Kasin Napaabig na Pananisia so Mansasakit?
Kasin Napaabig na Pananisia so Mansasakit?
SANO mansasakit itayo, pirawat tayo so nainawaan tan onabig. Nayarin kabat mo la a diad Biblia et mabetbet a pinaabig nen Jesu-Kristo so amin a nengneng na sakit, ya intarok to so pakainawaan ed dakel a mansasakit. Panon so inyabig da? Lapud “pakapanyari na Dios,” so inkuan na Biblia. (Lucas 9:42, 43; Gawa 19:11, 12) Kanian, say masanton espiritu a nanlapud Dios so sengegan na inyabig, aliwan say pananisia lambengat na indibidual. (Gawa 28:7-9) Lapud satan et agla kinaukolan nen Jesus ed mansasakit a totoo ya ibalikas da ni so pananisia ra ed sikato ta pian napaabig ira.
Nayarin panumamengan mo: ‘Kasin anggapo la iray mamilagron panagtambal, odino kasin nagawa lamet so panagpaabig a ginawa nen Jesus? Antoy ilalo na saramay manasagmak na makapaot-ot odino agnatambal a sakit?’
Ipapaliwawa na Biblia a diad matunong a balon mundo na Dios et nagawa lamet so mamilagron panagpaabig diad pakapanyari na Dios, a singa samay ginawa nen Jesus sanen wadiad dalin. Maliket iray Tasi nen Jehova ed lugar yo a mangipaliwawa ed sika no panon tan no kapigan sumpalen na Dios so bengatlan agnagawaan na managtambal panamegley na pananisia (faith healer), salanti, say pamaandi ed amin a sakit, ontan met ed ipapatey. On, say Dios ‘akmonen to so patey ed ando lan ando.’—Isaias 25:8.