Sakey a Selebrasyon a Mangaapekta ed Sika

SANEN wadiad dalin si Jesu-Kristo, inletneg to so sakey a selebrasyon a mangigagalang ed Dios. Saya so alenleneg a relihyoson seremonya a direktan ingganggan to a selebraan na papatumbok to. Satan so Pangdem na Katawan, a kabkabat met bilang Unor a Pangdem.

Isipen pa a sakey kan akatasi ed saray agawgawa a nansumpal ed satan ya okasyon. Si Jesus tan saray apostol to so nantitipon ed tagey a silir ed Jerusalem pian selebraan so Judion Paskua. Asumpal la ran nandurungo parad akaugalian lan pangdem ed Paskua, a kabiangan ed satan so inkalot a kordero, ampait iran pising, andi-lebadura a tinapay, tan ambalangan alak. Pinaalis la so agmatoor ya apostol a si Judas Iscariote tan magano to lan itapat so Katawan to. (Mateo 26:17-25; Juan 13:21, 26-30) Say 11 a matoor ya apostol lambengat so kaiba nen Jesus. Si Mateo so sakey ed sikara.

Unong ed salaysay na akatasi a si Mateo, onia so impangiletneg nen Jesus ed Pangdem na Katawan: “Angalay Jesus na tinapay [ya andi-lebadura], tan benendisyonan to, tan sikatoy pinipisag to; tan inter to’d saray babangatan, inkuan to, Ala yo, kanen yo; saya sikatoy laman ko. Et angala na sakey a kopa, tan angiter na pisasalamat, tan inter to’d sikara, a kuan to, Oninum kayo ya amin ed saya. Ta sikato yay dalak ed sipan a sikatoy naibung nipaakar ed amayamay a pangekal ed saray kasalanan.”​—Mateo 26:26-28.

Akin ya inletneg nen Jesus so Pangdem na Katawan? Sanen ginawa to itan, akin ya angusar na andi-lebadura a tinapay tan ambalangan alak? Kasin amin a patumbok nen Kristo so nepeg a mangan tan oninum ed sarayan emblema? Kaunongan kabetbet so nepeg a panselebra ed sayan pangdem? Tan peteg kasin walaan itan na kabaliksan ed sika?