‘Gawaen Yo so Gawa na Ebanghelisador’

“Manpaga ka ed saray ami-amin a bengatla, . . . gawam so gawa na ebanghelista.”​—2 TIMOTEO 4:5.

1. Anto so ingganggan nen Jesus ed saray patumbok to?

 NIYAABAWAG ed sankadalinan so ngaran tan saray gagala nen Jehova. Ontan so nagagawa lapud seseryosoen na saray dedikadon totoo na Dios so ingganggan nen Jesu-Kristo ed saray patumbok to sanen inkuanton: “Onla kayo . . . tan manggawa kayo na saray babangatan ed amin a nasyones, a binyagan yo ra ed ngaray Ama, tan say Anak, tan say espiritu santo. Ya ibangat yo ran mangunor na amin a bengabengatla ya ingganggan ko ed sikayo.”​—Mateo 28:19, 20.

2. Anton bilin so inawat na manangasikaso a si Timoteo, tan anto so sakey a paraan a nasumpal na saray Kristianon manangasikaso so ministeryo ra?

² Satan a ganggan et sineryoso na saray inmunan-siglon babangatan nen Jesus. Singa bilang, pinaseseg nen apostol Pablo so kapara ton Kristianon manangasikaso a si Timoteo: “Gawam so gawa na ebanghelista, sumpal mo so ministeryom.” (2 Timoteo 4:5) Natan et nagawaan na sakey a manangasikaso so ministeryo to diad pagmaliw a maseseg a manangiyabawag na Panarian, a regular a mibiang ed lawak na ministeryo. Alimbawa, say manangasikaso na Panagaral na Kongregasyon ed Libro so walaan na makapatumang a pribilehyo a mangidaulo diad panagpulong a kimey tan mangipasal ed arum. Sinumpal nen Pablo so personal a responsabilidad ton mangiyabawag ed maong a balita, tan impasal to so arum diad ministeryo.​—Gawa 20:20; 1 Corinto 9:16, 17.

 Saray Maseseg ya Ebanghelisador Nensaman

3, 4. Antoray naeksperiensya nen Felipe bilang ebanghelisador?

³ Kabkabat iray inmuunan Kristiano bilang maseseg ya ebanghelisador. Konsideraen pa so ebanghelisador a si Felipe. Sikato so sakey ed saray pinili a “pitoran lalaki a maong so dengel da, [a] napno na espiritu tan kakabatan” pian manumpal ed anggapoy nilabin panangiyutob na inagew-agew a tagano parad saray Kristianon balo a mansasalitay Griego tan Hebreo diad Jerusalem. (Gawa 6:1-6) Si Felipe so linma ed Samaria kayari na satan a nikaduman asainmin sanen nitaytayak so amin a Kristiano, nilikud ed saray apostol, lapud panamasegsegang. Inyabawag to diman so maong a balita tan sikatoy pinabiskeg na masanton espiritu a mamapaway ed saray demonyo tan mamaabig ed saray lupoy tan paralitikon totoo. Dakel a Samaritano so angawat ed mensahe na Panarian tan abautismoan ira. Sanen nadngelan itan na saray apostol ed Jerusalem, imbaki ra si Pedro tan Juan ed Samaria ta pian saray balon abautismoan a mananisia so makaawat met na masanton espiritu.​—Gawa 8:4-17.

⁴ Insan say espiritu na Dios so angiwanwan ed si Felipe a mangabet ed Etiopen eunoko diad dalan a mamaarap ed Gaza. Kayari na malinew ya impangipaliwawa nen Felipe ed propesiya nen Isaias, sayan too a “walaan na baleg a pakauley ed leksab nen Candace a reyna na saray taga-Etiopia” so anisia ed si Jesu-Kristo tan nampabautismo. (Gawa 8:26-38) Diad saginonor et si Felipe so linma ed Asdod insan dia ed Cesarea, ya “impakaba’to so ebanghelyo ed ganagana a baley” ya adalan to. (Gawa 8:39, 40) Maseguron impatnag to so maabig ya alimbawa diad impanumpal to ed kimey na sakey ya ebanghelisador!

5. Say apatiran mamarikit nen Felipe so kabkabat bilang anto?

⁵ Kayari na manga 20 a taon, si Felipe so aktibo nin siansia ed ministeryo diad Cesarea. Sanen nampundo si Pablo tan Lucas diad abung to, wala so “apatira ya anak ton mamarikit a nampropeta ra.” (Gawa 21:8-10) Mapatnag a sikaray nipasal a maong ed espiritual a paraan, maseseg ed ministeryo, tan apribilehyoan ni ingen a manpropesiya. Say inkaseseg na atateng so walaan na maabig ya epekto ed ananak natan lapud sikara so napakiwas met a magmaliw a maseseg ed panag-ebanghelyo bilang legay-bilay a kimey da.

Saray Maseseg ya Ebanghelisador Natan

6. Anton aligwas so agawaan na saray ebanghelisador nen inmunan siglo?

⁶ Diad malaknab a propesiya to a mangipapabitar ed panaon tayo tan ed panaon na anggaan, oniay inyabawag nen Jesu-Kristo: “Say ebanghelyo kaukolan a nipulong ya unona ed saray amin a nasyones.” (Marcos 13:10) Onsabi so anggaan no nipulong la so maong a balita ed “sankamundoan.” (Mateo 24:14) Diad impangiyabawag nen Pablo tan arum niran inmunan-siglon ebanghelisador ed maong a balita, dakel so nagmaliw a mananisia, tan saray kongregasyon so niletneg ed nanduruman pasen diad interon Empiryo na Roma. Saray mamatatken ya aturon manlingkor ed sarayan kongregasyon so akibiang ed panag-ebanghelyon kimey kaiba iray agagi ra tan pinalaknab da so panagpulong ed nanduruman pasen. Nantultuloy a binmulaslas tan tinmalona so salita nen Jehova ed saraman a panaon, a singa ed nagagawa natan lapud minilyon ed saray Tasi nen Jehova so manusumpal ed kimey da bilang ebanghelisador. (Gawa 19:20) Kasin kaiba kayo la ed saramay maliket a mandadayew ed si Jehova?

7. Anto so gagawaen na saray manangiyabawag na Panarian natan?

⁷ Aanamoten na dakel a manangiyabawag na Panarian natan iray pankanawnawa a napalaknab so pibibiang da ed panag-ebanghelyon kimey. Nilibo so nan-misionaryo, tan nilasus nilibo so linmoob ed sigpot-panaon a panag-ebanghelyon kimey bilang regular tan auxiliary payunir. Tan agaylan abig a kimey so nagagawaan na saray lalaki, bibii, tan ugugaw a manlilingkor bilang maseseg a manangipalapag na Panarian! On, bilang Kristianon ebanghelisador et panggagayagaan na amin a totoo nen Jehova so mayaman a panamendisyon to legan a sikaray benebenek a manlilingkor ed sikato.​—Sofonias 3:9.

8. Anton panagtatak a kimey so nagagawa la natan, tan siopa so manggagawa ed satan?

⁸ Inter na Dios ed saray alanaan a patumbok nen Jesus so responsabilidad a mangiyabawag ed maong a balita diad sankadalinan. Say ontutulong  ed sikara ed sayan panag-ebanghelyon kimey et say ondarakel ya ‘arum a karnero’ nen Kristo. (Juan 10:16) Diad mapropetikon paraan, sayan manangisalbay-bilay a kimey so niyaliling ed panagtatak ed kamolingan na saramay maningel tan mandageyem lapud saray makapadimlan nagagawa natan. Agmanbayag et naderal laray marelmeng. Kaleganan ni, agaylan pribilehyo so pangitarok na manangisalbay-bilay iran katuaan ed saray manaayam ed dalin!​—Ezequiel 9:4-6, 11.

9. Panon a natulongan iray balo ni diad ministeryo?

⁹ No abayag tayo lan mibibiang ed panag-ebanghelyon kimey, maseguron walay nagawaan tayo pian natulongan iramay balo ni diad loob na kongregasyon. No maminsan et nayarin itagar tayo ira ed ministeryo. Napaseseg iramay manlilingkor bilang mamatatken a gawaen da so anggaay nayarian da pian pabiskegen ed espiritual iray kapananisiaan da. Baleg so nagawaan na maabig a pansasagpot na saray mapaabeban manangasikaso pian natulongan so arum a magmaliw a maseseg tan mabungan ebanghelisador.​—2 Pedro 1:5-8.

Panagtasi Diad Kabkaabungan

10. Si Kristo tan saray akadkaunan patumbok to so angipatnag na anton alimbawa diad ministeryo?

¹⁰ Impatnag nen Jesu-Kristo ed saray patumbok to so alay abig ya alimbawa bilang ebanghelisador. Nipaakar ed ministeryo nen Kristo tan saray apostol to, oniay indalatdat na Salitay Dios: “[Sikato so] linma ed saray syudades tan aldeas, a nampupulong tan angiyakar na saray maong a balita na panarian na Dios, et iba to so saray labindua.” (Lucas 8:1) Komusta met iray apostol? Kayari na inkiyibung na masanton espiritu nen Pentecostes 33 K.P., “inagew-agew ed templo tan ed saray kaabungan, ag-ira tinmunda a nambabangat tan nampupulong a si Jesus et Kristo.”​—Gawa 5:42.

11. Unong ed Gawa 20:20, 21, anto so ginawa nen apostol Pablo diad ministeryo to?

¹¹ Lapud inkaseseg nen Pablo ed kimey a panag-ebanghelyo, nayarian ton ibaga ed saray Kristianon mamatatken diad Efeso ya: “Anggapo so antokaman a pakapinabangan yo a pinaulyan ko ya impaliwawa ed sikayo tan imbangat ko ed sikayo a lapag, tan dia ed saray kaabungan.” Sanen ‘nambangat si Pablo ed saray kaabungan,’ kasin say dinalaw to et saray kaabungan na saray managdayew ed si Jehova, a nanggawa na panagpastol a kimey ed saray mananisia? Andi, lapud oniay intuloy ton insalaysay: “Pinatuak ed saray Judios tan saray Griegos so pampataoli ed Dios, tan say pananisia ed Katawan tayo a Jesu-Kristo.” (Gawa 20:20, 21) Diad inkalapagan, saramay dedikado ed si Jehova so agla nakaukolan a bilinen nipaakar ed “pampataoli ed Dios, tan say pananisia ed Katawan tayo a Jesu-Kristo.” Impasal nen Pablo iray Kristianon mamatatken ed Efeso diad panagkabkaabungan a ministeryo bangta imbangat to iray agmananisia nipaakar ed panagbabawi tan pananisia. Diad impanggawa to ed satan, inalig nen Pablo so metodon inletneg nen Jesus.

12, 13. Mitunosan ed Filipos 1:7, anto so ginawa na saray totoo nen Jehova nipaakar ed kanepegan a manpulong?

¹² Nayarin sakey ya angat so panagkabkaabungan a ministeryo. Alimbawa, arum so maingongot sano ontoktok itayo ed puerta ra a tarok tayo so mensahe na Biblia. Agtayo labay a paningongoten so totoo. Ingen, say panagkabkaabungan a ministeryo et Makasulatan, tan say aro ed Dios tan kaparan totoo so mamakiwas ed sikatayo a mantasi ed onian paraan. (Marcos 12:28-31) Pian ‘nidepensa tan legal a niletneg’ so kanepegan tayon manpulong ed kabkaabungan, insegep tayo iray kaso dia ed korte, pati diad Korte Suprema na Estados Unidos. (Filipos 1:7, NW) Amin lawarin desisyon na korte et pabor ed sikatayo. Kaslakan la so onggendan a desisyon:

¹³ “Say panangibunog ed saray relihyoson tract et abayaglan paraan ed panag-ebanghelyo na saray misionaryo​—a singa kabayag la na inka-imbento na saray panag-imprintaan. Satan so epektibon paraan ya uusaren na nanduruman relihyoson grupo diad loob na dakel lan taon. Sayan nengneng na panag-ebanghelyo so malaknab ya uusaren natan na nanduruman sekta na relihyon, ya itatarok na saray managkalar da so Ebanghelyo ed nilibon kaabungan tan diad personal ya ibibisita ra et tatangguyoren da iray totoo ya ontumbok ed pananisia ra. . . . Sayan nengneng na relihyoson kimey so walaan na miparan kaimportantian diad First Amendment [ed Konstitusyon na Estados Unidos] nipaakar ed panagdayew ed loob na saray simbaan tan panagkalar ed saray pulpito.”​—Murdock v. Pennsylvania, 1943.

 Akin a Mantultuloy a Manpulong?

14. Anton aligwas so ilaloan tayo ed ministeryo tayo?

¹⁴ Dakerakel so rason no akin a manpulong ed kabkaabungan. Diad kada idalaw tayo ed onabung, panggugunaetan tayo so mangitanem na bini na Makasulatan a katuaan. Diad panagpawil, panggugunaetan tayon salogen itan. Tan onaligwas itan lapud oniay insulat nen Pablo: “Siak so angitanem, si Apolos so analog; bangbalet say Dios so amabaleg.” (1 Corinto 3:6) Kanian mantultuloy itayon ‘mantanem tan mansalog,’ a matalek itayon ‘pabalegen’ itan nen Jehova.

15, 16. Akin a maminpiga itayon ondalaw ed kaabungan na totoo?

¹⁵ Gagawaen tayo so kimey na saray ebanghelisador lapud bilay so nalalanor. Diad pampulong et niliktar tayo so inkasikatayo tan saramay ondengel ed sikatayo. (1 Timoteo 4:16) No amta tayon napepeligro la so bilay na sakey a too, paspasaray ni kasi so itulong tayo ed sikato? Andin balot! Lapud nalalanor so kilalaban, maminpiga itayon ondalaw ed kaabungan na saray totoo. Saray sirkumstansya so mantultuloy a manguman. Say sakey ya agtanton ontatalineng lapud sikatoy okupadon tuloy so nayarin mabulos lan ondengel ed mensahe na Biblia diad arum a pankanawnawa. Nayarin say mangilukas na puerta et sananey a membro na pamilya, tan satan so nayarin mangitonton ed Makasulatan a diskusyon.

¹⁶ Aliwa lambengat a saray sirkumstansya na saray onabung so nayarin manguman noagta ontan met ed awawey da. Singa bilang, say makapaot-ot ya impatey na inad-aro so nayarin mamakiwas ed sakey a too ya ondengel ed mensahe na Panarian. Pirawat tayo a naligliwa so too, a sikato so natulongan tayon magmaliw a sinononot ed espiritual a pankaukolan to, tan nipanengneng ed sikato no panon a makapnek itan.​—Mateo 5:3, 4.

17. Anto so sankamanunaan a rason no akin a manpupulong itayo?

¹⁷ Say sankamanunaan a rason no akin a manpupulong itayo ed kabkaabungan odino mibibiang ed arum niran nengneng na Kristianon ministeryo et say pilalek tayon mibiang ed pangiyabawag ed ngaran nen Jehova. (Exodo 9:16; Salmo 83:18) Agaylan makapatumang sano say panag-ebanghelyon kimey tayo et makatulong ed saray manangaro na katuaan tan inkatunong pian magmaliw ira a managdayew ed si Jehova! “Balangla so tobonbalo a lalaki, tan birhenes; mamasiken, tan saray ugugaw,” so inkanta na salmista. “Idayew da so ngaran nen Jehova; ta say ngaran to labat so masuri; say gloria to wala ed tagey na dalin tan katawenan.”​—Salmo 148:12, 13.

Nagunggonaan Itayon Mismo ed Panag-ebanghelyo

18. Panon itayon nagunggonaan a mismo ed panumpal ed panag-ebanghelyon kimey?

¹⁸ Say panggawa ed kimey na sakey ya ebanghelisador so makagunggona ed sikatayon mismo diad nanduruman paraan. Say iyakar tayo ed kabkaabungan a tarok so maong a balita so ontulong ed sikatayon makabayubo ed inkamapaabeba, nagkalautla sano ag-itayo awaten ed maabig a paraan. Pian magmaliw ya epektibon ebanghelisador, nakaukolan tayon aligen si Pablo, a ‘nagmaliw ya amin a ganagana ed amin day totoo, ta pian dia ed amin a gawa nilaban to so saray arum.’ (1 Corinto 9:19-23) Say eksperiensya tayo ed ministeryo so ontulong ed sikatayon magmaliw a mataktika. Diad panmatalek ed si Jehova tan diad pampili ed manepeg iran salita, niyaplika tayo so simbawa nen Pablo: “Say salita yo komon natekepan lawas na liga, alaokan na asin, pian nakabatan yo no panon so nepeg yo a yebat ed balang sakey.”​—Colosas 4:6.

19. Panon a tutulongan na masanton espiritu iray ebanghelisador?

¹⁹ Say panag-ebanghelyon kimey so mamakiwas met ed sikatayo a manmatalek ed masanton espiritu na Dios. (Zacarias 4:6) Bilang resulta, say bunga na satan​—salanti, say “aro, liket, deen, kasungdoan, kauyamoan, kaabigan, sisia, tayadno, dangka”​—so napatnagan ed ministeryo tayo. (Galacia 5:22, 23) Apektaen na satan so pidedeneng tayo ed totoo, lapud say pampasakop ed panangidirehi na espiritu et ontulong ed sikatayon mangagamil na aro, magmaliw a magayaga tan mareen, magmaliw a maanos tan mapangasi, a nipatnag tayo so kamaongan tan pananisia, tan nipanengneng so kaumildian tan dangka legan tayon iyaabawag so maong a balita.

20, 21. Antoray bendisyon tan gunggona ed pagmaliw tayon okupado ya ebanghelisador?

²⁰ Say sananey nin bendisyon ed sikatayo bilang  ebanghelisador et magmaliw itayon mas ma-empatya. Sano ibesngaw na totoo iray problema ra​—sakit, inkaandiay-trabaho, problema ed mismon ayaman da​—ag-itayo onaakton mananimbawa, noagta inanabang tayo ed sikara iray makapaseseg tan makaligliwan teksto. Sinononot itayo ed totoo ya abulag ed espiritual balet ompatnag a walaay aro ed inkatunong. (2 Corinto 4:4) Tan agaylan makapaliket so pakatulong ed espiritual diad saramay “wala a tinandaan ed bilay ya andi anggaan”!​—Gawa 13:48.

²¹ Say regular a pibibiang ed panag-ebanghelyon kimey so ontulong ed sikatayon mangiyapasakey ed nonot tayo ed maespiritual iran bengatla. (Lucas 11:34) Satan so maseguron makagunggona, lapud no ag-itayo akasentro ed saray maespiritual a bengatla et natukso itayon magmaliw a materyalistiko a kaslakan lan tuloy ed sayan mundo. Oniay impaseseg nen apostol Juan ed saray Kristiano: “Aleg ya aroen yo so mundo, ni saray bengatla a wala ed mundo. No siopaman a too aroen to so mundo say aro na Ama andi ed sikato. Ta amin a wala ed mundo, kilalawan na laman tan kilalawan na mata tan maapan gloria na bilay, aliwa a kien na Ama noag kien na mundo. Et say mundo mangangga, tan saray penel to: sabalet so mangunor ed linawa na Dios onsiansia lawas.” (1 Juan 2:15-17) Say pansiansian okupado bilang ebanghelisador tekep na daakan a kimey ed Katawan so ontulong ed sikatayon agmangaro ed mundo.​—1 Corinto 15:58.

Mantipon na Saray Kayamanan ed Tawen

22, 23. (a) Antoran kayamanan so titiponen na saray Kristianon ebanghelisador? (b) Panon a makatulong ed sikatayo so ontumbok ya artikulo?

²² Say maseseg a panangipulong ed Panarian so mangitarok na magnayon iran gunggona. Impabitar iya nen Jesus sanen inkuanto: “Agkayo mantipon a nipaakar ed sikayo na kaykayamanan ed tapew na dalin, a sikaray deralen na saray bokbok tan lati, tan sikaray kotkoten tan takewen dia na saray matakew. Noag say mantipon kayo a nipaakar ed sikayo na kaykaymanan ed tawen, a diman agderalen na saray bokbok tan lati, tan diman agkotkoten tan agtakewen na saray matakew. Ta no iner so kawalaay kayamanan mo, diman met so kawalaay pusom.”​—Mateo 6:19-21.

²³ Komon ta mantultuloy itayon mantipon na saray kayamanan ed tawen, a sikakabat itayo ya anggapo lay mas baleg a pribilehyo tayo nen say pangirepresenta ed Soberanon Katawan a Jehova bilang Tastasi to. (Isaias 43:10-12) Legan tayon susumpalen so ganggan ed sikatayo bilang ministros na Dios, nalikna tayo met so alikna na sakey a Kristianon bii a masulok to lan 90 años, ya oniay inkuanto nipaakar ed abayaglan panlilingkor to ed Dios: “Dia ed ami-amin et pisalamatan ko si Jehova lapud impananos to ed siak diad amin na sarayan taon, tan masimoon kon ipipikasi a sikato komon so magmaliw a maaron Amak ed andi-anggaan.” No ontan met so panamabli tayo ed relasyon tayo ed Dios, maseguron labay tayon sigpot a nagawaan so kimey na sakey ya ebanghelisador. Ontulong ed sikatayo so ontumbok ya artikulo pian namoria tayo no panon tayon sigpot a nasumpal so ministeryo tayo.

Panon Yon Ebatan?

• Akin a nepeg tayon gawaen so kimey na sakey ya ebanghelisador?

• Anto so nibaga yo nipaakar ed kimey na saray ebanghelisador nensaman tan natan?

• Akin a manpupulong itayo ed kabkaabungan?

• Panon kayon nagugunggonaan a mismo ed panggagawa ed kimey na sakey ya ebanghelisador?

[Tepetepet Parad Panagaral]

[Saray litrato ed pahina 10]

Saray ebanghelisador a singa si Felipe tan saray mamarikit to so walaan natan na saray kaparan maliket ya ebanghelisador

[Litrato ed pahina 14]

Panon kayon nagunggonaan a mismo diad panginanabang yo na maong a balita ed arum?