Agnarandan so Inkatalonggaring nen Jehova
Agnarandan so Inkatalonggaring nen Jehova
“Abalbaleg si Jehova, tan sankabalgan a dayewen; tan say kinabalgan to agniusa-usa.”—SALMO 145:3.
1, 2. Anto so nengneng na inkatoo nen David, tan panon ton minoria so inkasikato a misiglaotan ed Dios?
SAY anibukel ed Salmo 145 so sakey ed kabkabat a totoo ed awaran. Bilang tobonbalo, inarap to so sakey a naayuraan a higante tan apatey to. Tan bilang mibabakal ya ari, tinalo na sayan salmista so dakel a kakabusol. Say ngaran to et David, tan sikato so komaduan ari na kadaanan ya Israel. Nansiansia so maabig a reputasyon nen David anggad kayari na impatey to, kanian anggad natan et dakel a totoo so makaamta ed sikato.
2 Anggaman ed saray agawaan nen David, sikato so mapaabeba. Oniay inkanta to nipaakar ed si Jehova: “No umamengen ko so saray tawen mo, kimey na saray gamegamet mo, say bulan tan saray bitewen, ya ingganam; anto ta so too a manonot ka ed sikato? Tan say anak na too, a sikato so dalawen mo?” (Salmo 8:3, 4) Imbes ya isipen to a sikatoy matalonggaring, binidbir nen David a si Jehova so angiliktar ed sikato manlapud amin a kakabusol to, ya oniay inkuanto nipaakar ed Dios: “Initer mo ed siak met so kinlong na panangilaban mo; et say kauyamoan mo ginawa to ak a baleg.” (2 Samuel 22:1, 2, 36) Impatnag nen Jehova so kauyamoan diad impangipatnag to na panangasi ed saray managkasalanan, tan pinabli nen David so agkanepegan a panangasi na Dios.
‘Itandorok so Dios ya Ari’
3. (a) Anto so panmoria nen David nipaakar ed pagmaliw ya ari ed Israel? (b) Kaunongan kalaknab so impanpilalek nen David a mangidayew ed si Jehova?
3 Anggaman si David et tinuro na Dios bilang ari, minoria to si Jehova bilang say peteg ya Ari na Israel. Oniay inkuan nen David: “Kien mo so nanarian, O Jehova, tan nipatagey ka a singa ulo ed labas na amin.” (1 Awaran 29:11) Tan agaylay impangapresya nen David ed Dios bilang Mananguley! Oniay inkanta to: “Itandoro ta ka, Dios ko, O Arik, tan igalang ko so ngaran mo lawas lan lawas. Agew-agew ya igalang ta ka; tan idayew ko so ngaran mo lawas lan lawas.” (Salmo 145:1, 2) Pinilalek nen David ya idayew si Jehova a Dios diad interon agew tan ed andi-anggaan.
4. Antoran palson panamakasalanan so iwawalwal na Salmo 145?
4 Say Salmo 145 et mapuersan ebat ed panamakasalanan nen Satanas a say Dios et masiblet a mananguley, a mangikikibot na kawayangan ed saray pinalsa to. (Genesis ) Iwawalwal met na sayan salmo so tila nen Satanas a saramay manguunor ed Dios et gagawaen da labat itan lapud walay nagunggona ra, aliwan lapud inaro ra so Dios. ( 3:1-5Job 1:9-11; 2:4, 5) Singa si David, saray tuan Kristiano natan so mangitatarya na ebat ed saray palson akusasyon na Diablo. Papablien da so ilalo ran manbilay ya andi-anggaan diad pananguley na Panarian lapud pilalek da ya idayew si Jehova ed andi-anggaan. Ontan lay gagawaen na minilyon diad pangaagamil da na pananisia ed dondon bagat nen Jesus tan diad matulok a panlilingkor da ed si Jehova lapud aro ra ed sikato bilang dedikado tan bautismadon managdayew ed sikato.—Roma 5:8; 1 Juan 5:3.
5, 6. Antoray pankanawnawa a nabendito tan nidayew si Jehova?
5 Isipen pa so dakel a pankanawnawa tayon mamendito tan mangidayew ed si Jehova bilang lingkor to. Nagawaan tayo itan diad pikakasi sano natenyeg itayo ed bengatlan abasa tayo ed Salita to, say Biblia. Nibalikas tayo so maliket a panangidayew tan pisasalamat sano napakiwas itayo ed paraan na pidedeneng na Dios ed totoo to odino sano naliliketan itayo ed sakey ya aspekto na makapakelaw a palsa to. Bebenditoen tayo met si Jehova a Dios sano sisingbaten tayo iray gagala to a kaiba iray kapanisiaan diad saray Kristianon pantitipon odino legan na pribadon pantotongtong. Diad tua, amin a “maong a gawa” a gagawaen parad intereses na Panarian na Dios so kirayewan nen Jehova.—Mateo 5:16.
6 Saray agano nin alimbawa na saratan a maong a gawa so mangilaktip ed panagpaalagey na dakel a pasen a pandadayewan na totoo nen Jehova diad saray bansa a mairap so panagbilay. Nipapaalagey so dakel ed saratan lapud pinansyal a tulong na saray kapananisiaan ed arum a bansa. Pigaran Kristiano so tinmulong diad boluntaryon inyakar da ed saratan a lugar ta pian makapibiang ira ed panagpaalagey ed saray Kingdom Hall. Tan say sankaimportantian ed amin a maong a gawa et say panangidayew ed si Jehova diad panangipulong na maong a balita ed Panarian to. (Mateo 24:14) Unong ed ipapatnag na saray unor a bersikulo ed Salmo 145, inapresya nen David so pananguley na Dios tan intandoro to so inkaari To. (Salmo 145:11, 12) Kasin ontan met so panamabli yo ed maaron pananguley na Dios? Tan kasin regular yon itotongtong ed arum so nipaakar ed Panarian to?
Saray Alimbawa na Inkatalonggaring na Dios
7. Mangiter na manunan rason ya idayew si Jehova.
7 Say Salmo 145:3 so mangiiter na manunan rason pian idayew si Jehova. Oniay inkanta nen David: “Abalbaleg si Jehova, tan sankabalgan a dayewen; tan say kinabalgan to agniusa-usa.” Anggapoy geter na inkatalonggaring nen Jehova. Ag-itan sigpot a narandan, natalosan, odino nasukat na totoo. Balet maseguron nagunggonaan itayo ed pangonsidera natan ed saray alimbawa na agnarandan ya inkatalonggaring nen Jehova.
8. Anto so ipapatnag na uniberso nipaakar ed inkatalonggaring tan pakayari nen Jehova?
8 Nonoten pa so sakey ya inkagawa sanen niyarawi kayo ed saray maliwawan silew ed syudad tan tinmangay kayo ed malinlinak a katawenan ed labi. Agta mankelkelaw kayo ed karakel na bitewen a sankanengneng ed ambilunget a liwang? Agta apakiwas kayon mangidayew ed si Jehova lapud inkatalonggaring to diad impamalsa ed amin na saray bengatla ed tawen? Balet, say anengneng yo et melag lambengat a bilang na saray bibitewen ed galaksi a pakaromogan ed dalin. Niarum ni, akalkula a wala so masulok a sanlasus bilyon a galaksi, a talora labat ed saratan so nanengneng no ag-usaran na teleskopyo. On, say agnabilang a bibitewen tan galaksi a manugyop ed maaw-awang ya uniberso so paneknek ed pakayari nen Jehova a mamalsa tan agnarandan ya inkatalonggaring to.—Isaias 40:26.
9, 10. (a) Antoran aspekto na inkatalonggaring nen Jehova so nipatnag a misiglaotan ed si Jesu-Kristo? (b) Panon a makaapekto ed pananisia tayo so inkioli nen Jesus?
9 Konsideraen so arum niran aspekto na inkatalonggaring nen Jehova—saramay bengatlan mangilalanor ed si Jesu-Kristo. Nipatnag so inkatalonggaring na Dios diad impamalsa to ed Anak to tan impangusar to ed sikato diad loob na abayag a panaon bilang “uloen a komikimey” To. (Uliran 8:22-31) Say inkatalonggaring na aro nen Jehova so nipatnag sanen inter to so bogbogtong ya Anak to bilang dondon bagat parad katooan. (Mateo 20:28; Juan 3:16; 1 Juan 2:1, 2) Tan agnarandan na too so magloria tan imortal ya espiritun laman a denesinyo nen Jehova parad si Jesus diad inkioli to.—1 Pedro 3:18.
10 Say inkioli nen Jesus so angilanor ed dakel a makapasagyat iran aspekto na agnarandan ya inkatalonggaring nen Jehova. Maseguron impawil na Dios so memorya nen Jesus nipaakar ed kimey a mangilalanor ed panamalsa ed saray bengatlan agnanengneng tan nanengneng. (Colosas 1:15, 16) Saraya so mangilaktip ed arum niran espiritun pinalsa, say uniberso, say mabungan dalin, tan amin a nengneng na pisikal a bilay diad globo tayo. Nilikud ni ed impangipawil to ed pikakabat na Anak to nipaakar ed kompleton awaran na mangatatawen tan mangaraldalin a bilay a naimatonan na Anak to sakbay a nagmaliw a too, impawil nen Jehova ed memorya nen Jesus iray bengatlan naeksperiensya to bilang ayadyarin too. On, say agnarandan ya inkatalonggaring nen Jehova so niparungtal ed inkioli nen Jesus. Niarum ni, satan a matalonggaring a gawa so garantiya a posible so kioli na arum. Nepeg a mamabiskeg itan ed pananisia tayo a nayarian na Dios a paolien so minilyon ya inaatey a totoo a walad naspot a kanonotan to.—Juan 5:28, 29; Gawa 17:31.
Saray Makapakelaw tan Makapanyarin Gawa
11. Anton matalonggaring a gawa nen Jehova so ginmapo nen Pentecostes 33 K.P.?
11 Manlapu la’d inkioli nen Jesus, dakerakel ni so matalonggaring tan makapakelaw iran ginawa nen Jehova. (Salmo 40:5) Nen Pentecostes 33 K.P., inletneg nen Jehova so balon nasyon, ‘say Israel na Dios,’ a tugyopen na saray babangatan nen Kristo ya alanaan na masanton espiritu. (Galacia 6:16) Diad makapanyarin paraan, sayan balon espiritual a nasyon so linmaknab ed interon mundo nensaman. Anggaman linmesa so apostasya ya angitonton ed inkiletneg na Kakristianoan kayari na impatey na saray apostol nen Jesus, nantultuloy a nanggawa si Jehova na makapakelaw iran bengatla pian nipaseguro so kasumpalan na gagala to.
12. Anto so papaneknekan na katuaan a nipatalos natan so Biblia ed amin a manuna iran lenguahe ed dalin?
12 Alimbawa, say kanon na Biblia so nansiansia tan diad saginonor et nipatalos ed amin a manunan lenguahe diad dalin natan. Say panangipatalos ed Biblia so mabetbet a gagawaen anggaman mairap iray kipapasen tan anggaman ed ipapatey a pamapagyaw na saray manangilaman nen Satanas. Seguradon agnagawaan so panangipatalos ed Biblia diad masulok a 2,000 a lenguahe no aliwa itan a linawa na matalonggaring a tuloy a Dios, si Jehova!
13. Manlapu la’d 1914, panon a nipatnag so inkatalonggaring nen Jehova a misiglaotan ed saray gagala na Panarian to?
13 Nipatnag so inkatalonggaring nen Jehova a misiglaotan ed saray gagala na Panarian to. Singa bilang, nen taon 1914 et introno to so Anak to, si Jesu-Kristo, bilang mangatatawen ya Ari. Kayarin tuloy na satan, kinmiwas si Jesus sumpad si Satanas tan saray demonyo to. Sikaray pinagit ed tawen tan imbasileng ed kaliberliber na dalin, a panaalagaran da natan ed kikalinsurong da. (Apocalipsis 12:9-12; 20:1-3) Manlapu la’d saman, saray alanaan a patumbok nen Jesus so akaeksperiensya na pirmin panamasegsegang. Balet, sikara so tutulongan nen Jehova legan na sayan panaon na agnanengneng a kiwawala nen Kristo.—Mateo 24:3; Apocalipsis 12:17.
14. Anto so makapakelaw a ginawa nen Jehova nen 1919, tan anto so sinumpal na saya?
14 Nen taon 1919, nanggawa si Jehova na sananey nin makapakelaw a bengatla ya angipatnag na inkatalonggaring to. Binmiskeg iray alanaan a patumbok nen Jesus, a datin nidunget ed kipapasen na espiritual ya inka-inaktibo. (Apocalipsis 11:3-11) Diad saray taon manlapu la’d saman, saray alanaan so maseseg ya angipulong ed maong a balita na niletneg a mangatatawen a Panarian. Atipon so arum ya alanaan ta pian nakompleto so bilang na 144,000. (Apocalipsis 14:1-3) Tan diad panamegley na alanaan iran patumbok nen Kristo, inletneg nen Jehova so pundasyon na “dalin a balo,” say matunong a sosyedad na totoo. (Apocalipsis 21:1) Balet anto so nagawa ed “dalin a balo” no wala la’d tawen so amin a matoor ya alanaan?
15. Anton kimey so idadaulo na saray alanaan a Kristiano, tan tekep na antoran resulta?
15 Nen 1935, lugan na Agosto 1 tan Agosto 15 iran isyu na sayan dyurnal iray manunan artikulo a manasaglawi ed “baleg ya ulop,” a sinalambit ed Apocalipsis kapitulo 7. Saray alanaan a Kristiano so maseseg a nananap tan angitipon ed sarayan kaparan managdayew diad limog da manlapud amin a nasyon, tribu, totoo, tan pansasalita. Sayan “baleg ya ulop” so makaliktar ed manasingger lan “baleg ya irap,” tekep na ilalon magnayon a bilay diad Paraiso bilang permanentin kabiangan na “dalin a balo.” (Apocalipsis 7:9-14) Lapud panangipulong ed Panarian tan panaggaway-babangatan a kimey, ya indaulo na saray alanaan a Kristiano, masulok ya anemiran milyon a totoo so walaan la natan na ilalon agmangangga a bilay diad mangaraldalin a paraiso. Siopa so nepeg ya idayew lapud satan ya idaraak anggaman ed isusumpa nen Satanas tan say abulok a mundo to? (1 Juan 5:19) Si Jehova labat so makapanggawa ed satan ya amin, diad pangusar to na masanton espiritu to.—Isaias 60:22; Zacarias 4:6.
Say Maglorian Karlangan tan Kagalangan nen Jehova
16. Akin ya aliwan literal a nanengneng na saray totoo so ‘maglorian kagalangan na inkaari nen Jehova’?
16 Antokaman so nengneng na saratan, agbalot nalingwanan ‘iray pankelkelawan a gawa’ tan ‘makapanyari iran gawa’ nen Jehova. Oniay insulat nen David: “Say sakey a kapolian idayew to so gawagawam ed sakey a kapolian, tan ipaamta to so makapanyari a gawagawam. Dalepdepen ko so magloria a galang na inkaarim, tan saray pankelkelawan a gawagawam. Et saray totoo salambiten da so pakapanyari a makakebbiew a gawagawam; et ipaamtak so kinabalgan mo.” (Salmo 145:4-6) Ingen, kaunongan karakel kasi so amta nen David nipaakar ed maglorian karlangan nen Jehova, anta “say Dios sikatoy sakey ya espiritu” tan agnanengneng na too?—Juan 1:18; 4:24.
17, 18. Panon a binmulaslas so panamabli nen David ed ‘maglorian kagalangan na inkaari nen Jehova’?
17 Anggaman agto nanengneng so Dios, walaray paraan ed imbulaslas na panamabli nen David ed kagalangan nen Jehova. Singa bilang, nayarin abasa to so Makasulatan a rekord na saray makapanyarin gawa na Dios, a singa say inkaderal na marelmeng a mundo panamegley na delap ed interon dalin. Nayarin naamtaan nen David so inkipabpaabeba na saray palson dirios na Ehipto sanen inliktar na Dios iray Israelita manlapud panangaripen na Ehipto. Paneknekan na saratan ya ebento so kagalangan tan inkatalonggaring nen Jehova.
18 Maseguron binmulaslas so panamabli nen David ed kagalangan na Dios ya aliwa labat a lapud impanbasa to ed Kasulatan noagta lapud impandalepdep to met ed saratan. Singa bilang, nayarin dinalepdep to so agawa sanen inter nen Jehova so Ganggan ed Israel. Walaray karol, kirmat, makapal a lurem, tan makmaknol a trumpeta. Manmayegmeg tan manasewek so Palandey Sinai. Sankarengel ni ingen na saray Israelitan nandaragup ed leksab na palandey so “Samplora a Ganggan” manlapud utel na apoy tan lurem legan a mansasalita si Jehova ed sikara panamegley na sakey ya anghel. (Deuteronomio 4:32-36; 5:22-24; 10:4; Exodo 19:16-20; Gawa 7:38, 53) Agaylan makapakelkelaw a pakapatnagan na karlangan nen Jehova! Saray manangaro ed Salitay Dios a mandadalepdep ed sarayan salaysay so talagan napakiwas ed ‘maglorian kagalangan na inkaari nen Jehova.’ Siempre, natan et walaan itayo na kompleton Biblia, a lugan to iray nanduruman maglorian pasingawey a mangipupurek ed sikatayo ed inkatalonggaring nen Jehova.—Ezequiel 1:26-28; Daniel 7:9, 10; Apocalipsis, kapitulo 4.
19. Anto so mamadaak ed panamabli tayo ed kagalangan nen Jehova?
19 Say sakey nin paraan a nandinayewan nen David so kagalangan na Dios et diad impanaral to ed saray ganggan ya inter na Dios ed saray Israelita. (Deuteronomio 17:18-20; Salmo 19:7-11) Say katutulok ed saray ganggan nen Jehova so amagalang ed nasyon na Israel tan satan so angibiig ed sikara manlapud arum a totoo. (Deuteronomio 4:6-8) Singa ed biang nen David, say regular a pambasa tayo ed Kasulatan, pandalepdep a maong, tan maseet a panaral ed saratan so mamadaak met ed panamabli tayo ed kagalangan nen Jehova.
Matalonggaring a Tuloy Iray Moral a Kalidad na Dios!
20, 21. (a) Itatandoro na Salmo 145:7-9 so inkatalonggaring nen Jehova a misiglaotan ed antoran kalidad? (b) Anto so epekto na saray kalidad na Dios a sinalambit dia parad amin a mangaaro ed sikato?
20 Unong a naimano tayo la, say primeron anemiran bersikulo na Salmo 145 so mangiiter ed sikatayo na makatunongan iran rason pian idayew si Jehova lapud saray bengatlan misiglaotan ed agnarandan ya inkatalonggaring to. Itatandoro na bersikulo 7 anggad 9 so inkatalonggaring na Dios diad impanukoy na saratan ed moral iran kalidad to. Oniay inkanta nen David: “Sikara ibawag da a mapalalo so pakanodnonotan ed abalbaleg a kaabigan mo, tan mangikanta ra na inkatunong mo. Si Jehova maong a linawa tan mapangasi: matantan a manpasnok tan baleg ed abig na linawa. Si Jehova maong ed amin; tan saray matamoy a panangasi to wala ra ed tagey na saray amin a kimey.”
21 Impabitar dia nen David so kaabigan tan inkatunong nen Jehova—saray kalidad a sinuppiat nen Satanas a Diablo. Anto so epekto na saratan a kalidad ed amin a mangaaro ed Dios tan manpapasakop ed pananguley to? Siempre, say kaabigan nen Jehova tan matunong a pananguley to so mangitarok na gayaga ed saray mandadayew ed sikato kanian ag-ira napokpokan ed pangidadayew da. Niarum ni, say kaabigan nen Jehova so onnanatnat “ed amin.” Ilaloan tayo a makatulong iya ed dakel ni pian magbabawi tan magmaliw a managdayew ed tuan Dios sakbay a naatrasado iray bengatla.—Gawa 14:15-17.
22. Panon so pantratrato nen Jehova ed saray lingkor to?
22 Pinabli met nen David iray kalidad ya impabitar a mismo na Dios sanen Sikato so ‘nankurang ed unaan [nen Moises], et inyabawag to a kuanto, Jehova, Jehova, Dios a mapangasi tan mapaaro, mapalna ya onsanok, tan daakan ed maaro ya abig na linawa, tan katuaan.’ (Exodo 34:6) Kanian oniay niyabawag nen David: “Si Jehova maong a linawa tan mapangasi: matantan a manpasnok tan baleg ed abig na linawa.” Anggaman si Jehova et matalonggaring a tuloy, papagalangan to iray totoon manlilingkor ed sikato diad maong a panagtrato to ed sikara. Sikato so napno na panangasi, a mabulos a mamerdona ed saray magbabawin managkasalanan diad basiyan na dondon bagat nen Jesus. Si Jehova so matantan met a manpasnok, lapud iikdan to iray lingkor to na pankanawnawan makatalona ed kakapuyan da a mamupuger ed sikara ya onloob ed matunong a balon mundo to.—2 Pedro 3:9, 13, 14.
23. Anton mablin kalidad so konsideraen tayo ed ontumbok ya artikulo?
23 Intandoro nen David so maaron-kaabigan, odino matoor ya aro na Dios. Diad tua, say arum a kabiangan na Salmo 145 so mangipapabitar ed no panon so pangipapatnag nen Jehova ed sayan kalidad tan no panon so ikikiwas na saray matoor a lingkor to ed maaron kaabigan to. Sarayan pamaakaran so singbaten ed ontumbok ya artikulo.
Panon Yon Ebatan?
• Antoray walan pankanawnawa a nidayew si Jehova ed “agew-agew”?
• Antoran alimbawa so mangipatnag ya agnarandan so inkatalonggaring nen Jehova?
• Panon tayon napabulaslas so panamabli tayo ed maglorian kagalangan nen Jehova?
[Tepetepet Parad Panagaral]
[Litrato ed pahina 10]
Saray galaksi ed uniberso so mamapaneknek ed inkatalonggaring nen Jehova
[Credit Line]
Diad impangiyabuloy na Anglo-Australian Observatory, nilitrato nen David Malin
[Litrato ed pahina 12]
Panon a nipatnag so inkatalonggaring nen Jehova a misiglaotan ed si Jesu-Kristo?
[Litrato ed pahina 13]
Sanen naawat na saray Israelita so Ganggan ed Palandey Sinai, awalaan ira na ebidensya ed maglorian kagalangan nen Jehova