Tepetepet Manlapud Saray Managbasa
Tepetepet Manlapud Saray Managbasa
Lapud andian na tawir iray Levita diad kadaanan ya Israel, panon a nilako na Levitan si Janameel so sakey ya uma ed Levitan kapinsan to a si Jeremias, unong a nipabitar diad Jeremias 32:7?
Nipaakar ed saray Levita, oniay inkuan nen Jehova ed si Aaron: “Sika anggapo la so tawir mo ed dalin da, odino anggapo naani apag mo ed sikara [Israel].” (Numeros 18:20) Anggaman ontan, saray Levita so apabtangan na 48 a syudades pati saray uma a panpastolan da, a walad nanduruman pasen na Insipan a Dalin. Say baley nen Jeremias et diad Anatot, sakey ed saray syudad a nipabtang ed “saray anak nen Aaron a saserdote.”—Josue 21:13-19; Numeros 35:1-8; 1 Awaran 6:54, 60.
Nabasa tayo diad Levitico 25:32-34 a si Jehova so angiter na espesipiko iran instruksion ed saray Levita a ‘nayarian dan dondonen’ so kayarian dan dili. Mapatnag a saray pamilya na sinansakey a Levita so walaan na saray kanepegan a tawir nipaakar ed pangayarian, pangusar, tan pangilako ed saray espesipikon nabebetangan da. Siempre, kabiangan ed satan so pangilako tan panondon ed dalin. * Diad dakel ya aspekto, saray Levita so awalaan na kayarian tan angusar ed dalin diad paraan a mipara ed saray Israelita a kabiangan na arum a tribu.
Nayari pa lagin niyalis so pankayarian ed satan a dalin na Levita diad impangipatawir na pamilya. Balet, no nipaakar ed ‘pakayari a manondon,’ saray transaksion so niyabuloy labat ed baetan na saray Levita. Ontan met, ompatnag a say dalin a wala labat ed loob na saray syudad so nayari ya ilako tan dondonen, tan agnayarin ilako ‘iray uma a panagpastolan ed saray syudad da’ lapud saratan so “kayarian da a tuloy la.”—Levitico 25:32, 34.
Kanian mapatnag a say dalin a dinondon nen Jeremias ed si Janameel et samay dalin a nakayarian na arum panamegley na panondon. Nayarin satan so walad loob na syudad. Pinekderan nen Jehova a mismo a say ‘uma’ a sisingbaten et kayarian nen Janameel tan si Jeremias so walaan na kanepegan odino ‘pankatunongan a manondon.’ (Jeremias 32:6, 7) Si Jehova so angusar ed sayan transaksion diad simbolikon paraan ta pian paletan so sipan to ed saray Israelita a sikaray ompawil a mangayarian lamet ed dalin a tawir da kayari na abayag ya inkadakep ed Babilonia.—Jeremias 32:13-15.
Anggapo so pakapatnagan a si Janameel so agmakanepegan ya angayarian na dalin ed Anatot. Anggapo met so pakapatnagan a sinumlang to so ganggan nen Jehova diad impangilako to na sayan uma ed Anatot diad si Jeremias nisay inabuso nen Jeremias so kanepegan to a manondon diad impanaliw ed uma.—Jeremias 32:8-15.
[Paimano ed leksab]
^ par. 4 Nen inmunan siglo K.P., si Bernabe a Levita so angilako ed dalin a kayarian to tan indonasyon to so nanlakoan pian itulong ed saray mankaukolan a papatumbok nen Kristo diad Jerusalem. Nayarin say dalin to et walad Palestina odino Chipre. Odino nayarin sakey lambengat itan a panagponponan ya asaliw nen Bernabe diad Jerusalem.—Gawa 4:34-37.