panaon nen Noe diad sananey nin pamaakaran. Ingganggan nen Jehova so inmunan laki tan bii a ‘panoen da [na totoo] so dalin,’ ya usaren da so inter na Dios ed sikara a kapasidad ed sekso diad mapagalang a paraan tan diad loob na uksoyan na panangasawa. (Genesis 1:28) Diad panaon nen Noe, inimpluensyaan na saray matungangan anghel so katooan diad panamegley na ayesyes a panmoria ed sekso. Sikara so inmakseb diad dalin, nankinon-too, tan akiakdol ed saray magaganan bibii, nanilalak ira na kapalduan-too, kapalduan-demonyo—saray Nefilim. (Genesis 6:2, 4) Say kasalanan na sarayan magalin angheles so niyaliling ed saray pikewet ya agamil na saray taga-Sodoma tan Gomorra. (Judas 6, 7) Kanian, say seksual a kabandayan et kasmak ed saraman a panaon.
11. Anton kipapasen ed moral so pipadparaan na panaon tayo ed panaon nen Noe?
11 Komusta so kipapasen ed moral natan? Diad sarayan kaunoran ya agew, say kabibilay na dakel a totoo so akasentro ed sekso. Malinlinew a deneskribe nen Pablo iratan bilang “inter da so inkasikara a dili ed kaalakan na laman”; dakel so angiter ed inkasikaran dili a ‘siaagap ed amin a nengneng na karumsisan.’ (Efeso 4:19) Kaslakan la so pornograpiya, pisesekso sakbay na kasal, seksual a panangabuso ed ugugaw, tan homoseksualidad. Arum et “inako ra ed inkasikara a dili so gunggona a manepeg ed saray lingo ra” diad nengneng na saray makaalis a sakit ed sekso, inkabuyak na bilay na pamilya, tan arum niran problema ed sosyedad.—Roma 1:26, 27.
12. Akin a nepeg tayon bayuboan so pambusol ed mauges?
12 Diad panaon nen Noe, impaakseb nen Jehova so baleg a Delubio tan impangangga iman a mundon naatiwel la ed sekso. Nepeg ya agtayon balot lilingwanan so katuaan a sarayan agew tayo et talagan singa saray agew nen Noe. Diad onsabin “baleg ya irap” et naekal ed dalin so “saray managlawan, anggan saray manangigalang ed talintao, anggan saray managsinger ed agda asawa, anggan saray binabai, anggan saray milawanan ed kapara ra a laki.” (Mateo 24:21; 1 Corinto 6:9, 10; Apocalipsis 21:8) Talagan pankaganatan so pamayubo tayo ed pambusol ed mauges tan paliisan tayo iray sirkumstansya a mangitonton ed imoralidad!—Salmo 97:10; 1 Corinto 6:18.
Say Dalin so “Napno Nensaman na Karawalan”
13. Diad panaon nen Noe, akin a say dalin et ‘napno na karawalan’?
13 Diad impangipabitar ed sakey nin pakabidbiran ed panaon nen Noe, oniay kuan na Biblia: “Say dalin met inmuges nensaman ed arap na Dios, tan say dalin so napno nensaman na karawalan.” (Genesis 6:11) Diad tua et aliwa lan balo so karawalan. Say anak nen Adan a si Cain so amatey ed matunong ya agi to. (Genesis 4:8) Diad impannodnonot nen Lamec ed marawal ya awawey diad panaon to, tinibukel to so sakey ya anlong a mangipapangta ed impamatey to ed sakey a kalangweran a laki, a nibabagan panangidepensa ed dili. (Genesis 4:23, 24) Say pidumaan ed panaon nen Noe et say laknab na karawalan. Pinmalalo so karawalan ed saman sanen inasawa na saray matungangan anghelikon ananak na Dios iray bibii diad dalin tan nanilalak ira na saray Nefilim. Ipapabitar na NWT a say orihinal a Hebreon salita a manutukoy ed sarayan maramsak a higante et mankabaliksan na ‘saray Manangitumba’—‘saramay manangituang ed arum.’ (Genesis 6:4) Bilang resulta, say dalin so “napno na karawalan.” (Genesis 6:13) Isipen pa iray probleman inarap nen Noe diad impangasikaso to ed pamilya to ed ontan a kaliberliber! Ingen, si Noe so apaneknekan a ‘matunong ed arap nen Jehova dia ed saman a kapolian.’—Genesis 7:1.
14. Panon a say mundo natan et ‘napno na karawalan’?
14 Nagagawa la so karawalan diad interon awaran na katooan. Balet singa ed panaon nen Noe, naiimatonan met ed panaon tayo so karawalan diad malaklaknab a paraan. Mabetbet tayon narengelan so nipaakar ed karawalan ed loob na pamilya, saray gawa na terorismo, saray kampanya na panagpalanit ed sakey a grupo na totoo, tan turobos a panamatey na saray armadon totoo ya andian na malinew a motibo. Nilikud ni ed satan et say panamaagus na dala lapud saray bakal. Say dalin so napno lamet na karawalan. Akin? Anto so makasengeg ed inkasmak na satan? Iparungtal na ebat so sananey nin pipadparaan ed panaon nen Noe.
15. (a) Anto so sengegan ed indaak na karawalan diad kaunoran iran agew? (b) Anto so napanmatalkan tayon pansumpalan?
15 Sanen niletneg so Mesianikon Panarian na Dios diad tawen nen 1914, say nitronon Ari, si Jesu-Kristo, so makatantanda a kinmiwas. Manlapud tawen et nibasileng si Satanas a Diablo tan saray demonyo diad kaliberliber na dalin. (Apocalipsis 12:9-12) Sakbay na Delap, boluntaryon tinaynan na saray matungangan angheles so mangatatawen a posisyon da; balet, diad modernon panaon et sikara so paskaran a pinagit. Niarum ni, agda la nayarian natan so mankinon-too diad dalin ta pian napanliketan da so mabanday iran kagletan na laman. Kanian lapud inkadismaya, sanok, tan takot ed manasingger lan panangukom, iimpluensyaan da so totoo tan saray organisasyon a manggawa na inaayep iran gawa na krimen tan karawalan ed mas malaknab ni ingen a paraan nen samay diad panaon nen Noe. Pinunas nen Jehova so mundo sakbay na Delap sanen pinano itan na kaugsan na saray matungangan anghel tan saray ilalak da. Makapanseguro kayo ya ontan met so gawaen to ed panaon tayo! (Salmo 37:10) Balet, amta na saramay mansiasiansian akabantay natan ya asingger lay kililiktar da.
Nipupulong so Mensahe
16, 17. Anto so komapat a pampadparaan na saray agew nen Noe tan say panaon tayo?
16 Say komapat a punto a piparaan na kaplesan a panaon ed samay panaon sakbay na Delap et napatnagan ed kimey a niganggan ed si Noe. Si Noe so nanggawa na baleg a biong. Sikato met so “managpulong.” (2 Pedro 2:5) Anton mensahe so impulong to? Mapatnag a say impulong nen Noe et angilaktip ed pankaukolan na pagbabawi tan say pasakbay ed onsabin kadederal. Imbaga nen Jesus a saray totoo ed panaon nen Noe et “agda akabkabatan [“inim-imano,” NW] angga ed sinmabi’ delap, et inyanor to ra ya amin.”—Mateo 24:38, 39.
17 Mipadpara, legan na maseet a susumpalen na saray Tasi nen Jehova so ganggan ed sikara a manpulong, niyaabawag so mensahe na Panarian na Dios ed sankamundoan. Diad amin lawarin parte na mundo, narerengel tan nababasa na totoo so mensahe na Panarian diad mismon lenguahe ra. Say magasin a Panag-Bantayan, a mangiyaabawag ed Panarian nen Jehova, so nipapalapag ed masulok a 25,000,000 tan niyiimprinta ed masulok a 140 a lenguahe. On, say maong a balita na Panarian na Dios so nipupulong ed “sankamundoan ya onkanan pamintuan ed saray amin a nasyones.” Sano nasumpal itan a kimey unong ed panlabayan na Dios, seguradon onsabi so anggaan.—Mateo 24:14.
18. Panon so pamparpara na kiwas na dakel a totoo ed panagpulong a kimey tayo tan say kiwas na maslak a totoo ed panaon nen Noe?
18 No nodnonoten tayo so inkagba ed espiritual tan moral diad saray panaon sakbay na Delap, natalosan tayo no akin ya inelek-elekan na saray anawet a totoo so pamilya nen Noe tan nagmaliw iran puntirya na panagbalaw tan panagludlurey. Balet talagan sinmabi so anggaan. Mipadpara, “saray managlurey a pati panaglurey” da so kasmak ed kaunoran iran agew. “Balet say agew na Katawan onsabi a singa matakew,” so inkuan na Biblia. (2 Pedro 3:3, 4, 10) Onsabi itan ed aturon panaon. Ag-itan naatrasado. (Habacuc 2:3) Agaylan makabat so pantultuloy tayon akabantay!
Dagdaiset so Akaliktar
19, 20. Anto so naimano tayon pampadparaan na Delap tan say pakaderal na kaplesan a sistema na bengabengatla?
19 Saray pampadparaan na panaon nen Noe tan say panaon tayo so aliwa lambengat a say kaugsan na totoo tan say inkaderal da. No panon a walaray akaliktar ed Delap, wala met iray naliktar ed anggaan na kaplesan a sistema na bengabengatla. Saramay akaliktar ed Delap et saray mauyamo ya agnambilay a singa ed impanbilay na totoo ed inkalapagan. Tinalineng da so pasakbay na Dios tan nansiansia iran biig ed marelmeng a mundo nensaman. “Si Noe akagamor na grasya ed saray mata nen Jehova,” so inkuan na Biblia. “[Si Noe so] nagnap ed saray kapolian to.” (Genesis 6:8, 9) Manlapud amin a katooan, sakey a pamilya, a ‘daiset, salanti walwalora a katao so nilaban ed danum.’ (1 Pedro 3:20) Tan inter ed sikara nen Jehova a Dios so ganggan, a kuan to: “Manbunga kayo, tan ondakel kayo, tan makmakan yo so dalin.”—Genesis 9:1.
20 Papaseguroan itayo na Salitay Dios a say “baleg ya ulop” et ompaway ‘manlapu ed baleg ya irap.’ (Apocalipsis 7:9, 14) Kaunongan karakel so kabiangan ed baleg ya ulop? Oniay inkuan a mismo nen Jesus: ‘Mainget so pinto, tan makisir so dalan, a mamaarap ed bilay, et daiset so saray makaromog ed satan.’ (Mateo 7:13, 14) No ikompara ed binilyon a manbibilay ed dalin natan, daiset iray makaliktar ed onsabin baleg a kairapan. Balet nayarin walaan ira na pribilehyon mipadpara ed saramay akaliktar ed Delap. Saray makaliktar so nayarin nawalaan na pankanawnawan manilalak bilang kabiangan na balon mangaraldalin a sosyedad.—Isaias 65:23.
‘Mansiansia Kayon Akabantay’
21, 22. (a) Panon kan agunggonaan ed impangonsidera ed salaysay nipaakar ed Delap? (b) Anto so teksto ed taon 2004, tan akin a nepeg tayon talinengen so bilin na satan?
21 Anggaman say Delap et agawa labat nensaman, malinew ya itatarya na satan so pasakbay ya agtayo nepeg ya ibaliwala. (Roma 15:4) Saray pampadparaan na panaon nen Noe tan panaon tayo so nepeg a lalon mangipaimano ed sikatayo ed kabaliksan na saray nagagawa tan mamaliing ed sikatayo ed singa-matakew ya isabi nen Jesus a mangipaakseb na panangukom ed saray marelmeng.
22 Natan, si Jesu-Kristo so mangididirehi ed malaklaknab ya espiritual a panagpaalagey a kimey. Parad kaligenan tan kililiktar na saray tuan managdayew, wala so singa-biong ya espiritual a paraiso. (2 Corinto 12:3, 4) Pian naliktar itayo ed baleg a kairapan, nepeg a mansiansia itayo ed satan a paraiso. Diad paway na satan ya espiritual a paraiso et wadtan so mundo nen Satanas, ya akaparaan a mangakmon ed siopaman a makateglep ed espiritual. Importantin tuloy a sikatayo so ‘mansiansian akabantay’ tan paneknekan tayo ya akaparaan itayo ed agew nen Jehova.—Mateo 24:42, 44, NW.
Kasin Natandaan Yo?
• Anton simbawa so inter nen Jesus nipaakar ed isabi to?
• Diad anto so angikomparaan nen Jesus ed panaon na kiwawala to?
• Diad antoran paraan a mipadpara so panaon tayo ed panaon nen Noe?
• Panon a say panmolimoli ed saray pampadparaan na panaon nen Noe tan say panaon tayo so mangapekta ed inkaganatan tayo?
[Tepetepet Parad Panagaral]
[Blurb ed pahina 18]
Say teksto ed taon 2004 et: “Mansiansian manbantay . . .Seguroen yon akaparaan kayo.”—Mateo 24:42, 44, NW.
[Litrato ed pahina 15]
Tinalineng nen Noe so pasakbay na Dios. Ontan met kasi so ikiwas tayo?
[Saray litrato ed pahina 16, 17]
“Unong ed saray agew nen Noe, ontan naani so isabi na Anak na too”