Espiritualidad tan say Pankaabigan Mo

MASEGURON dakel so uusaren mon panaon diad pangaasikasom ed pisikal a bunigas mo. Kada agew et nayarin manguusar ka na anggad waloran oras ed kakaugip, pigaran oras ed panagluto tan panangan, tan waloran oras odino onsulok ni ed pantrabaho pian nabayaran mo so ayaman tan say kakanen mo. No mansakit ka, nayarin mangusar ka na panaon tan manggastos ka pian manpanengneng ed doktor odino pian mangiparaan na tradisyonal a tambal. Sika so manlilinis, manaames, tan regular a man-eehersisyo ni ingen pian napansiansiam so maabig a bunigas mo.

Balet, aliwa labat a say pangasikaso ed pisikal iran pankaukolan so nalalanor pian napansiansiay maabig a bunigas. Wala ni so sananey a bengatla a walaan na baleg ya epekto ed pankaabigan mo. Ipapatnag na medikal a panagsukimat a say pisikal a bunigas mo so maapit a nisiglaot ed espiritual a bunigas mo​—say pisikal a bunigas mo so apektaen na espiritualidad mo.

Sakey a Positibon Siglaotan

“Apaneknekan na maslak ya inmuunan artikulo a nansukimat ed pamaakaran a wala so positibon siglaotan ed baetan na maaligwas ya espiritualidad tan say magmaong a bunigas,” so inkuan nen Propesor Hedley G. Peach na University of Melbourne, Australia. Bilang komento ed sayan resulta na impansukimat, oniay imbaga na The Medical Journal of Australia (MJA): “Say inka-relihyoso so nisiglaot met ed . . . abeban presyon na dala, abeban kolesterol . . . tan pakapaliis ni ingen ed kanser ed pait.”

 Mipadpara, diad Estados Unidos, nalmoan diad impanaral nen taon 2002 ed 6,545 a totoo ya inkondukta na University of California (UC), Berkeley, a “saramay onaatendi ed relihyoso iran seremonya a maminsan ed sakey simba et mas andukey so bilay da nen saramay mataltalag ya onatendi odino ag-onaatendi a balot.” Oniay inkuan nen Doug Oman, say manunan autor ed satan ya impanaral tan managlektyur diad UC Berkeley’s School of Public Health: “Aromog mi iyan pidumaan anggan kayari na impangikonsidera mi ed saray sengegan a singa saray sosyal a panlilimog tan awawey nipaakar ed bunigas, laktip lay panagsigarilyo tan panag-ehersisyo.”

Diad panutukoy ed arum niran gunggona parad saramay walaan na maespiritual a panmoria ed bilay, oniay inkuan na MJA: “Nalmoan ed saray impanaral ed Australia a mas malet so panamaley, daiset so manguusar na alkohol tan ilegal a druga, daiset so mannonot a manbikkel, daiset so kapagaan tan depresyon, tan dakel so aliwan masiblet diad limog na saramay relihyoso.” Niarum ni, oniay inreport na BMJ (datin kabkabat bilang The British Medical Journal): “Ompatnag a saramay totoon walaan na mabiskeg ya espiritual a sisisiaen so mas mainomay tan sigpot a makareresolbi ed kaermenan da kayari impatey na inad-aro ra nen say saraman so andian na espiritual a sisisiaen.”

Wala so nanduruman ideya nipaakar ed no anto so tuan espiritualidad. Ingen, say espiritual a kipapasen mo so walaan na epekto ed pisikal tan mental a bunigas mo. Sayan ebidensya so mitunosan ed imbalikas nen Jesu-Kristo ngalngalin 2,000 taon lay apalabas. Inkuan to: “Maliket iray mamibidbir na pankaukolan dad maespiritu ran bengatla.” (Mateo 5:3, Maung a Balita Biblia) Lapud walaan na epekto ed bunigas tan inkaliket mo so espiritual a kipapasen mo, oniay makatunongan ya itepet: ‘Iner so pakaromogan ko na napanmatalkan ya espiritual a panangigiya? Tan anto so nalalanor ed pagmaliw a maespiritual a too?’

 [Picture Credit Lines sa pahina 2]

Photo Credits: Page 18: Mao Tse-tung and Golda Meir: Hulton/Archive by Getty Images; Francis Ferdinand: From the book The War of the Nations; Hirohito, Lindbergh, & Einstein: U.S. National Archives photo; Stalin: U.S. Army photo; Roosevelt: Franklin D. Roosevelt Library; Churchill: The Trustees of the Imperial War Museum (MH 26392)