No Panon Tayon Nipatnag so Panangaro Tayo ed Dios

SAY pamayubo na panangaro ed Dios et aliwa lambengat a diad pakapikabat ed sikato. Unong a napaneknekan na saray lingkor na Dios ed interon mundo, ombulaslas so tuan panangaro na sakey a too ed Dios legan ton naaamtaan so personalidad To, tan lalon ombiskeg itan no nakakabatan to no antoray aaroen, gugulaen, tan panlabayan tan kakaukolanen na Dios.

Si Jehova so maaron angiter ed sikatayo na Salita to, say Biblia, a pangipaparungtalan toy inkasikato. Naaralan tayo ditan no panon so inkiwas nen Jehova ed nanduruman situasyon. No panon a say sulat na sakey ya inad-aro so makapaliket a tuloy ed sikatayo, say Biblia so makapaliket met ed sikatayo legan tayon naaamtaan so niparungtal iran balon aspekto na personalidad nen Jehova.

Balet, singa naiimano tayo la no maminsan diad mapublikon ministeryo tayo, say panaral nipaakar ed Dios so aglawas mamapakiwas ed sakey a too a mangaro ed sikato. Oniay inkuan nen Jesus ed saray agmaapresyan Judio ed panaon to: “Usisaen yo so saray sulsulat, ta nonoten yo a diad sikara wala so bila’yon maando; . . . balet kabat ta kayo, ya anggapo ed inkasikayo so aroy Dios.” (Juan 5:39, 42) Arum so pigay taon lan manaaral nipaakar ed saray maaron gawa nen Jehova balet ta sikaray agtanton mangaaro ed sikato. Akin? Agda momorekdeken iray misiglaotan a katuaan nipaakar ed naaaralan da. Diad pisunian, naeeksperiensya na minilyon a masimoon a totoo ya iyaaralan tayo na Biblia a say panangaro ra ed Dios et mantutultuloy ya ombubulaslas. Akin? Lapud, singa ed ginawa tayo la, tutumboken da so alimbawa nen Asap. Diad anton paraan?

Maapresyan Mandalepdep

Determinado si Asap a bayuboan ed puso to so panangaro ed si Jehova. Oniay insulat to: “Akiunteng ak ed pusok a dili . . . Salambiten ko so saray kimkimey nen Jehova; tan nodnonoten ko so  gawam a makapakelaw nen una. Umamengen ko so amin a kimey mo, tan mandalepdep ak ed saray gawagawam.” (Salmo 77:6, 11, 12) Say panangaro ed Dios so ombulaslas ed puso na sakey a mandadalepdep ed saray paraan nen Jehova a singa ed ginawa na salmista.

Nilikud ed satan, say pannodnonot ed saray eksperiensyan nanggayagaan tayo legan itayon manlilingkor ed si Jehova so mamaelet na siglaotan tayo ed sikato. Inkuan nen apostol Pablo a sikatayo so “kakimeyan” na Dios, tan say pikakaaro a nayarin ombulaslas ed baetan na mankaiban komikimey so nikadkaduma. (1 Corinto 3:9) Sano ipatnag tayo ed salita tan kiwas ya aaroen tayo si Jehova, satan so pablien to, tan mamaliket itan ed puso to. (Uliran 27:11) Insan, sano onkekerew itayo na tulong ed si Jehova tan iwawanwan to itayo a manresolbe ed sakey a problema, amta tayo a sikatoy ontutulong ed sikatayo, tan onaralem so panangaro tayo ed sikato.

Ombulaslas so pankakaaro na duaran too legan dan ibabalikas so liknaan da ed sakey tan sakey. Mipadpara, sano ibalikas tayo ed si Jehova no akin a sikatayoy manmamatoor ed sikato, onelet so panangaro tayo ed sikato. Nipatnag tayo a nonodnonoten tayo iray salita nen Jesus: “Aroen mo si Jehova a Dios mo ed interon pusom tan ed interon kamarerwam tan ed interon nonot mo tan ed interon biskeg mo.” (Marcos 12:30, NW) Antoy nayarin gawaen tayo pian naseguro tayo a lawas tayon aaroen si Jehova ed interon puso, interon kamarerwa, interon nonot, tan interon biskeg tayo?

Aroen si Jehova ed Interon Puso Tayo

Say tutukoyen na Kasulatan et say piguratibon puso, salanti, say akindalem ya inkatoo​—saray pilalek, ugali, tan liknaan tayo. Kanian say pangaro ed si Jehova ed interon puso tayo et mankabaliksan a manunaan ed amin so pilalek tayo a napaliket so Dios. (Salmo 86:11) Nipatnag tayo a walaan itayo na ontan a panangaro no pagmaliwen tayon makapaliket ed sikato so personalidad tayo. Manbanikel itayon mangalig ed Dios diad ‘pamusol ed mauges tan ipeket ed maong.’​—Roma 12:9.

Say panangaro tayo ed Dios so mangapekta ed liknaan tayo nipaakar ed amin a bengatla. Alimbawa, nayarin naiimano tayon makapaangat odino mankaukolan na sigpot ya imano so trabaho tayo, balet kasin ditan so kawalaan na puso tayo? Andi. Lapud aaroen tayo si Jehova ed interon puso tayo, manuna ed amin et sikatayo so ministros na Dios. Ontan met, labay tayo a paliketen so atateng tayo, kapareha tayo, tan say amo tayo, balet ipapatnag tayo so interon-puso a panangaro tayo ed si Jehova diad panggegemtan ed bengatlan sankaimportantian pian sikatoy napaliket tayo. On, nepeg a sikato so sankamanunaan ed puso tayo.​—Mateo 6:24; 10:37.

Aroen si Jehova ed Interon Kamarerwa Tayo

Diad Kasulatan, say salitan “kamarerwa” so manunan ontutukoy ed interon inkatoo tayo ontan met ed bilay tayo. Kanian say pangaro  ed si Jehova ed interon kamarerwa so mankabaliksan ya usaren tayo so bilay tayo pian mangidayew ed sikato tan paneknekan a sikatoy aaroen tayo.

Siempre, nayarin walaray arum a paniinteresan tayo ed bilay, a singa say panaral a mantrabaho, pamakurang ed sakey a negosyo, odino pangasikaso ed pamilya. Balet, paneknekan tayo met so interon-kamarerwan panangaro tayo ed si Jehova diad panggawa ed saray bengatla unong ed paraan to tan diad suston pangilugar ed arum niran bengatla ed bilay tayo, a diad ontan et ‘aanapen tayo nin unona so panarian tan say inkatunong to.’ (Mateo 6:33) Say interon-kamarerwan panagdayew et mankabaliksan met na pagmaliw a maseseg. Ipatnag tayo ed si Jehova a sikatoy aaroen tayo diad maseseg a pangipulong ed mensahe na Panarian, pankomento na makapabiskeg diad saray miting, odino diad panulong ed saray Kristianon agagi tayo. Diad amin a pamaakaran, itultuloy tayon “gawaen so linawa na Dios ed interon-kamarerwa.”​—Efeso 6:6, NW.

Impatnag nen Jesus so interon-kamarerwan panangaro ed Dios diad impangiburi to ed inkasikato. Inyuna to so linawa na Dios tan komadua labat iray personal a pankaukolan to. Sikatayo so pinaseseg nen Jesus a tumboken so alimbawa to. Oniay inkuanto: “No say siopaman a too et labay toy ontumbok ed siak benegan toy dili ya inkasikato, et alaen toy krus to, tan tumboken to ak.” (Mateo 16:24, 25) Say pangiburi ed inkasikatayon dili et kabaliksan toy panggawa na dedikasyon. Kabaliksan na satan ya aaroen tayon maong so Dios a pauuleyan itayo ed sikato, a singa samay sakey ya Israelita ed panaon na Biblia ya angaron maong ed katawan to tan inobliga toy inkasikato a magmaliw ya aripen to lawas. (Deuteronomio 15:16, 17) Say pangidedika tayo na bilay tayo ed si Jehova et sakey a mabiskeg a paneknek a sikatoy aaroen tayo.

Aroen si Jehova ed Interon Nonot Tayo

Say pangaro ed si Jehova ed interon nonot tayo et kabaliksan ton gawaen tayo so amin a nayarian tayo pian talosan so personalidad, saray gagala, tan saray kakaukolanen nen Jehova. (Juan 17:3; Gawa 17:11) Ipatnag tayo ya aaroen tayo si Jehova diad pangusar ed amin ya abilidad tayon mannonot pian tulongan so arum a mangaro met ed si Jehova tan diad pamaaligwas ed dunong tayo ed panagbangat. Oniay impaseseg nen apostol Pedro: “Balkesan yo so saray banel na kanonotan yo.” (1 Pedro 1:13) Pambanikelan tayo met ya ipatnag so interes ed arum, nagkalalo la ed saray kapara tayon lingkor na Dios. Amtaen tayo iray kipapasen da tan imanoen sano matukoy so komendasyon odino nakaukolan da so ligliwa.

Ipapatnag tayo ed si Jehova a sikatoy aaroen tayo ed interon nonot tayo diad pangipasakop ed kanonotan tayo ed sikato. Panggunaetan tayon moriaen iray bengatla unong ed paraan to, a sikatoy nodnonoten sano mandedesisyon itayo, tan manmatalek a sankaabigan so paraan to. (Uliran 3:5, 6; Isaias 55:9; Filipos 2:3-7) Balet legan tayon itutultuloy ya ipapatnag so panangaro tayo ed Dios, panon tayon nausar so biskeg tayo?

Aroen si Jehova ed Interon Biskeg Tayo

Dakel a kalangweran diad Kristianon kongregasyon so manguusar ed biskeg da pian idayew si Jehova. (Uliran 20:29; Eclesiastes 12:1) Say sakey a paraan pian nipanengneng na dakel a kalangweran a Kristiano ya aaroen da si Jehova ed interon biskeg da et diad pibiang da ed panagpayunir, say sigpot-panaon a ministeryo. Dakel a kainaan so mibibiang ed sayan ministeryo legan a maneeskuela so ananak da. Saray matoor a mamatatken a manggagawa na panagpastol nilikud ed pangaasikaso ra ed pankaabigan na dilin pamilya ra so mangipapatnag ya aaroen da si Jehova ed interon biskeg da. (2 Corinto 12:15) Si Jehova so mangiiter na pakayari ed saraman so maniilalo ed sikato, ta pian nipatnag da so panangaro ra diad pandayew ed sikato, ya uusaren da so amin a biskeg da.​—Isaias 40:29; Hebreos 6:11, 12.

Ombulaslas so panangaro no nabayuboan itan a susto. Sirin, mantultuloy tayon ipanaon so pandalepdep. Nodnonoten tayo iray ginawa la nen Jehova parad sikatayo tan no akin a sikatoy makanepegan na debosyon tayo. Bilang ag-ayadyarin kapolian nen Adan, ag-itayon balot makanepegan ed ‘saray intadia na Dios ed saray mangaaro ed sikato,’ balet nayarian tayon ipatnag ya aaroen tayo si Jehova ed interon bilay tayo. Itultuloy tayo komon a gawaen so ontan!​—1 Corinto 2:9.

[Litrato ed pahina 20]

Ipatnag tayo so panangaro ed Dios diad panamegley na saray kiwas