Tepetepet Manlapud Saray Managbasa

Antoray sirkumstansya a sengegan na seksual ya impirelasyonan nen Juda ed bii ya abaloan ton sakey a balangkantis, unong a nisalaysay diad Genesis 38:15, 16?

Anggaman si Juda so seksual ya akirelasyonan ed bii ya abaloan ton sakey a balangkantis, diad tua et aliwan balangkantis imay bii. Unong ed Genesis kapitulo 38, onia so agawa.

Sakbay a makapan-ilalak so panguloan ya ilalak nen Juda diad panamegley na asawa ton si Tamar, sikato so pinatey lapud sikato so “mauges nensaman ed mata nen Jehova.” (Genesis 38:7) Diad saman a panaon et sakey lan kustombre so piasawa ed bayaw. Kakaukolanen na saya a sano inatey so laki ya anggapoy mananawir to, nepeg a say agi ton laki so mangasawa ed balo pian sikatoy makapangiyanak na sakey a mananawir. Balet say komaduan ilalak nen Juda, a si Onan, so ag-anumpal ed obligasyon to. Kanian, sikatoy inatey lapud inukom na Dios. Diad ontan et pinasempet ni nen Juda so manugang ton si Tamar ed abung nen ama to ya anggad imbaleg na komatlon ilalak nen Juda, a si Sela, pian mangasawa ed sikato. Balet, diad inlabas na panaon, ag-inter nen Juda si Sela a mangasawa ed si Tamar. Kanian sanen inatey so asawa nen Juda, ginetma nen Tamar so nawalaan na mananawir panamegley nen Juda, say Israelita a katulangan to. Ginawa to iya diad impankunkunwari to a sakey a balangkantis ed templo tan yinmurong ed gilig na dalan ya amta ton dalanan nen Juda.

Lapud agto abidbir si Tamar, si Juda so akirelasyonan ed sikato. Bilang tumang to, say bii so masilib a kinmerew ed sikato na paneguroan, tan diad saginonor et inusar to iratan bilang prueba a sikatoy nilukonan to. Sanen niparungtal so katuaan, agtinetel nen Juda si Tamar noagta sikatoy mapaabeban angikuan: “Sikato so matugtunong nen say siak, lapu ed agko inter si Sela, a laki ya anak ko.” Tan matukotukoy ta ‘sikato so agto la sininggeran.’​—Genesis 38:26.

Si Juda so lingon kinmiwas lapud agto inter ed si Tamar so ilalak ton si Sela unong ya insipan to. Sikato met so akirelasyonan ed bii ya abaloan ton sakey a balangkantis ed templo. Sumlang iya ed gagala na Dios, a say sakey a laki so nepeg a mirelasyonan lambengat ed sekso diad asawa to. (Genesis 2:24) Balet diad tua et ag-akirelasyonan si Juda ed sakey a balangkantis. Imbes, sikatoy agsigagagalan sinmandi ed ilalak ton si Sela diad uksoyan na piasawa ed bayaw kanian awalaan na lehitimon ilalak.

No nipaakar ed si Tamar, say ginawa to et aliwan imoral a bengatla . Say lason ya ananak to so ag-impasen ya ananak ed pilalawanan. Sanen inala nen Boaz a taga-Betlehem si Rut a Moabita pian magmaliw ya asawa to bilang bayaw, saray mamasiken ed Betlehem so paborablin anukoy ed anak nen Tamar a si Fares, ya inkuan da ed si Boaz: “Say abung mo sikato komon so singa say abung nen Fares, ya inyanak nen Tamar ed si Juda, ed bini ya inter nen Jehova ed sika ed sayan ugaw a bii.” (Rut 4:12) Kabiangan met si Fares ed listaan na saray inmunan ateng nen Jesu-Kristo.​—Mateo 1:1-3; Lucas 3:23-33.