Pamilya nen Jesus​—Siopara?

DIAD dakel a parte na mundo, no panaoy Disyembre et mabetbet a nanengneng iray “belen” a mangipaparungtal ed ugaw nin Jesus ya aampopoen na ina ton si Maria, tan si Jose ya anagibi ed sikato. Saratan a “belen” so nayarin pakasasagyatan na anggan saramay aliwan Kristiano. Lapud say pangiyaapasakeyan et si Jesus, anto kasi so ibabaga ed sikatayo na Kasulatan nipaakar ed pamilya nen Jesus diad dalin?

Makapainteres a tuloy so pamilya a nanlapuan nen Jesus. Sikatoy inyanak na sakey a birhen a manngaran na Maria, kanian sikatoy nagmaliw a kabiangan na pamilya na too. Unong ed Biblia, say bilay to ed tawen so inyalis ed panag-anakan nen Maria panamegley na masanton espiritu. (Lucas 1:30-35) Sakbay a nipakabat so mamilagron pangilukon ed si Jesus, si Maria so akisipanan la ed lakin manngaray Jose, kanian nagmaliw a sikato so anagibi ed si Jesus.

Kayari inkianak nen Jesus, si Jose tan Maria so awalaan na arum nin ananak, agagi’d ina nen Jesus a lalaki tan bibii. Napatnagan itan ed intepet na saray taga-Nazaret diad saginonor nipaakar ed si Jesus: “Aliwa ta’n saya man so anak na panday [“karpentero,” NW]? Say ina to agta manngaran na Maria? Tan saray agi to Santiago, tan Jose tan Simon tan Judas? Tan saray agi to a bibii andi ta ra dia ya amin ed sikatayo?” (Mateo 1:25; 13:55, 56; Marcos 6:3) Unong ed saya et nibaga tayo a say dilin kapamilya nen Jesus so tugyopen na saray ateng to, apatiran agagi a lalaki, tan ag-onkulang ed duara ya agagin bibii.

Balet, agpanisiaan na arum natan a saray agagi nen Jesus a lalaki tan bibii et ananak ira nen Jose tan Maria. Akin? Oniay inkuan na New Catholic Encyclopedia: “Abayag lan ibabangat na Simbaan a si Maria et lawas a birhen. Lapud saya et andi-duaruwa sirin a si Maria so agla awalaan na arum nin ananak.” Ibabaga na satan met a reperensya a saray salitan “agin laki” tan “agin bii” so nayarin ontukoy ed “arum a too odino totoon nikasakey ed relasyon a base ed relihyon odino arum nin relasyon” odino ed saray kanayon, a nayarin kakapinsan.

Peteg kasi ya ontan? Anggan saray arum a Katolikon teologo, ya agmipakna ed tradisyonal a doktrina, so manusuporta ed panmorian si Jesus et walaan na agagi ed laman a lalaki tan bibii. Oniay insulat nen John P. Meier, a datin presidente na Catholic Bible Association na Amerika: “Diad B[alon] S[ipan], sano say adelphos [agi] so inusar ya aliwa labat a piguratibo odino metapora noagta pian nibiig so arum a klase na pisikal odino legal a relasyon, satan so mankabaliksan labat na peteg ya agi odino agi ed sakey ya ateng, tan anggapo lay arum.” * On, ipapabitar na Kasulatan a walaray agagi nen Jesus a lalaki tan bibii ya anak nen Jose tan si Maria.

Sinalambit na saray Ebanghelyo so arum nin kakanayon nen Jesus, balet iyapasakey tayo natan ed dilin kapamilya nen Jesus tan imanoen no anto so naaralan tayo ed sikara.

[Paimano ed Leksab]