Tepetepet Manlapud Saray Managbasa

Diad modelon pikakasi to, kasin isusuheri nen Jesus a nagagawa la ed tawen so linawa na Dios anggaman agni apagit iray marelmeng ya anghel?

Oniay inkuan nen Jesus, unong a nikurit ed Mateo 6:10: “Nagawa komon so linawam, unong ed tawen, ontan met ed dalin.” Sayan kerew so nayarin talosan ed dinanman ed duaran dalan. Unona, bilang pikakasi a nagawa la komon diad dalin so linawa na Dios unong a nagagawa la itan ed tawen odino, komadua, bilang kerew a sigpot la komon a nagawa itan diad parehon tawen tan dalin. * Ipapabitar na say kabaliksan na inmuna iran salita nen Jesus ya, “onsabi komon so panarian mo,” a say komaduan panmoria so mas mitunosan ed Kasulatan. Tan ipapatnag na satan so kipapasen sanen wadiad dalin si Jesus tan say andukey a panat na panaon kayari na satan. Panon ya ontan?

Tinukoy na libro na Apocalipsis so duaran nandumaan a resulta na inkiletneg na Panarian na Dios ed tawen. Say primero et angapekta ed tawen a mismo, tan say komadua et angapekta ed dalin. Oniay inkuan na Apocalipsis 12:7-9, 12: “Agawa so sakey a baleg a bakal ed tawen: si Miguel tan saray anghel to pinmaway iran akibakal ed dragon: et samay dragon tan saray anghel to akibakal ira. Et ag-ira analo, tan agmet la aromog so dinan man a pasen da ed tawen. Tan nibantak dia ed dalin so baleg a dragon, say daan ya uleg, a manngaran na Diablo tan si Satanas, a sikato so mantila ed lapag na sankamundoan; nibantak dia ed dalin, tan saray anghel to nibantak ira ya alanor ed sikato. Kanian manliket kayo, O katawenan, tan sikayon manaayam ed sikara. Kasi lara so dalin tan dayat: ta say diablo inmakseb ed sikayo, a wala ed baleg a sanok to, ya amta to a daiset la so panaon to.”

Sanen apagit ed tawen si Satanas tan saray demonyo kayari na 1914, naandi la ed satan a pasen so amin a rebeldin espiritu, a pirmin amaliket ed saray matoor ya anghelikon ananak nen Jehova, a manunan mangirerepresenta ed karaklan ya espiritun pinalsa to. (Job 1:6-12; 2:1-7; Apocalipsis 12:10) Kanian asumpal la so kerew nen Jesus ed modelon pikakasi to, no nipaakar ed tawen. Amin iraman so mansiasiansia ed mangatatawen ya ayaman so matoor ed si Jehova tan sigpot a manpapasakop ed inkasoberano to.

Nepeg a nidanet ya anggan sakbay ni na satan, sanen makakar ni ed tawen iray marelmeng ya angheles, agla ra kabiangan ed pamilya na Dios tan sikaray sigpot ya apegetan. Singa bilang, ipaparungtal na Judas 6 a nen inmunan siglo K.P. et sikara lay ‘nigana ed silong na [espiritual a] kabilungetan ed andi-anggaan a panamangawan, angga ed panangukom na sankabalgan ya agew.’ Oniay ibabaga met na 2 Pedro 2:4: “Ag-intepel na Dios so saray angheles nen nankasalanan ira nensaman, noag ingen impelag to ra ed impierno [odino Tartaro, a mankabaliksan na sakey a kipapasen na pirmin inkiyabeba] ya asinger ira na golonggolong na [espiritual a] kabilungetan, [ya] inyawa’to ra pian atadia ra ed panangukom.” *

Diad sigpot a pisunian ed kipapasen da bilang nisian legan a wala ni ra ed tawen, saray marelmeng ya  anghel so walaan na baleg a pakauley diad dalin. Diad tua et tinukoy na Salita na Dios si Satanas bilang “say prinsipe na sayan mundo,” tan tinukoy na satan iray demonyo bilang saray “manuley ed mundo na sayan kabilungetan.” (Juan 12:31; Efeso 6:11, 12; 1 Juan 5:19) Lapud walaan na autoridad so Diablo, nayarian ton iyopresi ed si Jesus so “amin a panarian na mundo, tan say dayew da” daput no mandakmomo ed sikato. (Mateo 4:8, 9) Malinew sirin a sano “onsabi” so Panarian na Dios diad dalin, nagawa so sigpot a pananguman.

Dia ed dalin, say ‘isabi’ na Panarian na Dios so manresulta ed sigpot a kapasimbalo na sistema na bengabengatla. Mekmeken na Panarian so amin a ginaway-toon pananguley tan magmaliw la itan ya alenleneg a gobierno diad dalin. Ontan met, saramay matakot ed Dios a sakop na satan so magmaliw a “dalin a balo.” (2 Pedro 3:13; Daniel 2:44) Paandien met la na Panarian so kasalanan ed matulok a katooan tan diad kaunoran et pagmaliwen da a paraiso so interon dalin, tan diad ontan et naandi la so amin a pakasuysoyan na satanikon uley.​—Roma 8:20, 21; Apocalipsis 19:17-21.

Diad sampot na Sanlibon Taon, sano asumpal la na Mesianikon Panarian so linawa na Dios parad satan, “say Anak met a dili pauleyan ed anguley ed ami ganagana, pian say Dios wala ed amin ed ami ganagana.” (1 Corinto 15:28) Insan niwala so unor a subok, a kayari na satan et si Satanas, saray demonyo to, tan siopaman ya apalikdon totoo a nanrebelde so permanente lan nagalpong diad “ipapatey a komadua.” (Apocalipsis 20:7-15) Kayari na satan, amin a makabat a pinalsa ed tawen tan diad dalin so magaygayaga lan manpasakop ya andi-anggaan ed maaron inkasoberano nen Jehova. Diad amin a pamaakaran et sigpot lan nasumpal iray salita ed modelon pikakasi nen Jesus.​—1 Juan 4:8.

[Saray paimano ed leksab]