Itatarya nen Jehova so Inagew-agew a Pankaukolan Tayo

“Agyo met panduaruwaan so linawa yo. Ta . . . say Ama yo amta to a kaukolan yo so sarayan bengatla.”​—LUCAS 12:29, 30.

1. Panon so panatagano nen Jehova ed saray ayep?

 KASIN akanengneng kayo la na sakey ya anuyaw odino arum nin billit a mantotoktok diad kadabokan? Nayarin nanumamengan yo no anto so naromog ton nakan diad pantotoktok to labat diad dalin. Diad Sermon to ed Palandey, impabitar nen Jesus a makaaral itayo na leksion ed paraan na panatagano nen Jehova ed saray manok. Oniay inkuan to: “Imano yoray kamanokan ed tawen, ya ag-ira mantatanaman, ag-ira met manaani, tan ag-ira met mantipon ed kamkamalir; et say mangatatawen ya Ama yo tataganoen to ra. Agkayo ta mamabli nen sikara?” (Mateo 6:26) Diad makapakelaw iran paraan, itatarya nen Jehova so tagano parad amin a pinalsa to.​—Salmo 104:14, 21; 147:9.

2, 3. Antoran espiritual a leksion so naaralan tayo ed impangibangat nen Jesus ed sikatayo a manpikasi parad inagew-agew a kanen tayo?

² Akin et inlaktip ni nen Jesus ed modelon pikakasi to so kerew a: “Say kanen min agew-agew iter mo’d sikami ed agew aya”? (Mateo 6:11) Makaaral itayo na makabaliksan tan maespiritual iran leksion manlapud sayan simplin kerew. Unona, ipapanonot na satan ed sikatayo a si Jehova so Mabunlok a Manangitarya. (Salmo 145:15, 16) Nayarian na totoo so mantanem tan mamayubo, balet say Dios lambengat so makapampabaleg ed saray bengatla, diad espiritual tan pisikal. (1 Corinto 3:7) Say kakanen tan iinumen tayo so langkap na Dios. (Gawa 14:17) Say ikerew ed sikato na inagew-agew a pankaukolan tayo so mangipatnag ed sikato a papablien tayo iratan a probisyon. Siempre, satan a kerew so agmamalemew ed responsabilidad tayo a mantrabaho no nayarian tayo.​—Efeso 4:28; 2 Tesalonica 3:10.

³ Komadua, say ikerew tayo na ‘kanen tayo ed sayan agew’ so mangipabitar ya agtayo nepeg ya alablabas a pampagaan so nipaakar ed arapen. Oniay kaaruman ya inkuan nen Jesus: “Agkayo sirin mapaga, ya ikuan yo, Anto kasi kanen mi? Ono, Anto kasi inumen mi? Ono, Anto kasi pankawes mi? Ta saraya ya amin a bengatla so anapen na saray Gentiles; et say Ama yon mangatatawen amta to a nakaukolan yo so saraya ya amin a bengatla. Ingen anapen yo nin unona so panarian, tan say inkatunong to; et amin iraya a bengatla niarum ira ed sikayo. Kanian agkayo sirin mapaga nipaakar ed agew ya onsabi; ta say agew ya onsabi manpaga nipaakar ed sikaton dili.” (Mateo 6:31-34) Say pikakasi nipaakar ed ‘kanen tayo ed sayan agew’ so mangiletneg na padron diad pambilay a simpli tekep na ‘kasimpitan a tooran na pamasarag.’​—1 Timoteo 6:6-8.

Inagew-agew a Tagano ed Espiritual

4. Antoran inkagawa ed bilay nen Jesus tan ed saray Israelita so mangidanet ed kaimportantian na igamor na espiritual a tagano?

⁴ Say pikakasi tayo nipaakar ed inagew-agew a tagano so nepeg a mangipanonot met ed sikatayo a nakaukolan tayo so espiritual a tagano ed inagew-agew. Anggaman narnarasan la kayari na andukey ya impanayunal to, niresistian nen Jesus so pananukso nen Satanas a pagmaliwen a tinapay iray bato, a kuanto: “Aliwa a say tinapay labat so napambilay na too noag say amin a salitan ombesngaw ed sangi’ Dios.” (Mateo 4:4)  Inaon dia nen Jesus so imbaga nen propeta Moises ed saray Israelita: “Pinaabeba to ka [nen Jehova], tan pinaulyanan to ka a narasan, insan to ka pinakan na mana, ya agmo amta nisay amta na saray amam; pian nipaamta to ed sika a say too agnabilay ed tinapay labat, noag say amin a pamaakaran ya ombesngaw ed sangi nen Jehova so kabilayan na too.” (Deuteronomio 8:3) Say paraan na impangitarya nen Jehova ed mana so angiter ed saray Israelita na aliwa lambengat a materyal a tagano noagta espiritual met iran leksion. Sakey lan leksion et kinaukolan ya “inagew-agew a mantipon ira na tinandaan a karakel.” No sobra so tiponen da ed satan ya agew, say kera so nabangles tan nabigis. (Exodo 16:4, 20) Ingen, aliwan ontan so nagawa ed komanem ya agew sano kinaukolan da so mantipon na doblen karakel pian sapotan so pankaukolan da ed agew na Sabaton. (Exodo 16:5, 23, 24) Kanian say mana so angipaslep ed kanonotan da a kinaukolan da so magmaliw a matulok tan akadepende so bilay da ed aliwa labat a tinapay noagta diad “amin a pamaakaran ya ombesngaw ed sangi nen Jehova.”

5. Panon so pangitatarya ed sikatayo nen Jehova ed inagew-agew ya espiritual a tagano?

⁵ Nakaukolan tayo met so inagew-agew a mantagano ed espiritual ya itatarya nen Jehova panamegley na Anak to. Lapud saya, si Jesus so anuro na “matoor tan makabat ya aripen” pian mangitarya na “tagano ed panaon a kinepeg to” parad sankaabungan na pananisia. (Mateo 24:45) Satan a matoor ya aripen a klase so aglambengat mangitatarya na daakan ya espiritual a tagano diad panamegley na saray katulongan ed panagaral na Biblia noagta sikatayo so papasesegen da met a manbasa na Biblia diad inagew-agew. (Josue 1:8; Salmo 1:1-3) Singa si Jesus, sikatayo so napabiskeg met ed espiritual diad inagew-agew a panaral tan panggawa tayo ed linawa nen Jehova.​—Juan 4:34.

Panamerdona ed Saray Kasalanan

6. Antoran impakautang so ikerewan tayo na panamerdona, tan diad antoran kipapasen a mabulos si Jehova a mangekal ed saratan?

⁶ Say ontumbok a kerew ed modelon pikakasi et: “Perdonam iray utang mi a singa say impamerdona mi met ed saray akautang ed sikami.” (Mateo 6:12) Agtutukoyen dia nen Jesus so nipaakar ed pinansyal ya utang. Say punto to et nipaakar ed panamerdona ed saray kasalanan tayo. Diad rekord nen Lucas nipaakar ed modelon pikakasi et oniay nabasa ed sayan kerew: “Paandien mo ed sikami so saray kasalanan mi; ta sikami met paandien mi so balang sakey ya akautang ed sikami.” (Lucas 11:4) Kanian, sano mankasalanan itayo, singa itayo akautang ed si Jehova. Balet say maaron Dios tayo so akaparaan a ‘mamunas,’ odino mangekal, ed satan ya impakautang tayo no masimoon itayon magbabawi, “manpataoli,” tan onkerew ed sikato na panamerdona a base ed pananisia ed dondon bagat nen Kristo.​—Gawa 3:19; 10:43; 1 Timoteo 2:5, 6.

7. Akin a nepeg tayon ipikasi ed inagew-agew so nipaakar ed panamerdona?

⁷ Unong ed sananey a punto de bista, mankasalanan itayo sano agtayo nakapet iray estandarte nen Jehova nipaakar ed inkatunong. Lapud atawir a kasalanan, nalilingo tayon amin ed panagsalita, kagagawa, tan panag-isip odino onsaew itayon manggawa ed nepeg tayo komon a gawaen. (Eclesiastes 7:20; Roma 3:23; Santiago 3:2; 4:17) Kanian, balanglan sikakabat tayo odino andi ed impankasalanan tayo diad sakey ya agew, nakaukolan ya ilaktip tayo ed inagew-agew iran pikakasi tayo so kerew nipaakar ed kaperdona na saray kasalanan tayo.​—Salmo 19:12; 40:12.

8. Say pikakasi nipaakar ed panamerdona so mamakiwas ed sikatayon manggawa na anto, tan tekep na anton makagunggonan resulta?

⁸ Say pikakasi nipaakar ed panamerdona so nepeg a suportaan na matuan panangusisa ed dili, panagbabawi, tan panangipatua, base ed pananisia ed makarondon a pakayari na niyibung a dala nen Kristo. (1 Juan 1:7-9) Pian napaneknekan so inkasimoon na pikakasi tayo, nepeg a mitunosan itayo ed ikekerew tayo na panamerdona diad ‘panggawa ed saray manepeg parad panagbabawi.’ (Gawa 26:20) Nawalaan tayo sirin na pananisia ed inkamaparaan nen Jehova a mamerdona ed saray kasalanan tayo. (Salmo 86:5; 103:8-14) Say resulta et agnikompara a deen na nonot, ‘say deen na Dios, a talonaan to so amin a pakatalos, a bantayan to so kapusoan [tayo] tan  saray nonot [tayo] ed Kristo Jesus.’ (Filipos 4:7) Balet ibabangat ed sikatayo na modelon pikakasi nen Jesus a wala ni so nagkalalon gawaen tayo pian naperdona iray kasalanan tayo.

Pian Naperdona, Nepeg Itayon Mamerdona

9, 10. (a) Anton komento so inyarum nen Jesus diad modelon pikakasi, tan anto so idadanet na satan? (b) Panon so lalon impangiyilustra nen Jesus ed pankaukolan tayon magmaliw a manamerdona?

⁹ Makapainteres, say kerew a “perdonam iray utang mi a singa say impamerdona mi met ed saray akautang ed sikami,” so sakey labat a kabiangan na modelon pikakasi ya impalinew nen Jesus. Kayari na pikakasi, oniay inyarum to: “Ta no perdonaen yo ‘ray totoo ed kaugsan da, say Ama yon mangatatawen perdonaen to kayo met. Balet no agyo perdonaen so saray totoo ed saray kaugsan da, agto kayo met perdonaen nen Ama yo ed saray kaugsan yo.” (Mateo 6:14, 15) Kanian, pinabitar a maong nen Jesus a say pamerdona ed sikatayo nen Jehova so akadepende ed pagmaliw tayon mabulos a mamerdona ed arum.​—Marcos 11:25.

¹⁰ Diad sananey a kipapasen, inter nen Jesus so sakey ya ilustrasyon a nakaukolan tayo pian magmaliw itayon manamerdona no labay tayon perdonaen itayo nen Jehova. Insalaysay to so sakey ya istorya nipaakar ed ari a mabunlok ya angekal ed abalbaleg ya utang na aripen to. Diad saginonor et satan a too so pirmin dinusa na ari sanen siningil to ni so melmelag ya utang na kapara ton aripen. Oniay inkuan nen Jesus ed ilustrasyon to: “Ontan met naani gawaen nen Amak a mangatatawen ed sikayo, no sakey tan sakey ed sikayo agto perdonaen so agi to a manlapu ed puso yo.” (Mateo 18:23-35) Mabitar so leksion: Say utang a kasalanan a pinerdona la nen Jehova ed kada sakey ed sikatayo so mas babaleg ni nen say antokaman ya impankasalanan na siopaman sumpad sikatayo. Niarum ni, sikatayo so inagew-agew a peperdonaen nen Jehova. Maseguro sirin a naperdona tayo so sagpaminsan a pakaopendi ed sikatayo na arum.

11. Anto so insimbawa nen apostol Pablo a tumboken tayo no labay tayon perdonaen itayo nen Jehova, tan antoray maabig a resulta na satan?

¹¹ Oniay insulat nen apostol Pablo: “Manaanosan kayo ed sakey tan sakey, mapangasi, manpeperdonaan so sakey tan sakey, a singa met  say Dios pinerdona to kayo ed Kristo.” (Efeso 4:32) Say pampeperdonaan na balang sakey so mangitarok na kareenan ed limog na saray Kristiano. Oniay impaseseg ni nen Pablo: “Manpales kayo la sirin, a singa saray pinili Dios, sasanto tan inararo, sakey a puso a maabagey, maong a linawa, kauyamoan, kareenan, kasungdoan; mantetepelan so sakey tan sakey, tan manpeperdonaan so balang sakey, no say siopaman a too wala so pangidalman to ed siopaman; unong ed impamerdona na Katawan ed sikayo, ontan met so gawaen yo: Tan lalo la ed saraya ya amin a bengatla ikawes yo so aro, a sikato so singer yo ed inkayadyari.” (Colosas 3:12-14) Amin na saya so nipabitar ed pikakasin imbangat ed sikatayo nen Jesus: “Perdonam iray utang mi a singa say impamerdona mi met ed saray akautang ed sikami.”

Proteksion Sano Natutukso

12, 13. (a) Anto so agkabaliksan na komadua ed kaunoran a kerew diad modelon pikakasi? (b) Siopa so baleg a Mananukso, tan anto so kabaliksan na pikakasi tayo ya agto itayo ipaarap ed tukso?

¹² Say komadua ed kaunoran a kerew diad modelon pikakasi nen Jesus et: “Agmo kami yabuloy ed tukso.” (Mateo 6:13) Kasin labay ya ibaga nen Jesus a nepeg tayon kerewen ed si Jehova ya agto itayo tuksoen? Agnayarin ontan, lapud oniay insulat na pinuyanan a babangatan a si Santiago: “Agkomon ibaga na too no natukso, a, tinukso ak na Dios: ta say Dios agnayari a tuksoen na mauges tan agmet manukso na siopaman a too.” (Santiago 1:13) Niarum ni, oniay insulat na salmista: “No sika, Jehova, et uninengen mo so saray kasulitan, O Katawan, siopa kasi naani makaalagey?” (Salmo 130:3) Agtatalaranan nen Jehova so kada lingo tayo, tan agto itayo tutuksoen pian nalingo. Kanian, anto so kabaliksan na sayan kabiangan na modelon pikakasi?

¹³ Say manutukso ed sikatayo pian nalingo, pian napelag itayo ed saray masilib a taktika to, tan mangakmon ni ingen ed sikatayo et si Satanas a Diablo. (Efeso 6:11) Sikato so baleg a Mananukso. (1 Tesalonica 3:5) Diad pangipikasi tayo ya ag-itayo nipaarap ed tukso, kekerewen tayo ed si Jehova ya agto tayo aabuloyan a napelag sano natutukso itayo. Kekerewen tayo ed sikato a tulongan to itayo ya ‘agnatalonggaringan nen Satanas,’ a naresistian tayo iray tukso. (2 Corinto 2:11) Manpipikasi itayo pian mansiansia itayo ed “maamot a pasen na Sankatageyan,” a makagamor ed espiritual a salimbeng ya insipan to ed saramay mamibidbir ed inkasoberano nen Jehova diad amin a gagawaen da.​—Salmo 91:1-3.

14. Panon itayon papaseguroan nen apostol Pablo ya ag-itayo ikaindan nen Jehova no manilalo itayo ed Sikato sano natutukso itayo?

¹⁴ Makaseguro itayo a no satan so masimoon a pilalek tayo, a nipatnag ed panamegley na saray pikakasi tan kiwas tayo, ag-itayo ikaindan nen Jehova. Ipapaseguro ed sikatayo nen apostol Pablo: “Agkayo asabian na bengatlan katutukso noag samay nitepel na ami too; bangbalet say Dios matoor, ta agto kayo paulyan a natukso na onlabas ed nayarian yo; noag ingen pati tukso, manggawa met na dalan a paliisan, ta pian nayarian yo ya itepel.”​—1 Corinto 10:13.

“Ilaban Mo Kami Ingen ed Mauges”

15. Akin a nagkalalon importante so pampikasi a nilaban itayo manlapud mauges a sakey?

¹⁵ Unong ed napanmatalkan a tuloy iran manuskrito na Kristianon Griegon Kasulatan, nansumpal so modelon pikakasi nen Jesus ed onia iran salita: “Ilaban mo kami ingen ed mauges.” * (Mateo 6:13) Lalon nakaukolan tayo natan so proteksion ed sayan panaon na anggaan. Mibabakal si Satanas tan saray demonyo to ed saray alanaan a nakdaan, a “manguunor ed ganggan na Dios, tan wala ed sikara so impantasi nen Jesus,” tan ed saray kaiba ra a “baleg ya ulop.” (Apocalipsis 7:9; 12:9, 17) Sinimbawa nen apostol Pedro iray Kristiano: “Mandangka kayo, manbantay kayo; ta say kabusol yo, say diablo, wala ed kaliberliber yo a singa omoang a leon a mananap na buagen to: A sikato so sumpaen yo na mabiskeg a pananisia yo.” (1 Pedro 5:8, 9) Labay nen Satanas ya ontunda itayo ed panagpulong a  kimey tan diad panamegley na saray ahente to diad dalin​—balanglan relihyoso, komersyal, odino mapolitika​—panggugunaetan to ya ontalaw itayo. Balet, no mansiansia itayon mapekder, ilaban itayo nen Jehova. Oniay insulat nen babangatan a Santiago: “Ontulok kayo sirin ed Dios; balet onsumpa kayo ed Diablo, et sikato so onarawi ed sikayo.”​—Santiago 4:7.

16. Anton paraan so usaren nen Jehova pian natulongan iray lingkor to a nasusubok?

¹⁶ Inabuloyan nen Jehova a nidunget ed tukso so Anak to. Balet sanen sinumpa nen Jesus so Diablo, ya inusar to so Salitay Dios bilang proteksion, angibaki si Jehova na saray anghel pian sikatoy pabiskegen. (Mateo 4:1-11) Ontan met, uusaren nen Jehova iray anghel to pian ontulong ed sikatayo sano manpikasi itayo tekep na pananisia tan pasalimbengan itayo ed sikato. (Salmo 34:7; 91:9-11) Oniay insulat nen apostol Pedro: “Amta na Katawan so pangiliktar to ed saray masantos ed katukso, tan mangikana ed saray aliwan matunong ed leksab na kadudusa no nasabi agew na panag-ukom.”​—2 Pedro 2:9.

Asingger la so Sigpot a Kililiktar

17. Diad impangiter nen Jesus ed modelon pikakasi, panon ton inyalasir iray bengatla ed suston pasen da?

¹⁷ Diad modelon pikakasi nen Jesus, inyalasir nen Jesus iray bengatla ed suston pasen. Say manunan nodnonoten tayo et say pamasantos ed matalonggaring tan masanton ngaran nen Jehova. Lapud say paraan a nausar pian nasumpal itan et say Mesianikon Panarian, ipikasi tayon onsabi la so Panarian pian maneral ed agnaspot iran panarian odino gobierno na too, tan nipaseguro a sigpot a nagawa so linawa na Dios unong ed tawen ontan met diad dalin. Say ilalo tayo ya andi-anggaan a bilay diad paraison dalin so akadepende ed kapasantos na ngaran nen Jehova tan pamidbir ed matunong ya inkasoberano to ed interon uniberso. Kayari tayon ipikasi so nipaakar ed sarayan importantin bengatla, sarag tayo lan ipikasi so inagew-agew iran pankaukolan tayo, kaperdona na saray kasalanan tayo, tan kiliktar manlapud saray tukso tan panamalikdo na mauges a sakey, si Satanas a Diablo.

18, 19. Panon ya ontutulong ed sikatayo so modelon pikakasi nen Jesus pian mansiansia itayon akabantay tan magmaliw a ‘malet angga ed kasampotan’ so ilalo tayo?

¹⁸ Asingger la so sigpot a kiliktar tayo manlapud mauges a sakey tan ed abulok a sistema to. Amta nen Satanas a “daiset la so panaon to” pian ipatnag so “baleg a sanok to” ed dalin, nagkalautla ed saray matoor a lingkor nen Jehova. (Apocalipsis 12:12, 17) Diad interon tugyop a tanda na “anggaan na mundo,” impasakbay nen Jesus iray makapaliket ya ebento, ya arum ed saratan so wala ni ed arapen. (Mateo 24:3, 29-31) Legan tayon naiimatonan irayan nagagawa, say ilalo tayon kililiktar so lalon onliliwawa. Inkuan nen Jesus: “Sano onggapo a nagawa so saraya a bengatla, tangay kayo, et itangwa yo so saray ulo yo; ta say karondon yo asingger la.”​—Lucas 21:25-28.

¹⁹ Say asegek a modelon pikakasi nen Jesus ya inter to ed saray babangatan to et napanmatalkan a giya tayo no anto so ilaktip tayo ed saray pikakasi tayo legan a manasingger so anggaan. Manmatalek itayo komon ya anggad kasampotan et mantultuloy a mangitarya si Jehova na inagew-agew iran pankaukolan tayo, namparan diad espiritual tan materyal. Say pansiansia tayon mapeleng ed pikakasi so ontulong ed sikatayon “ipagnayon tayo a malet so sengeg na talek tayo angga ed kasampotan.”​—Hebreos 3:14; 1 Pedro 4:7.

[Paimano ed leksab]

Bilang Panrepaso

• Antoran bengatla so kabaliksan na ikekerew tayo na ‘kanen tayo ed sayan agew’?

• Ipaliwawa so kerew a “perdonam iray utang mi a singa say impamerdona mi met ed saray akautang ed sikami.”

• Anto so kabaliksan na kerew tayo ed si Jehova ya agto itayo ipaarap ed tukso?

• Akin a nakaukolan tayon ipikasi ya “ilaban mo kami ingen ed mauges”?

[Tepetepet Parad Panagaral]

[Saray litrato ed pahina 15]

Nepeg tayon perdonaen so arum ta pian naperdona itayo

[Picture Credit Line ed pahina 13]

Lydekker