Pakaaralan ed Pamilya nen Jesus Diad Dalin

ANTO so amta yo nipaakar ed dilin pamilya nen Jesus, saramay akaamong to anggad sikatoy abautismoan, diad primeron 30 a taon na impanbilay to diad dalin? Anto so ibabaga ed sikatayo na saray salaysay na Ebanghelyo? Anto so naaralan tayo diad pan-usisa ed pamilya to? Nagunggonaan kayo ed saray ebat.

Kasin nianak si Jesus ed mayaman a pamilya? Si Jose, ya anagibi ed sikato, et sakey a karpentero. Mankaukolan itan na impasyan pantrabaho, a mabetbet a mangilalanor ed pambatang na saray kiew pian gawaen a tabla. Sanen linma ed Jerusalem iray ateng nen Jesus manga 40 ya agew kayari inkianak to, angiyapay ira na bagat unong a kakaukolanen ed Ganggan. Kasin angiyapay ira na kalakian a karnero katekep na sakey a palekpek odino malapati, unong a nidatak ed Ganggan? Andi. Ompatnag ya agda nasarag so mangiyapay na ontan iran bagat. Ingen, walay probisyon na Ganggan parad saray mairap-bilay. Mitunosan ed satan, si Jose tan si Maria so angiyapay na “duaran palekpek [odino] duaran malapati a sibong.” Say impamili ra na mamuran ayayep so mangipatnag a mairap-bilay so pamilya ra.​—Lucas 2:22-24; Levitico 12:6, 8.

Natebek yo a si Jesu-Kristo, say arapen a Manuley ed amin a katooan, so nianak ed pamilyan mairap-bilay, saraman so kaukolan a mitalikarkaran pian nawalaan na manuna iran pankaukolan.  Sikatoy binmaleg bilang sakey a karpentero, a singa say ama ton anagibi ed sikato. (Mateo 13:55; Marcos 6:3) ‘Anggaman mayaman [si Jesus] nensaman’ bilang makapanyarin espiritun pinalsa ed tawen, inkuan na Biblia a sikatoy “nagmaliw a duka” nisesengeg ed sikatayo. Inako to so abebebban kipapasen bilang too tan binmaleg ed sakey a pamilya na ordinaryon totoo. (2 Corinto 8:9; Filipos 2:5-9; Hebreos 2:9) Agnianak si Jesus ed sakey a mayaman a pamilya tan nayarin akatulong iya pian komportable so liknaan na arum a totoo ed sikato. Ag-ira nasisikig ed kipapasen to. Sikatoy pinabli ra lapud saray bangat to, saray makapasagyat a kalidad to, tan saray makapakelaw a kimey to. (Mateo 7:28, 29; 9:19-33; 11:28, 29) Natebek tayo so kakabatan nen Jehova a Dios diad impangiyabuloy ton nianak si Jesus ed sakey ya ordinaryon pamilya.

Natan et imanoen tayo iray kapamilya nen Jesus tan nengnengen no anto so naaralan tayo ed sikara.

Si Jose​—Sakey a Matunong a Too

Sanen naamtaan nen Jose a malukon so nobya to “sanen agni ra nansinggeran,” maseguron sikatoy agonigon lapud panangaro to ed si Maria tan lapud pandimla to ed ipapasen ya imoralidad. Say interamentin kipapasen so ompatnag a sumlang ed kanepegan to bilang say magmaliw ya asawa to. Diad panaon to, say akisipanan lan bii so ipapasen a singa la asawa na laki. Kayari ton ninonot a maong, denesidi nen Jose ya isian to a maamot si Maria ta pian sikatoy agda tupaken lapud pikakalugoran.​—Mateo 1:18; Deuteronomio 22:23, 24.

Diad ontan et pinmayawar so sakey ya anghel ed si Jose diad sakey a kugip tan inkuan to: “Agka ontakot a mangawat ed Maria ya asawam; ta say nilukon ed sikato manlapud pakayari na espiritu santo. Et sikato yanak to naani so sakey ya anak a laki; et tawagen mo naani so Jesus a ngaran to; ta sikato ilaban to naani so baley to ed saray kasalanan da.” Kapangawat to ed sayan bilin a nanlapud Dios, kinmiwas si Jose unong ed satan tan inawat to si Maria.​—Mateo 1:20-24.

Lapud sayan desisyon, sayan matunong tan matoor a laki so nagmaliw a kabiangan ed impakasumpal na sinalita nen Jehova panamegley nen propeta Isaias: “Nia, sakey a birhen manlukon naani, tan mangiyanak na sakey ya anak a laki, tan natawag so ngaran to ya Emmanuel.” (Isaias 7:14) Si Jose so peteg a maespiritual a too a pinabli to so pribilehyon managibi ed Mesias, anggaman kabat to ya agto ilalak so panguloan ya anak nen Maria.

Pinaliisan nen Jose so miakdol ed si Maria anggad agto ni nianak so ugaw. (Mateo 1:25) Parad sanasawa a kapkapankasal da, nayarin mairap ed sikara so agpan-akdol, balet mapatnag ya agda nilabay so manggawa na antokaman a pakawetwetan ed no siopa so Ama na ugaw. Agaylan abig ya ehemplo na panagtepel! Inyuna nen Jose iray importantin espiritual a bengatla nen saray nisipor a pilalek to.

Amipat ya akaawat si Jose na bilin manlapud anghel nipaakar ed pamabaleg ed tagibin ilalak to. Say talora ed saraya et nipaakar ed no iner so pamabalegan ed ugaw. Importante so itulok a tampol pian mantultuloy a manbilay so ugaw. Diad amin a kipapasen, kinmiwas a tampol si Jose, ya inawit to so ugaw ed Ehipto tan impawil to ed Israel. Lapud saya et nipaliis so ugaw a Jesus manlapud impamalanit nen Herodes ed ugugaw a lalaki. Ontan met, lapud katutulok nen Jose, asumpal iray propesiya nipaakar ed Mesias.​—Mateo 2:13-23.

Si Jesus so imbangat nen Jose a mantrabaho ta pian nalegpet toy inkasikato. Kanian, aglambengat atawag si Jesus bilang “anak na karpentero” noagta sakey met a “karpentero.” (Mateo 13:55, NW; Marcos 6:3, NW) Insulat nen apostol Pablo a si Jesus et ‘atukso ed amin a singa sikatayo.’ Kaslakan a lalanoren na saya so impasyan pankimey pian makatulong ed pamilya to.​—Hebreos 4:15.

 Diad kaunoran et napaneknekan tayo so inkasimoon nen Jose ed tuan panagdayew unong ed unor a salaysay ya inkasaglawian to diad Kristianon Griegon Kasulatan. Impila nen Jose so pamilya to ed Jerusalem parad Paskua. Saray lalaki labat so kapilitan ya onatendi, balet niyugali la nen Jose ya awiten so pamilya to ed Jerusalem a “tinaontaon.” Pirmi so impansakripisyo to, lapud kinaukolan da so manakar na manga 100 kilometro manlapud Nazaret anggad Jerusalem. Balet, walay aminsan ya inkagawa a nisalaysay diad Kasulatan a si Jesus et nisian ed grupo. Sikato so aromog diad templo, ya onderengel tan mantetepet ed saray managbangat na Ganggan. Anggaman 12 años to ni labat, impatnag la nen Jesus so malaknab a kakabatan tan pikakabat ed Salita na Dios. Diad sayan inkagawa et natebek tayo a si Jesus so maseguron imbangat a maong na atateng to, a pinabaleg da bilang sakey a maespitual ya ugaw. (Lucas 2:41-50) Mapatnag ya inatey la si Jose manga pigaran taon kayari na saya, lapud sikato so agla asalambit diad saginonor iran salaysay na Kasulatan.

On, si Jose et sakey a matunong a too ya angasikason maong ed pamilya to, diad espiritual tan pisikal a paraan. Kasin iyuna yo ed bilay yo iray espiritual ya interes, a singa si Jose, sano natebek yo no anto so linawa na Dios ed sikatayo natan? (1 Timoteo 2:4, 5) Kasin mabulos yon tutuloken so ibabaga na Dios unong a nidatak diad Salita to, a mangipapatnag itan na panagpasakop a singa ed ginawa nen Jose? Kasin babangatan yo so ananak yo ta pian mantultuloy dan nitongtong ed arum iray nipaakar ed espiritual?

Si Maria​—Agmasiblet a Lingkor na Dios

Si Maria, ya ina nen Jesus, so matalonggaring a lingkor na Dios. Sanen impakabat nen anghel Gabriel a sikatoy manlukon, sikatoy nikelawan. Sikato so sakey a birhen, ya ‘anggapo so kabat to a laki’ odino agni akiakdol ed sakey a laki. Sanen naamtaan to a sikatoy mananak panamegley na masanton espiritu, sikatoy mapaabeban angawat ed mensahe, a kuanto: “Nia, so aripen na Katawan; nagawa ed siak so unong na salitam.” (Lucas 1:30-38) Pinabli ton tuloy so espiritual a pribilehyo kanian mabulos ton sinungdoan so antokaman ya irap a nayarin resulta na desisyon to.

On, nauman so interon bilay to bilang bii diad impangawat to ed satan a responsabilidad. Sanen linma ed Jerusalem pian pagogolan, oniay inkuan ed sikato na galgalangen a matatken a manngaran na Simeon: “Sakey a kampilan talosen to so dili a kamarerwam.” (Lucas 2:25-35) Mapatnag a say tutukoyen to et say nalikna  nen Maria sano naimatonan toy Jesus ya ipulisay na karaklan tan diad kaunoran et nipasak ed panamairapan a kiew.

Legan na ibabaleg nen Jesus, tinantandaan nen Maria so nagagawa ed bilay nen Jesus, “a ninodnono’to ed puso to.” (Lucas 2:19, 51) Singa si Jose, sikato so maepiritual a too tan pinabli to iray ebento tan salsalita ya anumpal ed saray propesiya. Maseguron nipaslep ed nonot to so imbaga nen anghel Gabriel ed sikato: “Sikato naani baleg, et ningaran ya Anak na Sankatageyan; et iter na Dios a Katawan ed sikato so trono nen David ya ama to; et manari lawas ed abung nen Jacob; et say panarian to andi-angga to.” (Lucas 1:32, 33) On, impasen ton importante so pribilehyon magmaliw ya ina na Mesias diad dalin.

Apatnagan lamet so espiritualidad nen Maria sanen akaarap to so kanayon to ya Elizabeth, a nanlukon met diad mamilagron paraan. Diad impakanengneng to’d sikato, indayew nen Maria si Jehova tan imbalikas toy panangaro to ed Salita na Dios. Tinukoy to so pikakasi nen Ana a nikurit ed 1 Samuel kapitulo 2 tan angaon ed arum niran libro na Hebreon Kasulatan. Say ontan a pikakabat ed Kasulatan so mangipapatnag a sikatoy kualipikadon magmaliw a masimoon tan matakot ed Dios ya ina. Sikatoy akikoopera ed si Jose diad impangasikaso ed espiritualidad na anak to.​—Genesis 30:13; 1 Samuel 2:1-10; Malaquias 3:12; Lucas 1:46-55.

Mabiskeg so pananisia nen Maria ed anak to bilang say Mesias, tan ag-itan kinmapuy anggan sanen inatey la si Jesus. Ag-abayag kayari inkioli nen Jesus, kaiba si Maria ed saray matoor a babangatan a nantitipon pian manpikasi a kaiba iray apostol. (Gawa 1:13, 14) Sikatoy nansiansian matoor, anggaman kinaukolan ton sungdoan so ot-ot ed impakaimaton ed impatey na anak to diad panamairapan a kiew.

Panon kayon nagunggonaan ed panaral ed bilay nen Maria? Kasin awaten yo so pribilehyon manlingkor ed Dios antokaman iray sakripisyon nalalanor? Kasin ipapasen yon importante iyan pribilehyo natan? Kasin tatandaan yo so impasakbay nen Jesus tan ikokompara yo itan ed say nagagawa natan, a ‘nonodnonoten yo itan ed puso yo’? (Mateo, kapitulo 24 tan 25; Marcos, kapitulo 13; Lucas, kapitulo 21) Kasin aaligen yo si Maria a mikabisadon maong ed Salita na Dios tan uusaren yo itan a naynay diad pitotongtong yo? Kasin pansiansiaen yo so pananisia yo ed si Jesus anggaman walaray nayarin pakagonigonan lapud panutumbok yo ed sikato?

 Saray Agagi nen Jesus​—Posible so Pananguman

Ompatnag ya ag-anisia iray agagi nen Jesus ed sikato anggad kayari na impatey to. Maseguro a satan so rason no akin ya anggapo ira sanen sikatoy inatey diad panamairapan a kiew tan kinaukolan ton imatalek so ina to ed si apostol Juan. Si Jesus so agnirespeto na saray kapamilya to, ya imbaga da ni ingen ed aminsan ya inkagawa a si Jesus et “naaatapis la.” (Marcos 3:21, NW) Lapud walaray agmananisian kapamilya nen Jesus, saraman so walaan met natan na saray agmananisian kapamilya so napaseguroan a natatalosan nen Jesus so nalilikna ra sano ludlureyen ira na kakanayon da nisengeg ed pananisia ra.

Anggaman ontan, kayari na inkioli nen Jesus, mapatnag a saray agagi to so anisia la ed sikato. Kabiangan ira ed samay grupon nantitipon ed Jerusalem sakbay na Pentecostes na 33 K.P. tan masimoon a nampikasi a kaiba iray apostol. (Gawa 1:14) Malinew a say inkioli nen Jesus so amakiwas ed sikaran manguman, ya anggad nagmaliw iran babangatan to. Nepeg ya agtayo onsusuko nipaakar ed saray kakanayon ya agtayo kapananisiaan.

Si Santiago, ya agi nen Jesus ed ina a pinayawaran To a mismo, so tinukoy diad Kasulatan a walaan na makanan betang diad Kristianon kongregasyon. Sikato so pinuyanan na Dios a mansulat ed saray kapara ton Kristiano, a sinimbawa to iran pansiansiaen so pananisia ra. (Gawa 15:6-29; 1 Corinto 15:7; Galacia 1:18, 19; 2:9; Santiago 1:1) Si Judas, a sananey nin agi to ed ina, so pinuyanan a mansulat pian mamaseseg ed saray kapananisiaan a mibakal nisesengeg ed pananisia. (Judas 1) Makatantanda ya ag-impatnag nen Santiago odino si Judas a walaan iray autoridad base ed relasyon da ed si Jesus ta pian kombinsien iray kaparan Kristiano. Agaylan abig a leksion na inkamapaabeba so naaralan tayo manlapud sikara!

Kanian, anto so pigaran bengatla a naaralan tayo manlapud pamilya nen Jesus? Segurado a saray leksion nipaakar ed panaglingkor a nayarin nipatnag diad paraan a singa saraya: (1) Matoor a manpasakop diad nibalikas a linawa na Dios tan arapen so amin a subok a resulta na panggagawa tayo ed satan. (2) Iyuna iray espiritual a bengatla, anggaman mankabaliksan itan na pansakripisyo. (3) Ipasal so ananak yo unong ed Kasulatan. (4) Ag-onsusuko ed saray membro na pamilya ya agyo kapananisiaan. (5) Ag-ilalastog so antokaman a pisisiglaotan yo ed saramay walaan na makanan betang diad Kristianon kongregasyon. On, no aralen tayo so nipaakar ed pamilya nen Jesus diad dalin, sikatayo so lalon napaapit ed sikato tan onaralem so apresasyon tayo ed impamili nen Jehova ed sakey ya ordinaryon pamilya a mangasikaso ed si Jesus legan na inkaugaw to.

[Saray litrato ed pahina 4, 5]

Inawat nen Jose si Maria bilang asawa to tan nagmaliw a kabiangan ed impakasumpal na saray propesiyan nipaakar ed Mesias

[Saray litrato ed pahina 6]

Imbangat nen Jose tan si Maria ed ananak da iray importantin espiritual a bengatla tan say kakanaan na pantrabaho

[Saray litrato ed pahina 7]

Anggaman pinabaleg ira ed maespiritual ya ayaman, saray agagi nen Jesus so ag-anisia ed sikato ya anggad kayari na impatey to

[Saray litrato ed pahina 8]

Saray agagi nen Jesus ed ina a si Santiago tan Judas so amaseseg ed saray kaparan Kristiano