Say Pangdem na Katawan​—Panon Itan a Sinelebraan?

DIAD impangipaliwawa na Kristianon apostol a si Pablo nipaakar ed impanselebra na Pangdem na Katawan, oniay insulat to: “Inawat ko ed Katawan a sikayo met so inyawat ko ed sikayo, a say Katawan a Jesus dia ed saman a labi ya inkiawa’to, angala na tinapay; tan nen akapisalamat la, pinisag to, tan inkuan to, Saya sikato so laman ko, a napisag lapu ed sikayo; gawa yo so saya a pannodnonotan yo ed siak. Ontan met say kopa, nen kayari to a nangdem, kuanto, Sayan kopa sikato so Balon Sipan ed dalak; gawa yo so saya kapag no inuman yo, a pannodnonotan yo ed siak. Ta kapag no kanen yo so saya a tinapay, tan inuman yo so kopa, ipakabat yo so impatey na Katawan angga ed isabi to.”​—1 Corinto 11:23-26.

Unong ya inkuan nen Pablo, inletneg nen Jesus so Pangdem na Katawan ‘diad samay labi a si Jesus so iyawat la’ nen Judas Iscariote ed saray Judion papangulo na relihyon ya angisugsog ed saray Romano ya ipasak si Kristo. Agawa iman a pangdem diad aralem lan labi na Huebes, Marso 31, 33 K.P. Inatey si Jesus ed panamairapan a kiew diad ngarem na Biernes, Abril 1. Lapud saray agew na Judion kalendaryo so onggagapo’d labi tan manampot ed labi na ontumbok ya agew, sirin say Pangdem na Katawan tan say impatey nen Jesu-Kristo so agawa ed saksakey ya agew​—Nisan 14, 33 K.P.

Saramay mangan na tinapay tan oninum na alak so nepeg a ‘manggawa ed saya’ bilang pannodnonot ed si Jesus. Unong ed sananey a patalos, oniay inkuan nen Jesus: “Gawaen yo iya bilang pakanodnonotan ed siak.” (1 Corinto 11:24, The New Jerusalem Bible) Say Pangdem na Katawan so tatawagen met a Memoryal na impatey nen Kristo.

Akin a Selebraan so Impatey nen Jesus?

Mandependi so ebat ed no anto so inkisiglaotan na satan ya impatey. Inatey si Jesus bilang manunan manangitandoro na inkasoberano nen Jehova. Diad ontan et pinaneknekan ton matila si Satanas a mangiyaakusan manlilingkor labat so totoo ed Dios lapud sinisiblet iran motibo. (Job 2:1-5; Uliran 27:11) Diad impatey nen Jesus bilang ayadyarin too, sikato met so ‘angiter ed bilay to a panondon ed amayamay.’ (Mateo 20:28) Sanen nankasalanan ed Dios si Adan, abalang to so ayadyarin bilay to tan say ilalon pambilay ya andi-anggaan. Balet “ontan lay panangaro na Dios ed mundo [na katooan], ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggan.” (Juan 3:16) On, “say bayar  na kasalanan say patey; bangbalet say langkap ya andi-bayar na Dios say bilay ya andi-angga ed Kristo Jesus a Katawan tayo.”​—Roma 6:23.

Kanian say impatey nen Jesu-Kristo et nisiglaot ed duaran sankatalonggaringan a panangipatnag na aro​—say baleg a panangaro ya impatnag nen Jehova ed katooan diad impangiter to ed Anak to tan say dilin-masakripisyon aro ya impatnag nen Jesus ed katooan diad mabulos ya impangiyapay to ed bilay to. Say Memoryal na impatey nen Jesus so mangitatandoro ed sayan duaran panangipatnag na aro. Lapud sikatayo so makakaawat ed sayan panangaro, agta nepeg tayon ipatnag so pisasalamat tayo ed satan? Nipatnag tayo itan diad iyatendi tayo ed panselebra na Pangdem na Katawan.

Say Kabaliksan na Tinapay tan Alak

Sanen inletneg nen Jesus so Pangdem na Katawan, inusar to so tinapay tan kopa na ambalangan alak bilang emblema, odino simbolo. Angala si Jesus na tinapay, tan “nen akapisalamat la, pinisag to, tan inkuanto, Saya [a tinapay] sikato so laman ko, a napisag lapu ed sikayo.” (1 Corinto 11:24) Kaukolan a pisagen so tinapay pian niyutob tan naakan lapud medyo masalangsang itan a gawa ed arina tan danum ya andian na lebadura, odino pampaalsa. Diad Kasulatan, say lebadura so mangisisimbolo ed kasalanan. (Mateo 16:11, 12; 1 Corinto 5:6, 7) Aliwan makasalanan si Jesus. Kanian kinmana so ayadyarin laman to bilang matukoy a bagat a panondon ed katooan. (1 Juan 2:1, 2) Agaylan matukoy a say tinapay ya inusar a mangirepresenta ed andiay-kasalanan a laman nen Kristo et andi-lebadura!

Akisalamat met si Jesus parad kopa na puron ambalangan alak tan inkuan to: “Sayan kopa sikato so balon sipan ed dalak.” (1 Corinto 11:25) Say ambalangan alak a walad kopa so mangirerepresenta ed dala nen Jesus. No panon ya apaletan so Ganggan na sipanan ed baetan na Dios tan say nasyon na Israel nen 1513 K.K.P. panamegley na dala na saray imbagat a baka tan kanding, say balon sipanan so apaletan met panamegley na niyibung a dala nen Jesus diad impatey to.

Siopara so Nepeg a Mangan tan Oninum?

Pian nabidbir no sioparay manepeg a mangan tan oninum ed saray emblema na Memoryal, nepeg tayon talosan no anto so nalalanor ed balon sipanan tan no sioparay kabiangan ed satan. Oniay ibabaga na Biblia: “Nia, saray agew onsabi ra, kuan nen Jehova, a siak manggawa ak naani na sakey a balo a sipan ed abung na Israel, tan ed abung na Juda . . . Iyan ko naani tunong ko ed saray akindalem a kabiangan da, tan dia ed puso ra sikato so isulat ko naani; et siak naani Dios da, et sikara naani baley ko. . . . Perdonaen ko naani inkauges da, tan agko la naani nonoten so kasalanan da.”​—Jeremias 31:31-34.

Magmaliw a posible so nikadkaduman relasyon ed si Jehova a Dios panamegley na balon sipanan. Lapud sayan sipanan, wala so sakey a grupo na saray indibidual a magmaliw a totoo to tan sikato so magmaliw a Dios da. Say ganggan nen Jehova so nisulat ed akindalem a kabiangan da, salanti, diad puso ra, tan anggan saramay aliwan Judio ya ag-agalsiman ed pisikal so nayarin magmaliw a kabiangan na balon sipanan a pisisiglaotan ed Dios. (Roma 2:29) Sinaglawi na managsulat na Biblia a si Lucas so nipaakar ed gagala na Dios a ‘mangala ed saray Gentiles na saray totoo a nipaakar ed ngaran To.’ (Gawa 15:14) Unong ed 1 Pedro 2:10, “dia ed saray apalabas a panaon aliwa [ra] nensaman a baley, natan balet baley [ira] na Dios.” Sikara so tutukoyen na Kasulatan bilang “Israel na Dios,” salanti, espiritual ya Israel. (Galacia 6:16; 2 Corinto 1:21) Sirin say balon sipanan et diad baetan nen Jehova a Dios tan espiritual ya Israel.

Diad unor lan labi a kaiba to iray babangatan to, si Jesus a mismo so nanggawa met na sananey  nin pisisipanan ed sikara. “Misipanan ak ed sikayo,” so inkuan to ed sikara, “no panon a say Amak so akisipanan ed siak, parad sakey a panarian.” (Lucas 22:29) Saya so sipanan a parad Panarian. Say bilang na ag-ayadyarin totoo a nagmaliw a kabiangan ed sipanan parad Panarian et 144,000. Kayarin sikaray napaoli ed tawen, sikara so manuley a kaiba nen Kristo bilang arari tan saserdote. (Apocalipsis 5:9, 10; 14:1-4) Kanian, saramay walad balon pisisipanan ed si Jehova a Dios so wala met ed pisisipanan ed si Jesu-Kristo parad Panarian. Sikara lambengat so makanepegan a mangan tan oninum ed saray emblema ed Pangdem na Katawan.

Panon a naseguro na saramay makanepegan a mangan tan oninum ed saray emblema ed Memoryal a walaan ira na nikadkaduman relasyon ed Dios tan kaiba ira nen Kristo a mananawir? Oniay impaliwawa nen Pablo: “Say dilin [masanton] espiritu so mamatua ed espiritu [awawey na kanonotan] tayo, ya anak itayo na Dios: Tan no anak itayo, tomatawir itayo met; tomatawir na Dios, tan mitatawir ed Kristo; a no ontan a mantepel itayo pati sikato, pian iba to itayo a nigloria.”​—Roma 8:16, 17.

Diad panamegley na masanton espiritu, odino aktibon puersa to, nilanaan na Dios iray kaiba nen Kristo a mananawir. Saya so mangipaseguro ed sikara a mananawir ira ed Panarian. Satan so mangipalikna ed saray alanaan a Kristiano a walaan ira na mangatatawen ya ilalo. Moriaen da ya onaplika ed sikaran mismo so amin ya ibabaga na Biblia nipaakar ed mangatatawen a bilay. Sakey ni, sikaray mabulos a mangisakripisyo ed amin a bengatlan misiglaotan ed mangaraldalin a bilay, a pati say pambilay diad dalin tan amin a pirerelasyonan ed too. Anggaman bibidbiren na saray Kristianon alanaan na espiritu ya alay abig so bilay diad mangaraldalin a Paraiso, aliwan satan so iilaloan da. (Lucas 23:43) Bilang resulta na ikukurang na masanton espiritu na Dios ed sikara, ya aliwan lapud saray lingon relihyoson panmoria, walaan ira na agnauman a mangatatawen ya ilalo tan sirin et makanepegan ira a mangan tan oninum ed saray emblema ed Memoryal.

Ipasen pa a manduaruwa so sakey a too no kasin sikatoy kabiangan ed balon sipanan tan ed sipanan parad Panarian. Panon to no sikatoy andian na panamatua na espiritu na Dios a sikatoy kaiba nen Kristo a mananawir? Agnayari sirin a sikato so mangan tan oninum ed saray emblema ed Memoryal. On, agnapaliket so Dios no sigagagalan irepresenta na sakey so inkasikato bilang say tatawagen a mangatatawen ya ari tan saserdote sano sikatoy peteg ya andian na ontan a tawag.​—Roma 9:16; Apocalipsis 22:5.

Kaunongan Kabetbet so Nepeg a Panselebra ed Satan?

Kasin sinimba odino inagew-agew so nepeg a panselebra ed impatey nen Jesus? Bueno, si Kristo so angiletneg ed Pangdem na Katawan tan sikatoy agmakatunongan a pinatey diad Agew na Paskua. Say Paskua a maminsan labat a nagagawa ed sakey taon, diad Nisan 14, so mangipapanonot ed inkiliktar na Israel manlapud panangaripen ed Ehipto. (Exodo 12:6, 14; Levitico 23:5) Kanian say impatey nen ‘Kristo a paskua tayo’ so nepeg a maminsan labat a selebraan ed kada taon, aliwan sinimba odino inagew-agew. (1 Corinto 5:7) Diad panseselebra ra ed Pangdem na Katawan, tutumboken na saray Kristiano so parehon paraan a singa ginawa nen Jesus sanen inletneg to itan.

Anto sirin so kabaliksan na saray salita nen Pablo a: “Kapag no kanen yo so saya a tinapay, tan inuman yo so kopa, ipakabat yo so impatey na Katawan angga ed isabi to”? (1 Corinto 11:26) Diad sayan teksto et inusar nen Pablo so salitan mankabaliksan na “bektaman,” odino “kapiganman.” Kanian, labay ton ibaga a kapiganman a mangan tan oninum iray alanaan a Kristiano ed  saray emblema, iyabawag da so pananisia ra ed dondon bagat nen Jesus.

Saray alanaan a Kristiano so manselebra ed impatey nen Kristo “angga ed isabi to.” Saya so mantultuloy a selebraan angga ed isabi nen Jesus a mangawat ed saray alanaan a papatumbok to ed tawen diad kioli ra ed espiritun bilay legan na “isasabi” odino kiwawala to. (1 Tesalonica 4:14-17) Mitunosan iya ed saray imbalikas nen Kristo ed 11 a matoor ya apostol to: “Onla ak tan mangiparaan ak na pasen yo onkana’d sikayo, onla ak dia lamet, tan awaten ta kayo ed inkasiak, pian no iner so kawalaan ko, diman makapanayam kayo met.”​—Juan 14:3.

Anto so Kabaliksan na Satan ed Sika?

Kasin nakaukolan ni so mangan tan oninum ed saray emblema ed Memoryal ta pian nagunggonaan ed bagat nen Jesus tan naawat so andi-anggaan a bilay diad dalin? Andi. Anggapoy pakapatnagan ed Biblia a sano apaoli la ed dalin iray matakot ed Dios a totoo a singa di Noe, Abraham, Sara, Isaac, Rebeca, Jose, Moises, tan David et mangan tan oninum ira ed saratan ya emblema. Ingen, sikara tan saray arum nin manpipilalek ed maandon bilay diad dalin so nepeg a mangagamil na pananisia ed Dios tan Kristo tan ed probisyon nen Jehova a dondon bagat nen Jesus. (Juan 3:36; 14:1) Pian nagamoran mo so andi-anggaan a bilay, nepeg mo met ya agamilen so ontan a pananisia. Say kiwawalam diad tinaon a panselebra ed impatey nen Kristo so mangipanonot ed sika ed satan a baleg ya impansakripisyo tan nepeg a mamaaralem na pisasalamat mo ed satan.

Indanet nen apostol Juan so kaimportantian na bagat nen Jesus sanen inkuanto: “Sarayan bengatla isulat ko ed sikayo [saray kapara ton alanaan] pian agkayo mankasalanan. Tan no wala so toon mankasalanan, wala so apireng tayo ya onarap ed Ama, si Jesu-Kristo a matunong; tan sikato so manamaandi kasalanan tayo, tan aliwa lambengat ed saray kasalanan tayo, noag met kasalanan na lapag a mundo.” (1 Juan 2:1, 2) Nayarin ibaga na saray alanaan a say bagat nen Jesus et sakey a pipupulangan a manakbong ed saray kasalanan da. Balet satan met so bagat a parad saray kasalanan na interon mundo, pian saray matulok a katooan so nawalaan na bilay ya andi-anggaan!

Kasin presente ka no Abril 4, 2004, pian selebraan so impatey nen Jesus? Saya so selebraan ed sankamundoan na saray Tasi nen Jehova diad saray pasen a pantitiponan da. No onatendi ka, nagunggonaan ka ed pandengel ed sakey ya importantin tuloy a paliwawa a nibase ed Biblia. Nipanonot ed sika ya agaylan kabaleg so ginawa nen Jehova a Dios tan si Jesu-Kristo parad sikatayo. Makagunggona met ed espiritual so pitipon ed saraman so walaan na aralem a respeto ed Dios tan ed Kristo tan ed dondon bagat nen Jesus. Sayan okasyon so mamaaralem a maong ed pilalek mon makaawat ed agkanepegan a panangasi na Dios, a mangitonton ed bilay ya andi-anggaan. Ag-aabuloyan a walay mamuger ed sika. Onla ka ed sayan makapaliket a selebrasyon a mangigagalang tan mamapaliket ed mangatatawen ya Ama tayo, si Jehova a Dios.

[Litrato ed pahina 5]

Say impatey nen Jesus so nisiglaot ed duaran sankatalonggaringan a panangipatnag na aro

[Litrato ed pahina 6]

Say andi-lebadura a tinapay tan say alak so matukoy iran simbolo na andiay-kasalanan a laman nen Jesus tan say nipaagus a dala to