Si Jehova so Daakan na Matoor ya Aro
Si Jehova so Daakan na Matoor ya Aro
“Si Jehova [et] . . . baleg ed abig na linawa.”—SALMO 145:8.
1. Panon kalaknab so panangaro na Dios?
“SAY Dios sikato so aro.” (1 Juan 4:8) Satan a makapaligsay-puson balikas so mamaneknek a nibase ed aro so paraan na pananguley nen Jehova. Agayla, anggan saray totoo ya agmanguunor ed sikato et nagugunggonaan ed agew tan uran a maaron itatarya to! (Mateo 5:44, 45) Lapud aro na Dios ed mundo na katooan, anggan saray kakabusol to et makapambabawi ira, makatupleg ira ed sikato, tan makagamor ira na bilay. (Juan 3:16) Balet, agmanbayag et deralen nen Jehova iramay mantultuloy a marelmeng ta pian saray totoon mangaaro ed sikato so makapanggayaga ed andi-anggaan a bilay diad matunong a balon mundo.—Salmo 37:9-11, 29; 2 Pedro 3:13.
2. Anton nikaduman aspekto na aro so ipapatnag nen Jehova ed saramay walaan na dedikadon relasyon ed sikato?
2 Impatnag nen Jehova so aro ed saray tuan mandadayew ed sikato diad mabli tan magnayon a paraan. Say ontan ya aro so impabitar na Hebreon salita a nipatalos ya “abig-linawa,” odino “matoor ya aro.” Pinablin tuloy nen Arin David na kadaanan ya Israel so maaron-kaabigan na Dios. Lapud personal ya eksperiensya tan impandalepdep to ed pidedeneng na Dios ed arum, matalek a nikanta nen David: “Si Jehova . . . baleg ed abig na linawa [“matoor ya aro,” NW].”—Salmo 145:8.
Pamidbir ed Saray Matoor ed Dios
3, 4. (a) Panon itayon natulongan na Salmo 145 pian nabidbiran iray matoor ed si Jehova? (b) Panon a say Dios so “benditoen” na saray matoor ed sikato?
3 Nipaakar ed si Jehova a Dios, oniay inkuan na ina nen propeta Samuel, a si Ana: “Sikato yagel to so saray sali na saray santo.” (1 Samuel 2:9) Siopa irayan ‘masanto’ odino matoor? Iter nen Arin David so ebat. Kayari ton intandoro iray alay abig a kalidad nen Jehova, oniay inkuanto: “Saray pinasantos mo dakmomoan [“benditoen,” NW] da ka.” (Salmo 145:10) Nayarin pankelawan yo no panon a nabendito na totoo so Dios? Manunan nagawaan da itan diad pangidayew odino pangitandoro ed sikato.
4 Saray matoor ed si Jehova so nabidbiran bilang saramay manguusar ed bibil da a mangitandoro ed sikato. Diad sosyal a pantitipon tan diad Kristianon pantitipon, anto so kaslakan a pantotongtongan da? Siempre, say Panarian nen Jehova! Saray matoor a lingkor na Dios so walaan na miparan liknaan ed si David, ya oniay inkanta to: “Salambiten da so gloria na panarian mo [nen Jehova], tan tongtongen da so pakauley mo.”—Salmo 145:11.
5. Panon tayon naseguro ya iimanoen nen Jehova so pangidadayew ed sikato na saray matoor?
5 Kasin iimanoen nen Jehova iray matoor a mangidadayew ed sikato? On, iimanoen to so ibabaga ra. Diad propesiya a misiglaotan ed tuan panagdayew ed panaon tayo, oniay insulat nen Malaquias: “Saman la saray tinmakot ed Jehova nansasalita ra ed sakey tan sakey; et si Jehova tinmalineng, tan dinmengel, et sakey a libro a pakanodnonotan so sinulatan ed arap to, nipaakar ed saray tinmakot ed Jehova, tan saray nannonot ed ngaran to.” (Malaquias 3:16) Makapaliket a tuloy ed si Jehova sano sikatoy itandoro na saray matoor ed sikato, tan sikaray nodnonoten to.
6. Anton kimey so ontulong ed sikatayo pian nabidbiran iray matoor ed Dios?
6 Nabidbiran met iray matoor a lingkor nen Jehova lapud inkakpel tan pangaanamot dan mitongtong ed totoon agmandadayew ed tuan Dios. On, saray matoor ed Dios et ‘ipapakabat [da] ed saray anak na totoo so makapanyari a gawagawa to, tan say magloria a kabintaan na panarian to.’ (Salmo 145:12) Kasin panggugunaetan tan aanamoten yo iray pankanawnawan itongtong so inkaari nen Jehova ed saray agmananisia? Aliwan singa saray gobierno na too, a magano lan naandi, say inkaari to et magnayon. (1 Timoteo 1:17) Pankaganatan a naamtaan na totoo so nipaakar ed andi-anggaan ya inkaari nen Jehova tan ontalindeg ira bilang onsusuporta ed sikato. “Say panarian mo sikato so maando a panarian,” so inkanta nen David, “tan say panuley mo miando ed saray kapolian.”—Salmo 145:13.
7, 8. Anto so agawa nen 1914, tan anto so walan paneknek a manuuley la natan so Dios panamegley na Panarian ya uleyan na Anak to?
7 Manlapu la’d 1914, wala so kaaruman a rason pian itongtong so nipaakar ed inkaari nen Jehova. Diad saman a taon, inletneg na Dios so mangatatawen a Mesianikon Panarian ya uleyan nen Jesu-Kristo, ya Anak nen David, bilang Ari. Kanian sinumpal nen Jehova so sipan to a say inkaari nen David so malet a niletneg diad ando lan ando.—2 Samuel 7:12, 13; Lucas 1:32, 33.
8 Say paneknek a manuuley la natan si Jehova panamegley na Panarian na Anak to, si Jesu-Kristo, so nanengneng ed kaplesan a kasumpalan na tanda na kiwawala nen Jesus. Say sankatalonggaringan a kabiangan na satan a tanda et say kimey ya impasakbay nen Jesus a sumpalen na amin a matoor ed Dios sanen inkuanton: “Saya ya ebanghelyo na panarian nipulong naani ed sankamundoan ya onkanan pamintuan ed saray amin a nasyones; et saman la onsabi so anggaan.” (Mateo 24:3-14) Lapud maseseg a susumpalen na saray matoor ed Dios itan a propesiya, masulok ya anemiran milyon a lalaki, bibii, tan ugugaw so mibibiang natan ed sayan malaklaknab tan agla naulit a kimey. Magano lan onsabi so panganggaan na amin ya onsusumpa ed Panarian nen Jehova.—Apocalipsis 11:15, 18.
Pakagunggonaan ed Inkasoberano nen Jehova
9, 10. Anto so pidumaan nen Jehova ed saray totoon manuley?
9 No dedikado itayon Kristianos, say relasyon tayo ed Soberanon Katawan a Jehova so mangitarok ed sikatayo na dakel a gunggona. (Salmo 71:5; 116:12) Singa bilang, lapud walaan itayo na takot ed Dios tan aagamilen tayo so inkatunong, panggagayagaan tayo so panangabobon to tan inkaapit ed sikato diad espiritual a paraan. (Gawa 10:34, 35; Santiago 4:8) Bilang pidumaan, saray manuuley a totoo so mabetbet a nanengneng a kalimog na saray prominentin totoo, a singa saray lider na militar, mayayaman a negosyante, odino saray bantog ed isport tan panligliwaan. Unong ed peryodiko na Aprika a Sowetan, oniay inkuan na sakey a prominentin opisyal na gobierno nipaakar ed saray lugar a panaayaman na saray mairap-bilay diad bansa to: “Natalosan ko no akin ya aglabay na maslak ed sikatayo so onla ed ontan iran lugar. Labay tayo labat a lingwanan a nagagawa iratan a kipapasen. Nagogonigon so konsiensia tayo tan nababaingan tayo lapud ankabli [iran luluganan] a mamanehoen tayo.”
10 Siempre, masimoon a pampapagaan na arum a totoon manuley so pankaabigan na saray uuleyan da. Balet anggan say sankamaongan ed sikara et agmakapikabat a maong ed saray uuleyan da. On, nayarin itepet tayo: Wala kasi so manuley a mangiyaansakit a maong ed amin a sakop to a sikatoy tampol ya ontulong ed kada sakey sano walaan na problema? On, wala. Oniay insulat nen David: “Si Jehova sampaten to so saray amin a niparukol, tan itagey to so saray amin a naruknot.”—Salmo 145:14.
11. Antoran subok so nasasagmak na saray matoor ed Dios, tan anto so walan tulong ed sikara?
11 Dakel a subok tan kalamidad so onsasabi ed saray matoor ed si Jehova a Dios lapud agda inkayadyari tan lapud manbibilay ira ed mundon mandukdukol ed pakayari nen Satanas, ‘say mauges.’ (1 Juan 5:19; Salmo 34:19) Napapasegsegang iray Kristiano. Arum so maniirap lapud graben sakit odino lapud inateyan ira. No maminsan, saray kalilingoan na saray matoor ed si Jehova so nayarin sengegan na ‘karuknot’ da ed impakadismaya. Balet, antokaman iray subok ed sikara, si Jehova so lawas akaparaan a mangiter ed sikara na ligliwa tan espiritual a biskeg ed kada sakey ed sikara. Say Arin Jesu-Kristo so walaan met na maaron interes ed saray matoor ya uuleyan to.—Salmo 72:12-14.
Makapnek a Tagano ed Dugan Panaon
12, 13. Panon so maabig a pangitatarya nen Jehova ed saray pankaukolan na “ami’ bengatlan mabilay”?
12 Lapud matalonggaring ya abig-linawa to, si Jehova so mangitatarya ed amin a pankaukolan na saray lingkor to. Kalaktip la ed satan so panusustuni to ed sikara na makapabunigas a tagano. Oniay insulat nen Arin David: “Saray mata na amin mantalaran ira ed sika [Jehova]; et sika ikdan mo ra na kanen da no kanepegan to a panaon. Sika buskagen mo so limam, tan peneken mo so saray pilalek na ami’ bengatlan mabilay.” (Salmo 145:15, 16) Anggan diad saray panaon na kalamidad, sarag nen Jehova ya imaneobra iray pamaakaran ta pian saray matoor ed sikato et nawalaan na ‘agew-agew a kanen.’—Lucas 11:3; 12:29, 30.
13 Sinalambit nen David a napenek so “ami’ bengatlan mabilay.” Satan so mangilaktip ed saray ayayep. No aliwan lapud dakerakel a tanaman ed dalin tan ed dayat, anggapoy oksiheno a sungapen odino tagano a kanen na saray pinalsa ed dayat, manok, tan ayayep ed dalin. (Salmo 104:14) Balet, seseguroen nen Jehova a napenek so amin a pankaukolan da.
14, 15. Panon a nitatarya so espiritual a tagano natan?
14 Aliwan singa saray ayayep, saray totoo so walaan na espiritual a pankaukolan. (Mateo 5:3) Agaylan abig so pamepenek nen Jehova ed espiritual iran pankaukolan na saray matoor ed sikato! Sakbay na ipatey to, insipan nen Jesus a “say matoor tan makabat ya aripen” so mangitarya na espiritual a “tagano ed panaon a kinepeg to” parad saray patumbok nen Jesus. (Mateo 24:45) Say nakdaan na 144,000 iran alanaan so manugyop ed satan ya aripen a klase natan. Panamegley da, talagan itatarya nen Jehova so daakan ya espiritual a tagano.
15 Alimbawa, maslak ed totoo nen Jehova natan so nagugunggonaan ed balo tan suston patalos na Biblia diad dilin lenguahe ra. Agaylan abig a bendisyon so New World Translation of the Holy Scriptures! Niarum ni, minilyon ya uusaren ed panagaral na Biblia so tuloytuloy a nipapalapag ed masulok a 300 a lenguahe. Amin na sayan espiritual a tagano so bendisyon ed saray tuan managdayew a walad interon dalin. Siopa so makanepegan a nidayew lapud saratan ya amin? Si Jehova a Dios. Lapud matalonggaring a maaron-panangasi to, ginawa ton posible parad aripen a klase so mangitarya na ‘tagano ed manepeg a panaon to.’ Panamegley na saratan a probisyon, napenek ‘iray pilalek na amin a bengatlan mabilay’ diad kaplesan ya espiritual a paraiso. Tan panliliketan a tuloy na saray lingkor nen Jehova so ilalo a makanengneng ed kapasimbalo na dalin a magmaliw a literal a paraiso!—Lucas 23:42, 43.
16, 17. (a) Antoray walan alimbawa na espiritual a tagano a sinmabi ed dugan panaon? (b) Panon ya ibabalikas na Salmo 145 iray liknaan na saray matoor ed Dios nipaakar ed manunaan ya isyu a pinalesa nen Satanas?
16 Konsideraen so nikadkaduman alimbawa na espiritual a tagano a naaawat ed suston panaon. Legan na 1939, ginmapo so Guerra Mundial II ed Europa. Diad satan met a taon, say Nobyembre 1 a paway na Say Panag-Bantayan so walaan na artikulo ya apauloan na “Neutralidad.” Bilang resulta na inkipresentay malinew ya impormasyon, amoria na saray Tasi nen Jehova ed interon mundo a nakaukolan day mansiansian sigpot a neutral ed saray gagawaen na manbabakal iran nasyon. Lapud satan, sinmanok ed sikara iray gobierno na namparan dapag legan na satan ya anem-taon a bakal. Balet, anggaman ed pananebel tan panamasegsegang, saray matoor ed Dios so nantultuloy ya angipulong ed maong a balita na Panarian. Manlapu la’d 1939 anggad 1946, sikara so abendisyonan tekep na makapakelkelaw ya indaak a 157 a porsiento. Niarum ni, say makapasagyat a rekord na impanmatoor da legan na satan a bakal so nantultuloy a tinmulong ed totoo a makapangibiig ed tuan relihyon.—Isaias 2:2-4.
17 Say espiritual a tagano ya itatarya nen Jehova so aliwa lambengat a nipanpanaon noagta makapnek met a tuloy. Anggaman pirmin nigalet iray nasyon ed pambabakal legan na Guerra Mundial II, saray totoo nen Jehova so atulongan a mangiyapasakey ed bengatlan mas importante ni nen say dilin kilalaban da. Sikara so tinulongan nen Jehova a makatalos a say manunaan ya isyu, a mangilalanor ed interon uniberso, so misiglaotan ed kanepegan na inkasoberano nen Jehova. Makapaliket a tuloy a naamtaan a lapud katooran da et kada Tasi nen Jehova so walaan na melag a betang ed kiyaalangon na inkasoberano nen Jehova tan diad pamepekder a matila so Diablo! (Uliran 27:11) Aliwan singa si Satanas, a mamapauges ed si Jehova tan ed paraan na pananguley to, saray matoor ed si Jehova so mantutultuloy ed mapublikon panangiyabawag da: “Si Jehova matunong ed saray amin a walwalna to.”—Salmo 145:17.
18. Anto so walan agano nin alimbawa nipaakar ed espiritual a tagano a nipanpanaon tan makapnek a tuloy?
18 Sananey nin alimbawa na nipanpanaon tan makapnek ya espiritual a tagano et say libron Onapit ed si Jehova, ya impaway ed nilasus a “Maseseg Iran Manangiyabawag na Panarian” a Distrito iran Kombension a ginawa ed interon mundo nen taon 2002/03. Sayan libro, a pinawala na “matoor tan makabat ya aripen” tan impalapag na saray Tasi nen Jehova, so mangiyaapasakey ed alay abig iran kalidad nen Jehova a Dios, kalaktip la iramay asalambit ed Salmo 145. Sayan alay abig a libro so maseguron walaan na importantin betang pian lalon onapit ed Dios iray matoor ed sikato.
Panaon La Pian Lalon Onapit ed si Jehova
19. Anton mapeligron panaon so asingger la, tan panon tayon arapen itan?
19 Asingger la so mapeligron panaon ed panolbar ed isyu nipaakar ed inkasoberano nen Jehova. Unong a nipasakbay ed Ezequiel kapitulo 38, si Satanas so magano lan manumpal ed betang to bilang “Gog ed dalin na Magog.” Saya so mangilaktip ed sankamundoan a panangataki ed totoo nen Jehova. Satan so malaknab a panangataki nen Satanas pian buyaken so integridad na saray matoor ed Dios. Mas nagkalalo la natan, saray mandadayew ed si Jehova so nakaukolan a masimoon ya ontawag ed sikato, ya onkerew ira na tulong to. Kasin anggapoy kakanaan na mapagalang a takot da ed Dios tan say panangaro ra ed sikato? Andin balot, lapud onia so inkuan na Salmo 145: “Si Jehova asingger ed amin ya ontawag ed sikato, ed amin day ontawag ed sikato ed katuaan. Gawaen to so pilalek na saray ontakot ed sikato; sikato denglen to met so akis da, tan ilaban to ra. Si Jehova yapiger to so amin a mangaro ed sikato; bangbalet amin na babagel gaygayen to ra.”—Salmo 145:18-20.
20. Panon a napaneknekan a tua iray salita na Salmo 145:18-20 diad magano lan arapen?
20 Agaylan makapaliket so pakaeksperiensya ed pagmaliw a maapit ed si Jehova tan ed manangiliktar a pakayari to sano deralen to la so amin a marelmeng! Diad satan a mapeligron panaon ya asingsingger la, talinengen labat nen Jehova iramay “ontawag ed sikato ed katuaan.” Maseguron agto ontalineng ed saray mansimpisimpitan. Mabitar ya ipapatnag na Salitay Dios a say atrasado lan itawag na sakey a marelmeng a too ed ngaran na Dios et lawas anggapoy kakanaan.—Uliran 1:28, 29; Miqueas 3:4; Lucas 13:24, 25.
21. Panon ya ipapatnag na saray matoor ed si Jehova a panliliketan da so pangusar ed ngaran to?
21 Mas pankaganatan natan nen say kapiganman a saramay ontatakot ed si Jehova so “ontawag ed sikato ed katuaan.” Panliliketan na saray matoor ed sikato so pangusar da ed ngaran to diad saray pikakasi ra tan diad saray komento ra ed saray aral da. Uusaren da so ngaran nen Jehova ed pribadon pantotongtong da. Tan sikara so makpel a mangiyaabawag ed ngaran nen Jehova diad mapublikon ministeryo ra.—Roma 10:10, 13-15.
22. Akin ya importante so pantultuloy a panresisti ed saray minumundon awawey tan pilalek?
22 Pian tuloytuloy itayon nagunggonaan ed maapit a siglaotan tayo ed si Jehova a Dios, importante met so pantultuloy tayon manresisti ed saray makaderal ed espiritual a singa say materyalismo, mabanday a panligliwaan, agmamerdonan awawey, odino panangibaliwala ed saray mankaukolan. (1 Juan 2:15-17; 3:15-17) No agnipetek, saratan a gegemtan tan walna so manresulta ed pangagamil na seryoson kasalanan tan pakabalang ed panangabobon nen Jehova diad kaunoran. (1 Juan 2:1, 2; 3:6) Sakey a makabat a kurang so pannodnonot a mantultuloy ya ipatnag nen Jehova so maaron-kaabigan, odino matoor ya aro to ed sikatayo no manmatoor tayo ed sikato.—2 Samuel 22:26.
23. Anton engranden arapen so manatalaran ed saray matoor ed Dios?
23 Komon ta lawas tayon isentro ed kanonotan tayo so engranden arapen a manatalaran ed amin a matoor ed si Jehova. Diad panggawa ed satan, walaan itayo na alay abig ya ilalo ed pakapibiang ed saramay mangitandoro, mamendito, tan mangidayew ed si Jehova ed “agew-agew” tan “lawas lan lawas.” (Salmo 145:1, 2) Komon ta ‘mansiansia itayo ed panangaro na Dios ya onkana ed bilay ya andi-angga.’ (Judas 20, 21) Legan itayon mantutultuloy a nagugunggonaan ed alay abig iran kalidad na mangatatawen ya Ama tayo, kalaktip lay matalonggaring ya abig-linawa ya ipapatnag to ed saramay mangaaro ed sikato, komon ta lawas mipara iray liknaan tayo ed imbalikas nen David ed unor iran salita na Salmo 145: “Say sangik salitaen to so galang nen Jehova; tan amin a laman galangen day masanton ngaran to ed lawas lan lawas.”
Panon Yon Ebatan?
• Panon a makatulong so Salmo 145 pian nabidbiran iray matoor ed Dios?
• Panon a ‘pepeneken nen Jehova so pilalek na ami’ bengatlan mabilay’?
• Akin a nakaukolan tayo so lalon onapit ed si Jehova?
[Tepetepet Parad Panagaral]
[Litrato ed pahina 16]
Panliliketan na saray matoor ed Dios so paningbat ed saray makapanyarin gawa to
[Litrato ed pahina 17]
Saray lingkor nen Jehova so makpel ya ontutulong ed saray agmananisia a makaaral nipaakar ed gloria na inkaari to
[Saray litrato ed pahina 18]
Itatarya nen Jehova so tagano parad “ami’ bengatlan mabilay”
[Credit Line]
Ayayep: Parque de la Naturaleza de Cabárceno
[Litrato ed pahina 19]
Iter nen Jehova so biskeg tan panangigiya ed saray matoor ed sikato, ya onkekerew na tulong to diad pikakasi