Impantitipon Diad “Pegley na Mundo”

Nadngelan mo ta la iray salitan “Te Pito o Te Henua”? Say kabaliksan na satan ed Rapa Nui, say orihinal a lenguahe ed Easter Island, et “Pegley na Mundo.” Akin a nikadkaduman tuloy so asamblea dia?

NISULINEK, makapakelkelaw, nidumaduma. Saraya so pigaran salita ya uusaren pian ideskribe so Easter Island, odino Rapa Nui unong ed pananawag na saray manaayam ditan. Talagan nisulinek itan a lugar a walad South Pacific Ocean, a 3,790 kilometro manlapud Santiago, Chile. Nagmaliw itan a probinsya na Chile nen Setyembre 9, 1888.

Sayan trianggulon isla, a walaan na kaawang a 166 kilometro kuadrado, so manunan titibukelen na taloran bolkan ya aliwa lan aktibo. Diad tua, singa ed dakel ya isla ed Pasipiko, satan so titibukelen na saray toktok lambengat na angkakabaleg a palandey ed dalem na danum. Say interon isla so indeklara a pasen na natural a monumento. Andi-duaruwa a kabkabat itan a tuloy lapud saray makapakelkelaw ya estatuan bato a wadtan, a tatawagen a moai. *

Nilikud ed makapasagyat iran landscape tan maawaran a paspasen, naromog ed Easter Island so nanduruman klase na masasamit a kakanen. Walara ditan so prutas a singa saray pinya, abokado, apayas, tan siamiran klase na ponti. Tan say dayat so walaan na dakel a klase na sira tan arum nin tagano a manlalapud dayat.

Kabkaabigan so klima ed Easter Island, a regular so uran tan saray kabunlalakaw, a mangitatarya ed saray bisita na malinis a dagem tan mararakep a nenengnengen. Diad kaplesan et manga 3,800 so residente ditan. Saray manaayam ditan natan so nanlapu ed poli na saray  inmunan nanayam ditan, a nanlalaok a Europeano, Chilean, tan arum niran nasyonalidad. Nilasus a turista a manlalapud Europa tan Asia so ombibisita ed isla, kanian say turismo so makanan kabiangan na ekonomya.

Primeron Inkitanem na Saray Bini na Panarian

Oniay inreport na 1982 Yearbook of Jehovah’s Witnesses: “Walay panaon a saksakey so manangipalapag mi diad nisulinek ya Easter Island. Sikato so atulongan ed espiritual diad impisulatan to ed sakey a misionaryon agin bii diad sanga [ed Chile]. Anggaman sikato so pinmawil la ed bansa, wala so rekord mi na saray mansusubskribe na Panag-Bantayan diad isla. Diad impakasurprisa min maong, nen Abril 1980 et akaawat kami na long-distance a tawag manlapud sakey ya interesado a mantetepet no kapigan selebraan so Memoryal. Insan diad saginonor ed satan met a taon, walay inmalis diman a sanasawa a nanlapud Valparaiso, tan walaray interesadon totoo ya iyaaralan da na Biblia. Nen Abril 1981 et agawa so sankaunaan a pantitipon parad Memoryal diad saman ya isla, a 13 totoo so inmatendi. Agaylay liket mi lapud nikakayat so ‘maong a balita’ ed sayan nisulinek a lugar!”

Diad saginonor, nen Enero 30, 1991, say sanga so angibaki na sanasawan espisyal payunir diad isla, a si Dario tan Winny Fernandez. Oniay nanonotan nen Brother Fernandez: “Kayari na limay oras ya impanbiahe ed eroplano, akasabi kami ed nisulinek a maong a parte na planeta, diad sakey a kulturan napno na misteryo.” Inorganisan tampol iray miting tan panagpulong a kimey diad tulong na sakey ya agin laki a taga diman tan sakey ya agin bii a kasabisabi to a kaibay duaran anak to. Anggaman ed pananesdes na pamilya, inkadeboto ed relihyon, tan pigaran estiloy panagbilay a kaslakan ed saray kultura na Polynesia, anengneng da so panamendisyon nen Jehova ed saray sagpot da. Si Brother tan Sister Fernandez so aliwa la natan ya espisyal payunir, balet nansiansia ira diad isla, a pamapabalegan da ed anak dan laki, a nianak diman. Natan et wala lay 32 a magayagan manangipalapag na Panarian. Kabiangan ed saratan iray tubon Rapa Nui, ontan met ed saramay nampirmi la diad isla odino inmalis ditan pian manlingkor lapud babaleg so pankaukolan parad saray manangiyabawag na Panarian.

Saray Preparasyon Parad Sirkiton Asamblea

Lapu ed arawrawi so isla manlapud kontinente, say kongregasyon so mamitlo ed sakey taon a makakaawat na saray video tape na saray programa ed espisyal ya agew ya asamblea, sirkiton asamblea, tan distriton kombension. Balet diad pansamposampot na taon 2000, inkonsidera na Branch Committee ed Chile so ideyan mamawala na asamblea ed satan a lugar, bilang sankaunaan ya asamblea diman. Diad kaunoran et denesidi so pangiyarunsa na sirkiton asamblea nen Nobyembre 2001, tan inimbitaan ya onatendi ed sayan espisyal ya okasyon so pigara lambengat ya agagin lalaki tan bibii ed nanduruman lugar ed Chile. Lapud eskedyul na biahe ed eroplano, say asamblea so inyarunsa ed Simba tan Lunes.

Malikeliket so 33 ya inimbitaan a delegado lapud sikaray onlan manbiahe ed isla pian mibiang ed primeron sirkiton asamblea a nagawa diad sayan nisulinek a lugar. Kayari na andukey ya impanbiahe ed eroplano diad Pacific Ocean, nainawaan iray delegado sanen inabrasa ira na  saray agagi diman a manaalagar ed sikara diad airport. Saray delegado so inabet diad impangisulong ed sikara na mararakep a kulintas a gawa ed saray rosas, say kaslakan a regalo diad isla. Insan sikaray intagar ed pampundoan da, tan kayari na impanpasyar a magano diad isla, amin iramay mibiang ed programa na asamblea so nantitipon diad Kingdom Hall.

Publisidad Manlapud Sakey ya Ag-inilaloan a Lapuan

Legan iran mamapaarap ed asamblea, arum a delegado so asurprisa sanen nadngel da so sakey a pari diman a mankokomento panamegley na radyo nipaakar ed ibibisita ra. Sinalambit to a walaray turista a nanlalapud kontinente ya ombisita ed saray kaabungan pian itongtong so nipaakar ed isabi na anggaan na mundo. Anggaman binagaan to iray mimimisa ya agda dedengelen iray bisita, say impangiyanunsio to so tinmulong pian nakabatan so isabi na baleg a grupo na saray Tasi nen Jehova diad isla. Saya so amakiwas ed arum ed saray taga-isla pian mantalaran. Legan na tinmumbok iran agew, saray delegado so mataktikan anginabang ed sikara na makapaseseg a mensahe na maong a balita.

Ginmapo so Asamblea

Diad kabuasan na Simba, saray agagi diman so manaalagar ed lolooban ed Kingdom Hall pian mangabrasa ed saray delegado ya onsabi ed primeron agew na asamblea. “Iorana Koe! Iorana Koe!” “Naabrasa kayo!” Arum ya agagin bibii so nansulong na tradisyonal a kawes tan inarkosan day buek da na mararakep a rosas bilang tuan estilo na Polynesian.

Kayari na balibalin manangigapo a musika, nilasus so akibiang ed impangansion ed “Agnagiing, Agnatenyeg!” unong ya agni itan nadngel a balot diad isla nensaman. Saray agagi a taga diman so akalua sanen sikaray maligligsan inabrasa na tsirman diad dilin lenguahe ra, a Rapa Nui. Legan na panangugto, taloran balo a Tasi so angisimbolo na dedikasyon da ed Dios diad impanpabautismo ra ed danum. Sanen anampot so programa ed primeron agew, apaapit so balang sakey ed si Jehova tan diad interon impanaagi.​—1 Pedro 5:9.

Impanpulong ed Kabuasan

Lapud nikaduma iran sirkumstansya diad isla, say programa ed komaduan agew na sirkiton asamblea so ginmapo ed kayari ogto. Kanian, saray delegado so anganamot ed kipapasen tan inusar da so kabuasan pian mibiang diad lawak na ministeryo. Antoran eksperiensya so manatalaran ed sikara?

Sakey ya akulaw a walaan na waloran anak a lalaki tan bibii so angikuan ed saray Tasi ya agto nayarian so mitongtong ed sikara lapud sikato so sakey a Katoliko. Sanen imbaga ra ed sikato a labay dan itongtong so nipaakar ed saray probleman kidudungetan na amin, a singa say panag-abuso ed druga tan saray problema ed pamilya, sikato so dinmengel.

Sakey met ya akulaw a taga diman so agmakaaron akiarap ed sanasawan Tasi. Imbaga to ya onalis la ra tan katongtongen da iray totoo diad kontinente a maruksan tuloy ed arum. Inkuan na sanasawa ed sikato a say “ebanghelyo na panarian” so parad amin tan say gagala ra ed inyakar da ed isla et onatendi ed asamblea ya ontulong ed amin pian ombulaslas ed panangaro ed Dios. (Mateo 24:14) Sikatoy tinepetan da no labay ton panggayagaan so andukey a bilay ed  paraiso iran kipapasen, a singa saray kipapasen diad isla balet ta anggapo la so sakit tan ipapatey. Sanen inkatunongan da ed sikato so kinabayag la na saray sangi na bolkan a walad isla, inumameng to so nipaakar ed kinatikey na bilay tan intepet to: “Akin a sikatayoy manbibilay ed ontan labat a katikey a panaon?” Sikatoy asurprisa sanen abasa to so Salmo 90:10.

Kabekta, saray Tasi so biglan akarengel na oneeyag diad onsublay a puerta. Anggaman agda itan atalosan, inkuan na bii ed sikara a saray kakaabay so mangiinsulto tan ipapalinew dan agda labay a sikaray dalawen na saray Tasi. Balet, sayan bii so nua, odino sankapanguloanan ed pamilya. Lapud inatey la so ama ra, obligasyon to so mandesidi no antoray sankaabigan parad pamilya. Diad arap na kakanayon to, inyagel to iray agagi diad dilin lenguahe to tan mapangasin inawat to iray publikasyon ya inyopresi ed sikato. Diad saginonor ed satan a simba, sanen adalanan da iray Tasi legan a manbiabiahe, impaitunda na bii ed agi ton laki so luganan. Anggaman mapatnag ya aglabay na agi to, say bii so nampayapay ed saray agagi tan pinirawat ton maabig so pansumpalan na ministeryo ra.

Anggaman saray taga-isla diad gapo et ompatnag ya agmangawat ed mensahen ipupulong na saray Tasi a nanlalapud kontinente, apaneknekan na saray bisita a saray Rapa Nui so sipor a mapangasi tan makaaro. Maslak ed sikara so dinmengel ed maong a balita. Diad tua et 6 ed 20 a Tasi ya abautismoan diad isla so lokal a residente ditan. Say sakey so akaaral ed katuaan ed Biblia diad indengel to ed biek a kuarto legan ya iyaaralan na Biblia so akulaw to. Sikaran sanasawa so bautismado lan Tasi natan, tan sikato so sakey lan ministeryal a lingkor diad kongregasyon.

Nantultuloy so Espiritual a Programa

Kayari ogto, ginmapo so komaduan agew na programa. Pigara so interesadon totoo ya akitipon lamet ed 32 ya agagin lalaki tan bibii a taga diman tan ed 33 a delegado. Ngalngalin sanlasus so dinmengel ed programa, a pati ed publikon paliwawan “No Panon a Say Aro tan Pananisia so Manaeg ed Mundo.” Diad tua, saramay inmatendi so akanengneng ed aktual a panangipatnag na aroan ed limog na saray totoo nen Jehova, anggan diad saramay duma so kultura ra.​—Juan 13:35.

Diad panaon na sirkiton asamblea, saray manangasikaso na sirkito tan distrito so angiyarunsa na espisyal a sesyon a kaiba iray payunir a ministro. Say taloran regular payunir a taga-isla so inulop na saray delegado a regular odino espisyal payunir. Amin so apaseseg a maong.

 Diad tinmumbok ya agew, arum ed saray agagi a taga diman so angiba ed saray delegado a manpasyar diad isla. Binisita ra so sakey a pantetebagan na bato ya akaukitan na saray moai, saray bolkan a pakagagawaan na saray kompetensiaan nensaman tan, siempre, say alay dakep a kolor-balitok a buer a baybay na Anakena, a sinakbitan na saramay inmunan nanayam diad isla. *

Say unor a pankanawnawa ya impakapilimog ed saray agagi diman et diad Panagaral na Kongregasyon ed Libro. Kayari na miting, saray Tasi diman so anurprisa ed saray sankaili ra panamegley na tipikal a panangan. Diad saginonor et nansulong ira na kawes a pakabidbiran ed sikara tan angipresenta ira na balibalin tradisyonal a sayaw. Saray delegado, ontan met ed saray agagin Rapa Nui, so makaseseguro a saray impansagpot a mangiparaan ed asamblea so akagunggonan tuloy.

Amin a linma a delegado so apaapit a maong ed saray walad nisulinek ya agagi ra, a malikeliket ya akaiba ra diad loob na sakey simba. Mairap so manpatanir. Lawas dan papablien iray balon akaaro ra ontan met ed naawat dan espiritual a panamaseseg. Diad airport, saray agagi diman so angisulong ed saray delegado na saray ginawa ran kulintas a seashell.

Sanen manpapatanir la iray delegado, oniay insipan da: “Iorana! Iau he hoki mai e Rapa Nui ee,” a kabaliksan toy: “Onla kami la! Ompawil kami ed sikayo, Rapa Nui.” On, pirawat da so ompawil ya ombisita ed saray balon kakaaro ra tan espiritual a kapamilya ra diad nidumaduma, nisulinek, makapakelkelaw, tan makaaron Easter Island!

[Saray paimano ed leksab]

[Kahon ed pahina 24]

Panagpulong ed Easter Island

Manga duay taon antis na sayan makatantandan asamblea, say manangasikaso na sirkito tan say asawa to so binmisita ed isla tan nanggayagaan da so makapaliket iran eksperiensya. Alimbawa, isipen pa so impakasurprisa ra sanen impanonot ed sikara na agin bii ya angipatnubang ed sikara diad pampundoan da a sikatoy inyaralan da na Biblia diad abalaten a Chile sanen sikato so tin-edyer ni manga 16 taon ed asasakbay. Diad saginonor, satan a bukel so nambunga diad Rapa Nui.

Oniay makapalek met ya eksperiensya ra: Say akankayarian na say lakoan na souvenir so angawat na New World Translation of the Holy Scriptures tan say katulongan ed panagaral na Biblia a Pikakabat a Mangitonton ed Andi-Anggaan a Bilay, a parehon impalapag na saray Tasi nen Jehova. Sanen sikato so pinawil da, imbaga to ed sikara ya agto nabasa iman a Biblia. Say nitilak da ed sikato et sakey manaya a Biblian Pranses, aliwan Español! Aresolbin tampol so problema, tan amoria to diad tulong na saray Tasi a taga diman tan, siempre, diad tulong na Biblia ed dilin lenguahe to, ya aliwan mairap manaya a talosan so Biblia.

[Mapa ed pahina 22]

(Parad aktual a format, nengnengen so publikasyon)

EASTER ISLAND

CHILE

[Saray litrato ed pahina 23]

Duara ed saramay abautismoan diad sirkiton asamblea

[Saray litrato ed pahina 25]

Alosadsar na bolkan a Rano Raraku; walad loob a litrato: Balang a prutas a “guayaba” (bayawas) ya ontutubo diad isla