Tepetepet Manlapud Saray Managbasa

Kayari na Delap, angibulos si Noe na sakey a malapati manlapud biong insan pinmawil itan a walay awit ton “bulong na olibo.” Iner so akaromogan na malapati ed bulong?

Ibabaga ed sikatayo na Biblia a “saray danudanum analonggaring ira a tuloy ed dalin; tan amin ya atatagey a palpalandey a wala ed silong na tawen ayanep ira.” (Genesis 7:19) Sanen oneekat la iray danum, si Noe so amitlon angibulos na malapati, a sakey simba so baetan. Diad komaduan pankanawnawa, pinmawil so malapati a walay awit ton “sakey a sinipi a bulong na olibo ed sangi to: kanian si Noe naamtaan to a saray danudanum inmekat la ra ya inmandi ed dalin.”​—Genesis 8:8-11.

Siempre, diad kaplesan et agnibaga no kaunongan kabayag ya adelap so partikular a parte na dalin, lapud maseguron inuman na Delubio so uhas na dalin. Anggaman kuan, nayarin abayag a niyanep na danum so maslak a rehyon kanian inaatey so dakel a kiew. Ingen, mapatnag a walaray mapaot, a saratan so akapansimit na balo iran sanga sanen inmekat iray danum.

Nipaakar ed kiew ya olibo, oniay imbaga na The New Bible Dictionary: “No binatang itan, ontubo iray balon sanga ed lamot, kanian anggad limara a balon sengeg so nayarin ombaleg. Saray nakekewet [magano lan ompatey] ya olibo so kaslakan a mansisimit ed onian paraan met.” Inkuan na The New Schaff-Herzog Encyclopedia of Religious Knowledge: “Singano agnaumas so inkapaot na satan.” Anggapoy too natan a makaamta ed saray detalye, a singa say inkaasin tan temperatura, na saray danum ed delap. Kanian, agtayo naseguro so posiblin epekto na saratan ed saray kiew ya olibo tan arum nin kakiewan.

Anggaman ontan, say balang ya olibo so agmakapambilay ed ambetel iran temperatura, a singa saramay walad ataragey a palpalandey. Saratan so kaslakan ya ombabaleg diad saray lugar a mas aleksab nen say 1,000 metro, a say promedyon temperatura et masulok a 50 degrees Fahrenheit. “Kanian,” kuan na libron The Flood Reconsidered, “nibaga nen Noe, unong ed kapkapanggetel a bulong, a naekatan la iray mas abeba a lawak.” Sanen imbulos nen Noe so malapati kayari na sakey simba, agla itan pinmawil, a mangipatnag a dakel la so kakiewan tan posiblin nadapoan na malapati.​—Genesis 8:12.