Manalwar Sumpad Panamalikdo
Manalwar Sumpad Panamalikdo
“Manasikaso kayo ta ompan wala so manggawa na deral ed sikayo lapu ed . . . andi-kakanaan a panamalingo.”—COLOSAS 2:8.
1-3. (a) Antoran alimbawa so mangipatnag a kinmasmak la so panamalikdo ed amin lawarin aspekto na inagew-agew a panagbilay? (b) Akin ya agtayo nepeg a nasurprisa ed panamalikdo na mundo?
“PIGARA ed sikayo so agnin balot awalaan na kliyente a nantila ed sikayo?” Pigay taon lay apalabas, nansurbi so sakey a propesor ed ley diad impangitepet to ed satan. Say ebat? Oniay insalaysay to: “Diad nilibo iran abogado, saksakey so agni awalaan na kliyente a nantila ed sikato.” Say rason? “Kagapogapo ni labat na abogado ya angiyaplika ed propesyon to dia ed sakey a baleg a kompanya tan anggapo ni so akatongtong ton kliyente.” Sayan eksperiensya so mangiyiilustra ed makapaermen a katuaan—say panagtila tan panamalikdo so kaslakan ed mundo natan.
2 Say panamalikdo so walaan na nanduruman nengneng tan kinmasmak itan ed amin lawarin aspekto na modernon kabibilay. Saray balita na media so walaan na dakerakel ya alimbawa, singa bilang et saray politiko a mangibuburi ed saray ginawa ra, saray accountant tan abogado ya alablabas ya angipabitar ed kantidad na ganansya na korporasyon, saray managpatalastas a mamapalikdo ed saray managsaliw, saray nikakaso a nansaol ed saray kompanya na insurance. Insan wadtan met iray panagpalikdo na relihyon. Papalikdoen na saray klero so karaklan a totoo diad pangibabangat da na palso iran doktrina, a singa say imortalidad na kamarerwa, impiernon-apoy, tan say Trinidad.—2 Timoteo 4:3, 4.
3 Nepeg tayo kasin nasurprisa ed amin na sayan panamalikdo? Andi. Nipaakar ed “saray kaunoran ya agew,” oniay impasakbay na Biblia: “Saray totoo a mauges tan saray managsaol onuges lara’n onuges, a managsaol ira, tan nasaol ira met a dili.” (2 Timoteo 3:1, 13) Bilang Kristiano, nakaukolan a manalerto itayo ed saray makapalikdon ideya a mangikasipa ed sikatayo manlapud katuaan. Walay duaran tepet ya onlesa: Akin a kasmak natan so panamalikdo, tan panon tayon makapanalwar sumpad pakapalikdo?
Akin a Kasmak a Tuloy Natan so Panamalikdo?
4. Panon ya isasalaysay na Biblia no akin a kasmak so panamalikdo ed sayan mundo?
4 Malinew ya isasalaysay na Biblia no akin a kasmak so panamalikdo ed sayan mundo. Insulat nen apostol Juan a “say sankamundoan mandukdukol ed kaugsan.” (1 Juan 5:19) Say manggagawa ed satan a kaugsan et si Satanas a Diablo. Nipaakar ed sikato, oniay inkuan nen Jesus: “Sikayo kien kayo na ama yo a diablo, et saray kalikaliktan nen ama yo sikato so labay yo a gawaen. Sikato so akapatey nanlapu ed gapo, tan agtinmalindeg ed katuaan, ta anggapo ed sikato so katuaan. Bangno mansalita na tila, mansalita nipaakar ed kayarian to, ta sikato matila, tan ama na tila.” Kasin pankelawan ni no akin ya ipapatnag na sayan mundo so espiritu, ugali, tan makapalikdon walna na manuuley ed satan?—Juan 8:44; 14:30; Efeso 2:1-3.
5. Diad sayan panaon na anggaan, panon a mas laloy pamapalikdo nen Satanas, tan siopa so nagkalalon pupuntiryaen to?
5 Diad sayan panaon na anggaan, mas laloy pansasagpot nen Satanas. Sikato so nibasileng diad dalin. Amta to ya antikey lay panaon to, kanian sikato so walaan na “baleg a sanok.” Lapud sikatoy determinadon maneral ed dakerakel a totoo anggad posible, ‘titilaan to so lapag a sankamundoan.’ (Apocalipsis 12:9, 12) Si Satanas et aliwan sagpaminsan labat a mamapalikdo. Imbes, sikato so agbalot ontutundan mansasagpot a mamalikdo ed katooan. * Uusaren to so amin a makapalikdon paraan a nagawaan to—kalaktip lay panagsaol tan panagliput—pian bulagen so kanonotan na saray agmananisia tan ikasipa ira ed Dios. (2 Corinto 4:4) Sayan onsianon manamalikdo so nagkalalon determinado a mangakmon ed saramay mandadayew ed Dios dia “ed espiritu tan katuaan.” (Juan 4:24; 1 Pedro 5:8) Agbalot lilingwanan a diad tua et onia so angat nen Satanas: ‘Sarag kon pabenegen so amin manlapud Dios.’ (Job 1:9-12) Konsideraen tayo so pigara ed saray “makapalikdon taktika” nen Satanas tan no panon itayon makapanalwar ed saratan.—Efeso 6:11, Jewish New Testament.
Manalwar Sumpad Panamalikdo na Saray Apostata
6, 7. (a) Anto so nayarin ikuan na saray apostata? (b) Panon a malinew ya ipapabitar na Kasulatan no anto so getma na saray apostata?
6 Abayaglan uusaren nen Satanas iray apostata pian palikdoen iray lingkor na Dios. (Mateo 13:36-39) Saray apostata so nayarin mankuan a dadayewen da si Jehova tan panisiaan da so Biblia, balet ipupulisay da so nanengneng a kabiangan na organisasyon to. Arum ni ingen so ompapawil ed saray doktrina a makapabanday ed Dios, salanti, saray doktrina na “Babilonia a Baleg,” say sankamundoan ya empiryo na palson relihyon. (Apocalipsis 17:5; 2 Pedro 2:19-22) Diad panangipuyan na Dios, inusar na saray managsulat na Biblia so mapuersa iran salita a mangiwalwal ed saray motibo tan metodo na apostata.
7 Anto so gagala na saray apostata? Maslak et agkontento labat a mangikaindan ed pananisia a datin minoria ra a tua. Mabetbet et labay da a tangguyoren so arum a miulop ed sikara. Imbes a mananap tan manggawa ira na dilin babangatan da, panggugunaetan na dakel ya apostata a ‘tangguyoren iray binangatan [salanti, saray babangatan nen Kristo] ya ontumbok ed sikara.’ (Gawa 20:29, 30) Nipaakar ed saray palson managbangat, inyabawag nen apostol Pablo iyan maganat a pasakbay: “Manasikaso kayo ta ompan wala so manggawa na deral ed sikayo.” (Colosas 2:8) Agta satan so maneskribe ed no anto so panggugunaetan a gawaen na dakel ya apostata? Singa say manag-kidnap a mangiyaarawi ed mangamangan biktima manlapud pamilya to, bibiktimaen na saray apostata iray membro na kongregasyon a manmamatalek ed sikara, a panggugunaetan dan iyarawi ira ed pulok.
8. Antoran metodo so uusaren na saray apostata pian nadampot da so gagala ra?
8 Antoran metodo so uusaren na saray apostata pian nadampot da so kalat da? Mabetbet ya uusaren da so panagpikewet, saray balikas ya agtanton tua, tan sigpot a katilaan. Amta nen Jesus a saray patumbok to et biktimaen na saramay “mangibaga na amin a klase na mauges a katilaan sumpad” sikara. (Mateo 5:11, Today’s English Version) Aliwan tua so ibabaga na saratan a mauges a sumusumpa lapud getma ra a palikdoen so arum. Amasakbay si apostol Pedro nipaakar ed saray apostata a mangusar na saray “kunkunwarin salita,” a mangikayat na ‘panamalingo,’ tan ‘pikeweten da so Kasulatan’ nisesengeg ed dilin gagala ra. (2 Pedro 2:3, 13; 3:16) Makapaermen, tinmalona iray apostata diad ‘impangotgot da ed pananisia na arum.’—2 Timoteo 2:18.
9, 10. (a) Panon itayon makapanalwar sumpad panamalikdo na saray apostata? (b) Akin ya ag-itayo nagogonigon sano nakaukolan ya umanen iray pakatalos tayo nipaakar ed gagala na Dios?
9 Panon itayon makapanalwar sumpad panamalikdo na saray apostata? Diad italineng ed bilin na Salitay Dios, a mangibabagan: “Imanoen yo so saray makasengeg na kasiansian tan sengeg na katiroran sumpa ed bangat ya inaral yo: tan arawian yo ra.” (Roma 16:17) ‘Naarawian’ tayo ira diad pangipulisay ed saray panagkatunongan da—balanglan diad insalita, diad niyimprinta iran babasaen, odino diad Internet. Akin ya ontan so gawaen tayo? Unona, lapud ontan so pagagawa ed sikatayo na Salitay Dios, tan manmatalek tayo a peteg a nononoten nen Jehova so pankaabigan tayo.—Isaias 48:17, 18.
10 Komadua, inaro tayo so organisasyon ya angibangat ed sikatayo ed saray mablin katuaan a malinew a mangibibiig ed sikatayo manlapud Babilonia a Baleg. Ontan met, bibidbiren tayo ya aliwan naspot so pikakabat tayo nipaakar ed gagala na Dios; walaray pananguman ed pakatalos tayo diad ilalabas na saray taon. Maliket iray matoor a Kristiano a manalagar ed si Jehova parad amin na saratan a panagpino. (Uliran 4:18) Kaleganan ni, agtayo ikaindan so organisasyon a panliliketan na Dios ya usaren, lapud nanengneng tayo so malinew ya ebidensya na panamendisyon to ed satan.—Gawa 6:7; 1 Corinto 3:6.
Manalwar Sumpad Dilin-Panamalikdo
11. Akin a saray ag-ayadyarin totoo et walaan na tendensia a mamalikdo ed inkasikaran dili?
11 Saray ag-ayadyarin totoo so walaan na tendensia a mainomay ya anamoten nen Satanas, salanti, say dilin-panamalikdo. “Say puso manamalingo [ya] alabas nen saray amin a bengatla,” so kuan na Jeremias 17:9. Tan onia so insulat nen Santiago: “[Say] sinansakey a too natukso, no natangguyor tan naayat na kaibgan na laman to a dili.” (Santiago 1:14) No naayat lay puso tayo, say epekto et nayarin nasagyat itayo na makasalanan a pilalek, a magmaliw lan marakep tan aliwan mauges itan ed imaton tayo. Makapalikdo so ontan a panmoria, lapud say isuko na sakey ed kasalanan so maseguron mansumpal ed kadederal.—Roma 8:6.
12. Diad antoran paraan a nayarin napatitan itayo ed dilin-panamalikdo?
12 Mainomay itayon napatitan ed dilin-panamalikdo. Nayarin ikatunongan na manamalingon puso so sakey a seryoson depekto na personalidad odino ambelat a kasalanan. (1 Samuel 15:13-15, 20, 21) Say desperadon puso tayo so nayarin mananap na paraan pian ikatunongan so kuestionablin kondukta. Alimbawa, konsideraen so nipaakar ed panligliwaan. Arum a panligliwaan et maabig tan makapaliket. Balet, dakel ed saray iyoopresi na sayan mundo—diad pelikula tan saray programa ed telebisyon tan diad Internet—so mabanbanday tan imoral. Mainomay tayon kombinsien so inkasikatayo a sarag tayon bantayan iray mabanday a panligliwaan ya anggapoy mauges ya epekto. Arum ni ingen so mangikatunongan, “Agak met nakokonsiensia, kanian anto so mauges ed satan?” Balet saratan ya indibidual so ‘mantitila ed inkasikaran dili.’—Santiago 1:22.
13, 14. (a) Anton Makasulatan ya alimbawa so mangipanengneng a say konsiensia tayo et aglawas napanmatalkan a giya? (b) Panon itayon makapanalwar ed dilin-panamalikdo?
13 Panon itayon makapanalwar sumpad dilin-panamalikdo? Unona, nakaukolan tayon tandaan ya aglawas napanmatalkan so konsiensia na too. Konsideraen so kipapasen nen apostol Pablo. Sakbay a nagmaliw a Kristiano, pinasegsegang to iray patumbok nen Kristo. (Gawa 9:1, 2) Nayarin sikatoy agnakokonsiensia ed saman a panaon. Balet, mapatnag a lingoy inkipasalan na satan. “Sikato so ginawak ya andi am-amta, nen agak ni anisia.” (1 Timoteo 1:13) Kanian say agtayo pakakakonsiensia ed sakey a panligliwaan et agmangigarantiya a susto so kurang tayo. Say napanmatalkan a konsiensia a nipasal a maong ed Salitay Dios so maptek a giya.
14 Ta pian napaliisan tayo so dilin-panamalikdo, wala so pigaran makatulong a suhestion a tandaan tayo. Sipipikasin analisaen so inkasikayon dili. (Salmo 26:2; 2 Corinto 13:5) Say matuan pan-analisa ed inkasikayon dili so nayarin mangipamoria a nakaukolan yo so manggawa na pigaran pananguman ed punto de bista odino ed saray paraan yo. Dengelen so arum. (Santiago 1:19) Lapud say dilin-panangusisa so nayarin naapektoan na dilin opinyon yo, makabat so idengel ed saray makatunongan a salita na saray matakken a kaparan Kristiano. No naimano yo a saray desisyon odino kakikiwas yo et kuestionable ed imaton na saray makatunongan tan eksperiensyadon kapananisiaan, nayarin oniay itepet yo ed inkasikayo, ‘Kasin susto so inkipasal na konsiensiak odino papalikdoen ak na pusok?’ Maparanay a basaen so Biblia tan saray publikasyon a nibase ed Biblia. (Salmo 1:2) Say panggawa ed satan so ontulong ed sikayo a mangitunos ed kanonotan, awawey, tan liknaan yo dia ed maridios iran prinsipyo.
Manalwar Sumpad Saray Katilaan nen Satanas
15, 16. (a) Diad saray sagpot ton palikdoen itayo, antoran katilaan so uusaren nen Satanas? (b) Panon tayon napaliisan so pakapalikdo ed saratan a katilaan?
15 Uusaren nen Satanas so nanduruman katilaan diad saray sagpot ton mamalikdo ed sikatayo. Kokombinsien to itayo a say materyal a kaykayarian et mangitarok na liket tan inkapnek, anggaman mabetbet a napaneknekan ya aliwan tua itan. (Eclesiastes 5:10-12) Papanisiaen to itayo a sayan marelmeng a mundo et magnayon, anggaman wala so malinew ya ebidensya a manbibilay itayo la ed “saray kaunoran ya agew.” (2 Timoteo 3:1-5) Iyaalibansa nen Satanas so ideya ya anggapo so mauges ed pangegemtan ed imoral ya estiloy-kabibilay, anggaman saray totoon mapaglet ed liket et mabetbet a manaani na ampait iran resulta na ginawa ra. (Galacia 6:7) Panon tayon napaliisan so pakapalikdo ed saratan a katilaan?
16 Minabang ed saray ehemplo a walad Biblia. Lugan na Biblia iray manamasakbay ya alimbawa na saray indibidual ya apalikdo ed saray tila nen Satanas. Pinabli ra so materyal iran bengatla, agda inimano so panaon a pambibilayan da, odino naplag ira ed imoralidad—ya amin iratan et walaan na makapasinagem iran resulta. (Mateo 19:16-22; 24:36-42; Lucas 16:14; 1 Corinto 10:8-11) Makaaral ed saray alimbawa ed modernon panaon. Makapaermen, no maminsan et walaray Kristiano a naandi so pankaganatan da tan anisia ra a walay nasasaew dan maong a bengatla diad panlilingkor da ed Dios. Nayarin taynan da so katuaan pian gegemtanen da so bilay ya ipapasen dan maliket. Balet saratan ya indibidual so walad “andanglel iran paspasen,” lapud agmanbayag et nidunget ira ed makapuy a resulta na agmaridios a kondukta ra. (Salmo 73:18, 19) Makabat itayo no makaaral itayo ed saray lingo na arum.—Uliran 22:3.
17. Akin ya iyaalibansa nen Satanas so katilaan ya ag-itayo aaroen tan papablien nen Jehova?
17 Wala so sananey nin tila ya epektibon uusaren nen Satanas—say tila ya ag-itayo aaroen odino papablien nen Jehova. Si Satanas et nilibolibo lan taon a manaaral ed saray ag-ayadyarin totoo. Amta to ya onletey itayo lapud pakadismaya. (Uliran 24:10) Kanian, iyaalibansa to so katilaan ya ag-itayo makana ed imaton na Dios. No ‘nigeba’ itayo tan nakombinsin ag-itayo iyaansakit nen Jehova, nayarin natukso itayon onsuko. (2 Corinto 4:9) Ontan so kaliktan na baleg a Manamalikdo! Panon sirin so pakapanalwar tayo sumpad pakapalikdo ed sayan tila nen Satanas?
18. Panon so pangipapaseguro ed sikatayo na Biblia ya inaro itayo nen Jehova?
18 Dalepdepen so ibabaga na Biblia nipaakar ed panangaro ed sikatayo na Dios. Uusaren na Salitay Dios so pigaran makatenyeg ya ilustrasyon pian ipaseguron sikatayo so sinansakey ya iimanoen tan aaroen nen Jehova. Titiponen to iray lua yo diad ‘botilya’ to, a mankabaliksan ya iimanoen tan nonodnonoten to iray lua yo diad pipupuligesgesan yon mansiansian matoor. (Salmo 56:8) Amta to no sikayo so ‘nabtagan ed puso’ tan sikatoy maapit ed sikayo legan na saratan a panaon. (Salmo 34:18) Amta to so amin a detalye nipaakar ed sikayo, a pati say bilang na “saray buek na ulo yo.” (Mateo 10:29-31) Manuna ed amin, “inter [na Dios] so bogbogtong ya Anak to” parad sikayo. (Juan 3:16; Galacia 2:20) No maminsan, nayarin nairapan kayon manisia ya onaplika ed sikayon mismo itan a teksto. Balet, nepeg tayon panisiaan so imbaga nen Jehova. Labay ton manisia itayo ya aaroen to itayo aliwa labat a bilang grupo noagta bilang indibidual.
19, 20. (a) Akin ya importante a nibiig tan ipulisay so katilaan nen Satanas ya agkayo aaroen nen Jehova? (b) Panon a tinulongan na sakey ya ombiabiahen manangasikaso iray naeermenan?
19 Ibiig tan ipulisay so katilaan. No amta yon walay mantitila, nasalimbengan yoy inkasikayo manlapud pakapalikdo. Ontan met, makatulong so pakaamta a labay nen Satanas a manisia kayo ed tila to ya agkayo aaroen nen Jehova. Bilang reaksion na sakey a Kristianon bii ed sakey ya artikulo na Panag-Bantayan ya amasakbay nipaakar ed saray taktika nen Satanas, oniay inkuan to: “Agkon balot amoria ya uusaren nen Satanas iray liknaan ko pian dismayaen to ak. Sanen naamtaan ko iya, apakiwas ak a manaeg ed naliliknak.”
20 Konsideraen so eksperiensya na sakey ya ombiabiahen manangasikaso diad sakey a bansa ed Abalaten ya Amerika. Sano dalawen to iray kapananisiaan to a naeermenan, oniay mabetbet ton itetepet, ‘Manisia ka ed Trinidad?’ Say mabetbet ya ebat na sakey ya adismaya et, ‘Siempre andi,’ lapud amta ton tila itan nen Satanas. Insan itepet lamet na ombiabiahen manangasikaso, ‘Manisia ka ed impiernon-apoy?’ Say ebat to lamet et, ‘Siempre andi!’ Insan ibaga ed sikara na ombiabiahen matatken a walay sananey nin tila nen Satanas ya agtanton naiimano. Impaimano to so pahina 249, parapo 21, na libron Onapit ed si Jehova. * a mangiwawalwal ed katilaan ya ag-itayo aaroen nen Jehova bilang indibidual. Inreport na ombiabiahen manangasikaso iray positibon resulta na ontan ya itutulong ed saray adismaya pian nibiig da tan nipulisay da iyan katilaan nen Satanas.
Manalwar Kayo Sumpad Panamalikdo
21, 22. Akin ya aliwa itayon ignorante nipaakar ed makapalikdo iran taktika nen Satanas, tan anto so nepeg a determinasyon tayo?
21 Legan na unor a kabiangan na kaunoran iran agew, nailaloan a si Satanas et mantultuloy a mamawala na dakerakel a katilaan tan panamalikdo. Misalamat tayo lapud ag-itayo pinaulyan nen Jehova ya ignorante ed makapalikdo iran taktika nen Satanas. Say Biblia tan saray nibase’d-Biblia a publikasyon na “matoor tan makabat ya aripen” so mabitar ya angiwalwal ed saray mauges a metodo na Diablo. (Mateo 24:45) Pian makapanparaan, nakaukolan a naamtaan lan unona so nipaakar ed sakey a situasyon.—2 Corinto 2:11.
22 Manalwar tayo sirin sumpad saray panagkatunongan na saray apostata. Determinado itayo komon ya ompaliis ed masilib a patit na dilin-panamalikdo. Tan ibiig tan ipulisay tayo so amin a katilaan nen Satanas. Diad panggawa ed satan, naalwaran tayo so relasyon tayo ed “Dios na katuaan,” a kagula to so panamalikdo.—Salmo 31:5; Uliran 3:32.
[Saray paimano ed leksab]
^ par. 5 Nipaakar ed porma na verb a nipatalos a ‘mantitila’ diad Apocalipsis 12:9, inkuan na sakey a reperensya a satan et “mangipapabitar ed tuloytuloy a kiwas a nagmaliw lan manunan kabiangan na walna na sakey.”
^ par. 20 Impalapag na saray Tasi nen Jehova.
Kasin Natandaan Yo?
• Akin a wala so pirmin panamalikdo ed mundo natan?
• Panon itayon makapanalwar sumpad panamalikdo na saray apostata?
• Panon itayon makapanalwar sumpad tendensia na dilin-panamalikdo?
• Panon tayon napaliisan so pakapalikdo ed saray katilaan nen Satanas?
[Tepetepet Parad Panagaral]
[Litrato ed pahina 17]
Agyo papalikdoen so inkasikayo nipaakar ed saray panligliwaan
[Saray litrato ed pahina 18]
Pian makapanalwar sumpad dilin-panamalikdo, sipipikasin analisaen so inkasikayo, dengelen so arum, tan maparanay a basaen so Salitay Dios