Saray Sipan a Napanmatalkan Mo

AMTA na propeta na Dios a si Miqueas a saray sipan so mabetbet a napapaneknekan ya agnapanmatalkan. Diad panaon to, anggan saray sankaapitan a kaiba so aglawas napanmatalkan a manoor ed insipan da. Kanian impasakbay nen Miqueas: “Agkayo manmatalek ed sakey a kaabay; agyo ’yan so panmatalek yo ed sakey a kaaro; kawaloen mo so saray pinto na sangim a manlapu ed saman so ondukol ed akwalan mo.”​—Miqueas 7:5.

Kasin inabuloyan nen Miqueas iyan maermen a kipapasen pian panduaruwaan to so amin lan sipan? Andi! Impatnag to so sigpot a kompiyansa ed saray insipan na Dios to, si Jehova. “No nipaakar ed siak,” so insulat nen Miqueas, “onnengneng ak naani ed Jehova; alagden ko naani so Dios na kilalaban ko.”​—Miqueas 7:7.

Akin ya ontan lay impankompiyansa nen Miqueas? Lapud amta to a totooren a naynay nen Jehova so salita To. Amin ya insipan na Dios ed inmuunan atateng nen Miqueas so tinmua. (Miqueas 7:20) Say inkamatoor nen Jehova diad apalabas so angiter ed si Miqueas  na amin a rason pian manisia a tooren To so salita To diad arapen.

“Anggapo so Sakey a Bengatla a Linmiwat”

Alimbawa, kabat nen Miqueas ya inliktar nen Jehova iray Israelita ed inkaaripen ed Ehipto. (Miqueas 7:15) Si Josue, ya akaeksperiensya ed satan a panangiliktar, so amaseseg ed saray kapara ton Israelita a manmatalek ed amin a sipan na Dios. Diad anton basiyan? Oniay impanonot nen Josue ed sikara: “Amta yo ed simoon a puso yo tan ed simoon a kamarerwa yo, ya anggapo so sakey a bengatla a linmiwat ed amin a maong a bengabengatla a si Jehova a Dios yo sinalita to nipaakar ed sikayo; sikara so agawa ya amin ed sikayo, anggapo so sakey a bengatla a linmiwat ed sikara.”​—Josue 23:14.

Kabkabat met na saray Israelita a nanggawa si Jehova na makapakelaw iran bengatla parad sikara. Tinoor to so sipan to ed say matakot ed Dios ya inmunan ateng dan si Abraham, a say ilalak to so magmaliw a singa karakel na saray bitewen tan kayarianen da so dalin na Canaan. Inkuan met nen Jehova ed si Abraham a saray kapolian to so managmak na kairapan ed loob na 400 a taon balet ta ompawil ira ed Canaan “dia ed komapat a kailalakan.” Agawa iyan amin.​—Genesis15:5-16; Exodo 3:6-8.

Saray Israelita so inabrasa ed Ehipto diad panaon nen Jose ya ilalak nen Jacob. Diad saginonor et sikaray maruksan inaripen na saray Ehipsio, balet unong ya insipan na Dios, kayari na peryodo na apatiran nantutumbokan a kailalakan manlapud inloob da ed Ehipto, sarayan kapolian nen Abraham so nibulos ed panangaripen ed Ehipto. *

Legan na tinmumbok ya 40 taon, lalon apaneknekan na saray Israelita a lawas totooren nen Jehova iray sipan to. Sanen agmakatunongan ya inataki na saray Amalekita iray Israelita, akilaban so Dios parad totoo to tan sinalimbengan to ra. Intarya to so amin a materyal a pankaukolan da legan na 40-taon ya impanteyengteyeng da ed kalawakan tan diad kaunoran et nanayam ira ed Insipan a Dalin. Legan a nonodnonoten nen Josue so awaran na impideneng nen Jehova ed sarayan kapolian nen Abraham, matalek ton nibaga ya: “Anggapo so linmiwat a balot ed anton maong a bengatla a si Jehova sinalita to ed abung na Israel; amin agawa.”​—Josue 21:45.

Pabiskegen so Panagmatalek ed Saray Sipan na Dios

Panon mon napabiskeg so panagmatalek mo ed saray sipan nen Jehova, a singa ginawa nen Miqueas tan si Josue? Bueno, panon mon babayuboan so panagmatalek ed arum? Kabaten mo iran maong anggad nayarian mo. Singa bilang, naamtaan mo a napanpiyaan iran tuloy diad pakaimaton mon matoor dan susumpalen so amin a sipan da. Legan mon nakakabat a nagkalalo iratan a totoo, sika so kalkalnan nawalaan na panagmatalek ed sikara. Nagawaan mo met so ontan no nipaakar ed panamabiskeg na panagmatalek ed saray sipan na Dios.

Say sakey a paraan a nagawaan mo iya et diad panmolimoli ed pinalsa tan saray ley a mangokontrol ed satan. Saray sientista so manmamatalek ed sarayan ley, a singa saramay ley a mangokontrol ed paraan na idakel na sakey a selula na too tan mamawala na trilyon a selula a manitibukel ed mismon laman mo. Diad  tua et saray ley a mangokontrol ed kipapasen na materyal tan enerhiya diad interon uniberso so maseguron inletneg na napanmatalkan a tuloy a Managgaway-ley. Seguradon napanmatalkan mo iray sipan to, unong a sikay manmamatalek met ed saray ley a mangokontrol ed palsa to.​—Salmo 139:14-16; Isaias 40:26; Hebreos 3:4.

Diad panamegley nen propetan Isaias, a kapanaonan nen Miqueas, inusar nen Jehova so inka-regular na saray tiempo tan say makapakelaw a sikulo na danum pian iyilustra so inkanapanmatalkan na salita to. Kada taon et onuuran. Saratan so manasalog ed dalin kanian saray totoo so makapantanem na bini ra tan makapan-ani na bunga. Nipaakar ed saya, inkuan nen Jehova: “Unong a say uran tan say musyak a lurem onlasor ira a manlapu ed tawen, et ag-ira ompawil diman noag ingen salogen da so dalin, tan panbungaen da tan panbukelen da, tan pangikdan to na bini ed saray managtanaman tan tinapay ed manangan. Ontan met naani so salitak ya ompaway ed sangik; sikato naani ag-ompawil ed siak a paoypaoy, noag ingen sumpalen to naani so kaliktan ko, tan onaligwas naani ed bengatla a pangiyakaran ko ed sikato.”​—Isaias 55:10, 11.

Segurado Iran Sipan Nipaakar ed Paraiso

Napabiskeg so panagmatalek ed Manamalsa diad pangusisa ed palsa, balet wala ni so nakaukolan no labay mon naamtaan iray sipan a kabiangan ed ‘salita a pinmaway ed sangi to.’ Pian naamtaan mo irayan sipan tan makapanmatalek ka ed saratan, nakaukolan mon usisaen so pinuyanan na Dios a Makasulatan a rekord nipaakar ed gagala na Dios ed dalin tan saray impideneng to ed katooan.​—2 Timoteo 3:14-17.

Nanmatalek si propetan Miqueas ed saray sipan nen Jehova. Sika so walaan na mas dakel a pinuyanan na Dios a rekord nen say si Miqueas. Legan mon babasaen so Biblia tan dadalepdepen itan, nawalaan ka met na panagmatalek a nasumpal iray sipan na Dios. Aliwa labat a saray natural ya ilalak nen Abraham so nalalanor ed sarayan sipan noagta amin a katooan. Oniay insipan nen Jehova ed sayan matakot ed Dios a patriarka: “Dia ed ilalak mo so pakapikapalaranan na saray amin a nasyon dia; lapu ed tinulok mo so boses ko.” (Genesis 22:18) Say manunan kabiangan na “ilalak” odino bini, nen Abraham et say Mesias, si Jesu-Kristo.​—Galacia 3:16.

Diad panamegley nen Jesu-Kristo, seguroen nen Jehova ya onagus iray bendisyon ed matulok a katooan. Tan antoy insipan na Dios a gawaen to diad panaon tayo? Oneebat so Miqueas 4:1, 2 ed oniaran mapropetikon salita: “Dia ed saray kaunoran ya agew nagawa naani, a say palandey na abung nen Jehova niletneg naani ed toktok na saray palandey, tan sikato naani nipaatagey ed tagey na saray pukdol; et saray baley onagus ira naani ed sikato. Et dakel a nasyon onla ra naani a kuan da, Dago kayo, tan onsegep itayo ed palandey nen Jehova, tan ed abung na Dios nen Jacob; et ibangat to itayo ed saray dalan to, tan manakar itayo ed basbas to.”

Saramay manaaral nipaakar ed dalan nen Jehova so ‘mamitpit ed saray kampilan da a tarem na lukoy, tan saray gayang da a kalkalawit.’ Naandi la so antokaman iran tendensian mibakal. Agmanbayag et napano so dalin na maptek a totoo, tan anggapo la so manaktakot ed sikara. (Miqueas 4:3, 4) On, isisipan na Salitay Dios a diad silong na Panarian ya uleyan nen Jesu-Kristo et ekalen nen Jehova ed dalin so amin a mauges a totoo.​—Isaias 11:6-9; Daniel 2:44; Apocalipsis 11:18.

Anggan saramay nanirap tan inatey bilang epekto na impanrebeldi na too ed Dios et napaoli tekep na ilalon manbilay a maando diad dalin. (Juan 5:28, 29) Napagit la si Satanas tan saray demonyo to, a mangisusugsog na karelmengan,  tan saray epekto na kasalanan nen Adan so naandi la panamegley na dondon bagat nen Jesus. (Mateo 20:28; Roma 3:23, 24; 5:12; 6:23; Apocalipsis 20:1-3) Tan antoy magmaliw a kipapasen na matulok a totoo? Peteg a sikaray napribilehyoan a manbilay ya andi-anggaan a walaan na ayadyarin bunigas diad sakey a paraison dalin!​—Salmo 37:10, 11; Lucas 23:43; Apocalipsis 21:3-5.

Agaylan abig a sipasipan! Balet kasin napanisiaan mo iratan? Petepeteg. Aliwa irayan sipan na totoo a nayarin walaan na maabig iran getma balet agmakayarin manumpal ed saratan. Saratan so sipan na Makapanyarin-amin a Dios, ya agnayarin mantila tan “agto bayagen so sipan to.” (2 Pedro 3:9; Hebreos 6:13-18) Sikay sigpot a makapanmatalek ed amin a sipan a lugan na Biblia, lapud ‘si Jehova, a Dios na katuaan’ so Lapuan na saratan.​—Salmo 31:5.

[Paimano ed leksab]

[Blurb ed pahina 6]

“Anggapo so sakey a bengatla a linmiwat ed amin a maong a bengabengatla a si Jehova a Dios yo sinalita to nipaakar ed sikayo.”​—JOSUE 23:14

[Saray litrato ed pahina 4, 5]

Tinoor nen Jehova iray sipan to ed Israel diad Ambalangan Dayat tan diad kalawakan

[Saray litrato ed pahina 7]

Sinumpal nen Jehova so sipan to ed kinen Abraham. Say Bini to, a si Jesu-Kristo, so mangitarok na bendisyon ed katooan