Sakey ya Agew a Nepeg a Nodnonoten

DIAD samay labi antis na impatey nen Jesu-Kristo, sikatoy angipasa na andi-lebadura a tinapay tan sakey a kopa na ambalangan alak ed saray apostol to tan ingganggan to ra a mangan tan oninum. Oniay imbaga to met ed sikara: “Gawa yo’ ya a pakanodnonotan ed siak.”​—Lucas 22:19.

Diad sayan taon et ompetek so anibersaryo na sayan ebento diad Simba, Abril 4, kaselek na agew. Saray Tasi nen Jehova ed sankamundoan so mantitipon diad sayan labi pian selebraan iyan okasyon a Memoryal unong ed paraan ya ingganggan nen Jesus. Sikara so malikeliket a mangiimbita ed sika ya onatendi. Ipangasin amtaen ed saray Tasi nen Jehova ed lugar yo so eksakton oras tan pasen na sayan espisyal a miting.