Niyaliling Iray Lingkor na Dios ed Saray​—Kiew Diad Antoran Paraan?

DIAD impanukoy na salmista ed indibidual a manliliket tan mangiyaaplika ed saray prinsipyo na Biblia ed bilay to, oniay inkuan to: “Sikato [so] mipara ed sakey a kiew a nitanem ed abay na saray ag-agus na danum, a mamapaway na bunga to no panaon to, say bulong to met agnamaga; tan antokaman a gawaen to ombuna.” (Salmo 1:1-3) Akin a matukoy itan a panangikompara?

Saray kiew so makapambilay ed loob na dakel a taon. Singa bilang, walaray kiew ya olibo diad rehyon na Mediteraneo a nibabagan makapambilay na sanlibo ya anggad duan libo a taon. Ontan met, saray kiew a baobab (kapamilya na kapes) diad sentral Aprika so makapambilay ed dakerakel a taon, tan say bristlecone pine ed California so panisiaan a makapambilay na manga 4,600 a taon. Diad katakelan, saray matakken lan kiew so mabetbet a makagunggona ed saray walad kaliberliber na saratan. Alimbawa, say sirum na ataragey a kiew so manproprotekta ed saray angkekelag, tan saray napepelag a bulong na kakiewan so mamapabuna ed dalin.

Kaslakan a saray sankatagyan a kiew ed interon mundo so ombabaleg a manaabay diad saray katakelan, a mansusuportaan iray kiew ed sakey tan sakey. Lapud mankakawelan iray lamot da, mas naresistian na pigaran nanaabay a kakiewan so maksil a dagem nen say sakey a kiew a manbukbukor diad pegley na alog. Say angkakabaleg a lamot so ontutulong met pian say sakey a kiew so makasepsep na magenap a danum tan sustansia manlapud dalin. Diad arum a kipapasen, saray lamot so ontatanek ed dalem na dalin a lalampasan na saratan so kaatagey na mismon kiew, odino onnanatnat iray lamot a papalumbasan na saratan so kalaknab na saray sanga na kiew.

Si apostol Pablo so nayarin anukoy ed sakey a kiew sanen impaliwawa to a saray Kristiano so nepeg a ‘manakar ed sikato [Kristo], a linmamot tan nipaalagey ed sikato, tan nipaletneg ed pananisia.’ (Colosas 2:6, 7) On, saray Kristiano so makapansiansia ya akatalindeg daput no sikaray malet a nilamot ed Kristo.​—1 Pedro 2:21.

Diad anto niran paraan a nayarin iyaliling iray lingkor na Dios ed saray kiew? Bueno, no panon a saray angkelag ed sakey a tanamanan so susuportaan na saray walad kaliberliber a kiew, saramay mansiasiansian maapit ed Kristianon kongregasyon et susuportaan met na saray kapananisiaan da. (Galacia 6:2) Saray matoor tan matakken lan Kristiano, a walaan na malaknab ya espiritual iran lamot, so ontutulong ed saray balon mananisia a mansiansian malet ed pananisia, anggaman nipapaarap ira ed singa maksil a dagem ya isusumpa. (Roma 1:11, 12) Saray balon Kristiano so ombulaslas diad silong na mananalimbeng a “sirum” na saray mas eksperiensyadon lingkor na Dios. (Roma 15:1) Tan amin a kabiangan na sankamundoan a Kristianon kongregasyon so nagunggonaan ed manamabiskeg ya espiritual a tagano ya itatarya na saray ‘[baleg a] kiew na inkatunong,’ salanti, saray alanaan a nakdaan.​—Isaias 61:3.

Agaylan makapaliket ya amin a lingkor na Dios so walaan na ilalon makaeksperiensya ed kasumpalan na sipan a naromog diad Isaias 65:22 a mangibabagan: “Singa saray agew na sakey a kiew ontan ira naani so saray agew na baley ko.”

[Picture Credit Line ed pahina 28]

Godo-Foto