Igloria so Dios, Aliwan say Too

DIAD apalabas iran bulan, naaralan na saray manangaro na inkatunong ed sankamundoan no panon ya igloria so Dios legan iran nandaragup diad “Igloria so Dios” a Distrito iran Kombension na saray Tasi nen Jehova. Repasoen tayo pa so edukasyonal a programan nipresenta ditan.

Say programan nibase ed Biblia so agawa ed loob na taloran nantutumbokan ya agew parad maslak ya inmatendi ed kombension tan apatiran agew parad saramay akaatendi ed espisyal ya internasyonal iran kombension. Diad ami-amin, saray inmatendi so akadngel na masulok a 30 Makasulatan a presentasyon, a kabiangan iray paliwawa ya amaaralem ed apresasyon parad espiritual, saray eksperiensya ya amabiskeg ed pananisia, saray demostrasyon ya angipabitar ed praktikal a kakanaan na saray prinsipyo ed Biblia, tan say kontodo-kostyum a drama ya angiyilustra ed saray angat ya inarap na saray Kristiano nen inmunan siglo. No akaatendi ka ed sakey ed saray kombension, akin ya agrepasoen iray notam legan mon babasaen iyan artikulo? Maseguro kami a saya so mangipanonot ed sika ed saray makapaliket ya eksperiensyam diad mayaman ya espiritual a piesta tan makaibangat met.

Tema ed Unonan Agew: “Sika so Manepeg, Jehova, . . . a Mangawat na Gloria”

Kayari na panlukas a kanta tan pikakasi, maligsan inabrasa na inmunan espiker so amin ya inmatendi panamegley na sakey a paliwawa a nisentro ed manunan gagala na kombension: “Nantitipon Pian Igloria so Dios.” Indanet na espiker so intiramintin tema na kombension ya inaon to so Apocalipsis 4:11. Impabitar ton tampol so kabaliksan na pangigloria ed Dios. Diad impangaon to ed libro na Salmo, indanet to a say lalanoren na pangigloria ed Dios et ‘panangigalang,’ ‘pisasalamat,’ tan ‘panangidayew.’​—Salmo 95:6; 100:4, 5; 111:1, 2.

Say tinmumbok a parte so apauloan na “Natutumangan Iraman so Mangiglogloria ed Dios.” Makapainteres so inkomento na espiker. Lapud masulok lan anemiran milyon a Tasi nen Jehova so wala ed 234 a daldalin ed sankamundoan, nibaga ya agew-labi et walaray mangiglogloria ed si Jehova. (Apocalipsis 7:15) Say makapasagyat a kabiangan na sayan parte a nanggayagaan na saray dumerengel et say impanginterbio ed pigaran Kristianon agagin lalaki tan bibii a walad nanduruman nengneng na espisyal a sigpot-panaon a serbisyo.

Tinmumbok so paliwawan “Iyaabawag na Saray Pinalsa so Gloria na Dios.” Anggaman agmansasalita so pisikal a katawenan, satan so mangitatandoro ed inkatalonggaring na Dios tan mamapaaralem  na apresasyon tayo ed maaron panangiyansakit to. Saya so detalyadon impaliwawa.​—Isaias 40:26.

Say panamasegsegang, isusumpa, minumundo iran impluensya, tan makasalanan iran tendensia so manusubok ed katooran na saray tuan Kristiano. Kanian, say paliwawan “Mankurang ed Dalan na Katooran” so makanepegan na agnaapag ya imano na saray dumerengel. Tinmumbok so bersikulo por bersikulon impaningbat ed koma-26 a Salmo, kalaktip iray interbio ed Tasin maneeskuela a mapekder a tinmalindeg nipaakar ed moralidad tan say sakey met a manguusar na dakel a panaon ed kuestionable iran panagligliwaan balet ta kinmiwas pian talonaan so problema.

Anampot so programa ed kabuasan panamegley na pinagkateman paliwawa a “Papakiwasen Itayo na Saray Magloria a Propetikon Pasingawey!” Tinukoy na espiker iray alimbawa nen propeta Daniel tan si apostol Juan tan Pedro a say pananisia ra so pinabiskeg na saray maglorian mapropetikon pasingawey ed kiletneg tan kikurang na Mesianikon Panarian na Dios. Diad impanukoy ed siopaman a nayarin akalingwan ed malinew a paneknek a wala itayo la ed panaon na anggaan, inkuan na espiker: “Masimoon tayon ilaloan a saratan so mangiyapasakey lamet ed inkapeteg na kiwawala nen Kristo ed gloria na Panarian tan natulongan ira pian napapawil day espiritual a biskeg da.”

Ginmapo so programa ed ngarem panamegley na diskurson apauloan na “Niparungtal so Gloria nen Jehova ed Saray Mapaabeba.” Impabitar na espiker no panon ya angipanengneng si Jehova na alimbawa ed inkamapaabeba, anggaman sikato so sankatageyan a Persona ed uniberso. (Salmo 18:35) Papaboran nen Jehova iraman so tuan mapaabeba, balet susumpaen to iraman so ompatnag a mapaabeba lambengat sano midedeneng ed saray kalimog da odino atagtagey nen sikara bangta maruksan manatrato ed saramay walad panangidaulo ra.​—Salmo 138:6.

Kayari na satan et imparungtal so propesiya ed Biblia ed sakey simposium a mangipapabitar ed nanduruman aspekto na manunan tema: “Say Propesiya nen Amos​—Say Mensahe na Satan ed Panaon Tayo.” Diad impanukoy to ed alimbawa nen Amos, impaimano na inmunan espiker so responsabilidad tayo a mamasakbay ed totoo nipaakar ed onsabin panangukom nen Jehova. Say tema na paliwawa to et “Salitaen so Salita na Dios Tekep na Inkakpel.” Say komaduan espiker so nantepet: “Kasin panganggaen nen Jehova so karelmengan tan kairapan diad sayan dalin?” Say tema ton, “Panangukom na Dios Sumpad Marelmeng,” so angipabitar a say panangukom na Dios so lawas makanepegan, agnaliktaran, tan aliwan turobos. Say unor ya espiker ed simposium so angiyapasakey ed teman “Uusisaen nen Jehova so Puso.” Saraman so manpirawat a mamaliket ed si Jehova so nepeg ya ontalineng ed saray salita diad Amos 5:15: “Gulaen yo so mauges, tan aroen yo so maong.”

Say de-alkohol ya iinumen, a singa say alak a mamapaliket ed puso, so nayarin nausar ed lingon paraan. Diad paliwawa ton “Paliisan so Patit na Panag-abuso ed Alak,” indatak na espiker iray pisikal tan espiritual a kapeligroan ed alablabas a panag-inum na alak, anggano agnabuanges so sakey a too. Sikatoy angiter na manangigiyan prinsipyo: Lapud nanduruma ed kada too so nasarag ton inumen ya alak, dinanman a karakel a mangapekta la ed “kakabatan tan kalakal” mo et sobra la parad sikan mismo.​—Uliran 3:21, 22.

Lapud manbibilay itayo ed mapeligron panaon, say tinmumbok a teman, “Si Jehova, say ‘Salimbengan Tayo ed Panaon na Gonigon,’” so peteg ya akaligliwa. Makatulong ed sikatayo so panagpikasi, masanton espiritu, tan saray kaparan Kristiano pian makapansungdo.

Say unor a paliwawa ed agew a, “‘Say Maong a Dalin’​—Pagpauna na Paraiso,” so anampot tekep na makapaliket a surprisa ed amin​—sakey a balon publikasyon a walaan na dakel a mapa ed Biblia! Apauloan itan na See the Good Land.

Tema ed Komaduan Agew: “Iyabawag so Gloria To ed Limog na Saray Nasyon”

Kayari na impangonsidera ed inagew-agew a teksto, impresenta so komaduan simposium ed kombension, a walaan na teman “Isindag so Gloria nen Jehova a Singa Saray Salming.” Imbinsabinsa ed inmunan parte so “Pangilaknab ed Maong a Balita ed Inerman a Pasen” a kalaktip iray panangiyakto ed aktual iran eksperiensya diad lawak na kimeyan. Say komaduan paliwawa so angilaktip ed demostrasyon nipaakar ed panagpawil legan ya impresenta na espiker so teman “Pangekal na Sakbong ed Saraman so Abulag.” Say unor a  parte, ya apauloan na “Panggawa na Malaem ed Ministeryo Tayo,” so pinabilay na saray makapasagyat ya interbio nipaakar ed saray eksperiensya ed lawak.

Say tinmumbok a parte na programa et apauloan na “Ginula ya Anggapoy Makasengeg.” Satan so angilaktip ed makapaseseg iran interbio ed saray matoor ya indibidual a lapud panamabiskeg na Dios et apansiansia ra so katooran da anggaman ed isusumpa.

Say pitalaran a kabiangan na saray kombension et say paliwawa ed bautismo a tinumbokan na sigpot ya inkipalseb ed danum na amin a kualipikadon kandidato. Isisimbolo na bautismo ed danum so sigpot a dedikasyon na too ed si Jehova. Kanian, matukotukoy so teman: “Mangigloria ed Dios so Pambilay Unong ed Dedikasyon Tayo.”

Ginmapo so programa ed ngarem panamegley na paliwawan angisagyat na dilin-panangusisa a  “Bayuboan so Singa-Kriston Panmoria ed Inkatalonggaring.” Sinalambit na espiker iyan makapainteres a punto: Say inkatalonggaring so manlapud pangalig ed inkamapaabeba nen Kristo. Kanian, agnepeg a panggunaetan na sakey a Kristiano so pakawalaan na responsablin betang pian peneken labat so personal a gegemtan to. Nepeg ton tepetan so inkasikato, ‘Kasin mabulos ak a manggawa na makatulong iran kimey ya agnaimano a tampol?’

Kasin asali yo lay kinmesaw? Mapatnag so ebat. Say paliwawan “Naksawan ed Pisikal Balet ta Andi ed Espiritual” so nanggayagaan na amin. Impatnag na saray interbio ed saray abayag lan Tasi a sikatayoy sarag nen Jehova a ‘pabiskegen . . . panamegley na espiritu to.’​—Efeso 3:16.

Say inkamabunlok et sakey a kalidad ya agnisipor ed sikatayo balet nepeg ya aralen. Sayan manunan punto so indanet diad partin “Magmaliw a Mabunlok, Akaparaan a Manginabang.” Tan oniay pinalesan tepet a makatenyeg na nonot: “Kasin akaparaan itayon manginabang na pigaran oras tayo ed saray maedad la, mansasakit, nagogonigon, odino maneermen ya agagi tayo?”

Asagyat so imano na saray dumerengel ed “Manalwar ed ‘Boses na Saray Sankaili.’” Inkompara na sayan paliwawa iray patumbok nen Jesus ed saray karnero ya ontatalineng labat ed boses to bilang “maong a pastol” tan ag-ontatalineng ed “boses na saray sankaili” a narerengelan manlapud dakel a totoon iimpluensyaan na Diablo.​—Juan 10:5, 14, 27.

Say ulop na komakanta so nepeg a mangansion a manbabansag pian natalosan. Pian nigloria ra so Dios, saray tuan managdayew ed sankamundoan so nepeg a mankakasakey. Kanian, say “Igloria so Dios Diad ‘Panamegley na Saksakey a Sangi’” so angiter na makagunggonan bilin ed no panon itayon makapansalita ya amin na “puron lenguahe” tan manlingkor ed si Jehova a “benebenek.”​—Sofonias 3:9.

Saray atateng, nagkalautla ed saramay angkelag ni so ananak da, so nanggayagan maong ed unor a paliwawa ed satan ya agew, “Saray Ananak Tayo​—Mablin Tawir.” Impaway so sakey a balon publikasyon a walaan na 256 a pahina, ya anurprisan maong ed saray dumerengel. Say libron Manaral Manlapud Sankamaongan a Managbangat so ontulong ed saray atateng a nawalaan na makagunggona ed espiritual a panaon a kaiba so ananak da, a langkap na Dios ed sikara.

Tema ed Komatlon Agew: “Gawaen so Amin a Bengatla Diad Kigloriaan na Dios”

Ginmapo so sampot lan agew na kombension diad impangipanonot na inagew-agew a teksto ed saray espiritual a pamaakaran. Say primeron parte na programa ed sayan agew so angiyapasakey a nagkalalo ed saray pamilya. Say inmunan paliwawa ya, “Atateng, Pabiskeg Yoy Pamilya Yo,” so angiparaan ed nonot na saray dumerengel. Kayarin nirepaso iray responsabilidad na atateng a mangitarya ed materyal a pankaukolan na pamilya ra, pinaneknekan na espiker a say manunan responsabilidad  na atateng et say pangitarya ed espiritual iran pankaukolan na ananak da.

Impaarap na tinmumbok ya espiker so paliwawa to ed saray ugugaw tan inusisa to so teman “No Panon a Saray Kalangweran so Mangidadayew ed si Jehova.” Inkuan to a saray kalangweran et singa ra “linaew” lapud kinarakel da tan say inkaseseg da bilang tobonbalo so makaparepresko. Maliket a mikimey ed sikara iray wala la’d edad diad panaglingkor ed si Jehova. (Salmo 110:3) Sayan parte so angilaktip ed saray makapaliket ya interbio ed saray napanuliranan a kalangweran.

Saray kontodo-kostyum a drama ed Biblia so lawas makapaliket a kabiangan na distrito iran kombension, kanian kabiangan met itan ed sayan kombension. Say drama a “Makpel a Panagtasi Anggaman ed Isusumpa” so angilitrato ed saray patumbok nen Jesus nen inmunan siglo. Aliwa labat a makapaliket itan noagta, nagkalalon importante et makaibangat itan. Say diskurso kayari na drama ya, “Iyabawag so Maong a Balita ya ‘Andi-Tunda,’” so angidanet ed saray manunan punto ed drama.

Amin ya inmatendi so mantatalaran ed say pantok a programa ed Simba, say publikon paliwawa a, “Siopa Iray Mangiglogloria ed Dios Natan?” Say espiker so angiter na mabiskeg a pamaneknek no panon a saray sientipiko tan relihyoson komunidad ed inkalapagan so agmangiglogloria ed Dios. Saraman labat so totoon mangaakbibit na ngaran to, a mangipupulong tan mangibabangat na katuaan nipaakar ed si Jehova, so peteg a mangiglogloria ed ngaran to natan.

Say publikon paliwawa so tinumbokan na impansumaryo na leksion ed magasin a Panag-Bantayan parad satan a simba. Insan, say sankaunoran a paliwawa et “‘Mantultuloy a Manbunga na Dakel’ Diad Kigloriaan nen Jehova.” Imparungtal na espiker so samploran-punto a resolusyon a nepeg ya iyaplika na amin ya inmatendi. Satan so niyapasakey ed nanduruman paraan pian nigloria si Jehova, say Manamalsa. Arengelan so nankakasakey ya “On” diad amin a kombension ed sankamundoan.

Sirin, say kombension so anampot a sankanonot na amin ya inmatendi so teman “Igloria so Dios.” Tan diad tulong na espiritu nen Jehova tan say nanengneng a kabiangan na organisasyon to, sikatayo komon so lawas manggunaet a mangigloria ed Dios ya aliwan say totoo.

[Kahon/Saray litrato ed pahina 23]

Internasyonal Iran Kombension

Say apat-agew ya internasyonal iran kombension so agawa ed Aprika, Asia, Australia, Europa, tan Amianen tan Abalaten ya Amerika. Saray arum a Tasi ed sankamundoan so naimbitaan a magmaliw a delegado diad sarayan pandaragup. Diad onian paraan et ‘akapanpapasesegan’ iray bisita tan saray amarawes ed sikara. (Roma 1:12) Akapannenengneng lamet iramay dati lan sankakabat, tan walaray balon akapankakabat. Say espisyal a kabiangan na internasyonal iran kombension et say parte ed programa ya apauloan na “Saray Report Manlapud Arum Iran Bansa.”

[Kahon/Saray litrato ed pahina 25]

Saray Balon Publikasyon a Mangiglogloria ed Dios

Duaran balon publikasyon so nipaway diad “Igloria so Dios” a Distrito iran Kombension. Say atlas na Biblia a See the Good Land so walaan na malet ya apis tan 36 a pahina na saray mapa tan litrato na saray lugar ya asalambit ed Biblia. Kada pahina et makolor tan walaan na saray mapa na empiryo na Asirya, Babilonia, Medo-Persia, Gresya, tan Roma. Walara so nibiig a mapa a mangokobre ed ministeryo nen Jesus tan say sinaknapan na Inkakristiano.

Say libron Manaral Manlapud Sankamaongan a Managbangat et walaan na 256 a pahina tan manga 230 a litrato. Dakel a makapaliket a panaon so nausar a kaiba iray ananak diad inengneng labat ed saray litrato tan pangebat ed saray makatenyeg na kanonotan a tepet a naromog diad libro. Sayan balon publikasyon so denesinyo pian naresistian so pangaataki nen Satanas ed saray ananak tayo, a say getma to et deralen so moralidad da.

[Litrato ed pahina 23]

Insalaysay na saray misionaryo so makapabiskeg na pananisia iran eksperiensya ra

[Saray litrato ed pahina 24]

Say bautismo so importantin kabiangan na “Igloria so Dios” iran kombension

[Saray litrato ed pahina 24]

Saray drama ed Biblia so nanggayagaan na ugugaw tan mamatatken