Paneknekan Yon Akaparaan Kayo ed Agew Nen Jehova

“Manparaan kayo met komon; ta dia ed oras ya agyo is-isipen onsabi’ Anak na too.”​—MATEO 24:44.

1. Akin a nepeg tayon imanoen so agew nen Jehova?

 SATAN so agew na bakal tan sanok, egagel tan gonigon, kabilungetan tan pankibalatar. Say “baleg tan makapataktakot ya agew” nen Jehova so maseguron onsabi ed sayan marelmeng a sistema na bengabengatla, a singa say impaneral na Delap ed marelmeng a mundo diad panaon nen Noe. Seguradon onsabi itan. Ingen, “anggan siopa ya ontawag ed ngaran nen Jehova; nilaban naani.” (Joel 2:30-32; Amos 5:18-20) Galpongen na Dios iray kakabusol to tan iliktar to so totoo to. Tekep na inkaganatan, oniay inyabawag nen propeta Sofonias: “Say baleg ya agew nen Jehova asingger, sikato so asingger tan masiglat a maomaong.” (Sofonias 1:14) Balet, kapigan so kipaakseb na sayan panangukom na Dios?

2, 3. Akin a makanakana ya iparaan tayoy inkasikatayo ed agew nen Jehova?

² “Satan ya agew tan oras anggapoy mikabat, anggan saray angheles ed tawen, anggan say Anak, noag say Ama lambengat.” (Mateo 24:36) Lapud agtayo amta so eksakton panaon, makana a talinengen tayo iray salita na teksto tayo ed taon 2004: “Mansiansian manbantay . . .  Seguroen yon akaparaan kayo.”​—Mateo 24:42, 44, NW.

³ Diad impangipabitar nen Jesus no panon kapeles so kiligen na saramay akaparaan bangta nikaindan so arum, oniay inkuan nen Jesus: “Walara naani duaran lalaki ed uma; say sakey naala, et say sakey natilak. Wala ra naani duaran bibii a mangigiling ed gilingan, say sakey naala, et say sakey natilak.” (Mateo 24:40, 41) Diad satan a mapeligron panaon, anto so kipapasen tayo? Kasin akaparaan itayo, odino nabigbigla itayo ed isabi na satan? Akadependen tuloy itan ed saray kundang a gagawaen tayo natan. Pian napaneknekan tayo ya akaparaan itayo ed agew nen Jehova, nakaukolan a paliisan tayo so awawey a kasmak natan, resistian tayo so kapelag ed sakey a kipapasen ed espiritual, tan paliisan tayo so pigaran estilo na kabibilay.

Paliisan so Awawey a Pangiyaleng-aleng

4. Anto so awawey na totoo ed panaon nen Noe?

⁴ Nodnonoten pa so panaon nen Noe. “Lapu ed pananisia si Noe, sanen binilin na Dios nipaakar ed saray bengatla ya agni anengneng, nensaman aragdag ed mapagalang a takot, angiparaan na sakey a biong a kilabanan na abung to,” so insalaysay na Biblia. (Hebreos 11:7) Say biong et nikadkaduma tan sankanengneng. Niarum ni, si Noe et “managpulong na katunongan.” (2 Pedro 2:5) Say panagpaalagey a proyekto nisay panagpulong nen Noe so ag-amakiwas ed saray totoo ed panaon to. Akin? Lapud ‘nanaakan ira tan naniinum ira, angaasawa ra tan akiaasawa ra.’ Saramay pinulongan nen Noe et okupadon tuloy ed personal iran kimey tan likeliket da ya “agda akabkabatan [“inim-imano,” NW] angga ed sinmabi’ delap, et inyanor to ra ya amin.”​—Mateo 24:38, 39.

5. Anto so awawey na saray manaayam ed Sodoma diad panaon nen Lot?

⁵ Mipadpara met itan ed panaon nen Lot. Oniay ibabaga ed sikatayo na Kasulatan: “Angan ira, naninum ira, nansaliw ira, nanlako’ra, nantanem ira, nanabung ira. Ingen dia ed agew ya impaway nen Lot ed Sodoma inmuran na apoy tan asupre nanlapu ed tawen, et dineral to ra ya amin.” (Lucas 17:28, 29) Kayarin pinasakbayan na saray anghel si Lot nipaakar ed asingger lan kadederal, imbaga to ed saray manugang to no anto so nagawa. Balet diad isip da et sikato so ‘singa samay sakey a manlulurey.’​—Genesis 19:14.

6. Anton awawey so nepeg tayon paliisan?

⁶ Singa ed panaon di Noe tan Lot, magmaliw ya “ontan naani so isabi na Anak na too,” so inkuan nen Jesus. (Mateo 24:39; Lucas 17:30) On, say kasmak ya awawey na dakel natan et say pagmamaliw a mangiyaleng-aleng o kampante. Nepeg itayon manalwar pian agtayo naimpluensyaan ed satan ya awawey. Agmet makapuy so panggayaga ed maabig a tagano tan iinumen diad kabkaabigan a paraan. Mipadpara, say panangasawa et sakey ya uksoyan na Dios. Balet, no saratan a pamaakaran et magmaliw lan manunaan ed bilay tayo tan napaulyanan la iray espiritual a pamaakaran, kasin akaparaan itayon mismo ed makapataktakot ya agew nen Jehova?

7. Anto so importantin itepet tayo sakbay a gawaen so antokaman a kimey, tan akin?

⁷ “Say panaon apatikeyan la,” so inkuan nen apostol Pablo. “Manlapu ed natan, saray lalaki a walaan na asawa, magmaliw ira a singa anggapo so asawa ra.” (1 Corinto 7:29-31) Limitado lambengat a panaon so nakekeraan parad sikatayo pian sumpalen tayo so inter na Dios a kimey tayon panangipulong ed Panarian. (Mateo 24:14) Sinimbawa ni ingen nen Pablo iramay walaay asawa ya agda nagnap ya isesentro so imano tan panaon da ed saray kapareha ra, a magmaliw lan segundaryo labat so intereses na Panarian ed bilay da. Malinew, say panag-isip ya impaseseg nen Pablo et say kasunian na pagmaliw a mangiyaleng-aleng. Inkuan nen Jesus: “Ingen anapen yo nin unona so panarian, tan say inkatunong [na Dios].” (Mateo 6:33) Sano manggagawa na antokaman a desisyon odino sakbay a gawaen so antokaman a kimey, importante ya oniay itepet,  ‘Panon iyan mangapekta ed pangiyuunak ed intereses na Panarian diad bilay ko?’

8. No okupado tayo lan tuloy ed inagew-agew a pamaakaran na bilay, anto so nepeg tayon gawaen?

⁸ Panon to no amoria tayo ya okupado tayo lan tuloy ed inagew-agew iran kimey ed bilay, a nipuepuera laray bengatlan nipaakar ed espiritual? Kasin mipadpara la so estilo na kabibilay tayo ed saray kapara tayon totoo ya andian na suston pikakabat ed Kasulatan tan aliwan manangiyabawag na Panarian? No ontan so kipapasen, nakaukolan tayo sirin ya ipikasi itan. Natulongan itayo nen Jehova a nawalaan na suston awawey na kanonotan. (Roma 15:5; Filipos 3:15) Natulongan to itayo a mangiyuna ed intereses na Panarian, manggawa na duga, tan manumpal ed obligasyon tayo ed sikato.​—Roma 12:2; 2 Corinto 13:7.

Resistian so Pakateglep ed Espiritual

9. Unong ed Apocalipsis 16:14-16, akin ya importante a resistian so espiritual a pakateglep?

⁹ Say mismon propesiya a manasaglawi ed onsabin “bakal na baleg ya agew na Dios, a Makapanyarin-amin” diad Armagedon so mangipapasakbay a walaray makateglep. “Nia, siak ondago ak a singa matakew,” so inkuan na Katawan tayon Jesu-Kristo. “Mapalar so manpuyat, tan isinop to so saray [akinpaway a] kawes to, ompan manakar a labos-lakseb, tan nanengneng da so kababaingan to.” (Apocalipsis 16:14-16) Saray akinpaway a kawes ya asalambit dia et manutukoy ed pakabidbiran ed sikatayo bilang Kristianon Tasi nen Jehova. Saya so mangilaktip ed kimey tayo bilang manangiyabawag na Panarian tan say Kristianon kondukta tayo. No makateglep itayo a sengegay pagmaliw tayon inaktibo, nayarin nalakseb ed sikatayo so pakabidbiran bilang Kristiano. Makapabaing tan mapeligro itan. Nepeg tayon resistian so pakateglep odino pagmaliw a mangiras ed espiritual. Panon tayon naresistian iyan tendensia?

10. Akin a makatulong ed sikatayo so inagew-agew a panagbasa na Biblia pian mansiansia itayon alerto ed espiritual?

¹⁰ Aminpigan indanet na Biblia so pankaukolan a mansiansian aliing tan alerto. Alimbawa, oniay ipapanonot ed sikatayo na saray salaysay na Ebanghelyo: “Manpuyat kayo” (Mateo 24:42; 25:13; Marcos 13:35, 37); “manparaan kayo met komon” (Mateo 24:44)’ “manlikas kayo, manbantay” (Marcos 13:33); “maparaan kayo” (Lucas 12:40). Kayarin indalatdat nen Pablo a say agew nen Jehova et agnailaloan ya onsabi ed sayan mundo, pinaseseg to iray kapananisiaan to: “Ag-itayo onugip, a singa gawa na saray arum, et manpuyat itayo tan mandangka itayo.” (1 Tesalonica 5:6) Diad unor a libro na  Biblia, indanet na niglorian Kristo Jesus so biglan isabi to, a kuanto: “Ondago ak a magano” odino “onlaak dia’n magano.” (Apocalipsis 3:11; 22:7, 12, 20) Dakel ed saray Hebreon propeta so aneskribe tan angipasakbay met ed baleg ya agew na panangukom nen Jehova. (Isaias 2:12, 17; Jeremias 30:7; Joel 2:11; Sofonias 3:8) Makatulong a maong ed sikatayo so inagew-agew a pambasa na Salitay Dios, say Biblia, tan panmolimoli ed nababasa tayo pian mansiansia itayon aliing ed espiritual.

11. Akin a makanakana so personal a panagaral na Biblia diad pagmaliw tayon aliing ed espiritual?

¹¹ On, agaylan makapaliing ed espiritualidad tayo so makulin panagaral na Kasulatan, ya usaren so nibase ed Biblia iran publikasyon ya intarya na “matoor tan makabat ya aripen”! (Mateo 24:45-47) Balet, pian nagunggonaan itayo ed personal a panagaral tayo, nepeg a progresibo tan tuloytuloy itan. (Hebreos 5:14–6:3) Nepeg a maparanay itayon onggamor na anawet ya espiritual a tagano. Nayarin sakey ya angat natan so pangiyeskedyul na oras parad satan. (Efeso 5:15, 16) Balet, aliwan magenap so pambasa na Biblia tan Makasulatan iran publikasyon sano kombeniente lambengat so panaon tayo. Makanakana so regular a personal a panagaral pian mansiansia itayon ‘maksil ed pananisia’ tan mansiansian aliing.​—Tito 1:13.

12. Panon a makatulong ed sikatayo so Makristianon miting, asamblea, tan kombension pian nadaeg tayo so pakateglep ed espiritual?

¹² Saray Makristianon miting, asamblea, tan kombension so makatulong met ed sikatayo pian nadaeg tayo so pakateglep ed espiritual. Panon? Diad panamegley na saray bilin a naaawat tayo. Diad sarayan pandaragup, agta regular itayon napapanonotan ya asingger la so agew nen Jehova? Say sinimba iran Makristianon miting so mangitatarya met na saray pankanawnawan ‘manaayatan so balang sakey ed aro tan saray maabig a gawa.’ Say ontan a panaayatan so makatulong ed pagmaliw tayon aliing ed espiritual. Agmakapasurprisa, sikatayo so niganggan a regular a mantitipon “nagkalalo la, lapud nanengneng [tayo] a manasingger so agew.”​—Hebreos 10:24, 25.

13. Panon a makatulong ed sikatayo so Makristianon ministeryo pian mansiansia itayon aliing ed espiritual?

¹³ Sikatayo so natulongan met a mansiansian aliing sano interon-puso itayon mibiang ed Makristianon ministeryo. Wala ni kasi so sankaabigan a paraan a mamasiansia ed sikatayon sinononot ed saray tanda na panaon tan say kabaliksan na saratan nen say pangitongtong ed saratan diad arum? Tan sano naiimatonan tayo so iyaaligwas na saramay iyaaralan tayo na Biblia tan onkikiwas ira unong ed naaaralan da, lalon nalilikna tayo so pankaganatan. “Balkesan yo so saray banel na kanonotan yo,” so inkuan nen apostol Pedro, “mandangka kayo tan manilalo kayo a nagnap.” (1 Pedro 1:13) Say ‘lawas pamadaak ed kimey na Katawan’ so maabig a solusyon ed inkangiras ed espiritual.​—1 Corinto 15:58.

Paliisan Iray Estilo na Kabibilay a Makaderal ed Espiritual

14. Unong ed deneskribe na Lucas 21:34-36, amasakbay si Jesus sumpad anton estilo na kabibilay?

¹⁴ Diad malaknab a propesiya to nipaakar ed tanda na kiwawala to, wala ni so inter nen Jesus a pasakbay. Inkuanto: “Manlikas kayo ed inkasikayo ompan saray puso yo napano ed inkasiba, tan panagbuek, tan saray kapagaan ed sayan bilay, et onsabi ed sikayo ed kasanlilikna so saman ya agew a singa sakey a patit. Ta ontan so isabi to ed saray amin a manaayam ed tapew na amin a dalin. Balet manbantay kayo ed amin a panaon, a mikasi kayo, pian ontalona kayo a nilaban ed sarayan amin a bengatlan nagawa, tan makaalagey kayo ed arap na Anak na too.” (Lucas 21:34-36) Malinew a deneskribe nen Jesus so estilo na kabibilay ya aagamilen na totoo ed inkalapagan: alablabas a panangan, panagbuanges, tan panagbilay a mangitatarok na saray kapagaan.

15. Akin a nepeg tayon paliisan so alablabas a panangan tan panag-inum?

¹⁵ Say alablabas a panangan tan panag-inum so misumlangan ed saray prinsipyo na Biblia tan nepeg iratan a paliisan. “Agka miulop ed saray mainum na alak, ed saray masiba a mangan na laman,” so kuan na Biblia. (Uliran 23:20) Balet, agla nakaukolan a magmaliw ya alablabas so panangan  tan kakainum na sakey a pakapeligroan la na espiritualidad to. Satan so mamateglep tan mamangiras la ed sakey sakbay nin nidunget ed ontan a kipapasen. “Say kamarerwa na mangiras manpilalek,” so kuan na uliran na Biblia, “et andian a balot.” (Uliran 13:4) Nayarin labay na satan a too so manggawa na linawa na Dios, balet siansia nin agto nagawaan itan a pilalek to lapud agto panaalwar.

16. Panon tayon napaliisan so pakabelatan ed saray kapagaan nipaakar ed pamilya tayo?

¹⁶ Amasakbay si Jesus sumpad antoran kapagaan ed bilay? Lalanoren na saratan so personal a kapagaan, say panlegpet ed pamilya tan saray bengatla a mipara ed satan. Agaylan agmakabat no abuloyan tayo iratan a mamabelat ed sikatayo! “Siopa ta ed sikayo so, lapu ed kapagaan to makapangiyarum na sankasiko ed inalagyan [“bilay,” NW] to?” so intepet nen Jesus. Onia so imbilin nen Jesus ed saray dumerengel to: “Agkayo sirin mapaga, ya ikuan yo, Anto kasi inumen mi? ono, Anto kasi pankawes mi? Ta saraya ya amin a bengatla so anapen na saray Gentiles; et say Ama yon mangatatawen amta to a nakaukolan yo so saraya ya amin a bengatla.” Say pangiyuna ed saray intereses na Panarian ed bilay tayo tan say pankompiyansa a mangitarya si Jehova ed sikatayo so ontulong pian nakontrol tayo iray kapagaan tayo tan mansiansia itayon aliing.​—Mateo 6:25-34.

17. Panon a mangitarok na kapagaan iray materyal a gegemtan?

¹⁷ Say kapagaan so nayari met a pansengegan na materyalistiko iran gegemtan. Alimbawa, nagmaliw a komplikado so bilay na arum lapud manggagastos ira ed labas na nasarag da. Arum so nasasagyat ed saray anapan ya onyaman a tampol tan delikado iran panangipuonan. Parad arum, say sekular ya edukasyon bilang paraan a pakaasensoan et nagmaliw a patit. Tua, wala so klase na edukasyon a nayarin mausar pian nawalaan na trabaho. Balet, say katuaan to et walaray naapektoan ed espiritual a paraan lapud pangegemtan da ed atagey ya edukasyon a manguupot na dakel a panaon. Agaylan mapeligron kipapasen itan diad panasingger la na agew nen  Jehova! Oniay ipapasakbay na Biblia: “Saray manpirawat ya onyaman napelag ira ed sakey a katuksoan tan say kalot tan dia ed saray dakel ya agum a maksay tan makaderal a kaalakan, a mangipalereg ed saray totoo ed kagegeba tan kababalang.”​—1 Timoteo 6:9.

18. Pian napaliisan tayo so materyalistikon estilo na kabibilay, anton abilidad so nepeg tayon bayuboan?

¹⁸ Say makanan gawaen pian agnatangguyor ed materyalistikon panagbilay et say pamayubo ed abilidad a mangibiig ed duga tan makapuy sano mandedesisyon. Sayan abilidad so nabayuboan diad regular ya igamor na ‘anawet ya espiritual a tagano a kien na saray matakken a totoo’ tan diad ‘pangipasal ed saray pakalikna tayo panamegley na pangagamil.’ (Hebreos 5:13, 14, NW) Say panseguro ed ‘saray aabobonan a bengatlan sankaabigan’ sano mangileletneg itayo na saray prayuridad so manalimbeng met ed sikatayo ed panggaway makapuy iran desisyon.​—Filipos 1:10.

19. No natetebek tayo a dagdaiset lay panaon tayo ed saray espiritual a gegemtan, anto so nepeg tayon gawaen?

¹⁹ Say materyalistikon estilo na kabibilay so mamulag ed sikatayo, a nawalaan itayo labat na daiset a panaon odino anggapo ni ingen parad espiritual iran gegemtan. Panon tayon nausisa lamet so inkasikatayo pian napaliisan so pakapatitan ed ontan ya estilo na kabibilay? Nepeg a sipipikasin konsideraen tayo no panon tan anggad anton laknab a napasimpli tayo so bilay tayo. Oniay inkuan nen Arin Solomon na kadaanan ya Israel: “Say ugip na mankikimey a too sikato so masamit, mangan na daiset odino dakel; balet say inkapno na mayaman agmangitepel ed sikato ya onugip.” (Eclesiastes 5:12) Kasin say pangaasikaso ed agnakaukolan iran materyal a kaykayarian so manguupot ed dakel a panaon tan biskeg tayo? No ondarakel so kayarian tayo, lalon dakel so mintinaen, bayaran tayo na insurance, tan protektaan tayo. Agta bentaha ed sikatayo so pamasimpli ed bilay tayo diad pamawas ed pigaran kaykayarian tayo?

Seguroen Yon Akaparaan Kayo

20, 21. (a) Anto so panamaseguro nen apostol Pedro nipaakar ed agew nen Jehova? (b) Antoran gawa tan agamil so nepeg tayon gawaen pian napaneknekan tayo ya akaparaan itayo ed agew nen Jehova?

²⁰ Angangga so mundo diad panaon nen Noe, tan mangangga met so kaplesan a sistema na bengabengatla. Oniay ipapaseguro ed sikatayo nen apostol Pedro: “Say agew na Katawan onsabi a singa matakew; a dia ed satan saray tawen mangangga ra a pati baleg ya ungol, tan say elementos natunaw ed manliob a petang, tan say dalin tan saray gawa a wala ed sikato napoolan ira.” Say simbolikon katawenan (marelmeng iran gobierno) nisay simbolikon dalin (say katooan a nisian ed Dios) so agmakaliktar ed petang na mandarlang a sanok na Dios. Diad impangipabitar nen Pedro no panon tayon makapanparaan ed satan ya agew, oniay imbelyaw to: “Diad inengneng a saraya ya amin a bengatla naderal ira naani, anton nengneng na inkatoo so nepeg yon pagmaliwan ed amin a masantos a panagbilay tan kasimpitan, dia ed panalagar tan pampilalek yo ed isabi agew na Dios”!​—2 Pedro 3:10-12.

²¹ Say regular ya iyaatendi ed saray Makristianon miting tan pibibiang ed panangipulong na maong a balita so kalaktip ed sarayan gawa tan agamil na maridios a debosyon. Komon ta gawaen tayo iratan tekep na masimoon a debosyon ed Dios legan itayon maanos a manaalagar ed baleg ya agew nen Jehova. ‘Pampelengan tayo ta pian naromog itayo ed kareenan, ya andi matik tan karumsisan ed imaton na Dios.’​—2 Pedro 3:14.

[Litrato ed pahina 24]

Kasin Natandaan Yo?

• Akin a nepeg tayon paneknekan ya akaparaan itayo ed agew nen Jehova?

• No okupado itayo lan tuloy ed inagew-agew iran kimey ed bilay, anto so nepeg tayon gawaen?

• Anto so ontulong ed sikatayo pian naresistian so pakateglep ed espiritual?

• Antoran makaderal ya estilo na kabibilay so nepeg tayon paliisan, tan panon?

[Tepetepet Parad Panagaral]

[Saray litrato ed pahina 20, 21]

Saray totoo ed panaon nen Noe so ag-angimano ed manasingger a panangukom​—kasin ontan kayo?

[Litrato ed pahina 23]

Sarag yo kasin pasimplien so bilay yo pian mas malaem so panaon yo ed saray espiritual a kimey?