No Panon Mon Napenek Iray Espiritual a Pankaukolan Mo

“DIAD apalabas a dekada, masulok a 300 a libron nisulat nipaakar ed kakanaan na espiritualidad diad pasen na sekular a trabaho​—manlapud Jesus CEO anggad The Tao of Leadership​—so amano ed saray lakoan na libro,” kuan na U.S.News & World Report. Sayan pananguman so pakapatnagan labat ed katuaan ya ondarakel so manpipirawat na espiritual a panangiwanwan ed bilay diad dakel a maasenson daldalin. Nipaakar ed saya, oniay inkomento na dyurnal a nipaakar ed negosyo a Training & Development: “Legan ya iimpluensyaan na teknolohiya so nanduruman aspekto na bilay tayo, sikatayo so manaanap na mas aralem a kabaliksan, gagala, tan pirmin pakapenekan tayo a mismo.”

 Balet, iner so pakaromogan mo na makapenek ya espiritual a panangigiya? Diad apalabas, saray totoo so maniilalon makaromog na “mas aralem a kabaliksan” tan “gagala” ed bilay panamegley na relihyon. Natan et dakel lay mangipupulisay ed saray naorganisan relihyon. Nalmoan ed impansurbi ed 90 a walaan na atagey a posisyon bilang manedyer tan executive a “panbibiiganen a tuloy na totoo so relihyon tan espiritualidad,” kuan na Training & Development. Minoria na saramay tinetepetan a say relihyon et “mapegpeget tan mangapag-apag,” bangta say espiritualidad et “inkalapagan tan para ed amin.”

Momoriaen met na dakel a kalangweran diad aliwan relihyoso iran sosyedad, a singa diad Australia, New Zealand, United Kingdom, tan Europa, a say relihyon so midumaan ed espiritualidad. Oniay imbaga nen Propesor Ruth Webber, unong ed sulat to ed Youth Studies Australia: “Maslak a kalangweran so manisia ed Dios, odino ed sakey a mabiskeg nen say too a puersa balet agda momoriaen ya importante odino makatulong so relihyon pian nipatnag so espiritualidad da.”

Say Tuan Relihyon so Mangitatandoro ed Espiritualidad

Natalosan so onian negatibon panmoria ed relihyon. Dakel a relihyoson organisasyon so nigalet lan tuloy ed mapolitikan isyu tan pansimpisimpitan ed moral tan walaan ira na eebatan ed ipapatey na inosentin totoo lapud kinarakel na relihyoson pambabakal. Balet, anggaman ipupulisay iray relihyoson organisasyon a natitilolan na pansimpisimpitan tan panamalikdo, arum so nalilingo ed pangipupulisay da met ed Biblia, ya iisipen dan kokonsintien na satan iray ontan ya ag-agamil.

Diad tua et kokondenaen na Biblia so pansimpisimpitan tan kaugsan. Oniay inkuan nen Jesus ed saray relihyoson lider ed panaon to: “Kasi kayo la, ya eskribas tan Fariseos, a mansimpisimpitan! ta mipadpara kayo ed saray pinutin lubok, a diad paway nengneng toy marakerakep, balet diad dalem napno na pukepukel na saray totoo ya inaatey, tan amin a karutakan. Ontan yo met a nengneng yo so matunong ed saray totoo, balet dia ed loob napno kayo na pansimpisimpitan tan kaugsan.”​—Mateo 23:27, 28.

Sakey ni, papasesegen na Biblia iray Kristiano a magmaliw a neutral ed amin a mapolitikan pakurang. Imbes a sagyaten iray mananisia a manpapateyan, igaganggan na satan a nepeg a mabulos iran ompatey nisengeg ed balang sinansakey. (Juan 15:12, 13; 18:36; 1 Juan 3:10-12) Imbes a “mapegpeget tan mangapag-apag,” say tuan relihyon, a nibase ed Biblia, so “para ed amin.” Oniay inkuan nen apostol Pedro: “Say Dios anggapo so pangiduma to ed saray totoo; noag ingen dia ed balang nasyon akoen to so antakot ed sikato tan manggawa na matunong.”​—Gawa 10:34, 35.

Say Biblia​—Napanmatalkan a Giya Parad Espiritual a Bunigas

Ibabaga ed sikatayo na Biblia ya apalsa so totoo unong ed indengan na Dios. (Genesis 1:26, 27) Agkabaliksan na satan a miulibay so totoo ed Dios diad pisikal a paraan, noagta say kabaliksan na satan et walaan na abilidad so totoo a mangipatnag ed saray walna na Dios, laktip lay kapasidad parad espiritual iran bengatla, odino espiritualidad.

Lapud satan, makatunongan labat a panisiaan a say Dios so mangitarya met ed sikatayo na saray paraan pian napenek iray espiritual a pankaukolan tayo, ontan met ed manepeg a panangiwanwan pian nibiig tayo no anto so makagunggona tan makaderal ed espiritualidad tayo. No panon a pinalsa na Dios so laman tayo tekep na makapakelaw ya inkadesinyo na immune system, a manreresisti ed sakit tan ontutulong pian mansiansia itayon mabunigas, inikdan to itayo met na konsiensia, odino akindalem a boses, a makatulong ed sikatayon manggawa na duga iran desisyon tan napaliisan so ag-agamil a makaderal ed pisikal tan espiritual. (Roma 2:14, 15) Unong a kabat tayo, nepeg a nasustini a maong so immune system tayo, pian mansiansia itan a maksil. Mipadpara, kaukolan tayon sustunien so konsiensia tayo panamegley na masustansian espiritual a tagano, pian magmaliw itan a makalikna.

Diad pangipapabitar nen Jesus ed klase na tagano a mamasiansia ed sikatayon mabunigas ed espiritual, oniay inkuan to: “Aliwa a say tinapay labat so napambilay na too noag say amin a salitan ombesngaw ed sangi’ Dios.” (Mateo 4:4)  Saray imbalikas nen Jehova so nikurit ed Salita to, say Biblia, tan saratan so “maabig a pakaaralan, pakasumalan, pakasimbawaan.” (2 Timoteo 3:16) Kanian, sikatayon mismo so mansagpot pian nagamoran itan ya espiritual a tagano. No malaknab so pikakabat tayo ed Biblia tan manseet itayon mangiyaplika ed saray prinsipyo na satan ed bilay tayo, dakel so nagunggona tayo diad espiritual tan pisikal a paraan.​—Isaias 48:17, 18.

Kasin Makana so Pansasagpot Tayo?

Tua, nakaukolan so panaon pian napaaligwas so espiritual a bunigas tayo diad panagaral ed Biblia; tan ompapatnag a ngalngalin anggapo la so malaem a panaon na totoo. Balet makana iray tumang ed pansasagpot tayo! Imanoen so impankatunongan na pigaran okupadon totoo a propesyonal no akin ya importante ed sikara so pakawalaan na panaon pian naasikaso so espiritual a bunigas da.

Oniay inkuan nen Marina, sakey a doktora: “Agkon balot ninonot so nipaakar ed espiritualidad ko ya anggad siak so ginmapon nantrabaho ed sakey ya ospital tan aliknak a maong so paniirap na arum. Insan ko amoria a nepeg kon bidbiren tan peneken so espiritual a pankaukolan ko ta pian nagamoran ko so inkakontento tan inkadeen, lapud say kurang na bilay tan say pankaukolan a pangasikaso ed saray kapagaan na totoo so nayarin makapadetdet ed siopaman a kaparak ed propesyon.

“Natan et papaiyaralan ak na Biblia ed saray Tasi nen Jehova. Sayan panagaral so ontutulong ed siak a nausisa iray kiwas tan motibok diad makapabiskeg a paraan tan mangipapasal ed panagnonot ko a magmaliw a lalon positibo, ta pian napansiansiak a balanse so bilay ko. Napepenek ak a tuloy ed sekular a karerak. Balet say panaaral ko ed Biblia so mamapaaligwas ed emosyonal a bunigas ko, ya ontutulong ed siak a natalonaan so negatibon liknaan, napakepa so tensyon, tan siak so magmamaliw a lalon maanos tan maabagey ed totoo. Say pangiyaaplikak ed saray prinsipyo na Biblia so mangugunggona met ed panamaley ko. Nagkalalon importante, akabat ko si Jehova tan anggan panon et naeeksperiensyak so mabulos ya iyaagus na espiritu to, a mangiiter ed bilay ko na aralem a kabaliksan.”

Oniay inkuan nen Nicholas, sakey ya arkitekto: “Sakbay ya impaiyaralan ak na Biblia ed saray Tasi nen Jehova, anggapo so interes ko ed espiritual. Say gagalak lambengat ed bilay et say italona ed pinilik a propesyon. Say impanaral ko ed Biblia so angibangat ed siak a wala ni so nagkalalon nalalanor ed bilay tan say panggawa na linawa nen Jehova so panlapuan na tua tan magnayon a liket.

“Naliliknak so inkapnek lapud sekular a karerak, balet ta say Biblia so angibangat ed siak ed kaimportantian na pamasimpli ed bilay diad pangiyapasakey ed espiritual iran bengatla. Diad panggagawa ed satan, apaliisan min sanasawa so dakel a pakadetdetan a makasengeg ed materyalistikon estilo na panagbilay. Awalaan kami met na dakel a tuan kakaaro diad pililimog mi ed saramay walaan na miparan espiritual a panmoria ed bilay.”

Oniay inkuan nen Vincent, sakey ya abogado: “Say maabig a sekular a karera so makapangitarya na pirmin inkapnek. Balet, amoriak a mas ni so nakaukolan pian nagamoran so liket tan inkakontento. Sakbay kon akabatan  so ibabangat na Biblia nipaakar ed satan, biglan amoriak ed saman so sigpot a kaapaan na bilay​—nianak, ombaleg, mangasawa odino miasawa, mantrabaho pian nitarya so materyal a pankaukolan parad pamabaleg ed ananak, ya ipasal iran manumbok ed satan a mismon sikulo na bilay, tan diad kaunoran et ontakken tan ompatey.

“Diad saman ko labat agamoran iray makapenek ya ebat ed saray tepet ko nipaakar ed gagala na bilay sanen impaiyaralan ak na Biblia ed saray Tasi nen Jehova. Say impanaral ko ed Biblia so tinmulong ed siak pian nakabat ko si Jehova bilang sakey a persona tan abayuboan ko so aralem a panangaro ed sikato. Saya so angiter ed siak na basiyan pian pansiansiaen so maabig ya espiritual a panmoria legan a pambabanikelan ko so manbilay a mitunosan ed akabatan kon gagala to. Natan et napepenek kamin sanasawa lapud amta min uusaren mi so bilay mi diad makabkabaliksan a paraan.”

Naliknam met a say bilay mo so walaan na gagala tan kabaliksan diad panaral mo ed Biblia. Maliket iray Tasi nen Jehova ya ontulong ed sika. Singa si Marina, Nicholas, tan Vincent, nagamoran mo so inkapnek diad pakaaral mo na nipaakar ed si Jehova tan ed saray gagala to parad sankatooan tan parad sika bilang indibidual. Sika so aglabat manliket ed pakapenek ed espiritual iran pankaukolan mo natan noagta nawalaan ka met na ilalon manggayaga ed maandon bilay tekep na ayadyarin pisikal a bunigas​—say ilalo a para labat ed saraman so “mamibidbir na pankaukolan dad maespiritu ran bengatla.”​—Mateo 5:3, Maung a Balita Biblia.

Nabayuboan tayo met so espiritualidad tayo diad panamegley na pikakasi. Impanaon nen Jesus so pangibangat ed saray babangatan to a manpikasi, ya imbangat to ed sikara so kaslakan a tatawagen a Pikakasi na Katawan. Antoy kabaliksan na satan a pikakasi parad sika natan? Panon kan nagunggonaan ed satan? Naromog mo iray ebat diad ontumbok a duaran artikulo.

[Saray litrato ed pahina 6]

Marina

[Saray litrato ed pahina 7]

Nicholas

[Saray litrato ed pahina 7]

Vincent