Ligliwa Parad Saray Maniirap

SANEN anagmak na irap iray matoor a lalaki tan bibii diad apalabas, sikaray masimoon a nampikasi parad panangiwanwan na Dios. Ingen, nanggawa met ira na nakaukolan iran kundang pian pakepaen so paniirap da, a singa say impangusar da ed inkadunong pian nilegyas ira ed saray managpairap. Alimbawa, say panagmatalek ed si Jehova tekep na dilin panagsagpot so tinmulong ed si David pian nasungdoan so kairapan to. Komusta itayo natan?

Sano manasagmak ka na irap, nayarin manggawa ka na nakaukolan iran kundang pian resolbien so problemam. Singa bilang, no naandian ka na trabaho, agka kasi mansagpot a mananap na matukoy a trabaho a manlegpet ed sika tan ed pamilyam? (1 Timoteo 5:8) Odino no mansasakit ka bilang, agmo kasi panggunaetan so suston pampatambal? Makapainteres a si Jesus, ya inikdan na Dios na pakayarin mamaabig ed amin a nengneng na sakit, so amidbir a ‘saray agmakayari so mankaukolan na mananambal.’ (Mateo 9:12) Balet, nayarin saray kairapan mo so aglawas naandi; nayarin kaukolan mon sungdoan iratan a mabayag.

Akin ya ag-itan ipikasi ed si Jehova? Singa bilang, sano manaanap na trabaho, say panmatalek ed Dios tekep na pikakasi so ontulong ed sikatayon napaliisan so antokaman a tukso a mangawat ed trabahon misumlangan ed saray prinsipyo na Biblia. Agtayo met abuloyan a sikatayoy ‘nabalang ed pananisia’ lapud agum odino aro ed kuarta. (1 Timoteo 6:10) On, sano manggagawa na importante iran desisyon nipaakar ed trabaho odino ed pamilya odino bunigas, nayarian tayon tumboken so simbawa nen David: “Paawit mo ed Jehova so awit mo, et sikato bembenan to ka: agton balot paulyan so matunong a natentenyeg.”​—Salmo 55:22.

Ontulong met ed sikatayo so impapuson pikakasi a napansiansia tayo so balansin kanonotan ta pian ag-itayo nadaeg na paniirap tayo. Bilang tuan Kristiano, oniay insulat nen apostol Pablo: “Dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo.” Diad anton paraan a makaligliwa ed sikatayo so masimoon a pikakasi? “Say deen na Dios, a talonaan ton amin a pakatalos, bantayan to so kapusoan yo tan saray nonot yo ed Kristo Jesus.” (Filipos 4: 6, 7) Say deen na Dios so ‘manalona ed amin a pakatalos.’ Kanian, napabiskeg itayo na satan sano nabebelatan itayo lapud kagogonigon. ‘Bantayan na satan so kapusoan tayo tan saray nonot tayo,’ pian napaliisan tayo so bengatbengat tan agmakabat ya ikiwas, a mamaloor laingen ed paniirap tayo.

Say pikakasi so makaapekto ni ingen ed pansumpalan na sakey a kipapasen. Sanen nipangaw si apostol Pablo diad Roma, mapaabeban kinerew to ed saray kaparan Kristiano a sikatoy ipikasi ra. Akin ya ontan so kinerew nen Pablo? “Kerewen ko ed sikayo a mapilpilit a gawaen yo so saya,” so insulat to ed sikara, “pian siak so nipawil ed sikayo ed maganggano.” (Hebreos 13:19) Diad arum a panangibaga, kabat nen Pablo a nayarin say pakarengel nen Jehova ed andi-tundan pikakasi na saray kapananisiaan to so nayarin makaapekto ed no kapigan so kibulos to.​—Filemon 22.

Kasin nauman na pikakasi so pansumpalan na paniirap tayo? Nayari. Ingen, nepeg tayon bidbiren a nayarin ag-ebatan nen Jehova a Dios iray pikakasi tayo unong ed panlabayan tayo. Aminpiga ya impikasi nen Pablo so nipaakar ed “sabit ed laman” to, a nayarin sakey a pisikal a beblay. Balet, imbes ya ekalen so paniirapan to, oniay inkuan na Dios ed si Pablo: “Say grasyak so masarag ed sika; ta say pakayarik agawan ayadyari ed kakapuyan.”​—2 Corinto 12:7-9.

No ontan sirin, nayarin agnaekal a tampol so paniirap tayo. Balet, nawalaan itayo na pankanawnawa a paneknekan so panagmatalek tayo ed mangatatawen ya Ama tayo. (Santiago 1:2-4) Tandaan ya anggano ag-ekalen nen Jehova a Dios so paniirap tayo, nayarian to so ‘manggawa na dalan a paliisan ta pian nayarian tayo ya itepel’ itan. (1 Corinto 10:13) Makatantanda a si Jehova so tinawag a ‘Dios na amin a ligliwa, a manliligliwa ed sikatayo ed amin a panermenan tayo.’ (2 Corinto 1:3, 4) Sarag na Dios ya iter so nakaukolan tayo pian makapansungdo, tan walaan itayo na ilalo a manbilay ya andi-anggaan.

Isisipan na Salitay Dios, say Biblia, a si Jehova so ‘mamunas ed amin a lua ed kamataan da, tan anggapo la naani ipatey, tan anggapo la naani onnangis o dageyem, o ot-ot.’ (Apocalipsis 21:3, 4) Kasin agnapanisiaan so nipaakar ed sakey a mundo ya anggapo lay panirap? Nayarin ontan no nipasal kayo la a manbibilay ed kairapan. Anggaman ontan, isisipan na Dios so nipaakar ed kibulos ed takot tan kalamidad, tan say gagala to et seguradon nasumpal.​—Isaias 55:10, 11.

[Saray litrato ed pahina 9]

Manlapud inkaandi na ilalo anggad pakainawaan