Onaaligwas so Tuan Inkakristiano
Onaaligwas so Tuan Inkakristiano
SAY ministeryo nen Jesu-Kristo so walaan na mabiskeg ya epekto ed mundo nen inmunan siglo. Makapabiskeg, makaibangat, tan makapasagyat so mensahe to kanian pankelkelawan itan na totoo. Dakel ed saramay akadngel ed paliwawa to so pirmin nandinayew ed saray salita to.—Mateo 7:28, 29.
Si Jesus so makpel ya angipulisay ed saray agmakatunongan a sistema na iglesia tan politika ed saman a panaon balet ginawa toy inkasikaton mainomay ya asinggeran na ordinaryon totoo. (Mateo 11:25-30) Sikatoy matuan amidbir ed malaknab ya impluensya na marelmeng ya espiritu diad dalin tan impanengneng to ed sikara so pakapanyari a nanlapud Dios. (Mateo 4:2-11, 24; Juan 14:30) Si Jesus so malinew ya angipaliwawa ed manunan siglaotan na paniirap tan kasalanan, tan maaron impabitar to a say Panarian na Dios so magnayon a solusyon. (Marcos 2:1-12; Lucas 11:2, 17-23) Aminpinsan et inekal to so kabilungetan ya abayag ya anakbong ed tuan personalidad na Ama to, ya imparungtal to so ngaran na Dios ed amin ya interesadon totoo a nawalaan na personal a relasyon ed Sikato.—Juan 17:6, 26.
Agpankelawan sirin ya anggaman ed pirmin panamasegsegang na relihyon tan politika, saray babangatan nen Jesus so maples ya angikayat ed mapuersan mensahe to. Diad loob lambengat na 30 a taon et aporma iray aktibon Kristianon kongregasyon diad Aprika, Asia, tan Europa. (Colosas 1:23) Saray simplin katuaan ya imbangat nen Jesus so nanliwawa ed kapusoan na saray mapaabeba tan maptek-impanpuso a totoo ed interon Empiryo na Roma.—Efeso 1:17, 18.
Balet, panon irayan amin a balon babangatan a nandurumay kipapasen da ed panagbilay, kultura, pansasalita, tan relihyoson abenegan so peteg a makapankakasakey ed “sakey a pananisia,” unong ya impanawag ed satan nen apostol Pablo? (Efeso 4:5) Anto so mamasiansia ed sikara a ‘mansalitay saksakey a bengatla’ pian ag-ira naapag-apag? (1 Corinto 1:10) Lapu ed pirmin agpankakasakey ed limog na saray mankuan a Kristiano natan, nepeg tayon usisaen so imbangat a mismo nen Jesus.
Say Basiyan ed Tuan Pankakasakey na Saray Kristiano
Sanen uusayen nen Poncio Pilato, impakabat nen Jesus so basiyan ed tuan pankakasakey na saray Kristiano. Oniay inkuan to: “Nisengeg ed saya nianak ak tan nisengeg ed saya linma ak dia ed mundo, pian tasian ko so katuaan. Balang sakey a kayarian na katuaan dengelen to so boses ko.” (Juan 18:37) Sirin, say pangawat ed saray bangat nen Jesus ontan met ed saray kabiangan na impuyan a Salitay Dios, say Biblia, so walaan na mabiskeg ya impluensya ed pankakasakey na saray tuan babangatan nen Kristo.—1 Corinto 4:6; 2 Timoteo 3:16, 17.
Siempre, nayarin walaray masimoon a tepet odino agpakapantatalosan no maminsan na saray babangatan nen Jesus. Antoy tinmulong ed sikara? Oniay insalaysay nen Jesus: “Sano onsabi espiritu na katuaan, itonton to kayo ed amin a katuaan, ta agmansalita na manlapu ed inkasikato, noag say dinanman a narengel to, saraya so salitaen to: et ipaliwawa to ed sikayo so bengatlan onsabi.” (Juan 16:12, 13) Kanian, say masanton espiritu na Dios so tinmulong ed saray tuan babangatan nen Jesus a makatalos ed katuaan unong a satan so kalkalnan imparungtal na Dios. Satan met ya espiritu so mamapawala na saray bunga, a singa say aro, liket, tan deen, a bilang resulta et niwala so pankakasakey ed limog da.—Gawa 15:28; Galacia 5:22, 23.
Ag-inabuloyan nen Jesus a nabuyak odino naapag-apag iray babangatan to; nisay inabuloyan to iran mangipatalos lamet ed saray katuaan ed Biblia pian iyadapta iratan ed kultura odino relihyoso iran tradisyon na saramay nakatongtong da. Imbes, diad samay unor lan labi a sikaray kaiba to, oniay masimoon ya impikasi to: “Aliwan saraya labat so pikasik, noag saraman met so manisia ed siak ed panamegley na salita ra; pian saksakey iran amin salanti singa sika, Ama, wala ka ed siak, tan siak ed sika, pian wala ra met ed sikata, pian say mundo manisia ya imbaki mo ak.” (Juan 17:20, 21) Sirin, say tuan pankakasakey ed espiritu tan katuaan so pakabidbiran ed saray babangatan nen Kristo nanlapula’d gapo ya anggad panaon tayo. (Juan 4:23, 24) Bangbalet, saray mankuan a Kristiano natan so aliwan nankakasakey, noagta naapag-apag. Akin ya ontan?
No Akin a Naapag-apag Iray Mankuan a Kristiano
Say prangkan ebat no akin a nanduruma so sisisiaen tan ag-agamil ed limog na saray mankuan a Kristiano natan et lapud agda tutumboken iray bangat nen Jesus. Oniay inkomento na sakey a managsulat: “Singa nensaman, saray balon Kristiano natan so mangaawat labat ed saray teksto ed Biblia a matukoy ed saray pankaukolan da—tan ibabaliwala ra so antokaman a tekston agmitunosan ed abangonan da iran relihyoson tradisyon.” Ontan a mismo so impasakbay nen Jesus tan saray apostol to a nagawa.
Singa bilang, si apostol Pablo so apuyanan a mansulat ed kapara ton manangasikaso a si Timoteo: “Onsabi so panaon ya agda nitepel so maabig a bangat; noag ingen dia ed kiwala na gatel ed laman da mantipon ira ed saray managbangat ed sikara; unong ed saray dilin kaalakan na laman da. Et itaynan da so saray pandengel da ed tua, tan sikara so pandengel da ed saray labilabir.” Kasin napalikdo so amin a Kristiano? Andi. Oniay intuloy nen Pablo: “Ingen sika manpaga ka ed saray ami-amin a bengatla, mantepel ka ed saray irirap, gawam so gawa na ebanghelista, sumpal mo so ministeryom.” (2 Timoteo 4:3-5; Lucas 21:8; Gawa 20:29, 30; 2 Pedro 2:1-3) Satan ya apuyanan a simbawa so inyaplika di Timoteo tan arum nin matoor a Kristiano diad bilay da.
Nankakasakey Iray Tuan Kristiano ya Anggad Natan
Singa si Timoteo, saray tuan Kristiano natan so mansiasiansian makabat diad pangipupulisay da ed panagkatunongan na too tan diad pangaawat da lambengat ed Kasulatan ya angibasiyan ed doktrinan sisisiaen da. (Colosas 2:8; 1 Juan 4:1) Bilang pangaalig ed saray Kristiano nen inmunan-siglo, susumpalen na saray Tasi nen Jehova so ministeryo ra diad masulok a 230 a daldalin, ya ipapasabi ra ed totoo ed amin a pasen so orihinal a mensahe nen Jesus, say maong a balita na Panarian. Konsideraen so apatiran importantin paraan a sikaray nankakasakey a mangaalig ed si Jesus tan mangaagamil na tuan Inkakristiano inerman so panaayaman da.
Saray sisiaen da so nibase ed Salitay Dios. (Juan 17:17) Oniay insulat na sakey a pari na parokya diad Belgium nipaakar ed sikara: “Say sakey a bengatlan naaralan tayo ed sikara [saray Tasi nen Jehova] et say inkamabulos dan ontalineng ed Salitay Dios tan say inkakpel dan mantasi nipaakar ed satan.”
Maniilalo ira a say Panarian na Dios so solusyon ed saray problema ed sankamundoan. (Lucas 8:1) Diad Barranquilla, Colombia, akitongtong so sakey a Tasi ed si Antonio, sakey ya aktibon mananuporta ed mapolitikan pakurang. Say Tasi so ag-akidapag ed sikato, nisay intandoro to so arum nin mapolitikan ideolohiya. Imbes, inyopresi to so libren panangiyaral na Biblia ed si Antonio tan ed saray agagi ton bibii. Ag-abayag et amoria nen Antonio a say Panarian na Dios so peteg a mogmon ilalo na saray mairap-bilay a totoo ed Colombia tan diad arum niran bansa.
Sikaray mangigagalang ed ngaran na Dios. (Mateo 6:9) Sanen saray Tasi nen Jehova so primeron akapitongtong ed si Maria, sakey a debosyonadon Katoliko a taga-Australia, inabuloyan to iray Tasi ya ipanengneng da ed sikato so ngaran na Dios diad Biblia. Panon so inkiwas to? “Sanen primeron anengneng ko so ngaran na Dios diad Biblia, siak so akanangis. Siak so apakiwas a tuloy a nayarian ko manaya a nakabatan tan nausar so personal a ngaran na Dios.” Intultuloy nen Maria ya inaral so Biblia, tan diad inmunan pankanawnawa ed bilay to et akabat to si Jehova bilang sakey a persona tan sikatoy awalaan na magnayon a pisisiglaotan ed sikato.
Sikaray nankakasakey lapud aro. (Juan 13:34, 35) Oniay inkomento na sakey ya editoryal ed The Ladysmith-Chemainus Chronicle, Canada: “Balanglan walaan ka na relihyoson sisiaen, odino anggapo, nepeg mon komendaan iray 4,500 a Tasi nen Jehova a nankimey ed agew tan labi diad apalabas a sakey tan kapalduan simba pian ipaalagey so 2,300-metro-kuadrado ya Assembly Hall diad Cassidy . . . Say maliket ya impanggawa ed satan ya anggapoy mansasangsangan, inkaapag-apag odino manaanap na dilin-kirayewan et sakey a tanda na tuan Inkakristiano.”
Kanian imanoen so ebidensya. Bangta saray teologo, misionaryo, tan mimimisa a kabiangan na Kakristianoan so mantutultuloy a mipupuligesgesan ed manesesgan problema a pansasangsangan ed saray simbaan da, say tuan Inkakristiano so ombubulaslas ed sankamundoan. On, susumpalen na saray tuan Kristiano so ministeryo ra a panangipulong tan panangibangat ed Salita na Dios. (Mateo 24:14; 28:19, 20) No sakey ka ed saramay ‘mansibek tan manakis’ ed makapadimla iran bengatla a nagagawa tan ed saramay nagogonigon lapud agpankakasakey na saray relihyon na Kakristianoan, pasesegen mi kan miulop ed saray Tasi nen Jehova ed nankakasakey a Kristianon panagdayew da ed alenleneg a tuan Dios, si Jehova.—Ezequiel 9:4; Isaias 2:2-4.