Relihyon​—Maabig Odino Mauges ya Impluensya?

“WALA so utang a linawak ed Inkakristiano, kanian, manisia ak, a nepeg ya ontan met ed mundo a pambibilayan tayo ed masulok lan 2000 a taon.”​—Paunan-salita, Two Thousand Years​—The First Millennium: The Birth of Christianity to the Crusades.

Satan a panangabobon ed “Inkakristiano” so imbalikas na Ingles a managsulat tan brodkaster a si Melvyn Bragg. Iyaaniweng na saray salita to so liknaan na minilyon a manaayam ed dalin a walaan met na baleg ya utang a linawa tan katooran ed sakey odino arum a relihyon. Kombinsido ira a say relihyon so walaan na maabig a tuloy ya impluensya ed bilay da. Alimbawa, inkuan na sakey a managsulat a say Islam so “angisagyat na malaknab a sibilisasyon . . . [a satan so] amaaligwas ed interon mundo.”

Betang na Relihyon​—Maabig Odino Mauges?

Balet, say tinmumbok iran balikas nen Bragg so amalesa na seryoson tepet a no kasin peteg a maabig ya impluensya so relihyon ed inkalapagan. Oniay inyarum to: “Say Inkakristiano so kaukolan met a mangipaliwawa ed siak.” Parad anto a nakaukolan to so paliwawaan? “Lapu ed inkamapeget, inkarelmeng, inkaruksa tan ginagalan inka-ignorante ya apatnagan met ed ‘awaran’ na satan,” so inkuan to.

Dakel so mangibabaga a say inkamapeget, inkarelmeng, inkaruksa, tan ginagalan inka-ignorante so manitilol ed maslak a relihyon ed mundo diad interon awaran. Moriaen da a say relihyon so ompapatnag lambengat a mangugunggona ed katooan​—a diad tua et say akinpaway a kaabigan tan inkasanto na satan so napno na pansimpisimpitan tan katilaan. (Mateo 23:27, 28) “Anggapo lay kaslakan a tema ed literatura tayo noagta say relihyon et walaan na nikaduman kablian no nipaakar ed sibilisasyon,” kuan na A Rationalist Encyclopædia. “Balet ipapanengneng na saray katuaan ed awaran a satan so petepeteg a katilaan,” so intuloy na satan.

No manbasa kayo na antokaman a peryodiko natan, nanengneng yo so dakdakel ya alimbawa na saray lider na relihyon a mangipupulong na aro, kareenan, tan panangabagey balet ta mangisasagyat na pambubusolan tan manguusar ed ngaran na Dios pian pagmaliwen a lehitimo iray maruksan panlalaban da. Agpankelawan no akin a momoriaen na dakel a totoo a say relihyon et kaslakan lan makaderal ya impluensya ed bilay!

Kasin Magmaong Ni ya Anggapo lay Relihyon?

Ibabaga ni ingen na arum, a singa ed imbaga na Ingles a pilosopon si Bertrand Russell, a mas maabig no onsabi so panaon a “naandi la so amin a klase na relihyoson sisiaen.” Unong ed panmoria  ra, say pakaandi na relihyon so ultimon magnayon a solusyon ed amin a problema na katooan. Balet, lablabayen dan ibaliwala so katuaan a saraman so mangipupulisay ed relihyon et makapangisagyat na pirmin pambubusolan tan inkamapeget a singa met ed saraman so matoor a manusuporta ed satan. Oniay ipapanonot ed sikatayo na sakey ya autor nipaakar ed relihyon a si Karen Armstrong: “Anggad sankamelagan, impatnag na Holocaust a say sekularistan ideolohiya so makapatey a singa ed antokaman a relihyoson krusada.”​—The Battle for God​—Fundamentalism in Judaism, Christianity and Islam.

Kanian, peteg kasin maabig ya impluensya so relihyon, odino diad tua et satan so manunan sengegan na saray problema na katooan? Kasin say solusyon ed saratan a problema et say pamaandi ed amin a relihyon? Konsideraen so ibabaga na Biblia nipaakar ed satan diad onsublay ya artikulo. Nasurprisa ka ed ebat na satan.