“Sakey ed Saray Sankabalgan a Kimey ed Engineering”

SANEN impaalagey so templo nen Jehova diad Jerusalem legan na uley nen Arin Solomon manga 3,000 a taon lay apalabas, ginawa met so alay dakep a gansan kargaan na danum tan inyan itan ed paway na lolooban na templo. Manbelat itan na masulok a 30 tonilada tan mankarga itan na manga 40,000 litro na danum. Sayan abalbaleg a kawa so tinawag ya imbobo a dayat (molten sea). (1 Arari 7:23-26) “Agpanduaruwaan a satan so sakey ed saray sankabalgan a kimey ed engineering a ginawa diad bansan Hebreo,” so inkuan nen Albert Zuidhof, a datin technical officer ed National Research Council na Canada, diad Biblical Archeologist.

Panon so impanggawa ed imbobo a dayat? Inkuan na Biblia a “dia ed talugtog na Jordan so nampaboboan na ari ed sikara [saray kagawaan a gansa], diad ginmibato a dalin.” (1 Arari 7:45, 46) “Maseguron say paraan na impanmoldi et mipara ed metodon ‘panagtunaw na eskayola’ ya ikakana ni anggad natan diad panaggawa na saray gansan kampana,” so inkuan nen Zuidhof. Impaliwawa to: “Manuna et nalalanor so pangiparaan ed modelon kawa a gawa’d eskayola ya imomoldi ya akapatikleb ed amagamagan panagmoldian. . . . No asumpal la itan, saray managmoldi so kaukolan a manggawa na akinpaway a hulma diad tapew na modelon eskayola tan pamagaen da itan. Saray unor a kundang et say pantunaw ed eskayola tan pangiyibung na likidon gansa ed longog na satan.”

Kinaukolan so malaknab a dunong ed panagmoldi diad sayan abalbaleg tan ambelbelat ya imbobo a dayat. Kaukolan a say utel na satan tan say akinpaway a hulma so makasarag ed belat na manga 30 tonilada na imbobo a gansa, tan nepeg a tuloytuloy so panagbobo pian ag-itan onletak odino nalamatan. Maseguron kinaukolan so tuloytuloy a panhurno kaleganan ya iyiibung ed hulma so tinunaw a metal. Talagan abalbaleg a kimey!

Diad pikakasi to legan na inagurasyon na templo, indayew nen Arin Solomon si Jehova a Dios lapud amin a kimey ed templo, a kuanto: “Sinalitam ed sangim, tan sinumpal mo ed limam a singa ed sayan agew.”​—1 Arari 8:24.