Sakey a Matuan Konsiensia

SAKEY ya agew, legan a pasempet la’d ayaman to a nanlapud trabaho, si Charles, sakey ya empleyado diad sakey ya unibersidad ed Kenya, so abalangan na cell phone. Diad Kenya et saraya so mabmabli nin siansia a kagawaan.

“Agko iilaloan a wala ni so mangipawil ed satan,” so inkuan nen Charles. Balet, linmabas so pigaran agew, sikatoy asurprisa sanen akaawat na tawag manlapud sangan opisina na saray Tasi nen Jehova ed Kenya. Agto napanisiaan so narerengel to sanen imbaga ed sikaton onla’d man tan alaen toy cell phone to! Walay sakey manaya a sigpot-panaon a ministro na saray Tasi nen Jehova ya akaluganan nen Charles tan aromog to so cell phone. Diad gunaet ton naromog so akankayarian, inawit na ministro so cell phone diad sangan opisina, tan diad kaunoran et akontak na saray boluntaryon komikimey diman si Charles panamegley na numero a pinmatnag ed cell phone.

“Pisalsalamatan kon tuloy so impanggunaet yon nakontak ak anggaman agaylay irap,” so inkuan nen Charles ed sulat to’d sangan opisina. “Masimoon kon pisasalamatan iray membro na organisasyon yo ya akaromog tan angipawil ed cell phone sanen naamtaan ton kayarian ko itan. Mairap la natan so makaromog na toon matua, balet makapaseseg ta walaan itayo na pigara a nabibidbiran a tuan Tasi nen Jehova a Dios.”

Kabkabat iray Tasi nen Jehova ed inerman a pasen lapud inkamatua ra. Aaligen da si apostol Pablo, ya angikuan: “Ilaloan mi a wala so maabig a konsiensia mi, a pampirawatan mi so manbilay a sigagalang dia ed saray amin a bengatla.” (Hebreos 13:18; 1 Corinto 11:1) Momoriaen da a say ontan a kondukta so mangigloria ed si Jehova a Dios, unong ya inkuan nen Jesus: “Pasindagen yo komon so silew yo ed arap na saray totoo; pian nanengneng da so saray maong a gawa yo, et galgalangen da so Ama yo a wala ed tawen.”​—Mateo 5:16.